1921—Usa Ka Gatos Ka Tuig Kanhi

“UNSANG buluhatona ang atong madahom niining tuiga?” Kana ang pangutana para sa madasigong mga Estudyante sa Bibliya nga mabasa diha sa Enero 1, 1921 nga Watch Tower. Ingong tubag, gikutlo niini ang Isaias 61:1, 2, nga nagpahinumdom kanila sa ilang buluhaton nga pagsangyaw. “Si Jehova nagdihog kanako sa pagpahayag sa maayong balita ngadto sa maaghop . . . , sa pagmantala sa tuig sa pagkamaayo ni Jehova ug sa adlaw sa panimalos sa atong Diyos.”

MAISOGONG MGA MAGSASANGYAW

Aron matuman ang ilang buluhaton, ang mga Estudyante sa Bibliya kinahanglang magmaisogon. Kinahanglan nilang imantala ang “maayong balita” ngadto sa mga maaghop ug ang “adlaw sa panimalos” ngadto sa mga daotan.

Si Brader J. H. Hoskin, nga taga-Canada, nagsangyaw nga maisogon bisan pa sa mga pagsupak. Sa sayong bahin sa 1921, naestorya niya ang usa ka ministro nga Methodist. Gisugdan ni Brader Hoskin ang panag-estorya pinaagi sa pag-ingon: “Kinahanglang maayo ang atong panaghisgot bahin sa Bibliya, ug bisag dili ta magkasinabot sa pipila ka butang, taposon nato ni sa malinawong paagi ug magbuwag sa maayong kabubut-on.” Pero wala nâ mahitabo. Si Brader Hoskin miingon: “Pipila ka minuto pa lang ming nag-estorya dihang gihapak [sa ministro] ang pultahan. Kusog kaayo to nga abi nakog mabuak ang dako nga bildo sa pultahan.”

“Maayo pag didto ka makig-estorya sa mga dili Kristohanon!” ang ministro misinggit. Wala motubag si Brader Hoskin, pero samtang molakaway na siya, nakaingon siya sa iyang kaugalingon, ‘Aw, paminaw nako dili Kristohanon ang akong kaestorya!’

Dihang ang ministro naghatag sa iyang sermon pagkasunod adlaw, gidaot niya si Brader Hoskin. Si Brader Hoskin nahinumdom: “Iyang gipasidan-an ang iyang mga sakop bahin nako ug giingnan sila nga ako ang pinakabakakon nga tawo nga miabot sa ilang lugar ug nga angay kong pusilon.” Pero wala nâ makapugong kang Brader Hoskin. Nagpadayon siya sa pagsangyaw ug daghan siyag naestorya. Siya miingon: “Nalingaw gyod ko sa akong pagsangyaw didto. Ang pipila ka tawo miingon pa gani, ‘Nahibalo ko nga ginahimo nimo ang kabubut-on sa Diyos!’ ug mitanyag sila nga hatagan ko nila sa mga butang nga akong gikinahanglan.”

PERSONAL UG PAMILYAHANON NGA PAGTUON

Aron tabangan ang mga interesado nga mouswag, ang mga Estudyante sa Bibliya nag-imprentag mga programa sa pagtuon sa Bibliya diha sa The Golden Age.a Ang programa nga Juvenile Bible Study may mga pangutana nga puwedeng hisgotan sa mga ginikanan uban sa ilang mga anak. “Ipangutana ni [sa mga ginikanan] ngadto sa ilang mga anak ug tabangan sila nga makita ang mga tubag diha sa Bibliya.” Ang pipila ka pangutana, sama sa “Pila ka basahon ang naa sa Bibliya?,” nagtudlog simpleng mga kamatuoran. Ang uban, sama sa “Angay bang dahomon sa matag tinuod nga Kristohanon nga lutoson siya?,” nag-andam sa mga batan-on nga mahimong maisogong mga magsasangyaw.

Para sa mga Estudyante sa Bibliya nga mas daghag nahibaloan bahin sa Kasulatan, diha poy gihimong programa. Kini gitawag ug Advanced Studies in the Divine Plan of the Ages. Duna ni makapukaw sa hunahuna nga mga pangutana nga gibase sa unang volume sa librong Studies in the Scriptures. Linibo ka magbabasa ang nakabenepisyo niini nga mga programa, pero pagka-Disyembre 21, 1921, gipahibalo diha sa The Golden Age nga kini nga mga programa hunongon na. Unsay hinungdan nianang kalit nga kausaban?

BAG-ONG LIBRO!

Ang librong *The Harp of God*

Kard diin nasulat ang asaynment nga basahonon

Kard nga may mga pangutana

Naamgohan sa mga nagapanguna nga kinahanglang makat-onan sa mga Estudyante sa Bibliya ang pangunang mga kamatuoran sa sistematikong paagi. Tungod niana, ang librong The Harp of God gi-release niadtong Nobyembre 1921. Ang mga interesado nga midawat sa libro gienrol sab sa The Harp Bible Study Course. Kini nga programa sa pagtuon himoon sa usa nga siyasiya ra. Nakatabang ni sa mga magbabasa nga masabtan “ang katuyoan sa Diyos nga hatagan ang mga tawo ug kinabuhing walay kataposan.” Unsay pamaagi niini nga programa?

Dihang dawaton sa usa ang libro, hatagan siyag asaynment nga nasulat diha sa gamayng kard. Makita diha sa kard kon unsa nga mga panid sa libro ang kinahanglan niyang basahon. Pagkasunod semana, makadawat siyag kard nga may mga pangutana bahin sa iyang nabasa. Sa ubos nga bahin sa kard, makita ang asaynment nga basahonon para sa sunod semana.

Kada semana sulod sa 12 ka semana, ang estudyante makadawat ug bag-ong kard gikan sa duol nga kongregasyon. Sagad, ang mag-andam sa mga kard mao ang mga igsoon nga tigulang na o dili na makapamalaybalay. Pananglitan, si Anna K. Gardner, nga taga-Millvale, Pennsylvania, U.S.A, miingon: “Dihang gi-release ang The Harp of God, nakahatag nig dugang buluhaton sa akong baldadong igsoon nga si Thayle, kay andamon niya ang mga kard nga ipadala kada semana.” Dihang mahuman na sa estudyante ang programa, bisitahon siya sa usa ka igsoon aron tabangan siya nga makakat-og dugang bahin sa Bibliya.

DUGANG BULUHATON

Sa hinapos sa tuig, si Brader J. F. Rutherford nagpadalag sulat sa tanang kongregasyon. Siya miingon nga “niining tuiga, mas daghan ang nasangyawan ug natabangan nga makakat-on bahin sa Gingharian kon itandi sa milabayng mga tuig sa yugto sa pagpangani.” Dayon, siya midugang: “Dako pa ang buluhaton. Dasiga ang uban nga moapil niining buluhaton nga giuyonan sa Diyos.” Klaro nga gisunod sa mga Estudyante sa Bibliya ang giingon ni Brader Rutherford. Sa tuig 1922, maisogon nilang gisangyaw ang Gingharian sa talagsaon kaayong paagi.

Maisogong mga Higala

Ang mga Estudyante sa Bibliya nagpakitag inigsoong gugma pinaagi sa pagtabang sa usag usa. Sila maisogong mga higala “nga masaligan panahon sa kalisdanan,” sama sa atong makita sa mosunod nga eksperyensiya.—Prov. 17:17.

Niadtong Martes, Mayo 31, 1921, usa ka itom nga lalaki sa siyudad sa Tulsa, Oklahoma, U.S.A. ang gipriso ug gikasohan kay giatake niya ang usa ka puti nga babaye. Human niana, kapig 1,000 ka puting mga lalaki ang nakig-away sa mas gamayng grupo sa itom nga mga lalaki. Ang panag-away miabot dayon sa Greenwood, diin nagpuyo ang daghang itom nga mga tawo. Kapig 1,400 ka balay ug negosyohanan ang gipangkawatan ug gisunog. Sumala sa report, 36 ka tawo ang namatay, pero ang tinuod nga gidaghanon tingali moabot ug ginatos. Kini nga kagubot gitawag sa ulahi ug Tulsa Race Massacre.

Giasoy ni Brader Richard J. Hill, usa ka itom nga Estudyante sa Bibliya ug nagpuyo sa Greenwood, kon unsay nahitabo: “Tigom namo adtong gabhiona. Human sa tigom, nadungog namo ang pinusilay didto sa sentro sa Tulsa. Nagpadayon ang pinusilay hangtod sa lawom nga kagabhion.” Pagka-Miyerkoles sa buntag, Hunyo 1, misamot ang kagubot. “Dihay pipila ka tawo nga nangabot ug miingon nga kon gusto namong maprotektahan, kinahanglang moadto dayon mi sa Convention Hall.” Busa si Brader Hill, uban sa iyang asawa ug lima ka anak, miadto dayon sa Convention Hall sa Tulsa. Didto, dihay mga 3,000 ka itom nga lalaki ug babaye nga giprotektahan sa National Guard, kinsa gipadala sa gobyerno aron pahunongon ang panag-away.

Niana pong panahona, si Brader Arthur Claus, kinsa usa ka puti nga igsoon, mihimog maisogong desisyon. “Dihang nabalitaan nako nga gipangkawatan ug gipangsunog ang mga balay sa Greenwood, nakadesisyon ko nga susihon ang kahimtang sa akong minahal nga higala, si Brader Hill.”

Gamit ang The Harp of God, gitudloan ni Arthur Claus ang usa ka klase nga may 14 ka bata

Pag-abot niya sa balay ni Brader Hill, nakita niya ang puti nga silingan niini nga naggunit ug riple. Ang silingan, nga higala sab ni Brader Hill, nagtuo nga apil si Arthur sa nagpahinabog kagubot. “Nag-unsa man ka dinhi?” misinggit ang silingan.

“Kon wala pa siya makaangay sa akong tubag, pusilon gyod ko niya,” miingon si Arthur. “Gipasaligan nako siya nga higala ko ni Brader Hill ug kadaghan na ko nakaanha sa iyang balay.” Naprotektahan ni Arthur ug sa silingan ni Brader Hill ang propidad batok sa mga kawatan.

Wala madugay, nahibaloan ni Arthur nga si Brader Hill ug ang pamilya niini tua sa Convention Hall. Si Arthur giingnan nga ang itom nga mga tawo dili makabiya didto kon walay mando nga pinirmahan ni Heneral Barrett, ang nagdumalang opisyal. Si Arthur miingon: “Lisod kaayong makigkita sa heneral. Dihang giingnan nako siya nga akong kuhaon ang pamilya ni Brader Hill, siya nangutana: ‘Bantayan ba nimo ning pamilyaha ug atimanon ang ilang mga panginahanglan?’ Siyempre, nalipay kong miingon ug oo.”

Dala ang pinirmahang mando, si Arthur nagdalidalig adto sa Convention Hall. Gitunol niya kini sa usa ka opisyal kinsa miingon: “Pinirmahan man diay ni sa heneral mismo! Nahibalo ba ka nga ikaw ang unang tawo nga nakahimo niini?” Wala madugay, nakita nila si Brader Hill ug ang iyang pamilya. Ang tibuok pamilya misakay sa sakyanan ni Arthur ug namauli.

Giseguro ni Brader Claus nga si Brader Hill ug ang iyang pamilya magpabiling luwas. Dihang nakita sa uban ang kaisog ug inigsoong gugma ni Brader Claus, nakadayeg kaayo sila. Si Arthur miingon: “Ang silingan nga mitabang sa pagprotektar sa propidad ni Brader Hill mas mitahod sa mga Saksi ni Jehova. Ug daghan ang nainteres sa Gingharian kay nakita nila nga walay pagpihig sa rasa ug walay usa sa katawhan sa Diyos ang naghunahuna nga mas labaw siya sa uban.”

a Ang The Golden Age giilisag ngalan nga Consolation niadtong 1937 ug Awake! niadtong 1946.