Andam na ba Kang Magpahinungod sa Imong Kaugalingon Kang Jehova?

1-2. Unsay kinahanglang himoon sa dili pa magpabawtismo?

SA MIAGING lima ka tuig, kapin sa usa ka milyong tawo ang nagpabawtismo ingong mga Saksi ni Jehova. Daghan nila ang sama sa unang siglong tinun-an nga si Timoteo, kinsa nakakat-on sa kamatuoran sukad sa pagkabata. (2 Tim. 3:​14, 15) Ang uban nakakat-on bahin kang Jehova dihang hamtong na sila, ang pipila dihang tigulang na. Sa di pa dugay, naay babaye nga nagpa-Bible study sa mga Saksi ni Jehova ug nabawtismohan sa edad nga 97!

² Kon Bible study ka o anak ug Saksi, naghunahuna ba ka nga magpabawtismo? Maayo na nga tumong! Pero sa dili pa ka magpabawtismo, kinahanglan una kang magpahinungod sa imong kaugalingon kang Jehova. Hisgotan niining artikuloha kon unsay gipasabot sa pagpahinungod. Makatabang pod ni aron makita nimo nga dili ka angayng magduhaduha nga magpahinungod ug magpabawtismo dihang andam na ka.

UNSA ANG PAGPAHINUNGOD?

3. Paghatag ug pananglitan sa mga tawo diha sa Bibliya nga napahinungod kang Jehova.

³ Sa Bibliya, ang pagpahinungod nagpasabot ug paglain para sa sagradong katuyoan. Ang mga Israelinhon maoy nasod nga napahinungod kang Jehova. Pero ang pipila kanila napahinungod kang Jehova sa espesyal nga paagi. Pananglitan, si Aaron nagsul-ob ug “balaang ilhanan sa pagkanapahinungod”—usa ka sinawng plaka nga bulawan sa atubangan sa iyang turban. Kana nga bulawang plaka nagpakita nga siya gilain aron mag-alagad sa espesyal nga paagi—ingong hataas nga saserdote sa Israel. (Lev. 8:9) Ang mga Nazareo pod napahinungod kang Jehova sa espesyal nga paagi. Ang pulong “Nazareo,” nga naggikan sa Hebreohanon nga pulong nga nazirʹ, nagpasabot ug “Usa nga Gilain,” o “Usa nga Gipahinungod.” Ang mga Nazareo kinahanglang mosunod sa mga restriksiyon nga gihatag para nila diha sa Moisesnong Balaod.—Num. 6:​2-8.

4. (a) Sa unsang paagi kadtong napahinungod kang Jehova gilain para sa sagradong katuyoan? (b) Unsay gipasabot sa ‘pagdumili’ sa atong kaugalingon? (Tan-awa sab ang hulagway.)

⁴ Dihang imong ipahinungod ang imong kaugalingon kang Jehova, modesisyon ka nga mahimong tinun-an ni Jesu-Kristo ug himoong pinakaimportante sa imong kinabuhi ang pagbuhat sa kabubut-on sa Diyos. Unsay pasabot sa imong pagpahinungod? Si Jesus miingon: “Kon dunay buot mosunod kanako, angay niyang dumilian ang iyang kaugalingon.” (Mat. 16:24) Kon magpahinungod na ka kang Jehova, kinahanglan nimong dumilian ang bisan unsa nga supak sa iyang kabubut-on. (2 Cor. 5:​14, 15) Apil ana ang pagdumili sa “mga buhat sa unod,” sama sa seksuwal nga imoralidad. (Gal. 5:​19-21; 1 Cor. 6:18) Kini ba nga mga restriksiyon makapalisod sa imong kinabuhi? Dili. Kon imong gimahal si Jehova ug kombinsido ka nga ang iyang mga balaod maoy para sa imong kaayohan, dili ka mobati niana. (Sal. 119:97; Isa. 48:​17, 18) Ang brader nga si Nicholas miingon, “Puwede nimong isipon ang mga sukdanan ni Jehova sa duha ka paagi: rehas sa prisohan nga nagpugong nimo sa paghimo sa imong gusto, o rehas nga nanalipod nimo batok sa mga leyon.”

5. (a) Unsaon nimo pagpahinungod sa imong kaugalingon kang Jehova? (b) Unsay kalainan sa pagpahinungod ug sa bawtismo? (Tan-awa sab ang hulagway.)

⁵ Unsaon nimo pagpahinungod sa imong kaugalingon kang Jehova? Manaad ka niya diha sa pag-ampo nga siya lang ang imong simbahon ug nga unahon nimo sa imong kinabuhi ang pagbuhat sa iyang kabubut-on. Sa ato pa, manaad ka kang Jehova nga padayon nimo siyang higugmaon “sa tibuok mong kasingkasing, sa tibuok mong kalag, sa tibuok mong hunahuna, ug sa tibuok mong kusog.” (Mar. 12:30) Ang imong pagpahinungod himoon sa pribado, tali lang nimo ug kang Jehova. Sa laing bahin, ang pagpabawtismo himoon atubangan sa daghan. Pinaagi ani, makita nila nga nagpahinungod na ka kang Jehova. Ang imong pagpahinungod maoy sagrado nga panaad. Gidahom ni Jehova nga imo nang tumanon, ug mao pod nay imong gidahom sa imong kaugalingon.—Eccl. 5:​4, 5.

NGANONG IPAHINUNGOD NIMO ANG IMONG KAUGALINGON KANG JEHOVA?

6. Unsay magpalihok sa usa nga magpahinungod kang Jehova?

⁶ Ang pangunang rason nga magpahinungod ka kang Jehova mao ang imong gugma kaniya. Ang imong gugma wala lang gibase sa emosyon. Gibase ni sa “tukmang kahibalo” ug “espirituwal nga pagsabot”—ang mga butang nga imong nakat-onan bahin kang Jehova nga nakapalalom sa imong gugma kaniya. (Col. 1:9) Ang imong pagtuon sa Kasulatan nagkombinsir nimo nga (1) si Jehova tinuod, (2) gigiyahan niya ang pagsulat sa Bibliya, ug (3) gigamit niya ang iyang organisasyon sa pagtuman sa iyang kabubut-on.

7. Unsay angay natong himoon sa dili pa nato ipahinungod ang atong kaugalingon sa Diyos?

⁷ Kadtong nagpahinungod sa ilang kaugalingon kang Jehova kinahanglang nahibalo sa pangunang mga pagtulon-an nga naa sa Pulong sa Diyos ug nagkinabuhi subay sa mga sukdanan niini. Ilang ginasulti sa uban ang ilang nakat-onan sumala sa makaya sa ilang kahimtang. (Mat. 28:​19, 20) Milalom ang ilang gugma kang Jehova ug gusto gyod nilang ihatag kaniya ang ilang eksklusibong debosyon. Ingon ana pod ba ang imong gibati? Kon mao, mapalihok ka nga magpahinungod ug magpabawtismo dili tungod kay gusto nimong mapalipay ang nag-study nimo o ang imong mga ginikanan o kay gusto nimong sundogon ang imong mga higala, kondili kay gimahal gyod nimo si Jehova.

8. Sa unsang paagi ang pagkamapasalamaton makatabang nimo nga modesisyon nga ipahinungod ang imong kaugalingon kang Jehova? (Salmo 116:​12-14)

⁸ Dihang imong hunahunaon ang tanang gihimo ni Jehova para nimo, mapalihok ka nga magpahinungod sa imong kaugalingon kaniya. (Basaha ang Salmo 116:​12-14.) Ang Bibliya nag-ingon nga si Jehova ang Maghahatag sa “matag maayong gasa ug matag hingpit nga regalo,” ug tinuod gyod na. (Sant. 1:17) Ang kinalabwang regalo ni Jehova mao ang halad lukat sa iyang Anak, si Jesus. Hunahunaa kon unsa na ka talagsaon! Tungod sa lukat, puwede kang makabaton ug suod nga relasyon kang Jehova. Ug gihatagan ka niyag paglaom nga mabuhi sa walay kataposan. (1 Juan 4:​9, 10, 19) Ang pagpahinungod sa imong kaugalingon kang Jehova maoy usa ka paagi nga mapakita nimo nga mapasalamaton ka nianang kinadak-ang ekspresyon sa gugma, apil na sa tanang panalangin nga gihatag ni Jehova kanimo. (Deut. 16:17; 2 Cor. 5:15) Kanay gipasiugda sa leksiyon 46 punto 4, sa librong Mabuhi Ka Hangtod sa Hangtod!, nga naa poy tulo ka minutong video nga Itanyag ang Inyong mga Gasa Ngadto sa Diyos.

ANDAM NA BA KANG MAGPAHINUNGOD UG MAGPABAWTISMO?

9. Nganong dili ka angayng mapresyur nga magpahinungod?

⁹ Mobati tingali ka nga dili pa ka andam magpahinungod ug magpabawtismo. Tingali kinahanglan pa kang mohimog mga kausaban aron masunod ang mga sukdanan ni Jehova, o basig kinahanglan pa nimog panahon sa pagpalig-on sa imong pagtuo. (Col. 2:​6, 7) Ang matag Bible study lainlaig pag-uswag, ug dili tanang batan-on ang andam nang magpahinungod ug magpabawtismo sa parehong edad. Susiha ang imong espirituwal nga pag-uswag base sa kon unsay kaya nimong himoon, ug dili sa pagtandi sa imong kaugalingon sa uban.—Gal. 6:​4, 5.

10. Unsay imong mahimo kon nakita nimo nga dili pa ka andam magpahinungod ug magpabawtismo? (Tan-awa sab ang kahong “Para Niadtong Gipadako sa Kamatuoran.”)

¹⁰ Bisag makita nimo nga dili pa ka andam magpahinungod sa imong kaugalingon kang Jehova, himoa gihapon nang tumong. Pag-ampo nga panalanginan ni Jehova ang imong mga paningkamot nga himoon ang gikinahanglang mga kausaban. (Filip. 2:13; 3:16) Makaseguro ka nga paminawon niya ang imong pag-ampo ug iya kang tabangan.—1 Juan 5:14.

KON NGANONG NAGDUHADUHA ANG UBAN

11. Sa unsang paagi tabangan ta ni Jehova nga makapabiling matinumanon kaniya?

¹¹ Ang uban magduhaduha gihapon nga magpahinungod ug magpabawtismo bisag andam na sila. Tingali naghunahuna sila, ‘Unsaon na lang kon makahimo kog seryosong sala ug mapalagpot?’ Kon kanay imong gikahadlokan, makasalig ka nga ihatag ni Jehova ang tanan nimong gikinahanglan aron makahimo ka sa ‘pagkinabuhi nga takos sa ngalan ni Jehova [ug] bug-os nimo siyang mapalipay.’ (Col. 1:10) Hatagan pod ka niyag kusog sa paghimo kon unsay husto. Daghan na siyag natabangan sa paghimo niana. (1 Cor. 10:13) Usa ni sa hinungdan kon nganong gamay ra ang mapalagpot gikan sa Kristohanong kongregasyon. Gitabangan ni Jehova ang iyang katawhan nga magpabiling matinumanon.

12. Sa unsang paagi malikayan nato ang paghimog seryosong sala?

¹² Ang tanang dili hingpit nga tawo makaatubang gyod ug mga tentasyon. (Sant. 1:14) Pero naa ra nimo kon magpadala ka sa tentasyon—imo nang desisyon. Ang tinuod, ikaw ang naay kontrol kon unsay imong himoon sa imong kinabuhi. Ang uban moingon nga dili nato makontrol ang atong pagbati ug mga aksiyon, pero dili na tinuod kay kaya natong kontrolon ang atong mga tinguha. Bisag motungha usahay ang sayop nga mga tinguha, makadesisyon ka nga dili magpadala niini nga mga pagbati. Ug naay makatabang aron makalikay ka sa paghimog seryosong sala. Pananglitan, pag-ampo kang Jehova kada adlaw. Mentinaha ang maayong rutina sa personal nga pagtuon sa Pulong sa Diyos. Tambong sa mga tigom. Isulti sa uban ang imong mga nakat-onan. Ang regular nga paghimo niini makahatag nimog kusog sa pagtuman sa imong panaad sa pagpahinungod. Ug ayawg kalimti nga tabangan ka ni Jehova sa paghimo niana.—Gal. 5:16.

13. Unsang maayong ehemplo ang gipakita ni Jose kanato?

¹³ Dili ka malisdan nga tumanon ang imong pagpahinungod kon nakadesisyon na ka daan kon unsay imong himoon dihang makaatubang kag tentasyon. Mao nay gihimo sa pipila ka karakter sa Bibliya bisag dili pod sila hingpit. Pananglitan, ang asawa ni Potipar balikbalik nga nagtental kang Jose. Pero wala maglibog si Jose kon unsay iyang himoon. Ang Bibliya nag-ingon nga “siya mibalibad” ug siya miingon: “Dili ko makaako sa pagbuhat niining dakong pagkadaotan ug magpakasala sa Diyos!” (Gen. 39:​8-10) Klaro nga nahibalo na daan si Jose kon unsay iyang himoon bisan niadtong wala pa siya tentala sa asawa ni Potipar. Tungod ana, wala siya malisdi sa paghimo kon unsay husto dihang gitental siya.

14. Unsay atong himoon aron masalikway dayon nato ang mga tentasyon nga motungha?

¹⁴ Unsaon nimo pagsundog ang ehemplo ni Jose? Puwede kang modesisyon karon kon unsay imong himoon dihang motungha ang tentasyon. Pagkat-on nga isalikway dayon ang mga butang nga gidumtan ni Jehova, ug likayi bisan gani ang paghunahuna niana. (Sal. 97:10; 119:165) Kon imo nang himoon, makabarog kang lig-on dihang naay tentasyon kay nahibalo na ka daan kon unsay imong himoon. Nakahimo na ka daan ug desisyon.

15. Unsaon pagpakita sa usa nga siya “sinserong nangita” kang Jehova? (Hebreohanon 11:6)

¹⁵ Tingali kombinsido ka nga nakaplagan na nimo ang kamatuoran ug gusto nimong alagaron si Jehova sa tibuok nimong kasingkasing. Pero basig mibati gihapon ka nga dili pa ka andam magpahinungod ug magpabawtismo. Kon mao, makatabang nimo ang pagsundog sa ehemplo ni Haring David. Puwede nimong hangyoon si Jehova: “Susiha ko, Oh Diyos, ug sayra ang akong kasingkasing. Susiha ko, ug sayra ang akong mga kabalaka. Tan-awa kon duna ba koy daotang kiling, ug tultoli ko sa dalan sa walay kataposan.” (Sal. 139:​23, 24) Panalanginan ni Jehova kadtong “sinserong nangita kaniya.” Kon maningkamot ka nga kab-oton ang imong tumong nga magpahinungod ug magpabawtismo, makita ni Jehova nga sinsero kang nangita kaniya.—Basaha ang Hebreohanon 11:6.

PADAYON SA PAGPAKIGSUOD KANG JEHOVA

16-17. Sa unsang paagi gikabig ni Jehova kadtong nagdako sa kamatuoran? (Juan 6:44)

¹⁶ Si Jesus miingon nga ang iyang mga tinun-an gikabig ni Jehova. (Basaha ang Juan 6:44.) Hunahunaa kon unsa na ka talagsaon ug kon unsay kahulogan niana para nimo. Si Jehova naay nakitang maayo sa matag tawo nga iyang gikabig. Para niya, ang maong tawo samag iyang bililhon o “espesyal nga katigayonan.” (Deut. 7:​6, footnote) Kanay iyang panglantaw nimo.

¹⁷ Pero tingali batan-on ka nga gipadako sa imong mga ginikanan sa kamatuoran. Mobati tingali ka nga nag-alagad lang ka kang Jehova kay nag-alagad pod ang imong ginikanan, ug dili kay gikabig ka ni Jehova. Pero ang Bibliya nag-ingon: “Duol sa Diyos, ug siya moduol kaninyo.” (Sant. 4:8; 1 Cron. 28:9) Dihang makigsuod ka kang Jehova, siya makigsuod pod nimo. Para kang Jehova, dili kay basta bahin lang ka sa usa ka grupo. Ginakabig niya ang kada indibiduwal—apil na ang matag usa nga nagdako sa kamatuoran. Dihang makigsuod ka kang Jehova, Siya makigsuod pod nimo, sama sa giingon sa Santiago 4:8.—Itandi ang 2 Tesalonica 2:13.

18. Unsay atong hisgotan sa sunod nga artikulo? (Salmo 40:8)

¹⁸ Dihang nagpahinungod ka kang Jehova ug nagpabawtismo, gisundog nimo ang ehemplo ni Jesus. Kinabubut-on niyang gihalad ang iyang kaugalingon sa iyang Amahan, ug gihimo niya ang tanan nga gisugo kaniya. (Basaha ang Salmo 40:8; Heb. 10:7) Sa sunod nga artikulo, atong hisgotan kon unsay makatabang nimo nga padayong mag-alagad nga matinumanon kang Jehova human sa imong bawtismo.