Padayon sa Pagpaabot nga Maikagon Uban ang Paglahutay

Unsa ka dugay na kang naghulat sa pag-abot sa Gingharian sa Diyos? Mapailobon ba kang milahutay bisan pa sa kalisdanan? (Rom 8:25) Ang ubang Kristohanon nag-atubang ug pagdumot, pagmaltratar, pagkapriso, ug gihulga pa gani nga patyon. Ug daghan sab ang nag-antos sa grabeng sakit o katigulangon.

Unsay makatabang nato sa pagpaabot nga mahinamon bisan pa sa mga pagsulay? Kinahanglang palig-onon nato ang atong pagtuo pinaagi sa pagbasa sa Bibliya kada adlaw ug pagpamalandong sa atong nabasa. Angay tang magpokus sa atong paglaom. (2Co 4:16-18; Heb 12:2) Kinahanglang mangamuyo ta kang Jehova ug hangyoon siya nga hatagan tag kusog pinaagi sa iyang balaang espiritu. (Luc 11:10, 13; Heb 5:7) Ang atong mahigugmaong Amahan makatabang nato sa paglahutay nga mapailobon ug malipayon.​—Col 1:11.

TAN-AWA ANG VIDEO NGA KINAHANGLANG MOLAHUTAY TA SA PAGDAGAN​—MAGMASALIGON NGA MADAWAT ANG GANTI, UG TUBAGA ANG MOSUNOD NGA MGA PANGUTANA:

• 

  Unsang mga “wala damhang panghitabo” ang posibleng motungha sa kinabuhi? (Ecc 9:11)

• 

  Dihang may pagsulay, nganong makatabang ang pag-ampo?

• 

  Kon dili na nato mahimo ang ubang buluhaton sa pag-alagad, nganong angay tang magpokus sa puwede pa natong mahimo?

• 

  Unsay nakatabang nimo nga padayong molaom sa ganti?