Padayong Palig-ona ang Imong Gugma sa mga Igsoon

1-2. (a) Nganong nakaingon si apostol Pablo nga gugma “ang kinalabwan” nga hiyas? (b) Unsang mga pangutana ang atong konsiderahon?

DIHANG si apostol Pablo naghisgot bahin sa pagtuo, paglaom, ug gugma, siya miingon nga “ang kinalabwan niini [nga mga hiyas] mao ang gugma.” (1 Cor. 13:13) Nganong nakaingon si Pablo niana? Sa umaabot, dili na ta kinahanglang magpakitag pagtuo sa mga saad sa Diyos bahin sa bag-ong kalibotan o molaom niini nga mga saad kay natuman na kini. Pero kinahanglan natong higugmaon kanunay si Jehova ug ang mga tawo. Gani, ang atong gugma para nila padayong motubo hangtod sa hangtod.

² Kay angay man tang magpakita kanunay ug gugma, atong konsiderahon ang tulo ka pangutana. Una, nganong angay natong higugmaon ang usag usa? Ikaduha, unsaon nato pagpakitag gugma sa usag usa? Ikatulo, sa unsang paagi padayon natong mapalig-on ang atong gugma sa usag usa?

NGANONG ANGAY NATONG HIGUGMAON ANG USAG USA?

3. Unsay mga rason nga maghigugmaay ta?

³ Nganong importante nga maghigugmaay ta? Ang usa ka rason kay ang gugma mao ang ilhanan sa tinuod nga mga Kristohanon. Giingnan ni Jesus ang iyang mga apostoles: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:35) Dugang pa, kon maghigugmaay ta, padayon tang magkahiusa. Si Pablo miingon nga gugma “ang hingpit nga bugkos sa panaghiusa.” (Col. 3:14) Pero naa pay laing importanteng rason kon nganong angay tang maghigugmaay. Si apostol Juan misulat sa mga Kristohanon: “Kadtong nahigugma sa Diyos kinahanglang mahigugma sab sa iyang igsoon.” (1 Juan 4:21) Dihang magpakita tag gugma sa usag usa, atong gipakita nga gihigugma nato ang Diyos.

4-5. Iilustrar kon sa unsang paagi ang atong gugma sa Diyos konektado sa atong gugma sa usag usa.

⁴ Sa unsang paagi ang atong gugma sa Diyos konektado kaayo sa atong gugma sa mga igsoon? Sa pag-ilustrar, konsideraha kon sa unsang paagi ang atong kasingkasing konektado sa ubang parte sa atong lawas. Dihang i-check sa doktor kon hinay o kusog ang pulso sa atong kamot, makakuha siyag ideya sa kondisyon sa atong kasingkasing. Unsay atong makat-onan niini bahin sa gugma?

⁵ Sama nga ang doktor makakuhag ideya sa kondisyon sa atong kasingkasing pinaagi sa pag-check sa atong pulso, makakuha pod tag ideya kon unsa ka lig-on ang atong gugma sa Diyos pinaagi sa pagsusi sa atong gugma sa uban. Kon namatikdan nato nga mihuyang ang atong gugma sa mga igsoon, posibleng ilhanan ni nga mihuyang pod ang atong gugma sa Diyos. Pero kon kanunay tang magpakitag gugma sa mga igsoon, ilhanan ni nga lig-on ang atong gugma sa Diyos.

6. Nganong angay tang mabalaka kon nagkahuyang ang atong gugma sa mga igsoon? (1 Juan 4:7-9, 11)

⁶ Angay tang mabalaka kon nagkahuyang ang atong gugma sa mga igsoon. Ngano? Kay nagpasabot ni nga nameligro ang atong espirituwalidad. Si apostol Juan klarong nagpasidaan: “Kon wala siya mahigugma sa iyang igsoon nga iyang nakita, unsaon man niya paghigugma sa Diyos nga wala niya makita?” (1 Juan 4:20) Unsay atong makat-onan niini? Si Jehova malipay lang kanato kon atong “higugmaon ang usag usa.”—Basaha ang 1 Juan 4:7-9, 11.

UNSAON NATO PAGPAKITAG GUGMA SA USAG USA?

7-8. Unsa ang pipila ka paagi nga makapakita tag gugma sa usag usa?

⁷ Sa Pulong sa Diyos, balikbalik natong mabasa ang sugo nga higugmaon ang usag usa. (Juan 15:12, 17; Roma 13:8; 1 Tes. 4:9; 1 Ped. 1:22; 1 Juan 4:11) Pero ang gugma maoy pagbati sa sulod nato, ug walay tawo nga makakita sa sulod sa atong kasingkasing. Busa sa unsang paagi mapakita nato ang atong gugma sa usag usa? Pinaagi sa atong sinultihan ug binuhatan.

⁸ Naay lainlaing paagi nga mapakita nato nga gimahal nato ang mga igsoon. Niay pipila ka pananglitan: “Sulti mog tinuod sa usag usa.” (Zac. 8:16) “Pagdinaitay kamo sa usag usa.” (Mar. 9:50) “Manguna sa pagpasidungog sa usag usa.” (Roma 12:10) “Dawata ang usag usa.” (Roma 15:7) “Padayon . . . nga magpinasayloay.” (Col. 3:13) “Padayon mong magtinabangay sa inyong bug-at nga mga palas-anon.” (Gal. 6:2) “Padayon sa paghupay sa usag usa.” (1 Tes. 4:18) “Padayon mong . . . maglig-onay.” (1 Tes. 5:11) “Pag-ampo alang sa usag usa.”—Sant. 5:16.

9. Nganong ang paghupay sa uban maoy importanteng paagi sa pagpakita sa atong gugma? (Tan-awa sab ang hulagway.)

⁹ Atong konsiderahon ang usa sa mga paagi sa pagpakitag gugma nga gihisgotan sa miaging parapo. Susihon nato ang giawhag ni Pablo: “Padayon sa paghupay sa usag usa.” Nganong ang paghupay sa uban maoy importanteng paagi sa pagpakita sa atong gugma? Sumala sa usa ka reperensiya, ang pulong nga gigamit ni Pablo para sa “paghupay” nagpasabot ug “pagtindog tapad sa usa ka tawo nga nakasinatig grabeng pagsulay aron dasigon siya.” Busa kon hupayon nato ang usa ka igsoon nga naa sa lisod nga kahimtang, ato siyang gitabangan nga makabarog ug makapadayon sa dalan sa kinabuhi. Sa matag higayon nga hupayon nato ang usa ka igsoon, atong gipakita nga ato siyang gimahal.—2 Cor. 7:6, 7, 13.

10. Sa unsang paagi konektado ang kaluoy ug paghupay?

¹⁰ Konektado kaayo ang kaluoy ug ang paghupay. Sa unsang paagi? Ang maluluy-ong tawo mapalihok sa paghupay sa uban ug maningkamot nga mamenosan ang ilang pag-antos. Busa sa primero, mobati tag kaluoy. Dayon mohatag tag paghupay. Matikdi kon giunsa pagpakita ni Pablo nga ang kaluoy ni Jehova sa mga tawo nagpalihok Niya sa paghupay kanila. Si Pablo miingon nga si Jehova “ang Amahan nga malumo ug maluluy-on ug ang Diyos sa tanang paghupay.” (2 Cor. 1:3) Dinhi, gigamit ni Pablo ang ekspresyong “malumo ug maluluy-on” aron ipasiugda ang dakong kaluoy ni Jehova para sa uban. Siya ang Amahan, o ang Tinubdan, sa kaluoy kay kini nga hiyas naggikan kaniya. Ug kini nga kaluoy nagpalihok niya nga hupayon ta “sa tanan natong pagsulay.” (2 Cor. 1:4) Sama nga ang hinlong tubig gikan sa tubod makarepresko niadtong mga giuhaw, ang paghupay gikan kang Jehova makarepresko niadtong nabug-atan sa mga problema. Unsaon nato pagsundog si Jehova, kinsa mibatig kaluoy ug naghupay sa uban? Ang usa ka paagi mao ang pag-ugmad ug mga hiyas nga magpalihok sa atong kasingkasing nga hupayon ang uban. Unsa ang pipila niini nga mga hiyas?

11. Sumala sa Colosas 3:12 ug 1 Pedro 3:8, unsa pa nga mga hiyas ang makatabang aron mamentinar nato ang gugma ug mahupay nato ang uban?

¹¹ Unsay makatabang aron mamentinar nato ang gugma nga atong gikinahanglan aron ‘makapadayon [ta] sa paghupay sa usag usa’ kada adlaw? Kinahanglan natong ugmaron ang mga hiyas sama sa simpatiya, inigsoong pagmahal, ug pagkamaayo. (Basaha ang Colosas 3:12; 1 Pedro 3:8.) Nganong makatabang nato kini nga mga hiyas? Kon ang kaluoy ug ang mga hiyas nga konektado niini mahimo nang bahin sa atong personalidad, mapalihok gyod ta nga hupayon ang mga nag-antos. Sama sa giingon ni Jesus, “gikan sa kadagaya sa kasingkasing ang baba mosulti. Ang maayong tawo magsultig maayo kay maayong mga butang ang anaa sa iyang kasingkasing.” (Mat. 12:34, 35) Ang atong paghupay sa mga igsoon maoy importante kaayong paagi nga mapakita nato ang atong gugma kanila.

SA UNSANG PAAGI PADAYON NATONG MAPALIG-ON ANG ATONG GUGMA SA USAG USA?

12. (a) Nganong kinahanglan tang magpabiling alerto? (b) Unsang pangutana ang atong konsiderahon?

¹² Gusto natong tanan nga ‘padayong higugmaon ang usag usa.’ (1 Juan 4:7) Pero angay natong hinumdoman ang pasidaan ni Jesus nga “mobugnaw ang gugma sa kadaghanan.” (Mat. 24:12) Si Jesus wala mag-ingon nga mahitabo ni sa kadaghanan sa iyang mga tinun-an. Bisan pa niana, kinahanglan tang magpabiling alerto aron dili ta maimpluwensiyahan sa kawalay-gugma sa mga tawo sa atong palibot. Busa atong konsiderahon kining importanteng pangutana: Naa bay paagi aron mahibaloan nato kon lig-on ba ang atong gugma sa mga igsoon?

13. Unsaon nato pagkahibalo kon lig-on ba ang atong gugma sa mga igsoon?

¹³ Ang usa ka paagi aron mahibaloan kon lig-on ba ang atong gugma mao ang pagsusi kon giunsa nato pag-atubang ang pipila ka situwasyon. (2 Cor. 8:8) Gihisgotan ni apostol Pedro ang usa niana nga situwasyon: “Labaw sa tanan, batoni ang init nga gugma sa usag usa, kay ang gugma magtabon sa daghang sala.” (1 Ped. 4:8) Busa ang atong reaksiyon sa kahuyangan ug kasaypanan sa mga igsoon magpaila kon lig-on ba ang atong gugma kanila.

14. Sumala sa 1 Pedro 4:8, unsa nga klase sa gugma ang atong gikinahanglan? Iilustrar.

¹⁴ Atong konsiderahon ang giingon ni Pedro. Ang unang bahin sa bersikulo 8 naghisgot kon unsa nga klase sa gugma ang kinahanglan natong ipakita—“init nga gugma.” Ang pulong nga gigamit ni Pedro para sa “init” literal nga nagkahulogang “giinat.” Ang ikaduhang bahin sa bersikulo naghisgot sa epekto sa init nga gugma. Kini magtabon sa sala sa atong mga igsoon. Puwede nato ning iilustrar niining paagiha: Ang atong gugma gunitan nato sa atong duha ka kamot, nga samag naggunit tag mainat nga tela. Dayon, ato ning inaton pag-ayo hangtod nga matabonan niini dili lang ang usa o duha ka sala, kondili ang “daghang sala.” Ang pagtabon nagpasabot ug pagpasaylo. Sama nga ang tela makatabon sa mansa, ang gugma makatabon sa kahuyangan ug kasaypanan sa uban.

15. Kon lig-on kaayo ang atong gugma sa mga igsoon, unsay kaya natong himoon? (Colosas 3:13)

¹⁵ Ang atong gugma sa uban kinahanglang lig-on kaayo aron mapasaylo nato ang kasaypanan sa atong mga igsoon, bisan pag usahay lisod nang himoon. (Basaha ang Colosas 3:13.) Kon magpasaylo ta, atong gipakita nga lig-on ang atong gugma ug gusto natong mapalipay si Jehova. Unsa pay makatabang nato nga palabyon ang makalagot nga kinaiya ug mga sayop sa uban?

16-17. Unsa pay makatabang nato nga palabyon ang ginagmayng sala sa uban? Iilustrar. (Tan-awa sab ang hulagway.)

¹⁶ Pagpokus sa positibong kinaiya sa mga igsoon, dili sa negatibo. Konsideraha ni nga ilustrasyon. Imadyina nga miadto ka sa usa ka tapoktapok uban sa pipila ka igsoon. Lingaw kaayo ka, ug pagkahuman nag-selfie ka uban nila. Gani, mikuha kag duha pa ka picture enkasog dili okey ang unang picture. Karon, naa na kay tulo ka picture. Pero sa usa niana, nagkusmod ang usa ka brader. Unsay imong himoon sa picture? Imo ning i-delete kay naa pa kay duha nga nag-smile ang tanan, apil ang brader.

¹⁷ Ang mga picture puwede natong ikompara sa mga memories nga atong gitipigan. Sagad, daghan tag maayong memories sa mga igsoon. Pero ibutang ta nga sa usa ka higayon naay nasulti o nahimo ang usa ka igsoon nga nakapasakit nimo. Unsay imong himoon niana nga memory? Imo nang i-delete, sama nga gi-delete nimo ang usa sa maong mga picture. (Prov. 19:11; Efe. 4:32) Kaya natong i-delete o kalimtan ang gamayng sala sa igsoon kay daghan pa tag maayong memories uban niya. Kadto nga mga memories ang gusto natong tipigan ug pabilhan.

KON NGANONG KINAHANGLAN NATO ANG GUGMA ILABINA KARON

18. Unsang mga punto bahin sa gugma ang atong nakat-onan niining artikuloha?

¹⁸ Nganong gusto natong magpabiling lig-on ang atong gugma sa usag usa? Sa ato nang nahisgotan, dihang magpakita tag gugma sa mga igsoon, atong gipakita ang atong gugma kang Jehova. Unsaon nato pagpakita ang atong gugma sa mga igsoon? Ang usa ka paagi mao ang paghupay kanila. Kita ‘makapadayon sa paghupay sa usag usa’ kon naa tay kaluoy. Unsaon nato pagpalig-on ang atong gugma sa usag usa? Pinaagi sa pagpaningkamot nga mapasaylo ang sayop sa uban.

19. Nganong importante ilabina karon nga magpakita tag gugma sa usag usa?

¹⁹ Nganong importante ilabina karon nga magpakita tag gugma sa usag usa? Matikdi ang rason nga gihatag ni Pedro: “Ang kataposan sa tanang butang duol na. Busa . . . batoni ang init nga gugma sa usag usa.” (1 Ped. 4:7, 8) Samtang mas nagkaduol ang kataposan niining daotang kalibotan, unsay atong madahom? Bahin sa iyang mga sumusunod, si Jesus nagtagna: “Dumtan mo sa tanang kanasoran tungod sa akong ngalan.” (Mat. 24:9) Aron makalahutay niana nga pagdumot, kinahanglan tang magpabiling nahiusa. Kon ato nang himoon, dili molampos si Satanas sa iyang mga paningkamot nga magkabahinbahin ta, kay kita nabugkos sa gugma—“ang hingpit nga bugkos sa panaghiusa.”—Col. 3:14; Filip. 2:1, 2.