Makapatagbaw nga Kinabuhi sa Pag-alagad Kang Jehova

ANG AKONG PAMILYA

Natawo ko niadtong 1934. Ang akong mga ginikanan taga-Switzerland, pero mibalhin sila sa Timmins, usa ka minahan sa lungsod sa Ontario, Canada. Sa mga 1939, si Mama misugod pagbasa sa magasin nga Watchtower ug sa pagtambong sa mga tigom sa mga Saksi ni Jehova. Ako ug ang akong unom ka igsoon ubanon niya sa mga tigom. Wala madugay, nahimo siyang Saksi ni Jehova.

Wala malipay si Papa sa iyang desisyon. Pero gimahal ni Mama ang kamatuoran, ug determinado siya nga magmaunongon kang Jehova. Gihimo ni niya bisan sa sayong bahin sa katuigan sa 1940 dihang gidili ang buluhaton sa mga Saksi ni Jehova sa Canada. Pirme niyang pakitaag kaayo ug pagtahod si Papa bisan pag ginasultihan siyag sakit kaayo nga mga pulong. Ang iyang maayo kaayong ehemplo nakatabang nako ug sa akong mga igsoon nga dawaton ang kamatuoran ug moalagad pod kang Jehova. Makapalipay kay anam-anam nga nausab si Papa ug mas buotan na ang iyang tinagdan namo.

SINUGDANAN SA BUG-OS PANAHONG PAG-ALAGAD

Sa 1950, mitambong ko sa Theocracy’s Increase Assembly sa New York City. Nadasig kaayo ko nga mohimo pag dugang sa pag-alagad kang Jehova human nako mailaila ang mga igsoon gikan sa lainlaing nasod ug madungog ang nindot nga mga kasinatian sa mga mi-graduate sa Gilead. Tungod ani, mas misamot ang akong determinasyon nga mosulod sa bug-os panahong pag-alagad. Pag-abot nako sa balay, miaplay dayon ko ingong regular payunir. Nakadawat kog sulat gikan sa sangang buhatan sa Canada, ug giingnan ko nga kinahanglan usa kong magpabawtismo. Maong nagpabawtismo ko niadtong Oktubre 1, 1950. Paglabayg usa ka bulan, nahimo kong regular payunir ug nadawat nako ang akong unang asaynment sa Kapuskasing. Kini nga lungsod layo kaayo gikan sa among gipuy-an.

Pagka-1951, ang sangang buhatan nagdapit sa mga igsoon nga makamaong mosultig French nga mobalhin sa probinsiya sa Quebec, diin ang mga tawo nagsultig French. Dako gyod ang panginahanglan didto. Nagdako ko nga makasultig French ug English, maong gidawat nako ang imbitasyon ug naasayn sa Rouyn. Wala koy kaila didto. Ang naa ra nako mao ang adres nga akong gihisgotan sa sinugdanan. Pero maayo kaayo ang nahimong resulta. Nagkasuod mi ni Marcel, ug nalipay gyod ko sa pag-alagad sa Quebec sulod sa upat ka tuig, diin sa ngadtongadto nahimo kong espesyal payunir.

GILEAD UG MGA PAGDAHOM NGA NALANGAN

Samtang naa ko sa Quebec, nalipay kaayo ko sa dihang nakadawat kog imbitasyon nga moeskuwela sa ika-26 nga klase sa Gilead sa South Lansing, New York. Mi-graduate ko niadtong Pebrero 12, 1956 ug naasayn sa gitawag karon ug Ghana,b sa West Africa. Pero sa dili pa ko mobiyahe ngadto sa Ghana, kinahanglan una kong mobalik sa Canada sulod sa pipila ka semana aron maandam ang mga dokumento nga akong gikinahanglan.

Pero naabtan kog pito ka bulan sa Toronto sa pagpaabot niana nga mga dokumento. Nianang panahona, gipapuyo ko sa balay sa pamilyang Cripps, ug nailaila nako ang ilang anak nga si Sheila. Nagkagustohay mi. Sa dihang nagplano na ko nga makigminyo niya, miabot ang akong visa. Amo ning giampo ni Sheila, ug nakadesisyon mi nga mopadayon ko sa akong asaynment. Midesisyon pod mi nga magsulatanay aron among mahibaloan kon posible ba gyod sa among kahimtang nga magminyo ug kon kanus-a pod mi magminyo. Dili gyod to sayon, pero sa ulahi, nakita namo nga maayo kaayo to nga desisyon.

Human sa usa ka bulan nga pagbiyahe pinaagig tren, barko nga pangkargamento, ug eroplano, nakaabot ko sa Accra, Ghana. Didto naasayn ko ingong tigdumala sa distrito, ug mibiyahe ko sa tibuok Ghana, apil sa Ivory Coast (karon Côte d’Ivoire) ug Togoland (karon Togo). Kasagaran, ako rang usa ang mobiyahe gamit ang sakyanan sa sangang buhatan. Pero na-enjoy gyod nako ang maong mga biyahe!

Sa Sabado ug Dominggo, naa koy mga asaynment sa sirkitong mga asembliya. Wala mi mga Assembly Hall, maong ang mga igsoon naghimog temporaryong kapasilongan gamit ang kawayan nga gihaklapan ug mga dahon sa palma aron dili mainitan ang mga igsoon. Kay walay mga refrigerator sa cafeteria, ang mga igsoon magdalag buhi nga mga hayop ug didto na ihawon ug lutoon aron ipakaon sa mga nanambong.

Naa mi kataw-anan nga mga eksperyensiya sa maong mga asembliya. Kas-a, samtang nagpakigpulong ang akong kauban nga misyonaryo nga si Herb Jennings,c naay baka nga nakabuhi gikan sa cafeteria. Midagan ni paingon sa atubangan sa stage. Si Herb mihunong sa iyang pakigpulong, ug ang baka morag nalisang. Pero maayo na lang kay nadakpan ni sa upat ka kusgang brader. Ila ning gidalag balik sa cafeteria, ug namakpak ang mga igsoon.

Sa mga adlaw nga walay asembliya, magpasalida kog pelikula nga The New World Society in Action sa duol nga mga baryo. Aron mapasalida ni, magtaod kog puti nga tela nga gihigot sa duha ka poste o sa duha ka kahoy. Ganahan kaayo ani ang mga tawo! Para sa kadaghanan, kini ang unang higayon nga nakakita silag pelikula. Kusog kaayo silang namakpak dihang nakakita silag esena sa mga gibawtismohan. Kadto nga pelikula nakatabang gyod sa mga tawo nga makita nga ang mga Saksi ni Jehova nagkahiusa sa tibuok kalibotan.

Human sa mga duha ka tuig sa Africa, eksayted kong motambong sa 1958 nga internasyonal nga kombensiyon sa New York City. Nalipay kaayo ko nga makita si Sheila, nga gikan pa sa Quebec, diin nag-alagad siya ingong espesyal payunir. Dugay na ming nagsulatanay, pero karon nga nagkita mi pag-usab, gipangutana nako siya kon mosugot ba siyang makigminyo nako, ug misugot siya. Misulat ko kang Brader Knorrd ug nangutana kon puwede bang makaeskuwela sa Gilead si Sheila ug mouban nako sa Africa. Misugot si Brader Knorr. Nakaabot ra gyod si Sheila sa Ghana. Nagminyo mi sa Accra niadtong Oktubre 3, 1959. Gibati gyod namo nga gipanalanginan mi ni Jehova tungod kay giuna namo siya sa among kinabuhi.

MAGKAUBANG NAG-ALAGAD SA CAMEROON

Niadtong 1961, naasayn mi sa nasod sa Cameroon. Gihangyo ko nga motabang sa pag-establisar ug sangang buhatan didto, maong busy kaayo ko. Ingong branch servant, daghan kog angayng makat-onan. Dayon pagka-1965, nahibaloan namo nga mabdos si Sheila. Sa primero, gibati namo nga dili pa mi andam nga mahimong ginikanan. Pero dihang eksayted na mi niining bag-ong responsibilidad ug nagplano na nga mobalik sa Canada, naay makapaguol kaayo nga hitabo.

Nakuhaan si Sheila, ug giingnan mi sa doktor nga lalaki unta ang among anak. Kapig 50 ka tuig na ang milabay, pero wala gyod to namo malimti. Bisag naguol kaayo mi sa nahitabo, nagpabilin mi sa among asaynment nga gimahal kaayo namo.

Ang mga igsoon sa Cameroon sagad makaatubang ug paglutos tungod sa ilang pagpabiling neyutral sa politika. Mas lisod pa gyod ang kahimtang ilabina panahon sa pagpilig presidente. Nahitabo ang among gikahadlokan niadtong Mayo 13, 1970, dihang ang mga Saksi ni Jehova opisyal nga gidili. Ang nindot ug bag-o nga pasilidad sa sangang buhatan, nga lima pa lang ka bulan namong gibalhinan, gikompiskar sa gobyerno. Wala ray semana, ang tanang misyonaryo—apil mi ni Sheila—gipapahawa sa nasod. Nalisdan mig biya sa mga igsoon kay gimahal namo sila pag-ayo ug nabalaka mi kon unsay mahitabo nila.

Sulod sa unom ka bulan, naa mi sa sangang buhatan sa France. Didto, padayon nakong gihimo ang tanan nakong maarangan aron maatiman ang panginahanglan sa mga igsoon sa Cameroon. Pagka-Disyembre nianang tuiga, giasayn mi sa sangang buhatan sa Nigeria, nga mao nay nag-atiman sa buluhaton sa Cameroon. Giabiabi mi pag-ayo sa mga igsoon sa Nigeria, ug nalipay gyod mi nga nag-alagad didto sulod sa pipila ka tuig.

LISOD NGA DESISYON

Niadtong 1973, kinahanglan ming mohimog lisod kaayo nga desisyon. Si Sheila nag-antos ug seryosong mga problema sa panglawas. Samtang naa mi sa New York para sa kombensiyon, mikalit siyag hilak ug miingon: “Dili na nako kayang mopadayon! Pirmeng luya ang akong lawas, ug sige na lang kog kasakit.” Kauban nakong nag-alagad si Sheila sa West Africa sulod sa kapig 14 ka tuig. Naapresyar kaayo nako ang iyang matinumanong pag-alagad, pero kinahanglan ming mohimog mga kausaban. Gihisgotan namo ang among situwasyon ug kinasingkasing nga nag-ampo. Human niana, nakadesisyon mi nga mobalik sa Canada aron mas maatiman ang panglawas ni Sheila. Ang pagbiya sa among asaynment ingong misyonaryo ug sa bug-os panahong pag-alagad mao ang pinakalisod ug makapaguol kaayo nga desisyon nga kinahanglan namong himoon.

Pag-abot sa Canada, nagtrabaho ko sa akong amigo nga tigbaligyag sakyanan, didto sa usa ka lungsod sa norte nga bahin sa Toronto. Nangabang mi ni Sheila ug apartment, namalit ug secondhand nga mga gamit, ug nakabalhin mi nga wala ra nagkautang-utang. Gusto namong magpabiling simple ang among kinabuhi, ug naglaom nga basin makabalik ra mi sa bug-os panahong pag-alagad. Pero wala mi magdahom nga mahitabo dayon to.

Nagsugod ko sa pagboluntaryo kada Sabado sa construction site sa bag-ong Assembly Hall sa Norval, Ontario. Sa ngadtongadto, giasayn ko nga mag-alagad ingong Assembly Hall overseer. Miarang-arang na ang panglawas ni Sheila, ug gibati namo nga kaya na niyang mosuporta nako niining bag-ong asaynment. Maong mibalhin mi sa apartment sa Assembly Hall niadtong Hunyo 1974. Nalipay gyod kaayo mi nga nakabalik sa bug-os panahong pag-alagad!

Makapalipay kay padayong miarang-arang ang panglawas ni Sheila. Duha ka tuig sa ulahi, gidawat namo ang asaynment sa sirkitong buluhaton. Ang sirkito naa sa Manitoba, usa ka probinsiya sa Canada nga tugnaw kaayo. Bisan pa niana, nalipay gyod mi sa mainitong gugma nga gipakita sa mga igsoon didto. Among nakat-onan nga dili importante kon asa ta mag-alagad—ang importante nga padayon tang moalagad kang Jehova bisan asa pa ta.

NAKAKAT-ON UG IMPORTANTENG LEKSIYON

Human sa pipila ka tuig sa sirkitong buluhaton, gidapit mi nga mag-alagad sa Canada Bethel niadtong 1978. Wala madugay human niana, nakakat-on kog importanteng leksiyon nga sa primero sakit dawaton. Sa usa ka espesyal nga miting sa Montreal, naasayn ko nga mohatag ug usag tunga ka oras nga pakigpulong sa French nga pinulongan. Makapaguol kay wala nako makuha ang atensiyon sa mga mamiminaw, maong naay brader gikan sa Service Department nga mihatag nakog tambag bahin niini. Pero niadtong higayona, naghunahuna ko nga maayo ko nga mamumulong. Maong wala nako dawata ang tambag sa brader. Morag dili magkauyon ang among personalidad. Gibati nako nga hinawayon ra kaayo siya ug wala gani maghatag ug komendasyon. Nasayop ko kay gihukman nako ang tambag base sa kon giunsa ni paghatag ug sa akong gibati sa naghatag ani.

Pipila ka adlaw sa ulahi, usa ka membro sa Branch Committee ang nakig-estorya nako bahin niini. Giangkon nako nga dili maayo ang akong reaksiyon sa tambag ug nagmahay ko sa akong gihimo. Dayon nangayo kog pasaylo sa brader nga nagtambag nako, ug iya kong gipasaylo. Kadto nga eksperyensiya nagtudlo nakog importanteng leksiyon bahin sa pagkamapainubsanon, nga dili gyod nako malimtan. (Prov. 16:18) Kadaghan nako ning giampo kang Jehova, ug determinado ko nga dili na isipon ang mga tambag sa negatibong paagi.

Kapig 40 ka tuig na ko sa Canada Bethel, ug sukad sa 1985, nakapribilehiyo ko nga mag-alagad ingong membro sa Branch Committee. Niadtong Pebrero 2021, ang akong minahal nga si Sheila mipahulay sa kamatayon. Gawas nga gimingaw ko niya, naa pod koy giatubang nga mga problema sa panglawas. Pero tungod kay busy ko ug malipayon sa pag-alagad kang Jehova, ‘dili kaayo nako mamatikdan ang paglabay sa mga adlaw.’ (Eccl. 5:20) Bisag daghan kog giatubang nga mga kalisdanan, gamay ra kaayo ni kon itandi sa kalipay nga akong gibati tungod sa akong mga naeksperyensiyahan. Ang pag-una kang Jehova sa akong kinabuhi ug ang 70 ka tuig nga bug-os panahong pag-alagad makapatagbaw gyod. Nag-ampo ko nga unahon sab sa mga batan-on karon si Jehova, kay kombinsido ko nga maeksperyensiyahan pod nila ang makapatagbaw ug makapalipay nga kinabuhi nga posible lang kon moalagad ta kang Jehova.