Ang “Balaod sa Pagkamaayo” Nagpalihok ba Nimo?

“ANG kaayo nga gipakita sa mga igsoon mao gyoy nakatandog nako.” Mao nay giingon ni Lisaa dihang gipangutana siya kon unsay unang nakadani niya sa kamatuoran. Parehas ana ang giingon ni Anne. “Sa primero mas nadani ko sa kaayo sa mga Saksi kay sa ilang gitudlo.” Karon, kini nga mga sister ganahan nang magbasa ug mamalandong sa Bibliya, pero dako gyod ug epekto ang kaayo nga gipakita kanila.

Unsaon nato pagpakitag kaayo nga makatandog sa kasingkasing sa uban? Hisgotan nato ang duha ka paagi: sa atong sinultihan ug sa atong binuhatan. Dayon hisgotan nato kon kinsay angay natong pakitaan ug kaayo.

“ANG BALAOD SA PAGKAMAAYO” ANGAY NGA NAA SA ATONG DILA

Bahin sa maayo kaayong asawa, ang Proverbio kapitulo 31 nag-ingon nga “ang balaod sa pagkamaayo naa sa iyang dila.” (Prov. 31:26) Kini nga “balaod” maoy motabang niya aron maayo ang iyang isulti ug ang iyang paagi sa pagsulti. Ang mga amahan angay pong magpagiya niini nga “balaod.” Ang kadaghanang ginikanan nahibalo nga kon sakit silag sinultihan, dili ni maayog epekto sa ilang anak, ug posible nga dili mopatuo nila ang ilang anak. Pero kon buotan silang manulti, mas sayon para sa ilang anak nga maminaw ug mopatuo nila.

Ginikanan man ka o dili, unsay imong himoon aron maayo ang imong sinultihan? Naa tay makat-onan sa unang bahin sa Proverbio 31:26: “Iyang gibuka ang iyang baba uban ang kaalam.” Nagpasabot ni nga kinahanglan tang mag-amping sa atong isulti ug sa atong paagi sa pagsulti. Sagad makatabang kon pangutan-on nato ang atong kaugalingon, ‘Kini bang akong isulti makapalagot o makapakalma?’ (Prov. 15:1) Oo, maayo gyod kon maghunahuna ta sa dili pa mosulti.

Ang Bibliya dugang miingon: “Ang mga pulong nga wala hunahunaa samag dunggab sa espada.” (Prov. 12:18) Kon hunahunaon nato ang epekto sa atong sinultihan, makatabang ni nga makontrol nato ang atong dila. Oo, ang pagsunod sa “balaod sa pagkamaayo” makatabang nato nga dili mogamit ug sakit nga mga pulong o mosulti sa sakit nga paagi. (Efe. 4:31, 32) Ang dili maayong hunahuna ug sinultihan kinahanglan natong ilisan ug maayo ug buotan nga sinultihan. Si Jehova nagpakitag maayong ehemplo niining bahina dihang gipasaligan niya ang iyang alagad nga si Elias, kinsa nahadlok pag-ayo. Pinaagig anghel, si Jehova misulti sa “kalma ug hinay nga tingog.” (1 Hari 19:12) Pero ang kaayo dili lang makita diha sa sinultihan. Angay pod ning makita diha sa buhat. Unsaon man?

ANG ATONG MAAYONG MGA BUHAT MAKADANI SA UBAN

Aron masundog si Jehova, ang atong maayong sinultihan angay natong ubanan ug maayong mga buhat. (Efe. 4:32; 5:1, 2) Si Lisa, nga gihisgotan ganina, nahinumdom sa kaayo nga gipakita kaniya sa mga Saksi. Siya miingon: “Dihang ang among pamilya kalit nga gipapahawa sa among balay, duha ka magtiayon sa kongregasyon ang mibiya usa sa ilang trabaho aron tabangan mi nga mag-empake. Wa pa gani ko mag-Bible study adtong panahona!” Tungod sa kaayo nga gipakita kang Lisa, nadasig siya nga magtuon sa Bibliya.

Si Anne, nga gihisgotan ganina, mapasalamaton pod sa kaayo nga gipakita kaniya sa mga Saksi. Siya miingon: “Tungod sa kinaiya sa kadaghanang tawo, dili ko bastabasta mosalig sa uban. Maong dihang nailaila nako ang mga Saksi, gikuwestiyon nako ang ilang motibo. Naghunahuna ko, ‘Nganong buotan man kaayo sila nako?’ Pero kay tininuod man ang kaayo sa nag-Bible study nako, misalig ko niya.” Unsay maayong resulta? “Sa ulahi, nainteres na ko sa akong ginatun-an.”

Matikdi nga natandog gyod si Lisa ug Anne sa kaayo nga gipakita sa mga igsoon. Tungod ana, nainteres sila sa kamatuoran ug misalig kang Jehova ug sa iyang katawhan.

SUNDOGA ANG DIYOS SA PAGPAKITAG KAAYO SA UBAN

Ang uban tingali buotan manulti o mapahiyomon kay mao nay ilang kultura. Kon ingon ana ta kay mao nay atong kultura o kinaiya, maayo nâ. Pero kon mao ra nay hinungdan nga nagpakita tag kaayo, posibleng wala nato masundog ang kaayo sa Diyos.​—Itandi ang Buhat 28:2.

Ang tinuod nga kaayo o pagkabuotan apil sa bunga sa balaang espiritu sa Diyos. (Gal. 5:22, 23) Busa aron mapakita nato ang tinuod nga kaayo, kinahanglan natong tugotan ang espiritu sa Diyos sa pag-impluwensiya sa atong hunahuna ug binuhatan. Pinaagi ana, masundog nato si Jehova ug si Jesus. Ug ingong mga Kristohanon, naa tay sinserong interes sa uban. Busa gipalihok ta sa atong gugma kang Jehova nga Diyos ug sa atong gugma sa isigkatawo. Tungod niana, ang atong kaayo mahimong mas puwersado kay kinasingkasing ni ug giuyonan ni sa Diyos.

KINSAY ANGAYNG PAKITAAN UG KAAYO?

Tingali, sayon rang magpakitag kaayo niadtong maayo kanato o niadtong atong kaila. (2 Sam. 2:6) Ang usa ka paagi nga mahimo nato nâ mao ang pagpasalamat kanila. (Col. 3:15) Pero komosta kon para nato, ang usa ka tawo dili angayng pakitaag kaayo?

Konsideraha ni: Si Jehova ang kinalabwang ehemplo sa pagpakitag “dili hitupngang pagkamaayo,” ug ang iyang Pulong nagtudlo natog importanteng leksiyon bahin sa pagpakita niini nga hiyas. Ang ekspresyong “dili hitupngang pagkamaayo” daghang beses nga gigamit diha sa Kristohanon Gregong Kasulatan. Sa unsang paagi ang Diyos nagpakita kanatog kaayo?

Hunahunaa ang milyonmilyong mga tawo nga gipakitaan ni Jehova ug kaayo pinaagi sa pagtagana sa ilang panginahanglan aron magpabiling buhi. (Mat. 5:45) Gani, bisan sa wala pa makaila ang mga tawo kang Jehova, gipakitaan na niya silag kaayo. (Efe. 2:4, 5, 8) Pananglitan, gihatag niya ang iyang kinamaayohan, ang iyang bugtong Anak, para sa tanang tawo. Si apostol Pablo misulat nga ang pagtagana ni Jehova sa lukat nagpakita nga “ang pagkamaayo sa Diyos dili gayod hitupngan!” (Efe. 1:7) Dugang pa, bisag makasala ta ug mapaguol nato si Jehova, padayon gihapon ta niyang gigiyahan ug gitudloan. Samag “taligsik” nga hinayhinayng motulo diha sa mga sagbot, ang iyang instruksiyon ug mga pulong mogiya nato sa lumo nga paagi. (Deut. 32:2) Dili gyod nato mabaslan ang tanang kaayo nga iyang gipakita kanato. Ug nahibalo ta nga kon wala ang dili hitupngang pagkamaayo ni Jehova, wala tay paglaom.​—Itandi ang 1 Pedro 1:13.

Wa gyoy duhaduha, ang pagkamaayo ni Jehova makapatandog ug makapadasig. Busa imbes mamili ta kon kinsa lay pakitaan natog kaayo, angay tang maningkamot nga sundogon si Jehova sa pagpakitag kaayo kada adlaw. (1 Tes. 5:15) Kon pirme tang magpakitag kaayo, sama tag baga nga jacket nga makahatag ug kainit sa tugnawng panahon. Makahupay ta sa atong pamilya, mga igsoon sa pagtuo, katrabaho, schoolmate, ug mga silingan.

Hunahunaa ang imong pamilya o ang mga igsoon sa kongregasyon nga makabenepisyo sa imong maayong mga pulong ug buhat. Tingali sa inyong kongregasyon naay nanginahanglan gyod ug tabang sa pag-atiman sa balay ug garden o sa paghimo sa ubang buluhaton sama sa pagpamalit. Dugang pa, kon naa kay mahibalag sa ministeryo nga nanginahanglag tabang, puwede ba kang makatabang niya?

Agig pagsundog kang Jehova, hinaot ang atong mga pulong ug buhat kanunayng nahiuyon sa “balaod sa pagkamaayo.”