Ayawg Padaog sa Imong mga Pagduhaduha

1-2. (a) Sa unsa tingali nagduhaduha ang ubang alagad ni Jehova? (b) Unsay atong hisgotan niini nga artikulo?

KITANG tanan, batan-on man o tigulang, naay mga pagduhaduhaa usahay. Pananglitan, imadyina ang usa ka batan-on nga nakapangutana kon interesado ba gyod si Jehova niya. Tungod ana, nagduhaduha tingali siya nga magpabawtismo. O hunahunaa ang usa ka brader kinsa, sa batan-on pa, mipili nga unahon ang Gingharian imbes ang kahigayonan nga mahimong inila o madato. Pero karon nga naglisod sa pinansiyal ang iyang pamilya, nagsugod na tingali siyag duhaduha kon husto ba ang desisyon nga iyang gihimo sa batan-on pa siya. Hunahunaa pod ang usa ka edarang sister nga luya na. Tingali maguol siya kay dili na niya mahimo ang mga butang nga iyang nahimo kaniadto. Naa pod ba kay ingon ana nga mga pagduhaduha ug nakapangutana sa imong kaugalingon: ‘Interesado ba gyod si Jehova nako? Husto ba ang akong gihimong mga sakripisyo para kang Jehova? Mapuslanon pa ba ko kang Jehova?’

² Kon dili nato matubag kini nga mga pangutana, makaapektar ni sa atong pag-alagad kang Jehova. Niini nga artikulo, atong hisgotan kon sa unsang paagi ang pagpamalandong sa mga prinsipyo sa Bibliya makatabang nato kon nagduhaduha ta kon (1) interesado ba gyod si Jehova nato, (2) husto ba ang atong nahimong mga desisyon, o (3) mapuslanon pa ba ta kang Jehova.

KON UNSAON NGA MADAOG ANG IMONG MGA PAGDUHADUHA

3. Unsa ang usa ka paagi nga madaog nato ang atong mga pagduhaduha?

³ Ang usa ka paagi nga madaog nato ang atong mga pagduhaduha mao ang pagsusi sa giingon sa Bibliya. Makatubag ni sa atong mga pangutana ug makatabang aron madasig ta, mouswag sa espirituwal, ug ‘makabarog nga lig-on sa pagtuo.’—1 Cor. 16:13.

4. Unsay atong himoon aron ‘maseguro nato ang tanang butang’? (1 Tesalonica 5:21)

⁴ Basaha ang 1 Tesalonica 5:21. Matikdi nga ang Bibliya nagdasig nato nga ‘seguroon ang tanang butang.’ Unsaon nato na paghimo? Angay natong seguroon nga tinuod ang atong gituohan pinaagi sa pagkompara niini sa giingon sa Bibliya. Pananglitan, konsideraha ang batan-on nga nagduhaduha kon interesado ba gyod ang Diyos kaniya. Angay ba niyang tuohan dayon ang iyang gihunahuna? Dili. Kinahanglan niyang ‘seguroon ang tanang butang’ pinaagi sa pagsusi kon unsay panghunahuna ni Jehova nianang bahina.

5. Sa unsang paagi “madungog” nato ang tubag ni Jehova sa atong mga pangutana?

⁵ Dihang mobasa ta sa Pulong sa Diyos, samag madungog nato si Jehova nga nakig-estorya nato. Pero aron mahibaloan nato ang iyang panghunahuna sa espesipikong pangutana, kinahanglan tang maningkamot. Angay tang mangitag mga teksto nga mohaom sa atong pangutana. Mag-research ta bahin niini gamit ang daghang study tool nga gitagana sa organisasyon ni Jehova. (Prov. 2:​3-6) Puwede natong hangyoon si Jehova nga giyahan ta sa atong pag-research ug tabangan ta nga mahibaloan ang iyang panghunahuna. Dayon mangita tag mga prinsipyo sa Bibliya ug praktikal nga mga impormasyon nga mapadapat sa atong kahimtang. Puwede pod natong basahon ang mga asoy sa Bibliya bahin sa mga alagad ni Jehova nga parehas natog gibati.

6. Sa unsang paagi ang mga tigom makatabang nato nga madaog ang atong mga pagduhaduha?

⁶ Samag madungog pod nato si Jehova nga nakig-estorya nato diha sa mga tigom. Kon regular tang motambong, makadungog ta ug mga pakigpulong o komento sa mga igsoon nga basin maoy makatabang nato. (Prov. 27:17) Hisgotan nato karon kon unsaon nga madaog nato ang pipila ka espesipikong mga pagduhaduha.

KON NAGDUHADUHA KA KON INTERESADO BA GYOD SI JEHOVA NIMO

7. Unsa tingali ang pangutana sa uban?

⁷ Nakapangutana na ba ka sukad sa imong kaugalingon, ‘Interesado ba gyod si Jehova nako?’ Kon gibati nimo nga dili ka importante, maghunahuna tingali ka nga imposible nga mahimo kang higala sa Maglalalang sa uniberso. Posibleng nakahunahuna pod ana si Haring David. Nahingangha kaayo siya nga gihatagan ni Jehova ug pagtagad ang mga tawo, maong nakapangutana siya: “Oh Jehova, unsa ra man ang tawo nga ikaw magtagad man kaniya, ang anak sa tawo nga ikaw mamati man kaniya?” (Sal. 144:3) Asa ka makakitag tubag niini nga pangutana?

8. Base sa 1 Samuel 16:​6, 7, 10-12, unsay ginatan-aw ni Jehova sa mga tawo?

⁸ Sa Bibliya, atong nakat-onan nga gihatagan ni Jehova ug pagtagad ang mga tawo nga giisip sa uban nga dili importante. Pananglitan, gipadala ni Jehova si Samuel sa balay ni Jese aron dihogan ang usa sa iyang mga anak ingong umaabot nga hari sa Israel. Gipatawag ni Jese ang pito sa iyang walo ka anak nga lalaki aron makita ni Samuel, pero wala niya apila si David, ang kamanghoran.b Pero si David mao ang gipili ni Jehova. (Basaha ang 1 Samuel 16:​6, 7, 10-12.) Nakita ni Jehova kon unsa gyoy naa sa iyang kasingkasing—nga gipabilhan niya ang espirituwal nga mga butang.

9. Nganong makaseguro ka nga interesado si Jehova nimo? (Tan-awa sab ang hulagway.)

⁹ Hunahunaa kon giunsa pagpakita ni Jehova nga interesado siya nimo. Naghatag siyag tambag nga haom kaayo sa imong panginahanglan. (Sal. 32:8) Mahimo kaha na niya kon wala gyod siya makaila nimo? (Sal. 139:1) Dihang imong ipadapat ang iyang tambag ug makita kon sa unsang paagi ni nakatabang nimo, mas makombinsir ka nga importante gyod ka kang Jehova. (1 Cron. 28:9; Buh. 17:​26, 27) Nakita ni Jehova ang imong mga paningkamot. Nahibalo siya kon unsay naa sa imong kasingkasing, maong siya mismo ang mihimog paagi aron makighigala nimo. (Jer. 17:10) Malipay gyod siya kon imong dawaton ang iyang imbitasyon nga mahimong iyang higala.—1 Juan 4:19.

KON NAGDUHADUHA KA KON HUSTO BA ANG MGA DESISYON NGA IMONG GIHIMO

10. Dihang maghunahuna ta sa mga desisyon nga atong gihimo kaniadto, unsa tingali ang atong ikapangutana?

¹⁰ Paglabay sa panahon, ang uban mamalandong tingali sa mga desisyon nga ilang gihimo kaniadto ug maghunahuna kon husto ba kini. Tingali midesisyon sila nga biyaan ang ilang trabaho nga dako untag suweldo o ang ilang negosyo nga maayo untag kita aron mas makaalagad sila kang Jehova. Pero paglabay sa taastaas nga panahon, nakita tingali nila ang ilang mga kaubanan kaniadto nga dato na karon ug komportable ug kinabuhi. Tungod ana, makahunahuna tingali sila: ‘Husto ba ang akong gihimong desisyon nga unahon si Jehova? Mas maayo kaha ang akong kinabuhi karon kon lahi pa nga desisyon ang akong gihimo?’

11. Unsay nakapatugaw sa magsusulat sa Salmo 73?

¹¹ Kon nakapangutana pod ka kon husto ba ang mga sakripisyo nga imong gihimo para kang Jehova, konsideraha ang gibati sa magsusulat sa Salmo 73. Nakita niya nga ang uban niadtong wala mag-alagad kang Jehova maayog kinabuhi, himsog, ug morag walay problema. (Sal. 73:​3-5, 12) Samtang nagtan-aw siya nila ug sa ilang kalamposan, gibati niya nga morag walay pulos ang iyang mga paningkamot sa pag-alagad kang Jehova. Tungod niining makapaluya nga panghunahuna, ‘natugaw siya sa tibuok adlaw.’ (Sal. 73:​13, 14) Unsay iyang gihimo aron mawala ang iyang negatibong pagbati?

12. Base sa Salmo 73:​16-18, unsay gihimo sa magsusulat aron mawala ang iyang negatibong pagbati?

¹² Basaha ang Salmo 73:​16-18. Ang salmista miadto sa sangtuwaryo ni Jehova. Didto, nakapamalandong siya pag-ayo. Nakita niya nga bisag morag hayahay ang kinabuhi sa uban, wala silay paglaom sa umaabot. Dihang iya ning nasabtan, nagmalinawon ang iyang hunahuna kay nakita niya nga ang pag-una sa espirituwal nga mga butang mao ang pinakamaayo nga desisyon. Ingong resulta, nabalik ang iyang determinasyon nga padayong mag-alagad kang Jehova.—Sal. 73:​23-28.

13. Unsay makatabang nimo kon nagduhaduha ka sa mga desisyon nga imong gihimo kaniadto? (Tan-awa sab ang hulagway.)

¹³ Sama sa salmista, magmalinawon sab ang imong hunahuna sa tabang sa Pulong sa Diyos. Sa unsang paagi? Pamalandonga ang tanan nimong nabatonan karon—apil ang imong mga bahandi sa langit—ug ikompara ni sa nabatonan niadtong mga tawo nga wala mag-alagad kang Jehova. Kini nga mga tawo nagpokus lang sa ilang kalamposan ug sa ginatanyag sa kalibotan karon kay wala silay laing gidahom nga paglaom sa umaabot. Pero sa imong bahin, gawas pa sa maayong mga butang nga imong nabatonan karon, naa pa gyoy gisaad si Jehova kanimo nga nindot nga mga panalangin sa umaabot. (Sal. 145:16) Hunahunaa pod ni: Dili gyod nato bug-os mahibaloan kon unsay atong kinabuhi karon kon lahi pa nga desisyon ang atong gihimo. Pero usa ka butang ang segurado: Kadtong mihimog mga desisyon base sa ilang gugma sa Diyos ug sa mga tawo dili gyod makulangan ug bisan unsa nga makahatag nilag tinuod nga kalipay.

KON NAGDUHADUHA KA KON MAPUSLANON BA KA KANG JEHOVA

14. Unsay kahimtang sa uban, ug unsa tingali ang ilang ikapangutana?

¹⁴ Ang ubang alagad ni Jehova tigulang na, nag-antos sa sakit, o naay depekto sa lawas. Tungod ana, magduhaduha tingali sila kon bililhon ba sila kang Jehova. Tingali makapangutana sila, ‘Mapuslanon pa ba ko kang Jehova?’

15. Sa unsa kombinsido ang magsusulat sa Salmo 71?

¹⁵ Nakahunahuna pod niana ang magsusulat sa Salmo 71. Siya miampo: “Ayaw kog biyai dihang luya na ko.” (Sal. 71:​9, 18) Bisan pa niana, ang salmista kombinsido nga kon mag-alagad siya nga maunongon, giyahan ug tabangan siya ni Jehova. Nakat-onan sa salmista nga nalipay si Jehova niadtong naghimo sa ilang kinamaayohan sa pag-alagad Kaniya bisan pa sa ilang mga limitasyon.—Sal. 37:​23-25.

16. Nganong giisip ni Jehova nga mapuslanon ang mga tigulang? (Salmo 92:​12-15)

¹⁶ Kon tigulang ka, hunahunaa kon unsay panglantaw ni Jehova kanimo. Makatabang siya nimo nga padayong mag-alagad kaniya bisan pa sa imong pisikal nga mga limitasyon. (Basaha ang Salmo 92:​12-15.) Imbes magpokus sa kon unsay dili na nimo mahimo, hunahunaa kon unsay kaya nimong himoon. Pananglitan, mapalig-on nimo ang uban pinaagi sa imong maayong ehemplo ug sa personal nga interes nga imong ginapakita. Puwede nimo silang sultihan kon giunsa ka pagtabang ni Jehova sulod na sa daghang katuigan ug kon unsa ka lig-on ang imong pagsalig nga matuman ang iyang mga saad. Ug ayawg pakamenosa ang mahimo sa imong kinasingkasing nga pag-ampo para sa uban. (1 Ped. 3:12) Bisag unsa pay atong kahimtang, kitang tanan naay mahatag kang Jehova ug sa uban.

17. Nganong angay natong suklan ang tendensiya nga ikompara ang atong kaugalingon sa uban?

¹⁷ Kon naluya ka kay gamay na lang ang imong mahimo sa pag-alagad kang Jehova, makaseguro ka nga gipabilhan niya ang bisan unsa nga imong mahimo. Maong sukli ang tendensiya nga ikompara ang imong kaugalingon sa uban. Ngano? Kay si Jehova dili gyod magtanditandi. (Gal. 6:4) Pananglitan, si Maria mihatag kang Jesus ug humot nga lana nga mahal kaayo. (Juan 12:​3-5) Sa laing bahin, ang kabos nga babayeng balo miamot diha sa templo ug duha ra ka gagmayng sensilyo nga ubos kaayog bili. (Luc. 21:​1-4) Pero wala ikompara ni Jesus kining duha ka babaye. Ang ilang gihimo parehas niyang giisip ingong ekspresyon sa ilang pagtuo. Ingon ana pod si Jehova. Nakita ni Jehova ang bisan unsa nga imong ginahimo tungod sa imong gugma ug pagtuo kaniya. Iya gyod nang gipabilhan, bisag para nimo gamay ra kaayo ang imong nahimo.

18. Unsay makatabang nato nga madaog ang atong mga pagduhaduha? (Tan-awa sab ang kahong “Ang Pulong ni Jehova Makatabang Aron Madaog Nimo ang mga Pagduhaduha.”)

¹⁸ Kitang tanan naay mga pagduhaduha usahay. Pero sa ato nang nakita, kaya nato ning suklan sa tabang sa Pulong sa Diyos, ang Bibliya. Maong paningkamoti nga madaog ang imong mga pagduhaduha ug mapulihan kinig pagsalig. Makaseguro ka nga personal gyod kang nailhan ni Jehova. Gipabilhan niya ang imong mga sakripisyo ug tumanon gyod niya ang iyang saad nga panalanginan ka. Makasalig ka nga gimahal ug gipabilhan ni Jehova ang matag usa sa iyang maunongong mga alagad.