Kon Unsaon nga mas Makabenepisyo Ka sa Imong Pagbasa sa Bibliya

1. Nganong makaingon ta nga importante kang Jesus ang Kasulatan?

IMADYINA nga naminaw ka samtang nanudlo si Jesus. Pirme siyang mokutlo sa Balaang Kasulatan. Gani, sa narekord nga unang mga pulong ni Jesus human sa iyang bawtismo ug ang kataposan niyang gisulti una siya mamatay, siya nagkutlo sa Kasulatan.b (Deut. 8:3; Sal. 31:5; Luc. 4:4; 23:46) Ug sulod sa tulo ug tunga ka tuig sukad siya nabawtismohan hangtod nga namatay siya, si Jesus kanunay nga nagbasa, nagkutlo, ug nagpatin-aw sa Kasulatan diha sa publiko.​—Mat. 5:17, 18, 21, 22, 27, 28; Luc. 4:16-20.

2. Samtang nagdako si Jesus, unsay nakatabang niya nga mapamilyar pag-ayo sa Kasulatan? (Tan-awa ang hulagway sa atubangan sa magasin.)

² Katuigan sa wala pa sugdi ni Jesus ang iyang ministeryo, pirme siyang magbasa ug maminaw sa Pulong sa Diyos. Sa balay, seguradong madunggan niya si Maria ug Jose nga mikutlo gikan sa Kasulatan dihang mag-estoryahanay ang ilang pamilya kada adlaw.c (Deut. 6:6, 7) Segurado pod ta nga si Jesus miadto sa sinagoga kada Igpapahulay uban sa iyang pamilya. (Luc. 4:16) Didto, naminaw siya pag-ayo samtang gibasa ang Kasulatan. Sa ngadtongadto, si Jesus nakakat-on sa pagbasa sa Balaang mga Sinulat. Busa si Jesus napamilyar pag-ayo sa Kasulatan, nakakat-on nga higugmaon kini, ug nagpaimpluwensiya niini. Pananglitan, hinumdomi ang nahitabo sa templo dihang 12 anyos pa lang si Jesus. Ang mga magtutudlo nga hawod kaayo sa Moisesnong Balaod “nahingangha sa iyang mga tubag ug pagsabot.”​—Luc. 2:46, 47, 52.

3. Unsay atong hisgotan niini nga artikulo?

³ Mapamilyar pod ta sa Pulong sa Diyos ug makakat-on sa paghigugma niini kon regular nato ning basahon. Pero sa unsang paagi mas makabenepisyo ta sa atong gibasa? Makakat-on ta sa giingon ni Jesus niadtong pamilyar sa Balaod, sama sa mga eskriba, Pariseo, ug Saduseo. Ang maong mga lider sa relihiyon pirmeng magbasa sa Kasulatan, pero wala sila makabenepisyo sa ilang gibasa. Gipakita ni Jesus ang tulo ka rason kon nganong wala sila makabenepisyo sa Kasulatan. Ang iyang giingon kanila motabang nato sa (1) pagsabot sa atong ginabasa, (2) pagpangitag espirituwal nga mga bahandi, ug (3) pagpaimpluwensiya sa Pulong sa Diyos.

SABTA ANG IMONG GINABASA

4. Unsay gitudlo sa Lucas 10:25-29 bahin sa pagbasa sa Pulong sa Diyos?

⁴ Gusto natong masabtan ang kahulogan sa atong mabasa sa Pulong sa Diyos. Kay kon dili, basin dili kaayo ta makabenepisyo sa atong pagbasa. Pananglitan, konsideraha ang giingon ni Jesus sa “tawong batid sa Balaod.” (Basaha ang Lucas 10:25-29.) Dihang ang tawo nangutana kang Jesus kon unsay kinahanglan niyang buhaton aron makabaton ug kinabuhing walay kataposan, gitabangan siya ni Jesus nga makita ang tubag diha sa Pulong sa Diyos. Iya siyang gipangutana: “Unsay nahisulat sa Balaod? Unsay nasabtan nimo sa imong gibasa?” Nakahatag ang tawo ug saktong tubag pinaagi sa pagkutlog mga bersikulo bahin sa paghigugma sa Diyos ug paghigugma sa isigkatawo. (Lev. 19:18; Deut. 6:5) Pero matikdi ang sunod nga giingon sa tawo: “Kinsa may akong higugmaon?” Gipakita sa tawo nga wala gyod niya masabti ang kahulogan sa iyang gibasa. Tungod ana, wala siya mahibalo kon unsaon niya pagpadapat ang maong mga bersikulo.

5. Sa unsang paagi ang pag-ampo ug ang dili pagdalidalig basa makatabang nga mas masabtan nato ang atong ginabasa?

⁵ Mas masabtan nato ang Pulong sa Diyos kon batasanon nato kining mosunod nga mga sugyot. Pag-ampo sa dili pa mobasa. Kinahanglan nato ang tabang ni Jehova aron masabtan ang Bibliya, busa pangayoon nato ang iyang balaang espiritu aron makapokus ta sa atong pagbasa. Dayon ayaw pagdalidalig basa. Makatabang na nga mas masabtan nimo ang imong ginabasa. Basin makatabang pod ang pagbasag kusog o ang pagpaminawg audio recording sa Bibliya samtang nagbasa ka. Kon madungog nimo ang rekording samtang nagbasa ka, mas makasabot, makahinumdom, ug makakat-on ka sa imong gibasa sa Pulong sa Diyos. (Jos. 1:8) Human nimog basa, pag-ampo pag-usab aron pasalamatan si Jehova sa iyang regalo nga Bibliya ug pangayog tabang aron mapadapat nimo ang imong nabasa.

6. Nganong ang pagpangutana sa kaugalingon ug pagsulat ug mugbong nota makatabang dihang magbasa? (Tan-awa sab ang hulagway.)

⁶ Nia pay duha ka sugyot nga makatabang nimo nga mas masabtan ang Bibliya. Pangutan-a ang imong kaugalingon bahin sa imong nabasa. Dihang magbasag asoy, konsideraha ni: ‘Kinsa ang pangunang mga karakter? Kinsay nag-estorya? Kinsay iyang kaestorya, ug ngano? Asa ug kanus-a kini nahitabo?’ Kini nga mga pangutana makatabang nimo nga mapamalandong ug masabtan ang pangunang mga punto sa imong gibasa. Puwede pod kang maghimog mugbong nota samtang magbasa. Kon magsulat ka, mapalihok ka nga hunahunaon ang imong gibasa maong mas masabtan ni nimo pag-ayo. Makatabang pod ni nga mahinumdoman nimo ang imong gibasa. Puwede nimong isulat ang imong mga pangutana, irekord ang imong mga na-research, isumaryo ang pangunang mga punto, isulat kon unsaon nimo pagpadapat ang imong nabasa, o kaha ang imong gibati sa imong gibasa. Ang pagsulat niana makatabang nga isipon nimo ang Pulong sa Diyos ingong personal niya nga mensahe para nimo.

7. Unsang katakos ang kinahanglan nato samtang magbasa, ug ngano? (Mateo 24:15)

⁷ Gihisgotan ni Jesus ang importanteng katakos nga gikinahanglan samtang magbasa sa Pulong sa Diyos​—ang pagsabot. (Basaha ang Mateo 24:15.) Unsa ang pagsabot? Kini ang katakos nga makita kon sa unsang paagi konektado o magkalahi ang mga ideya ug masabtan bisan ang mga ideya nga dili daling mamatikdan. Ug sumala sa gipasiugda ni Jesus, kinahanglan nato ang pagsabot aron makita kon unsang mga panghitabo ang nagtuman sa tagna sa Bibliya. Kinahanglan pod ni nato aron makabenepisyo ta pag-ayo sa tanan nga atong mabasa sa Bibliya.

8. Unsaon nato pagbasa nga may pagsabot?

⁸ Si Jehova maghatag sa iyang mga alagad ug pagsabot. Busa hangyoa siya pinaagi sa pag-ampo nga tabangan ka sa pag-ugmad niini nga katakos. (Prov. 2:6) Pero kinahanglang molihok ka uyon sa imong pag-ampo. Unsay imong himoon? Hunahunaa pag-ayo ang imong gibasa ug ang koneksiyon niini sa imo nang nahibaloan. Pag-research sa atong mga publikasyon, sama sa Giya sa Pagpanukiduki Para sa mga Saksi ni Jehova. Kini nga mga publikasyon makatabang nimo nga masabtan ang kahulogan sa mga teksto sa Bibliya ug kon unsaon kini pagpadapat. (Heb. 5:14) Dihang magbasa ka nga may pagsabot, mas molalom ang imong kahibalo bahin sa Bibliya.

PANGITAG ESPIRITUWAL NGA MGA BAHANDI

9. Unsang importanteng kamatuoran sa Pulong sa Diyos ang gibalewala sa mga Saduseo?

⁹ Ang mga Saduseo pamilyar kaayo sa unang lima ka basahon sa Hebreohanong Kasulatan. Pero gibalewala nila ang importanteng mga kamatuoran nga naa nianang inspiradong mga basahon. Pananglitan, matikdi kon giunsa pagtubag ni Jesus ang mga Saduseo nga nangutana niya bahin sa pagkabanhaw. Iya silang giingnan: “Wala ba mo makabasa sa basahon ni Moises, sa asoy bahin sa tunokong tanom, dihang ang Diyos nag-ingon kaniya: ‘Ako ang Diyos ni Abraham, ang Diyos ni Isaac, ug ang Diyos ni Jacob’?” (Mar. 12:18, 26) Bisag kadaghan nang nabasa sa mga Saduseo ang giingon sa Diyos kang Moises, ang pangutana ni Jesus nagpakita nga gibalewala nila ang usa ka importanteng kamatuoran sa Pulong sa Diyos​—ang pagtulon-an bahin sa pagkabanhaw.​—Mar. 12:27; Luc. 20:38.d

10. Unsay angay natong matikdan samtang magbasa?

¹⁰ Unsay atong makat-onan? Dihang magbasa, gusto natong matikdan ang tanang ikatudlo kanato sa usa ka bersikulo o asoy sa Bibliya. Gusto natong masabtan dili lang ang pangunang mga pagtulon-an, kondili apil pod ang lawom nga mga kamatuoran ug prinsipyo nga natago diha sa mga teksto.

11. Base sa 2 Timoteo 3:16, 17, unsaon nimo pagpangitag mga bahandi diha sa Bibliya?

¹¹ Unsaon nimo pagpangitag espirituwal nga bahandi samtang magbasa ka sa Bibliya? Konsideraha ang giingon sa 2 Timoteo 3:16, 17. (Basaha.) Matikdi nga “ang tibuok Balaang Kasulatan . . . mapuslanon” sa (1) pagtudlo, (2) pagbadlong, (3) pagtul-id, ug (4) pagdisiplina. Makita nimo kining upat ka kaayohan bisan sa mga basahon sa Bibliya nga dili nimo pirmeng gamiton. Samtang magbasa, hunahunaa kon unsay gitudlo niini bahin kang Jehova, sa iyang katuyoan, o sa mga prinsipyo diha sa Bibliya. Konsideraha kon sa unsang paagi ni makatabang sa pagbadlong. Matikdi ang mga bersikulo nga makatabang nimo nga makita ug masalikway ang sayop nga mga panghunahuna o kinaiya ug makatabang nimo nga magmatinumanon. Hunahunaa kon sa unsang paagi ang teksto makatabang nimo sa pagtul-id sa sayop nga ideya nga tingali nadunggan nimo sa ministeryo. Ug matikdi kon unsang pagdisiplina ang gihatag sa teksto nga makatabang nimo sa pagsundog sa panghunahuna ni Jehova. Kon imong hinumdoman kining upat ka kaayohan, makakita kag espirituwal nga bahandi nga makatabang nimo nga mas makabenepisyo sa pagbasa sa Bibliya.

PAGPAIMPLUWENSIYA SA IMONG GIBASA

12. Nganong gipangutana ni Jesus ang mga Pariseo, “Wala ba ninyo mabasa?”

¹² Gigamit pod ni Jesus ang pangutana nga“Wala ba ninyo mabasa?” aron ipakita nga ang mga Pariseo sayop ug pagsabot sa Kasulatan. (Mat. 12:1-7)e Nianang higayona, ang mga Pariseo miingon nga wala sunda sa mga tinun-an ni Jesus ang Igpapahulay. Sa pagtubag, si Jesus migamit ug duha ka pananglitan sa Kasulatan ug mikutlog bersikulo sa Oseas aron ipakita nga ang mga Pariseo wala makasabot kon nganong gihatag ang balaod sa Igpapahulay ug nga wala sila magpakitag kaluoy. Nganong wala sila maimpluwensiyahi sa ilang pagbasa sa Pulong sa Diyos? Kay mapahitas-on sila ug gusto lang nilang mangitag sayop sa uban. Tungod ani, wala nila masabti ang ilang gibasa.​—Mat. 23:23; Juan 5:39, 40.

13. Unsay angay natong kinaiya dihang magbasag Bibliya, ug ngano?

¹³ Makat-onan nato sa giingon ni Jesus nga importante ang hustong kinaiya dihang magbasa ta sa Bibliya. Dili sama sa mga Pariseo, kinahanglang sinsero ta ug andam mokat-on. Kinahanglan natong ‘mapainubsanong dawaton ang pagpatisok sa pulong.’ (Sant. 1:21) Kon mapainubsanon ta, tugotan nato ang Pulong sa Diyos nga mogamot sa atong kasingkasing. Ang mga leksiyon sa Bibliya bahin sa kaluoy ug gugma makaimpluwensiya lang nato kon likayan nato ang pagpanaway o ang pagkamapahitas-on.

14. Unsaon nato pagkahibalo kon nagpaimpluwensiya ba ta sa Bibliya? (Tan-awa sab ang mga hulagway.)

¹⁴ Ang atong pagtratar sa uban magpakita kon gitugotan ba nato ang Pulong sa Diyos sa pag-impluwensiya nato. Ang Pulong sa Diyos wala makaabot sa kasingkasing sa mga Pariseo maong ilang ‘gihukman nga daotan ang mga dili sad-an.’ (Mat. 12:7) Sa susama, ang atong panglantaw ug pagtratar sa uban magpakita kon nagpaimpluwensiya ba gyod ta sa Pulong sa Diyos. Pananglitan, makita ba dayon nato ang maayo sa uban, o manaway dayon ta sa ilang mga sayop? Maluluy-on ba ta ug andam mopasaylo, o masuk-anon ta ug dali rang magdumot? Ang tubag niini magpakita kon ang atong gibasa nag-impluwensiya ba gyod sa atong panghunahuna, pagbati, ug binuhatan.​—1 Tim. 4:12, 15; Heb. 4:12.

ANG PAGBASA SA PULONG SA DIYOS MORESULTAG KALIPAY

15. Unsay pagbati ni Jesus bahin sa Balaang Kasulatan?

¹⁵ Gihigugma ni Jesus ang Balaang Kasulatan, ug ang iyang pagbati niini gitagna sa Salmo 40:8: “Kalipay nako ang pagbuhat sa imong kabubut-on, Oh akong Diyos, ug ang imong balaod anaa sa akong kahiladman.” Tungod ana, malipayon siya ug malamposon sa pag-alagad kang Jehova. Sama kang Jesus, magmalipayon ug magmalamposon pod ta kon higugmaon nato ang Pulong sa Diyos.​—Sal. 1:1-3.

16. Unsay imong himoon aron mas makabenepisyo ka sa imong pagbasa sa Pulong sa Diyos? (Tan-awa ang kahong “Ang Giingon ni Jesus Makatabang nga Masabtan Nimo ang Imong Ginabasa.”)

¹⁶ Base sa atong nakat-onan sa giingon ni Jesus ug sa iyang ehemplo, importante nga pauswagon nato ang atong pagbasa sa Bibliya. Mapauswag nato ang atong pagsabot sa Bibliya kon mag-ampo ta, dili magdalidalig basa, mangutana, ug magsulat ug mugbong nota. Hunahunaon pod natog maayo ang atong gibasa ug mag-research sa atong binase sa Bibliya nga mga publikasyon. Mahimo pod tang hanas sa paggamit sa Bibliya, bisan sa mga teksto nga dili kaayo ta pamilyar, pinaagi sa pagpangitag espirituwal nga mga bahandi diha sa mga teksto. Ug aron maimpluwensiyahan ta sa Pulong sa Diyos, importante ang hustong kinaiya samtang magbasa. Kon maningkamot ta sa paghimo niini, mas makabenepisyo ta sa atong pagbasa sa Bibliya ug mas masuod ta kang Jehova.​—Sal. 119:17, 18; Sant. 4:8.