Ang Tinuod nga Kaalam Nagasinggit

1. Unsay reaksiyon sa daghang tawo sa maalamong tambag sa Bibliya? (Proverbio 1:20, 21)

SA DAGHANG nasod, sagad makakita tag malipayong mga igsoon diha sa kadalanan nga nagtanyag ug mga publikasyon sa mga tawo. Tingali nakasulay na ka niini nga buluhaton, ug seguradong nakahunahuna ka sa giingon sa basahon sa Proverbio​—nga ang kaalam nagasinggit diha sa kadalanan aron ang mga tawo makadungog sa tambag niini. (Basaha ang Proverbio 1:20, 21.) Makita diha sa Bibliya ug sa atong mga publikasyon ang “tinuod nga kaalam”​—ang kaalam ni Jehova. Kini nga impormasyon ang gikinahanglan sa mga tawo aron makabaton silag kinabuhing walay kataposan. Malipay ta dihang naay modawat sa atong publikasyon. Pero dili tanan ang modawat. Ang uban dili gustong mahibalo sa giingon sa Bibliya. Kataw-an pod ta sa uban. Para nila, karaan na kaayo ang Bibliya. Ang uban pod manaway sa gitudlo sa Bibliya bahin sa moralidad. Ug para nila, kadtong nagsunod niini estrikto ra kaayo ug mahukmanon. Pero tungod sa gugma ni Jehova, siya padayong naghatag sa iyang kaalam ngadto sa tanan. Sa unsang paagi?

2. Asa ta makakuhag tinuod nga kaalam, pero unsay gipili sa kadaghanan?

² Gihatag ni Jehova ang iyang Pulong, ang Bibliya, aron mabatonan nato ang tinuod nga kaalam. Halos tanang tawo naay Bibliya. Ug gawas niana, duna tay mga publikasyon nga gibase sa Pulong sa Diyos. Tungod sa panalangin ni Jehova, kini nga mga publikasyon mabatonan sa kapig 1,000 ka pinulongan. Kadtong maminaw, sa ato pa, mobasa ug mopadapat sa ilang nakat-onan, makabenepisyo. Pero ang kadaghanan mipili nga dili maminaw sa tinuod nga kaalam. Dihang mohimo silag desisyon, mas gusto nilang mosalig sa ilang kaugalingon o mamati sa uban. Basin gani ubos ang ilang panglantaw nato kay nagsunod ta sa giingon sa Bibliya. Hisgotan niini nga artikulo kon nganong ingon niana ang reaksiyon sa mga tawo. Pero hisgotan una nato kon sa unsang paagi atong mabatonan ang kaalam nga gikan kang Jehova.

ANG KAHIBALO BAHIN KANG JEHOVA MORESULTAG KAALAM

3. Unsay kahulogan sa tinuod nga kaalam?

³ Ang kaalam mao ang paggamit sa atong nahibaloan aron makahimo tag maayong mga desisyon. Pero labaw pa niana ang tinuod nga kaalam. Ang Bibliya nag-ingon: “Ang pagkahadlok kang Jehova mao ang sinugdan sa kaalam, ug ang kahibalo bahin sa Usa nga Labing Balaan mao ang pagsabot.” (Prov. 9:10) Busa dihang mohimo tag importanteng desisyon, kinahanglang ibase nato ni sa panghunahuna ni Jehova​—sa “kahibalo bahin sa Usa nga Labing Balaan.” Mahimo nato nâ pinaagi sa pagtuon sa Bibliya ug sa atong mga publikasyon. Nianang paagiha, nagpakita tag tinuod nga kaalam.​—Prov. 2:5-7.

4. Nganong si Jehova lang ang makahatag natog tinuod nga kaalam?

⁴ Si Jehova lang ang makahatag natog tinuod nga kaalam. (Roma 16:27) Nganong siya ang Tinubdan sa kaalam? Una, siya ang atong Maglalalang, ug walay kinutoban ang iyang kahibalo ug pagsabot bahin sa iyang kalalangan. (Sal. 104:24) Ikaduha, ang tanang ginahimo ni Jehova nagpakita nga maalamon siya. (Roma 11:33) Ikatulo, ang maalamong tambag ni Jehova makahatag gyod ug kaayohan niadtong mopadapat niini. (Prov. 2:10-12) Kon gusto natong makabaton ug tinuod nga kaalam, kinahanglang dawaton nato kining tulo ka importanteng kamatuoran ug magpagiya niini sa atong mga desisyon ug himoon.

5. Unsay resulta kon ang mga tawo dili moila nga si Jehova ang Tinubdan sa tinuod nga kaalam?

⁵ Daghan sa atong masangyawan ang moingon nga nindot kaayo ang kalalangan; pero dili sila motuo nga dunay Maglalalang. Ang uban motuog Diyos, pero para nila kinaraan na ang gitudlo sa Bibliya ug gusto nila nga silay magbuot sa ilang kinabuhi. Unsay resulta? Mas maayo ba ang kahimtang sa kalibotan kay ang mga tawo nagsalig sa ilang kaalam imbes sa kaalam sa Diyos? Naa ba silay tinuod nga kalipay o lig-ong paglaom sa umaabot? Ang atong makita sa atong palibot nagpamatuod niini nga kamatuoran: “Walay kaalam o katakos sa pag-ila o tambag nga makabarog batok kang Jehova.” (Prov. 21:30) Busa kinahanglang mangayo ta kanunay kang Jehova ug tinuod nga kaalam! Pero makapaguol kay ang kadaghanan wala maghimo ana. Ngano?

KON NGANONG GISALIKWAY SA MGA TAWO ANG TINUOD NGA KAALAM

6. Sumala sa Proverbio 1:22-25, kinsa ang dili gustong maminaw sa tinuod nga kaalam?

⁶ Daghan ang dili gustong maminaw sa tinuod nga kaalam nga “nagasinggit diha sa dalan.” Sumala sa Bibliya, dunay tulo ka grupo sa mga tawo nga nagsalikway sa kaalam: ang mga “walay kasinatian,” “bugalbugalon,” ug “buangbuang.” (Basaha ang Proverbio 1:22-25.) Hisgotan nato ang mga kinaiya sa maong mga tawo nga maoy hinungdan nga gisalikway nila ang kaalam nga gikan sa Diyos. Hisgotan sab nato kon unsaon nga dili nato masundog ang maong mga kinaiya.

7. Nganong ang uban mipili nga magpabiling “walay kasinatian”?

⁷ Ang mga“walay kasinatian” mao kadtong mga inosente ug daling motuo o mailad. (Prov. 14:15, footnote.) Daghan tag masangyawan nga ingon ana. Pananglitan, minilyon ang nalimbongan sa mga lider sa relihiyon o politika. Ang uban dili makatuo nga nailad sila sa maong mga lider. Pero kadtong gihisgotan sa Proverbio 1:22 mipili nga magpabiling walay kasinatian kay mao nay ilang gusto. (Jer. 5:31) Gibuhat nila kon unsay ilang gusto ug dili sila ganahang mahibalo sa giingon sa Bibliya o mosunod sa mga balaod niini. Daghan ang parehas sa debotadong babaye sa Quebec, Canada, kinsa miingon sa usa ka Saksi, “Kon giilad mi sa among pari, iya na nang sala!” Dili gyod nato gustong sundogon kadtong tinuyo nga nagpabiling ignorante!​—Prov. 1:32; 27:12.

8. Unsay makatabang nato aron makabaton tag kasinatian?

⁸ Ang Bibliya nagdasig nato nga dili magpabiling walay kasinatian, kondili ‘magpakahamtong sa atong pagsabot.’ (1 Cor. 14:20) Kon ipadapat nato ang mga prinsipyo sa Bibliya, makabaton tag kasinatian. Anam-anam natong makita kon sa unsang paagi ang maong mga prinsipyo makatabang nato nga malikayan ang mga problema ug makahimog maalamong mga desisyon. Busa maayong susihon kon miuswag ba ta niining bahina. Kon taudtaod na tang nag-Bible study ug nagtambongan sa mga tigom, puwede natong pangutan-on ang kaugalingon kon nganong wala pa ta magpahinungod kang Jehova ug magpabawtismo. Kon bawtismado na ta, miuswag ba ta sa atong pagsangyaw ug pagtudlo sa maayong balita? Ang ato bang mga desisyon nagpakita nga nagpagiya ta sa mga prinsipyo sa Bibliya? Nagpakita ba tag Kristohanong mga hiyas sa atong pagpakiglabot sa uban? Kon nakita nato nga naa tay angayng pauswagon, kinahanglang pamalandongon nato ang mga pahinumdom ni Jehova, nga “nagahimong maalamon sa walay kasinatian.”​—Sal. 19:7.

9. Giunsa pagpakita sa mga “bugalbugalon” nga gisalikway nila ang kaalam?

⁹ Ang ikaduhang grupo sa mga tawo nga dili maminaw sa kaalam nga gikan sa Diyos mao ang mga “bugalbugalon.” Usahay makaatubang tag ingon ana nga mga tawo sa atong pagsangyaw. Ganahan silang magbiaybiay sa uban. (Sal. 123:4) Ang Bibliya nagpasidaan nga sa kataposang mga adlaw, daghan ang bugalbugalon o mabiaybiayon. (2 Ped. 3:3, 4) Sama sa mga umagad sa matarong nga si Lot, ang uban karon dili maminaw sa mga pasidaan gikan sa Diyos. (Gen. 19:14) Kataw-an nila kadtong nagsunod sa mga prinsipyo sa Bibliya. Nagpaulipon sila sa “kaugalingon nilang mga tinguha alang sa dili diyosnong mga butang.” (Jud. 7, 17, 18) Ang deskripsiyon sa Bibliya bahin sa mga bugalbugalon haom gyod sa kinaiya sa mga apostata ug sa uban nga nagsalikway kang Jehova!

10. Base sa Salmo 1:1, unsay atong himoon aron dili nato masundog ang mga bugalbugalon?

¹⁰ Unsay atong himoon aron dili nato masundog ang mga bugalbugalon? Dili ta makig-uban niadtong kanunayng mangitag sayop ug reklamador. (Basaha ang Salmo 1:1.) Nagpasabot ni nga dili ta maminaw o mobasag bisan unsa gikan sa mga apostata. Kon dili ta magbantay, dali ra tang mahimong reklamador ug hinawayon ug magduhaduha na ta kang Jehova ug sa mga instruksiyon nga atong madawat pinaagi sa iyang organisasyon. Aron malikayan nâ, puwede natong pangutan-on ang atong kaugalingon: ‘Kon naay bag-ong instruksiyon o eksplinasyon, pirme ba kong moreklamo? Pirme ba kong mangitag sayop niadtong nagapanguna?’ Kon tul-iron dayon nato ang atong kaugalingon, si Jehova malipay nato.​—Prov. 3:34, 35.

11. Unsay panglantaw sa mga “buangbuang” sa mga sukdanan ni Jehova bahin sa moralidad?

¹¹ Ang ikatulong grupo sa mga tawo nga nagsalikway sa kaalam mao ang mga “buangbuang.” Sila buangbuang kay dili sila gustong mosunod sa mga balaod sa Diyos bahin sa moralidad. Gihimo nila kon unsay husto sa ilang panan-aw. (Prov. 12:15) Ilang gisalikway si Jehova, ang Tinubdan sa kaalam. (Sal. 53:1) Dihang masangyawan nato sila, sagad sawayon ta nila kay nagsunod ta sa mga prinsipyo sa Bibliya. Pero wala silay ikahatag nato nga mas maayo. Ang Bibliya nag-ingon: “Ang tinuod nga kaalam dili makab-ot sa buangbuang; wala siyay ikasulti diha sa ganghaan sa siyudad.” (Prov. 24:7) Ang buangbuang wala gyoy ikahatag nga maalamong tambag. Busa gipasidan-an ta ni Jehova nga ‘magpalayo sa tawong buangbuang’!​—Prov. 14:7.

12. Unsay makatabang aron dili nato masundog ang mga buangbuang?

¹² Dili ta parehas niadtong nagsalikway sa tambag sa Diyos kay atong gihigugma ang iyang tambag apil ang iyang mga sukdanan sa moralidad. Mapalig-on nato ang maong gugma pinaagi sa pagtandi sa mga resulta sa pagsunod ug dili pagsunod kang Jehova. Matikdi ang lainlaing problema nga giatubang sa mga tawo kay gisalikway nila ang maalamong tambag ni Jehova. Dayon pamalandonga kon unsa ka maayo ang imong kinabuhi kay gisunod nimo ang Diyos.—Sal. 32:8, 10.

13. Pugson ba ta ni Jehova sa pagsunod sa iyang maalamong tambag?

¹³ Gitanyag ni Jehova ang iyang kaalam ngadto sa tanan, pero wala siya mamugos nga dawaton kini. Hinuon, iyang gisulti kon unsay mahitabo niadtong dili maminaw sa iyang kaalam. (Prov. 1:29-32) Kadtong dili mosunod kang Jehova mag-antos sa resulta sa ilang desisyon. Sa ngadtongadto, ang ilang pagkinabuhi moresultag pag-antos, kalisdanan, ug sa ulahi kalaglagan. Pero kadtong maminaw sa maalamong tambag ni Jehova ug magpadapat niini makasalig niini nga saad: “Ang maminaw nako magpuyo nga may kasegurohan ug dili mahadlok nga may moabot nga katalagman.”​—Prov. 1:33.

ANG TINUOD NGA KAALAM MAKAHATAG NATOG KAAYOHAN

14-15. Unsay atong makat-onan sa Proverbio 4:23?

¹⁴ Makabenepisyo gyod ta kon ipadapat nato ang kaalam sa Diyos. Sa ato nang nahisgotan, si Jehova naghatag ug maalamong tambag nga sayon rang mabatonan. Pananglitan, sa tibuok basahon sa Proverbio, siya naghatag ug praktikal nga tambag nga makahatag gyod natog kaayohan kon atong ipadapat. Hisgotan nato ang upat ka pananglitan.

¹⁵ Panalipdi ang imong simbolikong kasingkasing. Ang Bibliya nag-ingon: “Labaw sa tanan nga imong bantayan, bantayi ang imong kasingkasing, kay nagdepende niini ang imong kinabuhi.” (Prov. 4:23) Hunahunaa kon unsay atong ginahimo aron mapanalipdan ang atong literal nga kasingkasing. Mokaon tag sustansiyadong pagkaon, mag-ehersisyo, ug maglikay ta sa dili maayong mga bisyo. Ingon ana pod ang atong himoon aron mapanalipdan ang atong simbolikong kasingkasing. Adlaw-adlaw tang mokaon ug espirituwal nga pagkaon pinaagi sa pagbasa sa Pulong sa Diyos. Mangandam ta, motambong, ug makigbahin sa mga tigom. Regular tang makigbahin sa ministeryo ug maglikay sa bisan unsa nga makadaot sa atong panghunahuna, sama sa imoral nga kalingawan ug daotang mga kauban.

16. Nganong praktikal kaayo ang tambag sa Proverbio 23:4, 5?

¹⁶ Magmakontento. Ang Bibliya nagtambag: “Ayaw pagpalabig hago sa pagbatog bahandi. . . . Inigtan-aw nimo niini, wala na kini, kay seguradong matuboan kinig pako sama sa agila ug molupad paingon sa langit.” (Prov. 23:4, 5) Ang kuwarta ug materyal nga mga butang dali rang mawala. Pero daghang dato ug pobre ang nangagpas nga makabaton ug daghang kuwarta. Tungod niini, sagad mohimo silag mga butang nga makadaot sa ilang reputasyon, sa ilang relasyon sa uban, ug bisan gani sa ilang panglawas. (Prov. 28:20; 1 Tim. 6:9, 10) Pero ang kaalam motabang nato nga mahimong balanse sa atong panglantaw sa kuwarta ug dili mahimong hakog, kondili mahimong kontento ug malipayon.​—Eccl. 7:12.

17. Sa unsang paagi mabatonan nato ang “dila sa maalamon” nga gihisgotan sa Proverbio 12:18?

¹⁷ Hunahunaa daan ang imong isulti. Kon dili ta mag-amping sa atong sinultihan, mahimong mapasakitan nato ang uban. Ang Bibliya nag-ingon: “Ang mga pulong nga wala hunahunaa samag dunggab sa espada, apan ang dila sa maalamon makaayo.” (Prov. 12:18) Mamentinar nato ang maayong relasyon kon dili nato ipanabi ang sayop sa uban. (Prov. 20:19) Aron ang atong sinultihan makaayo ug dili makapasakit, kinahanglang pun-on nato ang atong kasingkasing sa kahibalo nga gikan sa Pulong sa Diyos. (Luc. 6:45) Kon pamalandongon nato ang giingon sa Bibliya, ang atong sinultihan mahisamag “tuboran sa kaalam” nga makarepresko sa uban.​—Prov. 18:4.

18. Sa unsang paagi ang pagpadapat sa Proverbio 24:6 makatabang nato nga molampos sa ministeryo?

¹⁸ Sunda ang mga instruksiyon. Ang Bibliya naghatag niining praktikal nga tambag: “Pinaagi sa maalamong giya makiggubat ka, ug pinaagi sa daghang magtatambag dunay kalamposan.” (Prov. 24:6, footnote) Konsideraha kon sa unsang paagi ang pagpadapat niini nga prinsipyo makatabang nato nga molampos sa atong pagsangyaw ug pagpanudlo. Imbes sundon ang kaugalingon natong paagi sa pagministeryo, gusto natong sundon ang mga sugyot nga atong madawat. Makadawat tag maalamong giya diha sa atong mga tigom pinaagi sa mga pakigpulong nga gibase sa Bibliya ug mga pasundayag nga gihatag sa eksperyensiyadong mga igsoon sa pagbansay nato. Ang organisasyon ni Jehova nagtagana pod ug mga publikasyon ug video nga makatabang sa mga tawo nga masabtan ang Bibliya. Naningkamot ba ka nga mahimong hanas sa paggamit niini?

19. Unsay imong pagbati bahin sa kaalam nga gihatag ni Jehova? (Proverbio 3:13-18)

¹⁹ Basaha ang Proverbio 3:13-18. Mapasalamaton kaayo ta sa maayong tambag nga naa sa Pulong sa Diyos! Mag-unsa na lang kaha ta kon wala ni nga tambag? Niining artikuloha, nahisgotan nato ang pipila ka praktikal nga tambag sa basahon sa Proverbio. Siyempre daghan pag maalamong mga tambag si Jehova nga atong mabasa sa tibuok Bibliya. Hinaot determinado ta nga kanunayng ipadapat ang iyang maalamong mga tambag. Bisag ang kadaghanan walay pagpabili sa kaalam sa Diyos, kombinsido ta nga “kadtong naghawid pag-ayo [sa kaalam] tawgong malipayon.”