Tibuok Kalibotang Problema sa Mental Health
“Kanunay kong naay gikabalak-an, bisag nag-inusara ra ko sa kuwarto.”
“Dihang malipayon kaayo ko, mabalaka ko kay nahibalo ko nga human ana mobati kog grabeng kaguol.”
“Naningkamot ko nga magpokus kon unsa ray mahitabo karong adlawa, pero usahay kalit lang nga mabalaka ko sa daghang ubang butang.”
Gisulti ni sa mga tawo nga naay problema sa mental health. Ikaw ba—o ang usa nga imong suod—nag-atubang ug samang problema?
Hinumdomi nga wala ka mag-inusara. Daghan karon ang naapektohan sa problema sa mental health, sila man mismo o ang ilang minahal.
Makaingon gyod ta nga nagkinabuhi ta sa “kuyaw nga mga panahong lisod sagubangon” nga maoy hinungdan sa daghang kalisdanan. (2 Timoteo 3:1) Sumala sa usa ka pagtuon, sa tibuok kalibotan, mga usa sa matag walo ka tawo ang naay mental health disorder. Niadtong 2020, tungod sa COVID-19 nga pandemic, misakag mga 26 porsiyento ang naay anxiety disorder ug misaka pod ug mga 28 porsiyento ang naay grabeng depresyon.
Importanteng mahibaloan kon unsa ka daghan ang naay problema sa mental health. Pero mas importanteng mahibaloan kon unsay gibati nimo ug sa imong minahal ug kon unsay inyong mahimo aron moarang-arang ang kahimtang.
Unsa ang mental health?
Kon maayo ang imong mental health, sagad maayo ang imong bation ug makahimo ka sa imong mga buluhaton. Makaya nimo ang mga stress, epektibo ka sa imong trabaho, ug malipayon ka sa imong kinabuhi.
Ang mental disorder . . .
DILI resulta sa imong kahuyangan.
MAOY usa ka sakit nga moresultag grabeng pag-antos ug naay dili maayong epekto sa hunahuna, emosyon, ug batasan.
Sagad maoy hinungdan nga ang usa malisdan sa pagpakighigala ug sa pag-atubang sa kinabuhi adlaw-adlaw.
Makaapektar sa tanan bisag unsa pay edad, kultura, rasa, tribo, relihiyon, edukasyon nga nakab-ot, o estado sa kinabuhi.
Tabang para sa naay problema sa mental health
Kon ikaw o ang imong minahal nakaeksperyensiyag dakong kausaban sa personalidad, naay problema sa tulog o kaon, o dugay nang nagsigeg kabalaka o kaguol, basig gikinahanglan ang medikal nga tabang aron mahibaloan ang problema ug matambalan kini. Pero asa ka makapangayog tabang?
Ang pinakamaalamong tawo nga nabuhi sukad, si Jesu-Kristo, miingon: “Ang mga tawong himsog wala magkinahanglag doktor, apan kadto lang mga masakiton.” (Mateo 9:12) Kadtong makadawat ug gikinahanglang medical therapy ug pagtambal matabangan nga moarang-arang ang ilang kondisyon ug makabatog mapuslanon ug malipayon nga kinabuhi. Kon grabe o dugay na ang mga simtomas, maalamon nga magpatambal dayon.a
Bisag ang Bibliya dili libro bahin sa medikal, makatabang ni sa atong mental health. Gidasig mo namo nga basahon ang mosunod nga mga artikulo nga naghisgot kon sa unsang paagi ang Bibliya makatabang nato sa pag-atubang sa problema sa mental health.
a Ang Bantayanang Torre wala mag-endorso ug bisan unsang pagtambal. Angayng susihon pag-ayo sa matag indibiduwal ang iyang kapilian sa dili pa mohimog desisyon.