Panalipdi ang Inyong Kaminyoon

Seryoso kaayo para kang Jehova ang panaad sa kaminyoon. Siya miingon nga ang bana ug asawa kinahanglang magmaunongon sa usag usa. (Mat 19:5, 6) Daghag maayong ehemplo sa kaminyoon taliwala sa katawhan sa Diyos. Siyempre, walay perpektong kaminyoon. Motungha usahay ang mga problema. Dili gyod nato sundogon ang komon nga panglantaw nga ang pagbulag ug diborsiyo maoy tubag dihang magkaproblema ang magtiayon. Unsaon pagpanalipod sa mga magtiayong Kristohanon ang ilang kaminyoon?

Konsideraha ang lima ka importanteng paagi.

1. Panalipdi ang imong kasingkasing pinaagi sa pagsalikway sa mga butang nga makapahuyang sa kaminyoon sama sa pagbirigbirig ug imoral nga mga kalingawan.​—Mat 5:28; 2Pe 2:14.

2. Palig-ona ang imong relasyon sa Diyos, ug paningkamoti nga mapalipay siya diha sa inyong kaminyoon.​—Sal 97:10.

3. Padayong isul-ob ang bag-ong personalidad, ug paghimog simpleng mga buhat nga makapalipay sa imong kapikas.​—Col 3:8-10, 12-14.

4. Mentinaha ang matinahoron ug maayong komunikasyon.​—Col 4:6.

5. Ihatag ang seksuwal nga panginahanglan uban ang pagmahal ug gugma.​—1Co 7:3, 4; 10:24.

Dihang tahoron sa mga Kristohanon ang kaminyoon, ilang gipasidunggan ang Tigmugna sa kaminyoon, si Jehova.

TAN-AWA ANG VIDEO NGA KINAHANGLANG MOLAHUTAY TA SA PAGDAGAN​—SUNDA ANG MGA BALAOD SA LUMBA, DAYON TUBAGA ANG MOSUNOD NGA MGA PANGUTANA:

• 

  Bisag maayo tingali ang sinugdanan sa kaminyoon, unsang mga problema ang posibleng motungha?

• 

  Unsang mga prinsipyo sa Bibliya ang makatabang sa mga magtiayon nga mibating wala na silay gugma sa usag usa?

• 

  Unsa nga mga instruksiyon ang gihatag ni Jehova sa kaminyoon?

• Aron molampos ang kaminyoon, unsay angayng himoon sa bana ug asawa?