Kita Mabuhi sa Walay Kataposan

1. Unsay epekto kon pamalandongon nato ang saad ni Jehova nga kinabuhing walay kataposan?

SI Jehova nagsaad nga kadtong mosunod niya makadawat ug “kinabuhing walay kataposan.” (Roma 6:23) Kon pamalandongon nato ang saad ni Jehova, mas molalom ang atong gugma kaniya. Hunahunaa ni: Gimahal gyod ta pag-ayo sa atong langitnong Amahan mao nga dili gyod ta mabulag kaniya.

2. Sa unsang paagi makatabang nato ang saad nga kinabuhing walay kataposan?

² Ang saad sa Diyos nga kinabuhing walay kataposan motabang nato nga makalahutay sa mga pagsulay. Bisan pag patyon ta sa atong mga kaaway, dili ta mokompromiso. Ngano? Kay nahibalo ta nga kon mamatay ta nga matinumanon kang Jehova, iya tang banhawon nga may paglaom nga dili na mamatay pag-usab. (Juan 5:28, 29; 1 Cor. 15:55-58; Heb. 2:15) Nganong makaseguro ta nga puwede tang mabuhi sa walay kataposan? Konsideraha ang mosunod nga mga rason.

SI JEHOVA WALAY KATAPOSAN

3. Nganong makaseguro ta nga kaya ni Jehova nga masustenir ang atong kinabuhi hangtod sa hangtod? (Salmo 102:12, 24, 27)

³ Nahibalo ta nga kaya ni Jehova nga masustenir ang atong kinabuhi hangtod sa hangtod kay siya ang Tuboran sa kinabuhi ug wala siyay kataposan. (Sal. 36:9) Matikdi ang pipila ka teksto sa Bibliya nga nagpamatuod nga si Jehova naglungtad na sukad pa sa una ug dili mamatay. Ang Salmo 90:2 nag-ingon nga si Jehova “gikan sa walay sinugdanan hangtod sa walay kataposan.” Parehas pod ana ang giingon sa Salmo 102. (Basaha ang Salmo 102:12, 24, 27.) Ug si propetang Habacuc misulat bahin sa atong langitnong Amahan: “Oh Jehova, dili ba naglungtad na ka sukad pa kaniadto? Oh akong Diyos, akong Balaang Usa, ikaw dili mamatay.”​—Hab. 1:12.

4. Bisan pag maglisod tag sabot nga si Jehova kanunayng naglungtad, nganong dili ta angayng magduhaduha niana?

⁴ Naglisod ba kag sabot sa ideya nga si Jehova naglungtad sukad pa sa una ug “hangtod sa hangtod”? (Isa. 40:28) Daghan pod ang naglisod ug sabot ana. Bahin sa Diyos, si Elihu miingon: “Ang gidaghanon sa iyang mga tuig dili matukib.” (Job 36:26; footnote) Pero kon wala ta kasabot sa usa ka butang, wala nâ magpasabot nga dili nâ tinuod. Pananglitan, bisag dili nato bug-os masabtan ang pag-obra sa kahayag, nagpasabot ba ni nga dili tinuod ang kahayag? Wala! Sa samang paagi, kita pod dili gyod bug-os makasabot sa ideya nga si Jehova naglungtad sukad pa sa una ug hangtod sa hangtod. Pero wala nâ magpasabot nga ang maong ideya dili tinuod. Ang kamatuoran bahin sa Maglalalang wala mag-agad sa atong masabtan o dili masabtan. (Roma 11:33-36) Ug siya naglungtad na sa wala pa ang uniberso, apil ang adlaw ug mga bituon. Nahibalo ta nga si Jehova “ang Magbubuhat sa yuta pinaagi sa iyang gahom.” Oo, siya naglungtad na sa wala pa niya ‘ibuklad ang kalangitan.’ (Jer. 51:15; Buh. 17:24) Unsa pay laing rason nga makaseguro ta nga posibleng mabuhi ta sa walay kataposan?

GILALANG TA NGA MABUHI HANGTOD SA HANGTOD

5. Unsa untay paglaom sa unang magtiayon?

⁵ Sa tanang gilalang ni Jehova dinhi sa yuta, ang mga tawo lang ang iyang gihatagan ug paglaom nga dili mamatay. Pero gipasidan-an ni Jehova si Adan: “Kon bahin sa kahoy sa kahibalo sa maayo ug sa daotan, ayaw gayod ug kaon sa bunga niini, kay sa adlaw nga mokaon ka niini mamatay gyod ka.” (Gen. 2:17) Kon misunod pa si Adan ug Eva kang Jehova, dili unta sila mamatay. Makataronganon nga makaingon ta nga sa ngadtongadto, tugotan ra sila ni Jehova nga mokaon gikan “sa kahoy sa kinabuhi.” Nagpasabot to nga sila “mabuhi hangtod sa hangtod.”b​—Gen. 3:22.

6-7. (a) Unsa pay nagpakita nga ang mga tawo wala lalanga aron lang mamatay? (b) Unsa unyay gusto nimong himoon kon mabuhi na ka sa walay kataposan? (Tan-awa ang hulagway.)

⁶ Makapainteres kay nadiskobrehan sa ubang siyentista nga ang atong utok may kapasidad sa pagpondog mas daghang impormasyon kay sa atong makat-onan sa tibuok natong kinabuhi karon. Niadtong 2010, ang magasing Scientific American Mind nag-ingon nga ang kapasidad sa atong utok gibanabana nga 2.5 ka milyong gigabyte. Katumbas ni sa tulo ka milyong oras (kapig 300 ka tuig) nga programa sa TV. Ug basin ganig mas dako pa gyod ana ang kapasidad sa atong utok. Nagpakita lang nâ nga gihimo ni Jehova ang atong utok nga makapondog mas daghang impormasyon kay sa atong makat-onan sulod lang sa 70 o 80 ka tuig.​—Sal. 90:10.

⁷ Gilalang sab ta ni Jehova nga may tinguha nga dili mamatay. Ang Bibliya nag-ingon nga gibutang sa Diyos ‘ang walay kataposan diha sa kasingkasing’ sa mga tawo. (Eccl. 3:11) Usa nâ ka rason nga giisip natong kaaway ang kamatayon. (1 Cor. 15:26) Kon grabe tang masakit, wala ra ba tay himoon ug maghulat na lang nga mamatay? Dili. Sagad magpadoktor ta ug motomar ug tambal aron maayo ta. Gani, buhaton nato ang tanan nga puwedeng himoon aron dili ta mamatay. Ug kon mamatay ang atong minahal, bata man siya o tigulang, grabe ang atong kaguol ug dugay ning mawala. (Juan 11:32, 33) Siyempre, gihatagan ta sa atong mahigugmaong Maglalalang ug tinguha ug kapasidad nga magpabiling buhi kay katuyoan niya nga mabuhi ta sa walay kataposan. Pero daghan pag rason nga makatuo ta nga posible ang kinabuhing walay kataposan. Atong hisgotan ang gihimo ni Jehova kaniadto ug karon nga nagpamatuod nga wala mausab ang iyang orihinal nga katuyoan.

WALA MAUSAB ANG KATUYOAN NI JEHOVA

8. Bahin sa katuyoan ni Jehova para nato, unsay gipasalig kanato sa Isaias 55:11?

⁸ Bisan pag nakasala si Adan ug Eva, nga miresultag kamatayon sa ilang mga anak, wala usba ni Jehova ang iyang katuyoan. (Basaha ang Isaias 55:11.) Katuyoan gihapon niya nga ang matinumanong mga tawo mabuhi hangtod sa hangtod. Nahibalo ta ana tungod sa gisulti ug gihimo ni Jehova sa pagtuman sa iyang katuyoan.

9. Unsay gisaad sa Diyos? (Daniel 12:2, 13)

⁹ Si Jehova nagsaad nga iyang banhawon ang mga patay ug hatagan silag kahigayonan nga mabuhi hangtod sa hangtod. (Buh. 24:15; Tito 1:1, 2) Ang matinumanong si Job segurado nga si Jehova nangandoy sa pagbanhaw sa mga patay. (Job 14:14, 15) Si propetang Daniel nahibalo nga ang mga tawo may paglaom nga banhawon ug hatagag kahigayonan nga mabuhi hangtod sa hangtod. (Sal. 37:29; basaha ang Daniel 12:2, 13.) Ang mga Hudiyo sa panahon ni Jesus nahibalo sab nga hatagan ni Jehova ang iyang matinumanong mga alagad ug “kinabuhing walay kataposan.” (Luc. 10:25; 18:18) Si Jesus kadaghan naghisgot niini nga saad, ug siya mismo gibanhaw sa iyang Amahan.​—Mat. 19:29; 22:31, 32; Luc. 18:30; Juan 11:25.

10. Unsay gipamatud-an sa nahitabong mga pagkabanhaw kaniadto? (Tan-awa ang hulagway.)

¹⁰ Si Jehova ang Maghahatag ug Kinabuhi ug duna siyay gahom nga banhawon ang mga tawo. Iyang gihatagag gahom si propetang Elias aron banhawon ang anak sa babayeng balo sa Zarepta. (1 Hari 17:21-23) Sa ulahi, sa tabang sa Diyos, gibanhaw ni propetang Eliseo ang anak sa Sunaminhong babaye. (2 Hari 4:18-20, 34-37) Kini ug ang uban pang pagkabanhaw nagpamatuod nga si Jehova may gahom sa pagbanhaw sa mga tawo. Sa dinhi pa si Jesus sa yuta, iyang gipamatud-an nga gihatagan siya sa iyang Amahan niana nga gahom. (Juan 11:23-25, 43, 44) Karon, si Jesus tua na sa langit ug gihatag na kaniya “ang tanang awtoridad sa langit ug sa yuta.” Busa matuman gyod niya ang saad nga “ang tanang anaa sa handomanang mga lubnganan” banhawon ug hatagag kahigayonan nga mabuhi hangtod sa hangtod.​—Mat. 28:18; Juan 5:25-29.

11. Sa unsang paagi gipaposible sa lukat nga mabuhi ta hangtod sa hangtod?

¹¹ Nganong gitugotan ni Jehova nga ang iyang pinalanggang Anak makaagom ug sakit nga kamatayon? Gisulti ni Jesus ang rason: “Gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.” (Juan 3:16) Pinaagi sa paghatag sa iyang Anak ingong lukat aron mapasaylo ang atong mga sala, gipaposible sa Diyos nga makabaton tag kinabuhing walay kataposan. (Mat. 20:28) Gipatin-aw ni apostol Pablo kining importanteng bahin sa katuyoan sa Diyos dihang siya misulat: “Kay ang kamatayon pinaagi man sa usa ka tawo, ang pagkabanhaw sa mga patay pinaagi usab sa usa ka tawo. Kay ingon nga diha kang Adan ang tanan nangamatay, sa ingon usab diha sa Kristo ang tanan pagabuhion.”​—1 Cor. 15:21, 22.

12. Unsay papel sa Gingharian sa katumanan sa katuyoan ni Jehova?

¹² Gitudloan ni Jesus ang iyang mga sumusunod nga iampo nga moabot ang Gingharian ug matuman ang kabubut-on sa Diyos dinhi sa yuta. (Mat. 6:9, 10) Apil sa katuyoan sa Diyos nga ang mga tawo mabuhi sa walay kataposan sa yuta. Aron matuman nâ, gitudlo ni Jehova ang iyang Anak ingong Hari sa Mesiyanikong Gingharian. Ginatigom sa Diyos ang 144,000 ka tawo gikan sa yuta aron makauban ni Jesus sa pagtuman sa Iyang kabubut-on.​—Pin. 5:9, 10.

13. Unsay ginahimo ni Jehova karon, ug unsay angay nimong himoon sa pagsuportar niana?

¹³ Ginatigom karon ni Jehova ang “dakong panon” sa mga tawo ug ginabansay sila ingong mga sakop sa iyang Gingharian. (Pin. 7:9, 10; Sant. 2:8) Bisan pag kadaghanang tawo karon nabahinbahin tungod sa pagdumot ug gubat, kadtong apil sa dakong panon naningkamot nga mawala sa ilang kasingkasing ang tanang klase sa pagdumot. Ang ilang pagkinabuhi nagpakita nga ila nang nasalsal ang ilang mga espada ug gihimo kining mga punta sa daro. (Miq. 4:3) Imbes mag-apil-apil sa mga gubat nga maoy hinungdan sa daghang kamatayon, ginatabangan nila ang mga tawo nga makaplagan ang “tinuod nga kinabuhi” pinaagi sa pagtudlo kanila bahin sa matuod nga Diyos ug sa iyang katuyoan. (1 Tim. 6:19) Tingali supakon sila sa ilang pamilya o maglisod sila sa pinansiyal tungod kay gisuportahan nila ang Gingharian sa Diyos, pero gipaneguro ni Jehova nga mabatonan nila ang ilang panginahanglan. (Mat. 6:25, 30-33; Luc. 18:29, 30) Kining tanan nagpamatuod nga tinuod ang Gingharian sa Diyos, ug padayon niining tumanon ang katuyoan ni Jehova.

NINDOT KAAYO NGA PALAABOTON

14-15. Sa unsang paagi matuman na gyod ang saad ni Jehova nga wad-on sa bug-os ang kamatayon?

¹⁴ Si Jesus nagmando na karon ingong hari sa langit ug iya unyang tumanon ang tanang saad ni Jehova. (2 Cor. 1:20) Sukad niadtong 1914, nagsugod na si Jesus sa pagpangdaog sa iyang mga kaaway. (Sal. 110:1, 2) Sa dili madugay, laglagon niya ug sa iyang kaubang mga magmamando ang mga daotan.​—Pin. 6:2.

¹⁵ Sa Usa ka Libo ka Tuig nga Pagmando ni Jesus, iyang banhawon ang mga patay ug tabangan ang masinugtanong mga tawo nga mahimong hingpit. Human sa kataposang pagsulay, kadtong hukman ni Jehova ingong matarong “manag-iya sa yuta, ug sila magpuyo niini hangtod sa hangtod.” (Sal. 37:10, 11, 29) Ug makapalipay kay “ang kataposang kaaway, ang kamatayon, pagawagtangon.”​—1 Cor. 15:26.

16. Unsay angay natong pangunang motibo sa pag-alagad kang Jehova?

¹⁶ Sa ato nang nahisgotan, ang atong paglaom nga mabuhi sa walay kataposan naay lig-ong basehanan; gibase ni sa Pulong sa Diyos. Ang maong paglaom makatabang nato nga magmaunongon niining lisod nga panahon sa kataposang mga adlaw. Pero aron mapalipay si Jehova, kinahanglan nga ang atong motibo dili lang kay gusto natong mabuhi. Ang pangunang rason nga magmaunongon ta kang Jehova ug kang Jesus mao ang atong dakong gugma kanila. (2 Cor. 5:14, 15) Kana nga gugma magpalihok nato nga sundogon sila ug isangyaw ang atong paglaom. (Roma 10:13-15) Dihang mosakripisyo ta ug magmahinatagon, malipay si Jehova kanato ug mahimo ta niyang higala hangtod sa hangtod.​—Heb. 13:16.

17. Unsay angay natong buhaton? (Mateo 7:13, 14)

¹⁷ Maapil ba ta niadtong makadawat ug kinabuhing walay kataposan? Gihatagan ta ni Jehova niana nga kahigayonan, busa kinahanglan tang magpabilin sa dalan nga padulong sa kinabuhi. (Basaha ang Mateo 7:13, 14.) Unsa unya ang kinabuhi dihang mabuhi na ta sa walay kataposan? Hisgotan nato nâ sa sunod artikulo.