Ang Pag-ampo Makatabang Nimo

Si Pamela miduol sa mga doktor aron magpatambal sa iyang grabeng sakit. Pero miampo sab siya sa Diyos nga tabangan siyang makalahutay sa iyang lisod nga kahimtang. Nakatabang ba ang iyang pag-ampo?

“Panahon sa akong mga treatment sa kanser, sagad mobati kog grabeng kahadlok,” miingon si Pamela. “Pero dihang mag-ampo ko kang Jehova nga Diyos, mokalma ko ug dili na mahadlok. Naa gihapon ang akong sakit, pero ang pag-ampo nakatabang nako nga magpabiling positibo. Dihang komostahon ko sa mga tawo, moingon ko, ‘Dili maayo ang akong pamati, pero malipayon gihapon ko!’”

Siyempre, dili nato hulaton nga grabe tang masakit ayha pa moampo. Kitang tanan naay mga problema, dagko ug gagmay, ug sagad nagkinahanglan tag tabang sa pag-atubang niini. Makatabang ba ang pag-ampo?

Ang Bibliya nag-ingon: “Itugyan ang imong palas-anon kang Jehova, ug siya motabang kanimo. Dili gyod niya itugot nga mapukan ang matarong.” (Salmo 55:22) Pagkamakapahupay niana! Busa sa unsang paagi ang pag-ampo makatabang nimo? Kon mag-ampo ka sa Diyos sa hustong paagi, ihatag niya ang imong gikinahanglan aron masagubang nimo ang mga kalisdanan.—Tan-awa ang kahong “Mga Benepisyo sa Pag-ampo.”

Mga Benepisyo sa Pag-ampo

Kalinaw sa hunahuna

“Ipahibalo sa Diyos ang inyong mga hangyo . . . ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna pinaagi ni Kristo Jesus.” (Filipos 4:6, 7) Kon isulti nimo sa Diyos ang imong mga kabalaka, tabangan ka niya nga magpabiling kalmado ug makahimog maalamong desisyon bisan pag na-stress.

Kaalam gikan sa Diyos

“Kon duna kaninyoy nakulangan ug kaalam, padayon siyang mangayo sa Diyos, kay siya madagayaong nagahatag sa tanan ug dili mamuyboy, ug kini ihatag kaniya.” (Santiago 1:5) Dihang mag-atubang tag lisod nga kahimtang, usahay dili kaayo maayo ang atong mga desisyon. Kon mangayo tag kaalam, ipahinumdom sa Diyos kanato ang daghang mapuslanong prinsipyo nga nasulat sa iyang Pulong, ang Bibliya.

Kusog ug paghupay

“Naa koy kusog sa pag-atubang sa tanang butang tungod kaniya nga naghatag nakog gahom.” (Filipos 4:13) Ingong labing gamhanang Diyos, si Jehova makahatag nimog kusog nga gikinahanglan sa pag-atubang sa mga kalisdanan o sa pagpalig-on nimo panahon sa mga pagsulay. (Isaias 40:29) Sa Bibliya, si Jehova gitawag sab nga “ang Diyos sa tanang paghupay.” Hupayon ta niya “sa tanan natong pagsulay.”—2 Corinto 1:3, 4.

GUSTO BA KANG MAKABENEPISYO?

Siyempre, dili ka pugson ni Jehova sa pag-ampo kaniya. Hinuon, mahigugmaon siyang nag-imbitar nimo sa paghimo niana. (Jeremias 29:11, 12) Pero komosta kon mibati ka nga wala tubaga ang imong mga pag-ampo? Ayawg kaguol o kaluya. Sagad ang mahigugmaong ginikanan motabang sa ilang mga anak sa paagi ug sa panahon nga lahi sa gidahom sa ilang mga anak. Tingali naay mas maayong solusyon ang ginikanan. Pero mao ni ang segurado: Ang mahigugmaong ginikanan motabang sa ilang mga anak.

Si Jehova nga Diyos—ang pinakamahigugmaong ginikanan—gusto sab nga motabang nimo. Kon susihon nimo pag-ayo ang mga giya sa Bibliya nga atong gihisgotan ug maningkamot sa pagsunod niini, tubagon sa Diyos ang imong mga pag-ampo sa pinakamaayong paagi!—Salmo 34:15; Mateo 7:7-11.