Kita Nag-alagad sa Diyos nga “Maluluy-on Kaayo”

1. Unsay imong mahunahunaan sa usa ka tawo nga maluluy-on, ug unsang ilustrasyon ang mosantop sa imong hunahuna?

DIHANG maghunahuna tag maluluy-on nga tawo, maimadyin tingali nato ang usa nga buotan, mabination, ug mahinatagon. Mosantop pod tingali sa atong hunahuna ang ilustrasyon ni Jesus bahin sa buotang Samarianhon. Kanang tawhana nga taga-laing nasod “nagpakitag kaluoy” sa usa ka Hudiyo nga gitulis. Ang Samarianhon “naluoy” sa gikulata nga Hudiyo ug mahigugmaong nag-atiman kaniya. (Luc. 10:29-37) Kini nga ilustrasyon nagpasiugda sa nindot nga hiyas sa atong Diyos—ang kaluoy. Kana nga hiyas maoy usa ka ekspresyon sa gugma sa Diyos, ug iya nang gipakita kanato kada adlaw sa daghang paagi.

2. Unsay laing paagi sa pagpakitag kaluoy?

² Duna pay laing paagi sa pagpakitag kaluoy. Ang tawong maluluy-on modesisyon tingali nga dili mopahamtang ug silot kon dunay basehanan sa paghimo niana. Sa ingon niana nga paagi, si Jehova nagpakita gyod ug kaluoy kanato. “Wala siya magpahamtang kanatog silot sumala sa atong kasal-anan,” matod pa sa salmista. (Sal. 103:10) Pero usahay, si Jehova mohatag tingalig bug-at nga disiplina sa nakasala.

3. Unsang mga pangutana ang atong tubagon?

³ Niining artikuloha, atong tubagon ang tulo ka pangutana: Nganong nagpakitag kaluoy si Jehova? Makaingon ba ta nga ang paghatag ug bug-at nga disiplina maoy pagpakita gihapog kaluoy? Ug unsay makatabang nato sa pagpakitag kaluoy? Susihon nato ang tubag sa Pulong sa Diyos niining mga pangutanaha.

NGANONG NAGPAKITAG KALUOY SI JEHOVA?

4. Nganong nagpakitag kaluoy si Jehova?

⁴ Si Jehova gustong magpakitag kaluoy. Si apostol Pablo misulat nga ang Diyos “maluluy-on kaayo.” Niini nga konteksto, gipatin-aw ni Pablo nga ang Diyos maluluy-on kay gihatagan niyag paglaom nga mabuhi sa langit ang iyang dili hingpit, dinihogang mga alagad. (Efe. 2:4-7) Pero dili kay sila lang ang gipakitaan ni Jehova ug kaluoy. Si salmistang David misulat: “Si Jehova maayo sa tanan, ug ang iyang kaluoy madayag sa tanan niyang buhat.” (Sal. 145:9) Kay gimahal ni Jehova ang mga tawo, siya nagpakitag kaluoy matag higayon nga makakita siyag basehanan sa paghimo niana.

5. Nganong nahibalo si Jesus nga maluluy-on si Jehova?

⁵ Labaw kay kang bisan kinsa, si Jesus nahibalo nga gusto kaayo ni Jehova nga magpakitag kaluoy. Sila magkauban sa langit sulod sa libolibong katuigan una mianhi si Jesus sa yuta. (Prov. 8:30, 31) Sa daghang higayon, nakita ni Jesus kon sa unsang paagi ang iyang Amahan nagpakitag kaluoy sa makasasalang mga tawo. (Sal. 78:37-42) Sa iyang pagpanudlo, daghang higayon nga gipasiugda ni Jesus kining nindot nga hiyas sa iyang Amahan.

6. Sa unsang paagi gitabangan ta ni Jesus nga masabtan ang pagkamaluluy-on sa iyang Amahan?

⁶ Sumala sa gihisgotan sa miaging artikulo, gigamit ni Jesus ang ilustrasyon bahin sa milayas nga anak aron masabtan nato nga gusto kaayo ni Jehova nga magpakitag kaluoy. Ang anak mibiya sa ilang balay ug “giwaldas ang iyang katigayonan pinaagi sa pagkinabuhing mapatuyangon.” (Luc. 15:13) Sa ulahi, siya naghinulsol sa iyang imoral nga binuhatan, nagpaubos, ug mipauli sa ilang balay. Unsay reaksiyon sa iyang amahan? Ang batan-on wala na maghulat ug dugay aron mahibaloan kana. Si Jesus miingon: “Samtang layo pa [ang anak] sa balay, nalantawan siya sa iyang amahan ug naluoy pag-ayo kaniya. Ang amahan midagan ug migakos sa iyang anak ug mapinanggaong mihalok kaniya.” Wala pakaulawi sa amahan ang iyang anak. Nagpakita hinuon siyag kaluoy pinaagi sa pagpasaylo sa batan-on ug pagdawat kaniyag balik ingong bahin sa pamilya. Ang milayas nga anak nakahimog dako kaayong sala, pero tungod sa iyang paghinulsol, gipasaylo siya sa iyang amahan. Ang maluluy-ong amahan diha sa ilustrasyon nagrepresentar kang Jehova. Niining makapatandog nga paagi, gipakita ni Jesus nga si Jehova andam mopasaylo niadtong mga makasasala nga sinserong maghinulsol.—Luc. 15:17-24.

7. Sa unsang paagi ang pagpakita ni Jehova ug kaluoy nagpamatuod nga siya maalamon kaayo?

⁷ Si Jehova nagpakitag kaluoy tungod sa iyang dili hitupngang kaalam. Siya kanunayng mohimog mga desisyon alang sa kaayohan sa iyang mga linalang. Ang Bibliya nag-ingon nga “ang kaalam nga gikan sa langit” “puno sa kaluoy ug maayong mga bunga.” (Sant. 3:17) Samag mahigugmaong ginikanan, si Jehova nahibalo nga ang iyang kaluoy makahatag ug kaayohan sa iyang mga anak. (Sal. 103:13; Isa. 49:15) Ang kaluoy ni Jehova naghatag ug paglaom sa katawhan bisag dili sila hingpit. Busa ang walay kinutobang kaalam ni Jehova magpalihok niya sa pagpakitag kaluoy dihang makita niya nga dunay basehanan sa paghimo niana. Pero nahibalo sab si Jehova kon kanus-a siya dili angayng magpakitag kaluoy. Kay maalamon siya, dili gyod siya magpakitag kaluoy kon ang pagbuhat niana magkonsentir sa sayop nga binuhatan.

8. Unsay kinahanglang buhaton usahay, ug ngano?

⁸ Ibutang ta nga ang usa ka alagad sa Diyos tinuyong nagpakasala. Unsay angay natong buhaton? Si Jehova naggiya kang Pablo sa pagsulat: ‘Hunong na sa pagpakig-uban’ sa maong tawo. (1 Cor. 5:11) Ang dili mahinulsolong makasasala palagpoton gikan sa kongregasyon. Kinahanglan kanang buhaton aron mapanalipdan ang atong matinumanong mga igsoon ug mapakita ang pagkabalaan ni Jehova. Pero ang pipila tingali malisdan sa paghunahuna nga ang pagpalagpot maoy ekspresyon sa kaluoy sa Diyos. Ekspresyon ba gyod nâ sa iyang kaluoy? Tan-awon nato.

PAGPAKITA BAG KALUOY ANG PAGPAHAMTANG UG BUG-AT NGA DISIPLINA?

9-10. Base sa Hebreohanon 12:5, 6, nganong makaingon ta nga ang pagpalagpot nagpakitag kaluoy? Iilustrar.

⁹ Sa dihang makadungog tag pahibalo panahon sa tigom nga ang igsoon nga atong nailhan ug gimahal dili na usa sa mga Saksi ni Jehova, maguol kaayo ta. Maghunahuna tingali ta kon kinahanglan ba gyod siyang palagpoton. Ang pagpalagpot ba maoy pagpakita gihapog kaluoy? Oo. Kon ang usa nagkinahanglag disiplina pero wala nâ ihatag kaniya, dili kana maalamon ug wala nâ magpakitag kaluoy ug gugma. (Prov. 13:24) Ang pagpalagpot ba makatabang sa dili mahinulsolong makasasala nga magbag-o ug maghinulsol? Posible. Daghan niadtong nakahimog seryosong sala ang miingon nga ang pagpalagpot nakatabang nila nga makaamgo, magbag-o, maghinulsol, ug mobalik sa mapinanggaong mga bukton ni Jehova.—Basaha ang Hebreohanon 12:5, 6.

¹⁰ Tagda ni nga ilustrasyon. Ang magbalantay nakamatikod nga ang usa sa iyang mga karnero nasakit. Nahibalo siya nga aron maayo ang karnero niining sakita, kinahanglan kining ibulag sa panon. Pero ang mga karnero ganahang makig-uban sa panon, ug dili tingali sila mahimutang kon mabulag sila. Apan nagpasabot ba nâ nga ang magbalantay pintas o way kaluoy kay iyang gilain ang karnero? Wala. Nahibalo siya nga kon iyang tugotan ang masakitong karnero nga makig-uban sa panon, matakdan ang uban. Pinaagi sa paglain sa masakitong karnero, iyang giprotektahan ang tibuok panon.—Itandi ang Levitico 13:3, 4.

11. (a) Sa unsang mga paagi nga ang tawong napalagpot puwedeng ipakasama sa masakitong karnero? (b) Unsang mga tagana ug tabang ang puwedeng mabatonan niadtong napalagpot?

¹¹ Dihang ang usa ka Kristohanon mapalagpot, puwede nato siyang ipakasama nianang masakiton nga karnero. Nasakit siya sa espirituwal nga diwa. (Sant. 5:14) Ang espirituwal nga sakit, sama sa ubang pisikal nga sakit, puwedeng makatakod. Busa sa pipila ka kahimtang, ang nasakit sa espirituwal kinahanglang ibulag sa kongregasyon. Kini nga disiplina maoy ekspresyon sa gugma ni Jehova para sa matinumanong mga sakop sa Iyang panon, ug posibleng makatabang ni sa nakasala nga makaamgo ug maghinulsol. Samtang napalagpot, puwede siyang motambong sa mga tigom diin siya mapakaon ug mapalig-on sa espirituwal. Puwede sab siyang mokuhag literatura aron duna siyay mabasa ug matun-an, ug puwede siyang motan-aw sa JW Broadcasting^®. Ug dihang makita sa mga ansiyano nga naghimo na siyag mga kausaban, puwede silang mohatag kaniyag tambag matag karon ug unya aron matabangan siya nga mahibalik ang iyang maayong relasyon kang Jehova ug mapasig-uli ingong usa sa mga Saksi ni Jehova.b

12. Unsaon pagpakita sa mga ansiyano ang gugma ug kaluoy ngadto sa dili mahinulsolong makasasala?

¹² Importanteng hinumdoman nga kadto lang dili mahinulsolong makasasala ang palagpoton. Ang mga ansiyano nahibalo nga kinahanglan silang mamalandong pag-ayo una pa sila modesisyon nga palagpoton ang usa. Nahibalo sila nga si Jehova nagadisiplina “sa hustong paagi.” (Jer. 30:11) Gimahal nila ang mga igsoon, ug dili nila gustong mobuhat ug bisan unsa nga makadaot sa relasyon sa ilang mga igsoon kang Jehova. Pero usahay, mapakita ang gugma ug kaluoy pinaagi sa pagpalagpot sa nakasala.

13. Nganong ang usa ka Kristohanon sa Corinto kinahanglang palagpoton?

¹³ Konsideraha kon unsay gihimo ni Pablo maylabot sa dili mahinulsolong makasasala sa unang siglo. Ang usa ka Kristohanon sa Corinto nakig-ipon sa asawa sa iyang amahan. Makaluod gyod to! Si Pablo nahibalo nga giingnan ni Jehova ang mga Israelinhon kaniadto: “Ang lalaki nga makigsekso sa iyang inaina nagpakaulaw sa iyang amahan. Silang duha patyon gayod.” (Lev. 20:11) Siyempre, dili puwedeng sultihan ni Pablo ang kongregasyon nga patyon ang maong tawo. Pero iyang giingnan ang mga taga-Corinto nga palagpoton siya. Ang imoral nga binuhatan sa maong tawo nakaapektar sa uban diha sa kongregasyon, ug ang pipila kanila wala gani maghunahuna nga kadto maoy seryosong sala!—1 Cor. 5:1, 2, 13.

14. Giunsa pagpakita ni Pablo ang kaluoy ngadto sa napalagpot nga tawo sa Corinto, ug ngano? (2 Corinto 2:5-8, 11)

¹⁴ Paglabayg pipila ka panahon, nahibaloan ni Pablo nga ang maong tawo naghimog dagkong kausaban. Siya tinuod gyong naghinulsol! Bisag gipakaulawan sa maong tawo ang kongregasyon, dili gusto ni Pablo nga maghinobra sa pagdisiplina kaniya. Busa iyang giingnan ang mga ansiyano: “Kinahanglang andam mong magpasaylo kaniya ug maghupay kaniya.” Matikdi kon nganong gisulti kana ni Pablo: “Aron dili siya malumsan sa hilabihang kasubo.” Naluoy si Pablo nianang mahinulsolong tawo. Dili niya gustong makita ang maong tawo nga malumsan sa kaguol tungod sa nahimo niini, nga moundang na hinuon ni sa pagpangayog pasaylo.—Basaha ang 2 Corinto 2:5-8, 11.

15. Sa unsang paagi ang mga ansiyano mahimong balanse sa pagpahamtang ug disiplina?

¹⁵ Sama kang Jehova, ang mga ansiyano gustong magpakitag kaluoy. Magpahamtang silag bug-at nga disiplina kon gikinahanglan pero magpakita silag kaluoy kon posible dihang dunay tinuod nga basehanan sa paghimo niana. Kon wala gyod silay ipahamtang nga disiplina sa nakasala, wala sila magpakitag kaluoy, kondili gikonsentir nila ang sayop nga binuhatan. Pero ang mga ansiyano ra ba ang kinahanglang magpakitag kaluoy?

UNSAY MAKATABANG NATONG TANAN SA PAGPAKITAG KALUOY?

16. Sumala sa Proverbio 21:13, unsay buhaton ni Jehova niadtong dili magpakitag kaluoy?

¹⁶ Ang tanang Kristohanon gustong magmaluluy-on sama kang Jehova. Ngano? Ang usa ka rason mao nga si Jehova dili maminaw niadtong dili magpakitag kaluoy sa uban. (Basaha ang Proverbio 21:13.) Gusto nato nga paminawon ni Jehova ang atong mga pag-ampo, busa likayan gyod nato ang pagkadili-maluluy-on. Imbes dili magpakabana sa pag-antos sa atong igsoon, kinahanglan nga kanunay tang andam maminaw sa “tawong makaluluoy nga nagpakitabang.” Sa susama, maningkamot ta sa pagpadapat niini nga prinsipyo sa Bibliya: “Ang usa nga dili magpakitag kaluoy hukman nga walay kaluoy.” (Sant. 2:13) Kon hinumdoman nato nga nagkinahanglan gyod tag kaluoy, mahimong mapalihok ta sa pagpakitag kaluoy. Ilabinang gusto natong magpakitag kaluoy dihang ang mahinulsolong makasasala mobalik sa kongregasyon.

17. Sa unsang paagi si Haring David nagpakitag kinasingkasing nga kaluoy?

¹⁷ Ang mga ehemplo sa Bibliya makatabang nato sa pagpakitag kaluoy. Pananglitan, hunahunaa si Haring David. Sagad kinasingkasing siyang nagpakitag kaluoy. Bisag gusto siyang patyon ni Saul, si David nagpakitag kaluoy sa dinihogang hari sa Diyos, nga wala gyod manimalos o magpahinabog kadaot niini.—1 Sam. 24:9-12, 18, 19.

18-19. Unsa ang duha ka higayon nga si David wala magpakitag kaluoy?

¹⁸ Pero dihay mga higayon nga si David wala magpakitag kaluoy. Pananglitan, dihang ang ngil-ad kaayog batasan nga si Nabal nanginsulto ug wala mohatag ug pagkaon kaniya ug sa iyang mga sundalo, nasuko kaayo si David ug gusto niyang patyon si Nabal ug ang tanang lalaki sa panimalay niini. Maayo na lang kay milihok dayon ang buotan ug mapailobong asawa ni Nabal nga si Abigail. Busa, nalikayan ni David nga mahimong sad-an sa dugo.—1 Sam. 25:9-22, 32-35.

¹⁹ Sa laing higayon, si propetang Natan nag-estorya kang David bahin sa datong tawo nga nagkuha sa pinanggang karnero sa iyang pobreng silingan. Si David nasuko pag-ayo ug miingon: “Ingon nga si Jehova buhi, ang tawo nga nagbuhat niini angayng mamatay!” (2 Sam. 12:1-6) Si David nahibalo sa Moisesnong Balaod. Ang tawong mangawat ug karnero kinahanglang mobayad niana ug upat ka karnero. (Ex. 22:1) Bug-at ra kaayo nga paghukom ang pag-ingon nga kinahanglang patyon ang kawatan. Sa tinuoray lang, si Natan migamit ug ilustrasyon aron masabtan ni David nga mas grabe pa ang mga krimen nga iyang nahimo! Bisan pa niana, si Jehova nagpakitag dakong kaluoy kang David, samtang si David wala magpakitag kaluoy sa tawo nga nangawat ug karnero.—2 Sam. 12:7-13.

20. Unsang leksiyon ang atong makat-onan kang David?

²⁰ Matikdi nga sa dihang si David nadala sa iyang kasuko, siya miingon nga si Nabal ug ang tanang lalaki sa panimalay niini angayng patyon. Ug sa ulahi, si David miingon nga ang datong tawo sa ilustrasyon ni Natan angayng mamatay. Niining ikaduhang higayon, matingala tingali ta kon nganong ang usa ka mahigugmaong tawo mohatag ug ingon niana ka bug-at nga paghukom. Tagda ang konteksto. Nianang panahona, si David gihasol sa iyang konsensiya. Kon ang usa magpakanaog ug bug-at ra kaayo nga paghukom sa uban, timailhan nâ nga dili maayo ang iyang relasyon kang Jehova. Si Jesus naghatag ug bug-at nga pasidaan sa iyang mga sumusunod: “Ayaw na panghukom aron dili mo hukman; kay kamo iyang hukman sumala sa inyong paghukom sa uban.” (Mat. 7:1, 2) Busa mag-amping ta aron malikayan ang pagpahamtang ug bug-at ra kaayo nga paghukom ug maningkamot ta nga mahimong “maluluy-on kaayo,” sama sa atong Diyos.

21-22. Unsa ang pipila ka praktikal nga paagi nga makapakita tag kaluoy?

²¹ Ang kaluoy dili kay pagbati lang. Gani, kini gihatagag kahulogan ingong “pagkamabination nga inubanag buhat.” Busa, maniid ta kon kinsay nanginahanglag tabang diha sa atong pamilya, kongregasyon, ug komunidad. Makakaplag gyod tag daghang kahigayonan sa pagpakitag kaluoy! Duna bay nagkinahanglag paghupay? Makahatag ba tag praktikal nga tabang, tingali pinaagi sa pagtaganag pagkaon o sa uban pang panginahanglan? Ang bag-o bang napasig-uli nga igsoon nagkinahanglag paghupay ug makapalig-ong panag-ubanay? Puwede ba natong ipaambit sa uban ang makapahupayng mensahe sa maayong balita? Usa ni sa maayo kaayong paagi sa pagpakitag kaluoy sa tanan.—Job 29:12, 13; Roma 10:14, 15; Sant. 1:27.

²² Kon abtik tang maniid, makakita tag mga kahigayonan sa pagpakitag kaluoy. Sa dihang magpakita tag kaluoy, mapalipay gyod nato ang atong langitnong Amahan, ang Diyos nga “maluluy-on kaayo”!