Kon Unsaon nga mas Magmalipayon sa Ministeryo

1. Unsay gibati sa uban bahin sa pagpakig-estorya sa mga tawo diha sa ministeryo? (Tan-awa sab ang hulagway.)

INGONG katawhan ni Jehova, nagsangyaw ta sa uban kay gimahal nato ang atong langitnong Amahan ug gusto natong tabangan ang mga tawo nga makaila kaniya. Daghang igsoon ang ganahan kaayong mosangyaw. Pero ang uban wala kaayo mag-enjoy niini nga buluhaton. Ngano? Kay ang uban maulawon kaayo ug walay kompiyansa sa kaugalingon. Naay uban nga dili komportable nga moadto sa mga balay kon wala sila imbitaha. Ang uban pod mahadlok nga makasab-an. Ug ang uban dili ganahan nga makapasuko sila sa mga tawo. Bisag gimahal kaayo nila si Jehova, kini nga mga igsoon nalisdan sa pagsangyaw sa dili nila kaila. Pero nahibalo sila nga importante kaayo ni nga buluhaton, ug regular silang nakigbahin niini. Seguradong nalipay gyod si Jehova nila!

2. Kon nalisdan ka nga magmalipayon sa ministeryo, nganong dili ka angayng maluya?

² Malisdan ba ka usahay nga magmalipayon sa ministeryo tungod sa maong mga pagbati? Kon mao, ayawg kaluya. Ang imong kakulang ug kompiyansa sa kaugalingon nagpakita nga mapainubsanon ka ug dili nimo gustong mapokus kanimo ang atensiyon sa uban. Nagpakita pod ni nga dili ka ganahang makiglalis. Ug dili nato gusto nga makasab-an ta sa mga tawo, ilabina kay naningkamot ta nga mohimog maayo kanila. Ang imong langitnong Amahan nahibalo pag-ayo sa imong gibati ug gusto ka niyang tabangan. (Isa. 41:13) Niining artikuloha, hisgotan nato ang lima ka sugyot kon unsaon pag-atubang ang maong mga pagbati ug kon sa unsang paagi ta magmalipayon sa atong ministeryo.

TUGOTI NGA MAPALIG-ON KA SA PULONG SA DIYOS

3. Unsay nakatabang kang propetang Jeremias sa pagsangyaw sa uban?

³ Sukad pa sa una, ang mensahe sa Diyos nakapalig-on sa iyang mga alagad dihang naa silay lisod nga asaynment nga kinahanglang himoon. Konsideraha pananglitan si propetang Jeremias. Nabalaka siya dihang gisugo siya ni Jehova nga mosangyaw. Si Jeremias miingon: “Dili ko mahibalong mosulti, kay bata pa ko.” (Jer. 1:6) Unsay nakatabang niya nga makabaton ug kompiyansa? Napalig-on siya sa mensahe sa Diyos. Siya miingon: “Nahisama kinig kalayo nga nagdilaab sulod sa akong kabukogan, ug gikapoy na kog pinugong niini.” (Jer. 20:​8, 9) Bisag lisod ang teritoryo ni Jeremias, ang mensahe nga iyang isangyaw naghatag niyag kusog sa pagtuman sa iyang asaynment.

4. Unsay resulta kon basahon ug pamalandongon nato ang Pulong sa Diyos? (Colosas 1:​9, 10)

⁴ Ang mga Kristohanon mapalig-on sa mensahe sa Pulong sa Diyos. Sa sulat ni apostol Pablo sa kongregasyon sa Colosas, siya miingon nga ang pagkuhag tukmang kahibalo magpalihok sa mga Kristohanon nga “magkinabuhi . . . nga takos sa ngalan ni Jehova” samtang padayon silang “mamunga sa tanang maayong buhat.” (Basaha ang Colosas 1:​9, 10.) Apil sa maayong buhat ang pagsangyaw sa maayong balita. Busa dihang basahon ug pamalandongon nato ang Pulong sa Diyos, molig-on ang atong pagtuo kang Jehova ug makita nato kon unsa ka importante ang pagsangyaw sa mensahe sa Gingharian.

5. Sa unsang paagi ta makabenepisyo pag-ayo sa pagbasa ug pagtuon sa Bibliya?

⁵ Aron makabenepisyo ta pag-ayo sa Pulong sa Diyos, dili nato angayng dalidalion ang pagbasa, pagtuon, ug pagpamalandong. Paggahin ug igong panahon. Kon naglisod kag sabot sa teksto nga imong gibasa, ayaw nig palabya. Gamita ang Watch Tower Publications Index o ang Giya sa Pagpanukiduki Para sa mga Saksi ni Jehova aron makakitag eksplinasyon bahin sa teksto. Kon mogahin kag igong panahon sa pagtuon, molig-on ang imong pagsalig nga tinuod ang Pulong sa Diyos. (1 Tes. 5:21) Kon mas kombinsido ka, mas mag-enjoy ka sa pagsangyaw bahin sa imong nakat-onan.

PANGANDAM PAG-AYO SA MINISTERYO

6. Nganong angay tang mangandam pag-ayo sa ministeryo?

⁶ Kon mangandam ta pag-ayo sa ministeryo, mas naa tay kompiyansa nga mosangyaw sa uban. Gitabangan ni Jesus ang iyang mga tinun-an nga mangandam sa wala pa niya sila ipadala aron mosangyaw. (Luc. 10:​1-11) Kay gipadapat nila ang gitudlo ni Jesus, mibati silag tinuod nga kalipay sa ilang napalampos.—Luc. 10:17.

7. Unsaon nato pagpangandam sa ministeryo? (Tan-awa sab ang hulagway.)

⁷ Unsaon nato pagpangandam sa ministeryo? Kinahanglan natong hunahunaon kon unsay atong isangyaw ug kon unsaon nga epektibo nato ning masulti sa atong kaugalingong mga pulong. Makatabang pod ang paghunahunag duha o tulo ka komon nga reaksiyon sa mga tawo sa atong teritoryo ug ang pag-andam ug tubag para sa matag usa niana. Dayon dihang makig-estorya na ta sa mga tawo, maningkamot ta nga mahimong kalmado, mo-smile, ug magmahigalaon.

8. Nganong ang mga Kristohanon gipakasamag mga sudlanang kulonon diha sa ilustrasyon ni Pablo?

⁸ Si apostol Pablo naghatag ug ilustrasyon bahin sa buluhatong pagsangyaw. Siya miingon: “Nabatonan namo kini nga bahandi diha sa mga sudlanang kulonon.” (2 Cor. 4:7) Unsa ni nga bahandi? Kini mao ang buluhatong pagsangyaw sa mensahe sa Gingharian nga makaluwas ug kinabuhi. (2 Cor. 4:1) Unsa ang mga sudlanang kulonon? Kini nagrepresentar sa mga alagad sa Diyos nga nagdala sa maayong balita ngadto sa uban. Sa panahon ni Pablo, ang mga negosyante naggamit ug mga sudlanang kulonon aron maghatod ug importanteng mga produkto sama sa pagkaon, bino, ug kuwarta. Sa susama, gisalig ni Jehova kanato ang importanteng mensahe sa maayong balita. Sa tabang ni Jehova, makabaton tag kusog nga atong gikinahanglan aron padayon natong masangyaw sa uban ang atong mensahe.

PAG-AMPO ALANG SA KAISOG

9. Unsay atong buhaton kon mobati tag kahadlok sa tawo o kahadlok nga supakon? (Tan-awa sab ang hulagway.)

⁹ Usahay, mobati tingali tag kahadlok sa tawo o kahadlok nga supakon. Unsay atong buhaton aron dili ta madaog niana? Konsideraha ang pag-ampo sa mga apostoles dihang gisugo sila sa awtoridad nga mohunong sa pagsangyaw. Imbes magpadaog sa kahadlok, gihangyo nila si Jehova nga tabangan sila nga ‘padayong masulti ang iyang pulong uban ang bug-os nga kaisog.’ Gitubag dayon ni Jehova ang ilang pag-ampo. (Buh. 4:​18, 29, 31) Kon usahay mobati tag kahadlok sa tawo, makapangayo pod tag tabang kang Jehova. Hangyoa si Jehova nga tabangan ka nga mas molabaw ang imong gugma sa mga tawo kay sa imong gibating kahadlok.

10. Sa unsang paagi gitabangan ta ni Jehova nga matuman ang atong buluhaton ingong iyang mga Saksi? (Isaias 43:​10-12)

¹⁰ Gipili ta ni Jehova ingong iyang mga Saksi, ug nagsaad siya nga tabangan ta niya nga magmaisogon. (Basaha ang Isaias 43:​10-12.) Konsideraha ang pipila ka paagi nga iya nang gihimo. Una, kauban nato si Jesus dihang magsangyaw ta sa maayong balita. (Mat. 28:​18-20) Ikaduha, gigamit ni Jehova ang mga anghel sa pagtabang nato. (Pin. 14:6) Ikatulo, gihatagan ta ni Jehova sa iyang balaang espiritu aron tabangan ta nga mahinumdoman ang mga butang nga atong nakat-onan. (Juan 14:​25, 26) Ikaupat, gitagan-an ta ni Jehova ug mga igsoon nga kauban nato sa pagsangyaw. Sa tabang ni Jehova ug sa mahigugmaong mga igsoon, makabaton tag kaisog nga padayong mosangyaw.

MAGPAILIN-ILIN UG MAGPABILING POSITIBO

11. Unsay imong himoon aron daghan kag maestorya diha sa ministeryo? (Tan-awa sab ang hulagway.)

¹¹ Maluya ba ka kon wala kaayo kay maabtan nga tawo dihang mamalaybalay? Puwede nimong pangutan-on ang imong kaugalingon: ‘Asa kaha karon ang mga tawo sa among teritoryo?’ (Buh. 16:13) ‘Naa ba sila karon sa trabahoan, o kaha nag-shopping ba sila?’ Kon mao, puwede kaha nimong sulayan nga mag-street witnessing aron mas daghan kag maestorya? Ang brader nga si Joshua miingon, “Mas daghan kog masangyawan diha sa mga shopping area ug mga parking lot.” Siya ug ang iyang asawa nga si Bridget mas daghan pog maabtan nga mga tawo sa balay dihang mosangyaw sila sayo sa gabii o sa Dominggo sa hapon.—Efe. 5:​15, 16.

12. Unsaon nato pagkahibalo kon unsay gituohan sa mga tawo o kon unsang topiko ang makapainteres nila?

¹² Kon wala kaayoy interes ang mga tawo sa atong mensahe, susiha kon unsay ilang gituohan o kon unsang mga topiko ang makapainteres nila. Si Joshua ug Bridget naggamit sa pangutana nga naa sa tract aron makasugod ug panag-estorya. Pananglitan, gamit ang tract nga Para Nimo, Unsa ang Bibliya? moingon sila: “Ang uban nagtuo nga ang Bibliya gikan sa Diyos, pero ang uban pod dili motuo niana. Unsay imong opinyon ana?” Sagad, moresulta nig panag-estoryahay.

13. Nganong makaingon ta nga malamposon ta sa ministeryo bisag dili maminaw ang mga tawo? (Proverbio 27:11)

¹³ Ang kalamposan sa atong ministeryo wala magdepende sa mga resulta. Ngano? Kay gihimo nato kon unsay gipabuhat ni Jehova ug sa iyang Anak—ang pagsangyaw. (Buh. 10:42) Bisag wala tay maestorya o walay maminaw sa atong mensahe, malipay gihapon ta kay nahibalo ta nga napalipay nato ang atong langitnong Amahan.—Basaha ang Proverbio 27:11.

14. Nganong malipay ta dihang ang ubang igsoon makakitag interesado diha sa teritoryo?

¹⁴ Malipay pod ta dihang ang ubang igsoon makakitag interesado diha sa teritoryo. Sa Bantayanang Torre, ang atong buluhaton gipakasama sa pagpangita sa usa ka bata nga nawala. Daghan ang miapil sa pagpangita sa bata, ug giadtoan nila ang lainlaing lugar. Dihang nakit-an ang bata, nalipay ang tanan, dili lang kadtong nakakita niya. Sa susama, kitang tanan nagtinabangay sa paghimog tinun-an. Ang matag usa gikinahanglan aron maadtoan ang lainlaing teritoryo, ug kitang tanan malipay dihang ang usa ka interesado magsugod nag tambong sa mga tigom.

PAGPOKUS SA IMONG GUGMA KANG JEHOVA UG SA IMONG ISIGKATAWO

15. Sa unsang paagi ang pagpadapat sa Mateo 22:​37-39 makadugang sa atong kadasig sa ministeryo? (Tan-awa sab ang hulagway.)

¹⁵ Madugangan ang atong kadasig sa pagsangyaw kon magpokus ta sa atong gugma kang Jehova ug sa atong isigkatawo. (Basaha ang Mateo 22:​37-39.) Hunahunaa lang kon unsa ka malipayon si Jehova dihang makita ta niya nga naghimo sa atong buluhaton ug kon unsa unya ka malipayon ang mga tawo dihang magtuon na silag Bibliya! Hunahunaa sab ang kaluwasan nga nagpaabot niadtong modawat sa atong mensahe.—Juan 6:40; 1 Tim. 4:16.

16. Sa unsang paagi ta magmalipayon sa atong ministeryo bisag dili na ta makagawasgawas sa balay? Paghatag ug mga pananglitan.

¹⁶ Naa ra ba ka sa inyong balay tungod sa pipila ka rason? Kon mao, pagpokus sa kon unsay imong mahimo aron ipakita ang imong gugma kang Jehova ug sa mga tawo. Panahon sa COVID-19 nga pandemic, si Samuel ug Dania nagpondo na lang sa balay. Nianang lisod nga mga panahon, regular silang nag-telephone witnessing, naghimog mga sulat, ug nag-Bible study pinaagig Zoom. Dihang moadto si Samuel sa clinic aron magpatambal sa iyang kanser, sangyawan niya ang iyang mga mailaila didto. Siya miingon: “Dihang mag-atubang tag lisod nga mga kahimtang, mabalaka ta, maluya sa pisikal, ug masulayan ang atong pagtuo. Kinahanglang mangita tag mga paagi nga magmalipayon sa atong pag-alagad kang Jehova.” Niining mga panahona pod, natumba si Dania ug nagpondo na lang sa higdaanan sulod sa tulo ka bulan. Dayon kinahanglan siyang mag-wheelchair sulod sa unom ka bulan. Siya miingon: “Naningkamot ko nga himoon ang tanan nakong maarangan bisan pa sa akong kahimtang. Akong gisangyawan ang nurse nga mibisita nako, apil na pod kadtong naay mga gi-deliver sa among balay. Naa pod koy naestorya diha sa telepono nga representative sa usa ka medikal nga kompaniya.” Bisag limitado na lang ang mahimo ni Samuel ug Dania tungod sa ilang kahimtang, gihimo nila ang tanan nilang maarangan maong nagmalipayon sila.

17. Sa unsang paagi makabenepisyo ta pag-ayo sa mga sugyot niining artikuloha?

¹⁷ Ang mga sugyot nga gihisgotan niining artikuloha mas epektibo kon sulayan nato tanan. Ang matag sugyot samag ingredient sa usa ka recipe. Kon isagol nato ang tanang ingredients, molami ang atong giluto. Kon ipadapat nato ang tanang sugyot, madaog nato ang negatibong mga pagbati ug mas magmalipayon ta sa atong ministeryo.