Kon Unsaon Pagsundog sa Kongregasyon ang Panglantaw ni Jehova sa mga Makasasala

1. Unsay gusto ni Jehova para sa tanang tawo?

GIHATAGAN ta ni Jehova ug gasa nga kagawasan sa pagpili. Kanunay natong gigamit kini nga gasa dihang mohimo tag mga desisyon. Ang pinakaimportanteng desisyon nga mahimo sa usa ka tawo mao ang pagpahinungod sa iyang kaugalingon kang Jehova ug mahimong bahin sa Iyang pamilya nga nagsimba Kaniya. Mao nay gusto ni Jehova nga himoon sa tanan. Ngano? Tungod kay gimahal niya ang mga tawo ug gusto niya ang pinakamaayo para nila. Gusto niya nga masuod sila kaniya ug mabuhi hangtod sa hangtod.—Deut. 30:​19, 20; Gal. 6:​7, 8.

2. Unsay pagbati ni Jehova sa dili mahinulsolong makasasala? (1 Juan 2:1)

² Pero dili pugson ni Jehova si bisan kinsa nga alagaron siya. Gitugotan niya ang matag usa nga maoy magdesisyon kon unsay iyang himoon. Komosta kon ang usa ka bawtismadong Kristohanon makalapas sa balaod sa Diyos ug makahimog seryosong sala? Kon dili siya mahinulsolon, kinahanglan siyang tangtangon gikan sa kongregasyon. (1 Cor. 5:13) Bisan pa niana, gusto gyod ni Jehova nga ang nakasala mobalik kaniya. Gani, usa na sa importanteng mga rason kon nganong gitagana niya ang lukat—aron mapaposible nga mapasaylo ang mahinulsolong makasasala. (Basaha ang 1 Juan 2:1.) Ang atong mahigugmaong Diyos kinasingkasing nga nagdasig sa mga makasasala sa paghinulsol.—Zac. 1:3; Roma 2:4; Sant. 4:8.

3. Unsay atong hisgotan niini nga artikulo?

³ Gusto ni Jehova nga sundogon nato ang iyang panglantaw bahin sa sala ug sa mga makasasala. Kini nga artikulo maghisgot kon sa unsang paagi mahimo nato kana. Samtang imong basahon ang artikulo, matikdi (1) kon giunsa pagdumala sa unang siglong kongregasyon sa Corinto ang usa ka kaso sa seryosong sala, (2) kon unsa nga direksiyon ang gihatag ni apostol Pablo dihang naghinulsol ang nakasala, ug (3) kon unsay gitudlo niini nga asoy sa Bibliya bahin sa panglantaw ni Jehova sa mga Kristohanon nga nakahimog seryosong sala.

KON GIUNSA PAGDUMALA SA KONGREGASYON SA UNANG SIGLO ANG USA KA SERYOSONG SALA

4. Unsang problema ang mitungha sa unang siglong kongregasyon sa Corinto? (1 Corinto 5:​1, 2)

⁴ Basaha ang 1 Corinto 5:​1, 2. Panahon sa iyang ikatulong misyonaryong panaw, si Pablo nakadungog ug makapatugaw nga balita bahin sa bag-ong natukod nga kongregasyon sa Corinto. Dihay igsoon sa kongregasyon nga naghimog seksuwal nga imoralidad uban sa iyang inaina. Kini makapatugaw gyod kaayo ug “wala gani buhata bisan taliwala sa mga nasod”! Gawas nga gikonsentir ni sa kongregasyon, tingali ila pa gyod ning gipasigarbo. Naghunahuna seguro ang uban nga ila rang gisundog si Jehova, kinsa maluluy-on ug masinabtanon sa dili hingpit nga mga tawo. Pero si Jehova dili magkonsentir sa sayop nga binuhatan sa iyang katawhan. Ang maong tawo seguradong nagdaot sa reputasyon sa kongregasyon tungod sa iyang makauulawng binuhatan. Posibleng naimpluwensiyahan pod niya ang ubang igsoon sa kongregasyon. Busa unsang direksiyon ang gihatag ni Pablo sa kongregasyon?

5. Unsay giingon ni Pablo nga himoon sa kongregasyon, ug unsay iyang gipasabot? (1 Corinto 5:13) (Tan-awa sab ang hulagway.)

⁵ Basaha ang 1 Corinto 5:13. Ubos sa paggiya sa Diyos, gisulatan ni Pablo ang mga taga-Corinto nga tangtangon gikan sa kongregasyon ang dili mahinulsolong makasasala. Unsaon pagtratar sa matinumanong mga Kristohanon ang nakasala? Giingnan sila ni Pablo nga “mohunong na sa pagpakig-uban” kaniya. Unsay iyang gipasabot? Si Pablo nagsugo nga “dili gani [sila] mokaon uban sa ingon niana nga tawo.” (1 Cor. 5:11) Kon ang usa mokaon uban sa laing tawo, makagahin siyag taastaas nga panahon uban niya. Busa tin-awng gipasabot ni Pablo nga likayan sa kongregasyon ang pagpakig-uban sa maong tawo. Makatabang ni aron maproteksiyonan ang kongregasyon gikan sa iyang dili maayong impluwensiya. (1 Cor. 5:​5-7) Makatabang pod ni niya aron makaamgo siya sa iyang sala kang Jehova, mobatig kaulaw, ug mapalihok sa paghinulsol.

6. Unsay epekto sa sulat ni Pablo diha sa kongregasyon ug sa nakasala?

⁶ Human niya mapadala ang iyang sulat ngadto sa mga Kristohanon sa Corinto, si Pablo naghunahuna kon unsa kahay ilang reaksiyon niini. Sa ngadtongadto, si Tito nagdalag balita nga nakapalipay niya. Ang mga taga-Corinto misunod sa tambag ni Pablo ug ilang gitangtang sa kongregasyon ang nakasala. (2 Cor. 7:​6, 7) Ug wala madugay human niana, ang makasasala naghinulsol. Giusab niya ang iyang binuhatan ug panglantaw ug misunod sa matarong nga mga sukdanan ni Jehova. (2 Cor. 7:​8-11) Busa unsay sunod nga gisulti ni Pablo nga himoon sa kongregasyon?

KON UNSAY ANGAYNG PAGTRATAR SA KONGREGASYON SA MAHINULSOLONG MAKASASALA

7. Unsay maayong resulta dihang gitangtang gikan sa kongregasyon ang nakasala? (2 Corinto 2:​5-8)

⁷ Basaha ang 2 Corinto 2:​5-8. Giingnan ni Pablo ang kongregasyon nga “igo na ang pagbadlong nga [ilang] gihatag sa maong tawo.” Sa ato pa, nakab-ot na ang katuyoan sa disiplina. Unsa nga katuyoan? Tabangan siya nga maghinulsol.—Heb. 12:11.

8. Unsay sunod nga giingon ni Pablo nga himoon sa kongregasyon?

⁸ Busa giawhag ni Pablo ang kongregasyon nga ‘pasayloon ug hupayon’ ang nakasala nga igsoon ug “pamatud-an ang [ilang] gugma kaniya.” Matikdi nga wala lang mag-ingon si Pablo nga dawaton nila pag-usab sa kongregasyon ang nakasala. Gusto niya nga pinaagi sa pulong ug buhat, pasaligan nila ang maong mahinulsolong igsoon nga ila siyang gimahal ug gipasaylo na. Pinaagi ana, ilang mapakita nga kinasingkasing nila siyang gidawat pag-usab sa kongregasyon.

9. Nganong ang uban tingali nalisdan sa pagpasaylo sa igsoon nga nakasala?

⁹ Naa kahay pipila diha sa kongregasyon nga nalisdan sa pagdawat pag-usab sa maong naghinulsol nga igsoon? Walay giingon ang Bibliya, pero posible na. Kon buot hunahunaon, ang iyang gibuhat nakahatag ug problema sa tibuok kongregasyon ug tingali nakahatag ug kaulawan sa pipila ka igsoon. Ang uban basin naghunahuna nga dili gyod makataronganon nga mainitong dawaton pag-usab ang maong igsoon nga mora bag wala ray nahitabo, samtang sila naningkamot pag-ayo nga magpabiling hinlo sa moral. (Itandi ang Lucas 15:​28-30.) Pero nganong importante man nga ang kongregasyon magpakitag tinuod nga gugma sa ilang mahinulsolong igsoon?

10-11. Unsa kahay mahitabo kon dili pasayloon sa mga ansiyano ang mahinulsolong nakasala?

¹⁰ Imadyina kon unsay posibleng mahitabo kon dili tugotan sa mga ansiyano ang mahinulsolong tawo nga makabalik sa kongregasyon, o kon dili siya pakitaag gugma sa mga igsoon human siya makabalik. Posibleng malumsan siya sa “hilabihang kasubo.” Basin maghunahuna siya nga wala na siyay paglaom. Basin mohunong pa gani siya sa iyang mga paningkamot nga mabalik ang iyang relasyon sa Diyos.

¹¹ Pero mas grabe pa, kon ang mga igsoon dili magpasaylo niya, posibleng madaot ang ila mismong relasyon kang Jehova. Ngano? Kay wala nila sundoga si Jehova, kinsa mapinasayloon sa mga mahinulsolon. Hinuon, ilang gisundog si Satanas, kinsa pintas ug walay kaluoy. Kon ila nang himoon, sama rag nagpagamit sila sa Yawa aron daoton ang espirituwalidad sa maong tawo.—2 Cor. 2:​10, 11; Efe. 4:27.

12. Sa unsang paagi masundog sa kongregasyon si Jehova?

¹² Sa unsang paagi masundog sa kongregasyon sa Corinto si Jehova, dili si Satanas? Pinaagi sa pagsundog sa pagkamapinasayloon ni Jehova sa mahinulsolong mga makasasala. Matikdi ang giingon sa pipila ka magsusulat sa Bibliya bahin kang Jehova. Si David miingon nga si Jehova “maayo ug andam sa pagpasaylo.” (Sal. 86:5) Si Miqueas misulat: “Kinsa nga Diyos ang sama kanimo, nga nagapasaylo sa kasaypanan ug nagapalabay sa kalapasan?” (Miq. 7:18) Ug si Isaias miingon: “Pabiyaa ang tawong daotan sa iyang dalan, ug ipabag-o sa tawong daotan ang iyang hunahuna; pabalika siya kang Jehova, nga maluoy kaniya, sa atong Diyos, kay siya madagayaong magpasaylo.”—Isa. 55:7.

13. Nganong haom lang nga ipasig-uli diha sa kongregasyon sa Corinto ang mahinulsolong makasasala? (Tan-awa ang kahong “Kanus-a Napasig-uli ang Lalaki nga Taga-Corinto?”)

¹³ Aron masundog si Jehova, kinahanglang dawaton pag-usab sa kongregasyon sa Corinto ang maong mahinulsolong tawo ug pasaligan siya sa ilang gugma. Pinaagi sa pagsunod sa direksiyon ni Pablo nga dawaton pag-usab ang maong tawo, gipakita sa kongregasyon nga sila “masinugtanon . . . sa tanang butang.” (2 Cor. 2:9) Tinuod, pipila pa lang ka bulan ang milabay sukad siya natangtang sa kongregasyon, pero ang disiplina nga iyang nadawat nagpalihok na niya sa paghinulsol. Busa dili angayng langanon ang pagpasig-uli kaniya diha sa kongregasyon.

KON UNSAON PAGSUNDOG ANG HUSTISYA UG KALUOY NI JEHOVA

14-15. Unsay atong nakat-onan sa paagi sa pagdumala sa kaso sa karaang Corinto? (2 Pedro 3:9) (Tan-awa sab ang hulagway.)

¹⁴ Ang asoy bahin sa kon giunsa pagdumala ang kaso sa karaang Corinto gipasulat diha sa Bibliya “aron tudloan ta.” (Roma 15:4) Base niana nga asoy, atong nakat-onan nga si Jehova dili magkonsentir sa seryosong sala sa iyang mga alagad. Ang uban tingali maghunahuna nga kay maluluy-on si Jehova, tugotan ra niya ang dili mahinulsolong makasasala nga magpabilin sa kongregasyon ug padayong makig-uban sa iyang matinumanong mga alagad. Pero dili kana ang paagi ni Jehova sa pagpakitag kaluoy. Bisag maluluy-on si Jehova, siya dili konsentidor; dili pod niya ipaubos ang iyang mga sukdanan. (Jud. 4) Sa tinuod lang, kon siya magkonsentir, dili kana pagpakitag kaluoy kay kana magpameligro sa tibuok kongregasyon.—Prov. 13:20; 1 Cor. 15:33.

¹⁵ Pero nakat-onan pod nato nga dili gyod gusto ni Jehova nga dunay malaglag. Gusto niya nga maluwas ang mga tawo kutob sa mahimo. Siya magpakitag kaluoy niadtong mag-usab sa ilang panghunahuna ug binuhatan ug maningkamot nga mabalik pag-usab ang ilang maayong relasyon kaniya. (Ezeq. 33:11; basaha ang 2 Pedro 3:9.) Busa sa dihang ang lalaki sa Corinto naghinulsol ug mibiya sa iyang daotang binuhatan, gigamit ni Jehova si Pablo aron ipatin-aw sa kongregasyon nga ang maong lalaki angay nang pasayloon ug dawaton pag-usab.

16. Unsay imong pagbati sa paagi sa pagdumala sa kaso sa Corinto?

¹⁶ Ang pagsusi kon giunsa pagdumala ang kaso sa Corinto seguradong nakatabang nato nga makita kon unsa ka dako ang gugma, pagkamatarong, ug hustisya ni Jehova. (Sal. 33:5) Ang pagkahibalo niini magpalihok nato nga mas dayegon pa gyod ang atong Diyos. Kon buot hunahunaon, kitang tanan makasasala, ug nagkinahanglan ta sa iyang pagpasaylo. Ang matag usa nato angay gyong magmapasalamaton kang Jehova tungod sa lukat, kay tungod niini posibleng mapasaylo ang atong mga sala. Makapahupay ug makapadasig gyod ang pagkahibalo nga si Jehova nahigugma pag-ayo sa iyang katawhan ug gusto niya ang pinakamaayo para nila!

17. Unsay hisgotan sa sunod nga mga artikulo?

¹⁷ Komosta ang paagi sa pagdumala sa mga kaso sa seryosong sala karon? Sa unsang paagi masundog sa mga ansiyano ang gugma ni Jehova ug matabangan ang nakasala sa paghinulsol? Unsay angayng reaksiyon sa mga igsoon dihang ang mga ansiyano modesisyon nga tangtangon o ipasig-uli ang nakasala? Kini nga mga pangutana hisgotan sa sunod nga mga artikulo.