Kon sa Unsang Paagi Matabangan ang Bible Study nga Mouswag ug Magpabawtismo​—Bahin Uno

1. Sa unsang paagi ang 2 Corinto 3:1-3 motabang kanato nga maapresyar ang atong pribilehiyo sa pagdumalag Bible study nga motultol sa bawtismo? (Tan-awa ang hulagway sa atubangan sa magasin.)

UNSAY imong bation dihang imong makita ang usa ka Bible study sa inyong kongregasyon nga mabawtismohan? Segurado nga malipay ka. (Mat. 28:19) Ug kon ikaw ang nag-study niya, mobati kag dako kaayong kalipay! (1 Tes. 2:19, 20) Ang bag-ong nabawtismohan nga mga tinun-an maoy maayong “mga sulat sa rekomendasyon,” dili lang sa nag-study nila kondili sa tibuok kongregasyon usab.​—Basaha ang 2 Corinto 3:1-3.

2. (a) Unsang importanteng pangutana ang angay natong konsiderahon, ug ngano? (b) Unsa ang pagdumalag Bible study? (Tan-awa ang footnote.)

² Makapalipay kaayo nga sa milabayng upat ka tuig, sa aberids, dihay mga 10,000,000 ka Bible studyb nga gireport kada bulan sa tibuok kalibotan. Ug nianang mga tuiga, sa aberids, kapig 280,000 ang nabawtismohan kada tuig ingong mga Saksi ni Jehova ug bag-ong mga tinun-an ni Jesu-Kristo. Unsay atong himoon aron mas daghan pa tag matabangan nga Bible study nga mabawtismohan? Samtang si Jehova mapailobong naghatag sa mga tawo ug panahon ug kahigayonan nga mahimong mga tinun-an sa Kristo, gusto natong buhaton ang tanan natong maarangan aron tabangan sila nga mouswag ug mabawtismohan sa labing madali. Mubo na lang kaayo ang panahon!​—1 Cor. 7:29a; 1 Ped. 4:7.

3. Unsay atong hisgotan niining artikuloha bahin sa pagdumalag Bible study?

³ Kay importante kaayo ang paghimog mga tinun-an karon, ang mga sangang buhatan gisurbi aron mahibaloan kon sa unsang paagi mas daghan tag matabangan nga Bible study nga mouswag ug magpabawtismo. Niining artikuloha ug sa sunod, atong tan-awon kon unsay makat-onan nato gikan sa eksperyensiyadong mga payunir, misyonaryo, ug tigdumala sa sirkito.c (Prov. 11:14; 15:22) Ilang gisaysay kon unsay mahimo sa mga nagdumala ug sa ilang mga Bible study aron ang pagtuon mahimong mas mapuslanon. Niining artikuloha, atong hisgotan ang lima ka butang nga angayng himoon sa Bible study aron siya mouswag ug magpabawtismo.

MAGTUON KADA SEMANA

4. Unsay angay natong masabtan bahin sa pagdumalag Bible study diha sa pultahan?

⁴ Daghan sa atong mga igsoon ang nagdumalag mga Bible study diha sa pultahan. Bisan tuod maayo ni nga paagi sa pag-ugmad ug interes, kini nga mga panaghisgot sagad mubo lang ug posible nga dili gani senemana. Aron maugmad pa ang interes, ang pipila ka igsoon mangayog cellphone number. Dayon, sa mga adlaw una sila moduaw pag-usab, ilang tawgan o i-text ang interesado aron hisgotan kadiyot ang usa ka topiko sa Bibliya. Ang maong mga panaghisgot magpadayon tingali sulod sa pipila ka bulan. Pero, moabot kaha sa punto nga ang Bible study magpahinungod ug magpabawtismo kon mao ra nay iyang ihatag nga panahon ug himoong paningkamot sa pagtuon sa Pulong sa Diyos? Posibleng dili.

5. Unsay giingon ni Jesus sa Lucas 14:27-33 nga magamit nato sa pagtabang sa atong mga Bible study?

⁵ Sa usa ka higayon, giilustrar ni Jesus kon unsay kinahanglang buhaton aron mahimong iyang tinun-an. Siya naghisgot bahin sa usa nga gustong magtukod ug torre ug bahin sa usa ka hari nga gustong makiggubat. Si Jesus nag-ingon nga ang usa nga gustong magtukod ug torre kinahanglan ‘unang molingkod ug kuwentahon ang gasto’ sa paghuman niana. Miingon sab siya nga ang hari kinahanglan ‘unang molingkod ug mangonsulta’ kon mapildi ba sa iyang mga sundalo ang kaaway. (Basaha ang Lucas 14:27-33.) Sa susama, si Jesus nahibalo nga ang usa nga gustong mahimong tinun-an kinahanglang maghunahuna pag-ayo kon unsay kahulogan sa pagkahimong iyang sumusunod. Busa, kinahanglang dasigon nato ang mga Bible study nga magtuon uban nato kada semana. Sa unsang paagi mahimo nato kana?

6. Unsay puwede natong buhaton aron mouswag ang atong mga Bible study?

⁶ Puwede nimong patas-an ang gidugayon sa inyong pagtuon diha sa pultahan. Tingali dili lang usa ka teksto ang imong hisgotan sa matag higayon nga moduaw ka. Kon ganahan na ang tagbalay sa taastaas nga panag-estorya, pangutan-a siya kon asa mo puwedeng manglingkod aron ipadayon ang panaghisgot. Ang tubag sa tagbalay magpakita kon seryoso ba siya sa pagtuon sa Bibliya. Sa ngadtongadto, aron mopaspas pa ang iyang pag-uswag, puwede pa gani nimo siyang pangutan-on kon gusto ba niyang magtuon kaduha sa usa ka semana. Pero, labaw pa ang gikinahanglan kay sa pagtuon kas-a o kaduha kada semana.

MANGANDAM SA MATAG PAGTUON

7. Sa unsang paagi ang magtutudlo makapangandam pag-ayo sa matag pagtuon?

⁷ Ingong magtutudlo, kinahanglang mangandam ka pag-ayo sa matag pagtuon. Mahimo nimo ning sugdan pinaagi sa pagbasa sa tun-anan ug sa mga teksto. Sabta pag-ayo ang pangunang mga punto. Hunahunaa ang ulohan sa tun-anan, ang mga sub-ulohan, ang mga pangutana, ang mga teksto nga basahon, ang mga hulagway, ug ang bisan unsang video nga makatabang nimo sa pagsaysay sa topiko. Dayon hunahunaa ang imong Bible study, ug pamalandonga kon unsaon nimo pagpresentar ang impormasyon sa simple ug klarong paagi aron dali niya kining masabtan ug mapadapat.​—Neh. 8:8; Prov. 15:28a.

8. Unsay gitudlo kanato sa giingon ni apostol Pablo sa Colosas 1:9, 10 bahin sa pag-ampo para sa atong Bible study?

⁸ Ingong bahin sa pagpangandam, iampo kang Jehova ang imong Bible study ug ang iyang mga panginahanglan. Hangyoa si Jehova nga tabangan ka sa pagtudlo sa Bibliya sa paagi nga matandog ang iyang kasingkasing. (Basaha ang Colosas 1:9, 10.) Hunahunaa kon duna bay mga punto nga malisdan siya sa pagsabot o pagdawat. Hinumdomi nga ang imong tumong mao ang pagtabang kaniya nga mouswag ug magpabawtismo.

9. Sa unsang paagi matabangan nimo ang Bible study nga mangandam sa pagtuon? Ipatin-aw.

⁹ Manghinaot ta nga pinaagi sa regular nga pagtuon, ang Bible study makaapresyar sa gihimo ni Jehova ug Jesus ug gusto pang mokat-on ug dugang. (Mat. 5:3, 6) Aron bug-os nga makabenepisyo sa pagtuon, ang Bible study kinahanglang magpokus sa iyang ginatun-an. Busa, isaysay kaniya kon unsa ka importante nga mangandam siya sa matag pagtuon pinaagi sa pagbasa nga abante sa tun-anan ug sa pagpamalandong kon unsaon niya kini pagpadapat. Unsaon nimo siya pagtabang? Ipakita kaniya kon unsaon pagpangandam.d Ipatin-aw kaniya kon unsaon pagpangita ang direktang tubag sa mga pangutana, ug ipakita kon sa unsang paagi ang pagbadlis o pag-highlight sa importanteng mga pulong makatabang kaniya nga mahinumdom sa tubag. Dayon, hangyoa siya sa pagtubag sa kaugalingon niyang mga pulong. Pinaagi niana, mahibaloan nimo kon nasabtan ba gyod niya ang iyang gitun-an. Pero, naa pay laing butang nga puwede nimong idasig sa Bible study nga himoon.

TUDLOI SIYA NGA MAKIGKOMUNIKAR KANG JEHOVA KADA ADLAW

10. Nganong importante nga basahon ang Bibliya adlaw-adlaw, ug unsay gikinahanglan aron bug-os nga makabenepisyo sa pagbasag Bibliya?

¹⁰ Gawas pa sa pagtuon sa Bibliya matag semana uban sa iyang magtutudlo, ang Bible study makabenepisyo sa pagbuhat ug mga butang kada adlaw nga siyasiya ra. Kinahanglan siyang makigkomunikar kang Jehova. Sa unsang paagi? Pinaagi sa pagpaminaw ug pagpakig-estorya kang Jehova. Makapaminaw siya sa Diyos pinaagi sa pagbasa sa Bibliya adlaw-adlaw. (Jos. 1:8; Sal. 1:1-3) Ipakita kaniya kon unsaon paggamit ang ma-print nga “Eskedyul sa Pagbasag Bibliya” nga makita diha sa jw.org.e Siyempre, aron bug-os siyang makabenepisyo sa iyang pagbasag Bibliya, dasiga siya sa pagpamalandong kon unsay gitudlo sa Bibliya bahin kang Jehova ug kon unsaon niya pagpadapat ang iyang nakat-onan.​—Buh. 17:11; Sant. 1:25.

11. Sa unsang paagi ang Bible study makakat-on sa pag-ampo sa hustong paagi, ug nganong importante nga pirme siyang mag-ampo kang Jehova?

¹¹ Dasiga ang imong Bible study nga makig-estorya kang Jehova pinaagi sa pag-ampo kada adlaw. Pag-ampo nga kinasingkasing sa dili pa ug inigkahuman sa matag pagtuon, ug hisgoti ang imong Bible study sa imong mga pag-ampo. Samtang maminaw siya, makakat-on siya kon unsaon pag-ampo nga kinasingkasing ngadto kang Jehova nga Diyos sa ngalan ni Jesu-Kristo. (Mat. 6:9; Juan 15:16) Hunahunaa lang kon sa unsang paagi ang adlaw-adlaw nga pagbasa sa Bibliya (pagpaminaw kang Jehova) ug pag-ampo (pagpakig-estorya kang Jehova) makatabang sa imong Bible study nga mas masuod sa Diyos! (Sant. 4:8) Kon himoon niya kini adlaw-adlaw, makatabang kini kaniya nga magpahinungod ug magpabawtismo. Unsa pay makatabang kaniya?

TABANGI SIYA NGA MASUOD KANG JEHOVA

12. Sa unsang paagi matabangan nimo ang imong Bible study nga masuod kang Jehova?

¹² Ang makat-onan sa Bible study sa pagtuon kinahanglang makaabot dili lang sa hunahuna kondili sa kasingkasing sab. Ngano? Ang atong kasingkasing​—nga nag-apil sa atong tinguha, emosyon, ug pagbati—​magpalihok nato sa pagpadapat sa atong nakat-onan. Si Jesus migamit ug lohikal nga pangatarongan nga nakapainteres sa mga tawo. Pero sila misunod kaniya kay natandog sab ang ilang kasingkasing. (Luc. 24:15, 27, 32) Kinahanglang makita sa imong Bible study nga si Jehova tinuod nga Persona nga puwede niyang masuod ug isipon ingong iyang Amahan, Diyos, ug Higala. (Sal. 25:4, 5) Panahon sa pagtuon, ipasiugda ang nindot nga mga hiyas sa atong Diyos. (Ex. 34:5, 6; 1 Ped. 5:6, 7) Bisan unsa pay inyong hisgotan, hatagig pagtagad kon unsang klaseha sa Persona si Jehova. Tabangi ang Bible study nga maapresyar ang nindot nga mga hiyas ni Jehova​—ang iyang gugma, pagkamaayo, ug pagkamabination. Si Jesus miingon nga “ang kinalabwan ug unang sugo” mao ang ‘paghigugma kang Jehova nga imong Diyos.’ (Mat. 22:37, 38) Tabangi ang imong Bible study nga higugmaon si Jehova.

13. Paghatag ug pananglitan kon unsaon pagtabang ang Bible study nga makakat-on bahin sa nindot nga mga hiyas ni Jehova.

¹³ Sa imong pagpakig-estorya sa imong Bible study, ipahayag ang imong lawom nga gugma kang Jehova. Posibleng makatabang ni kaniya nga makahunahuna nga kinahanglan sab niyang ugmaron ang suod nga relasyon sa Diyos. (Sal. 73:28) Pananglitan, duna ka bay nabasahan sa tun-anang mga publikasyon o sa Bibliya bahin sa gugma, kaalam, hustisya, o gahom ni Jehova nga nakatandog sa imong kasingkasing? Isulti kana ngadto sa imong Bible study, ug ipahibalo kaniya nga mao nâ ang usa sa daghang rason nga gihigugma nimo ang atong langitnong Amahan. Pero duna pay angayng buhaton ang Bible study aron siya mouswag ug magpabawtismo.

DASIGA SIYA NGA MOTAMBONG SA MGA TIGOM

14. Unsay gitudlo kanato sa Hebreohanon 10:24, 25 bahin sa Kristohanong mga tigom nga makatabang sa Bible study nga mouswag?

¹⁴ Gusto natong tanan nga ang atong mga Bible study mouswag ug magpabawtismo. Ang usa ka importanteng paagi nga matabangan nato sila mao ang pagdasig kanila sa pagtambong sa mga tigom. Ang eksperyensiyadong mga igsoon nag-ingon nga ang mga Bible study nga motambong dayon sa mga tigom paspas kaayong mouswag. (Sal. 111:1) Sultian sa ubang igsoon ang ilang Bible study nga madugangan pa gyod ang iyang kahibalo sa Bibliya kon motambong siya sa mga tigom. Basaha ang Hebreohanon 10:24, 25 uban sa imong Bible study, ug ipatin-aw kaniya ang mga kaayohan sa pagtambong sa mga tigom. Ipakita kaniya ang video nga Unsay Ginahimo Diha sa Kingdom Hall?f Tabangi ang imong Bible study nga himoong bahin sa iyang kinabuhi ang pagtambong sa mga tigom kada semana.

15. Unsay atong mahimo aron madasig ang Bible study nga motambong sa mga tigom nga regular?

¹⁵ Unsay imong mahimo kon ang imong Bible study wala pa makatambong ug tigom o dili regular sa pagtambong? Isulti kaniya kon unsay imong nakat-onan sa tigom nga nakapalipay kaayo nimo. Mas makapalihok nâ niya sa pagtambong kay sa pag-imbitar lang kaniya sa tigom. Hatagi siya ug Bantayanang Torre o workbook sa Tigom nga Kinabuhi ug Ministeryo. Ipakita kaniya kon unsay hisgotan sa sunod nga tigom, ug pangutan-a siya kon unsang bahina niana ang nakapainteres kaayo niya. Ang maeksperyensiyahan sa imong Bible study sa una niyang pagtambong mas maayo kay sa bisan unsa nga iyang naeksperyensiyahan sa ubang relihiyosong tigom. (1 Cor. 14:24, 25) Mailaila niya ang mga igsoon nga magsilbing maayong ehemplo kaniya ug makatabang niya nga mouswag ug magpabawtismo.

16. Unsay gikinahanglan aron makadumala tag pagtuon nga motultol sa bawtismo, ug unsay atong makat-onan sa sunod nga artikulo?

¹⁶ Sa unsang paagi makadumala tag pagtuon nga motultol sa bawtismo? Makatabang ta sa Bible study nga seryosohon ang pagtuon pinaagi sa pagdasig niya nga mag-Bible study kada semana ug mangandam sa matag pagtuon. Gusto sab nato siyang dasigon nga makigkomunikar kang Jehova kada adlaw ug maningkamot nga masuod Kaniya. Gusto natong palihokon ang Bible study nga motambong sa mga tigom. (Tan-awa ang kahon nga “Kon Unsay Angayng Himoon sa Bible Study Aron Mouswag ug Magpabawtismo.”) Pero, ingon sa ipatin-aw sa sunod nga artikulo, duna pay lima ka butang nga kinahanglan natong himoon aron matabangan ang atong Bible study nga magpabawtismo.