Sundoga ang Panghunahuna ni Jehova ug ni Jesus

1-2. Unsay gipasabot sa paghigugma kang Jehova, ug giunsa pagpakita ni Jesus nga iyang gihigugma si Jehova?

“HIGUGMAA si Jehova nga imong Diyos sa tibuok mong kasingkasing, sa tibuok mong kalag, sa tibuok mong kusog, ug sa tibuok mong hunahuna.” (Luc. 10:27) Si Jesus miingon nga kini ang pinakaimportanteng sugo sa Moisesnong Balaod. Matikdi nga kinahanglang higugmaon nato si Jehova sa tibuok natong kasingkasing, nga naglakip sa atong mga tinguha, pagbati, ug emosyon. Kinahanglan pod nato siyang higugmaon sa tibuok natong kalag ug kusog. Pero dili kay kana ra ang gipasabot sa paghigugma kang Jehova. Angay sab nato siyang higugmaon sa tibuok natong hunahuna, nga naglakip sa atong panglantaw sa mga butang. Siyempre, dili gyod nato bug-os masabtan ang panghunahuna ni Jehova. Pero makatabang nato ang pagtuon sa “panghunahuna sa Kristo” kay bug-os nga gisundog ni Jesus ang panghunahuna sa iyang Amahan.—1 Cor. 2:16 ug study note nga “we do have the mind of Christ.”

² Gihigugma ni Jesus si Jehova sa tibuok niyang hunahuna. Nahibalo siya kon unsay kabubut-on sa Diyos para niya ug determinado siya nga buhaton kana, bisan pag nagkahulogan kana nga mag-antos siya. Wala gyod niya tugoti ang bisan unsang butang nga makabalda niya sa pagbuhat sa kabubut-on sa iyang Amahan.

3. Unsay nakat-onan ni apostol Pedro kang Jesus, ug unsay gidasig ni Pedro nga himoon sa iyang mga isigka-Kristohanon? (1 Pedro 4:1)

³ Si Pedro ug ang iyang kaubang mga apostoles nakapribilehiyo nga makauban mismo si Jesus ug makakat-on sa iyang panghunahuna. Sa iyang unang sulat, gidasig ni Pedro ang mga Kristohanon nga andamon ang ilang kaugalingon nga magbaton sa panghunahuna sa Kristo. (Basaha ang 1 Pedro 4:1.) Sa orihinal nga pinulongan, dihang si Pedro miingon “andama . . . ang inyong kaugalingon,” naa sa iyang hunahuna ang mga sundalo nga nagtakin o nagbitbit sa ilang mga armas alang sa gubat. Busa kon sundogon sa mga Kristohanon ang panghunahuna ni Jesus, sama rag nagtakin silag epektibong armas aron makadaog batok sa ilang makasasalang mga tinguha ug sa kalibotan nga gimandoan ni Satanas.—2 Cor. 10:3-5; Efe. 6:12.

4. Sa unsang paagi kining artikuloha makatabang nato sa pagsunod sa tambag ni Pedro?

⁴ Atong susihon ang panghunahuna ni Jesus ug hisgotan kon unsaon nato ni pagsundog. Atong sayron (1) kon sa unsang paagi masundog nato ang panghunahuna ni Jehova, nga makatabang nato nga magkahiusa sa atong panghunahuna, (2) kon unsaon nga mahimo tang mapainubsanon, ug (3) kon sa unsang paagi makaugmad tag maayong panghunahuna pinaagi sa pagsalig kang Jehova diha sa pag-ampo.

SUNDOGA ANG PANGHUNAHUNA NI JEHOVA

5. Unsa ang usa ka higayon nga wala masundog ni Pedro ang panghunahuna ni Jehova?

⁵ Konsideraha ang usa ka higayon dihang wala masundog ni Pedro ang panghunahuna ni Jehova. Giingnan ni Jesus ang iyang mga apostoles nga kinahanglan siyang moadto sa Jerusalem ug itugyan ngadto sa relihiyosong mga lider didto, paantoson, ug dayon patyon. (Mat. 16:21) Nahibalo si Pedro nga si Jesus mao ang paglaom sa Israel ug ang gisaad nga Mesiyas, maong nalisdan tingali siya sa pagdawat nga tugotan ni Jehova nga mamatay si Jesus. (Mat. 16:16) Maong gidala ni Pedro si Jesus sa daplin ug giingnan: “Maluoy ka sa imong kaugalingon, Ginoo; dili gayod kana mahitabo kanimo.” (Mat. 16:22) Managlahi ang panghunahuna ni Jesus ug Pedro niining butanga tungod kay wala sundoga ni Pedro ang panghunahuna ni Jehova.

6. Giunsa pagpakita ni Jesus nga gisundog niya ang panghunahuna ni Jehova?

⁶ Gisundog gyod ni Jesus ang panghunahuna sa iyang langitnong Amahan. Iyang giingnan si Pedro: “Palikod nako, Satanas! Kapandolan ka kanako kay ang imong hunahuna, hunahuna sa tawo, dili sa Diyos.” (Mat. 16:23) Tingali maayo ang intensiyon ni Pedro sa iyang tambag, pero wala gyod na dawata ni Jesus. Nahibalo si Jesus nga aron mabuhat ang kabubut-on ni Jehova, kinahanglan siyang mag-antos ug mamatay. Nianang higayona, nakat-onan ni Pedro nga kinahanglang usbon niya ang iyang panghunahuna ug ipahiuyon kini sa panghunahuna sa Diyos. Angay pod natong hinumdoman kining importante nga leksiyon.

7. Giunsa pagpakita ni Pedro sa ulahi nga naningkamot gyod siya sa pagsundog sa panghunahuna ni Jehova? (Tan-awa ang hulagway.)

⁷ Sa ulahi, gipakita ni Pedro nga naningkamot siya sa pagsundog sa panghunahuna ni Jehova. Miabot na ang panahon nga gitugot sa Diyos nga mahimong bahin sa iyang katawhan ang dili tinuli nga mga Hentil. Si Pedro ang giasayn sa pagsangyaw kang Cornelio, usa sa unang mga Hentil nga sa ulahi nahimong Kristohanon. Niadtong panahona, ginalikayan sa mga Hudiyo ang mga Hentil, maong dili gyod sayon para kang Pedro ang maong asaynment. Pero sa dihang nasabtan ni Pedro ang kabubut-on sa Diyos niining butanga, iyang giusab ang iyang panghunahuna. Busa, iyang gituman ang gisugo kaniya nga “wala gayoy pagduhaduha.” (Buh. 10:28, 29) Gisangyawan ni Pedro si Cornelio ug ang iyang panimalay, ug sila nabawtismohan.—Buh. 10:21-23, 34, 35, 44-48.

8. Unsaon nato pagpakita nga gisundog nato ang panghunahuna ni Jehova? (1 Pedro 3:8 ug footnote)

⁸ Paglabay sa mga tuig, gidasig ni Pedro ang mga Kristohanon nga “magkauyon sa hunahuna.” (Basaha ang 1 Pedro 3:8 ug footnote.) Ingong katawhan sa Diyos, magkauyon ta sa atong panghunahuna kon atong sundogon ang panghunahuna ni Jehova nga anaa sa Bibliya. Pananglitan, giawhag ni Jesus ang iyang mga sumusunod nga unahon sa ilang kinabuhi ang Gingharian. (Mat. 6:33) Ingong pagpadapat niana, tingali naay igsoon sa inyong kongregasyon nga gustong magpayunir o mosulay ug laing paagi sa bug-os panahong pag-alagad. Imbes dasigon siya nga pilion ang mas sayon nga kinabuhi, angay nato siyang komendahan ug suportahan sa iyang tumong.

MAGMAPAINUBSANON

9-10. Giunsa pagpakita ni Jesus nga mapainubsanon gyod siya?

⁹ Sa gabii una pa mamatay si Jesus, gitudloan niya si Pedro ug ang ubang apostoles ug usa ka importanteng leksiyon bahin sa pagkamapainubsanon. Una pa niana, gisugo ni Jesus si Pedro ug Juan nga andamon ang tanang gikinahanglan alang sa iyang kataposang panihapon uban kanila. Tingali, apil sa ilang giandam ang planggana ug mga tualya nga gamiton sa paghugas sa ilang mga tiil sa dili pa sila manihapon. Pero kinsa may mohimo niining ubos nga trabaho?

¹⁰ Mapainubsanon gyod si Jesus, kay wala siya magduhaduha nga himoon ang butang nga sagad ginahimo sa usa ka ulipon. Imadyina ang kakurat sa iyang mga apostoles sa dihang gihubo ni Jesus ang iyang panggawas nga besti, gibakos ang tualya sa iyang hawak, gibutangag tubig ang planggana, ug gihugasan ang tiil sa iyang mga apostoles. (Juan 13:4, 5) Tingali taudtaod pod una niya nahuman ug hugas ang tiil sa iyang 12 ka apostoles—apil na ang kang Judas nga hapit nang magbudhi niya. Pero gihuman gyod to ni Jesus. Dayon, mapailobon niya silang giingnan: “Nasabtan ba ninyo ang akong gihimo kaninyo? Gitawag ko ninyog ‘Magtutudlo’ ug ‘Ginoo,’ ug husto mo. Busa kon ako nga Ginoo ug Magtutudlo naghugas sa inyong mga tiil, angay sab nga hugasan ninyo ang mga tiil sa usag usa.”—Juan 13:12-14.

11. Giunsa pagpakita ni Pedro nga nakakat-on siya nga magmapainubsanon? (1 Pedro 5:5 ug footnote) (Tan-awa sab ang hulagway.)

¹¹ Si Pedro nakakat-on gikan sa pagkamapainubsanon ni Jesus. Human mibalik si Jesus sa langit, milagrosong giayo ni Pedro ang usa ka lalaki nga bakol sukad sa iyang pagkatawo. (Buh. 1:8, 9; 3:2, 6-8) Siyempre, nahingangha ang daghang tawo ug ilang gitapokan si Pedro. (Buh. 3:11) Gipahimuslan kaha ni Pedro ang kahigayonan aron mahimong sikat, ilabina kay nagdako siya sa kultura diin ang mga tawo taas kaayog panglantaw sa mga prominente ug tag-as ug posisyon? Wala, mapainubsanong giingnan ni Pedro ang mga tawo nga ihatag ang pagdayeg ngadto kang Jehova ug Jesus. Siya miingon: “Pinaagi sa [ngalan ni Jesus], ug pinaagi sa among pagtuo sa iyang ngalan, kining tawhana nga inyong nakita ug nailhan nahimong lig-on.” (Buh. 3:12-16) Sa ulahi, gisulatan ni Pedro ang mga Kristohanon nga kinahanglan silang magmapainubsanon. Sa orihinal nga pinulongan, migamit siyag pulong nga maghatag ug ideya nga kinahanglang ‘isul-ob ang pagkamapainubsanon.’ Magpahinumdom ni nato sa higayon nga gibakos ni Jesus ang tualya ug gihugasan ang tiil sa iyang mga apostoles.—Basaha ang 1 Pedro 5:5 ug footnote.

12. Sa unsang paagi masundog nato si Pedro sa pagpakitag pagkamapainubsanon?

¹² Masundog nato si Pedro pinaagi sa pagpaningkamot nga mahimong mapainubsanon. Hinumdomi nga ang tinuod nga pagkamapainubsanon wala lang magpasabot nga mapainubsanon ta sa atong sinultihan. Ang termino nga gigamit ni Pedro para sa pagkamapainubsanon nagpasabot ug pagpaubos sa hunahuna. Alagaran nato ang uban kay gimahal nato sila ug si Jehova, dili aron dayegon ta sa uban. Mapakita nato nga mapainubsanon ta kon malipayon natong alagaran si Jehova ug ang atong mga igsoon, bisan pag dili mamatikdan sa uban ang atong ginahimo.—Mat. 6:1-4.

UGMARA ANG “MAAYONG PANGHUNAHUNA”

13. Ipatin-aw kon unsay gipasabot sa “maayong panghunahuna.”

¹³ Unsay kahulogan sa “maayong panghunahuna”? (1 Ped. 4:7) Ang Kristohanon nga maayog panghunahuna maningkamot nga masabtan ang panghunahuna ni Jehova dihang mohimog desisyon. Para niya, ang pinakaimportante mao ang iyang relasyon kang Jehova. Balanse pod siyag panglantaw sa iyang kaugalingon, ug iyang giila nga limitado ra ang iyang nahibaloan. Gipakita pod niya ang iyang pagsalig sa Diyos pinaagi sa pagduol kanunay kang Jehova diha sa pag-ampo.a

14. Unsa ang usa ka higayon nga wala mosalig si Pedro kang Jehova?

¹⁴ Sa gabii una pa mamatay si Jesus, gipasidan-an niya ang iyang mga tinun-an: “Kamong tanan mobiya kanako karong gabhiona.” Pero si Pedro misalig sa iyang kaugalingon ug miingon: “Dili gyod ko mobiya nimo, bisan pag biyaan ka sa tanan!” Nianang gabhiona, gitambagan ni Jesus ang pipila sa iyang mga tinun-an: “Padayon mo sa pagbantay ug sa pag-ampo.” (Mat. 26:31, 33, 41) Kon gisunod ni Pedro ang tambag, naa unta siyay kaisog nga angkonon nga tinun-an siya ni Jesus. Pero lahi ang iyang gihimo. Gilimod ni Pedro ang iyang Agalon, ug iya gyod tong gimahayan.—Mat. 26:69-75.

15. Unsay gihimo ni Jesus sa gabii una siya mamatay nga nakatabang niya nga padayong mabatonan ang maayong panghunahuna?

¹⁵ Si Jesus bug-os nga misalig kang Jehova. Bisag hingpit siya, balikbalik siyang nag-ampo. Nakahatag to niyag kaisog nga sundon ang kabubut-on ni Jehova para niya. (Mat. 26:39, 42, 44; Juan 18:4, 5) Seguradong wala gyod malimti ni Pedro sa iyang tibuok kinabuhi ang maayong ehemplo ni Jesus sa pag-ampo kanunay.

16. Giunsa pagpakita ni Pedro nga naugmad na niya ang maayong panghunahuna? (1 Pedro 4:7)

¹⁶ Sa ngadtongadto, nakat-onan ni Pedro nga mas mosalig kang Jehova diha sa pag-ampo. Dihang nabanhaw si Jesus, iyang gipasaligan si Pedro ug ang ubang apostoles nga makadawat sila ug balaang espiritu aron matuman nila ang ilang buluhaton sa pagsangyaw. Pero giingnan sila ni Jesus nga magpabilin sa Jerusalem hangtod madawat nila ang balaang espiritu. (Luc. 24:49; Buh. 1:4, 5) Unsay gihimo ni Pedro samtang naghulat? Si Pedro ug ang mga Kristohanon “nagpadayon sa pag-ampo.” (Buh. 1:13, 14) Sa ulahi, sa iyang unang sulat, gidasig niya ang mga Kristohanon nga batonan ang maayong panghunahuna ug kanunayng mosalig kang Jehova diha sa pag-ampo. (Basaha ang 1 Pedro 4:7.) Si Pedro nakakat-on nga mosalig kang Jehova, ug usa siya sa mga nakapalig-on pag-ayo sa kongregasyon.—Gal. 2:9.

17. Bisag unsa pay atong mga katakos o abilidad, unsay kinahanglan natong himoon? (Tan-awa sab ang hulagway.)

¹⁷ Aron mabatonan ang maayong panghunahuna, kinahanglang moampo ta kanunay kang Jehova. Atong ilhon nga bisag naa tay mga katakos o abilidad, gikinahanglan gihapon nato ang tabang ni Jehova. Busa moampo ta kang Jehova para sa giya ilabina kon mohimo tag importanteng mga desisyon, kay nahibalo si Jehova kon unsay pinakamaayo para nato.

18. Sa unsang paagi mas mouswag ta sa pagsundog sa panghunahuna ni Jehova?

¹⁸ Mapasalamaton kaayo ta sa pagkadisenyo ni Jehova nato kay gihatagan ta niyag katakos nga mapakita ang iyang mga hiyas. (Gen. 1:26) Siyempre, dili nato bug-os masundog si Jehova. (Isa. 55:9) Pero sama kang Pedro, puwede tang mas mouswag nianang bahina. Hinaot magmadeterminado ta nga himoon kana pinaagi sa pagpaningkamot nga masundog ang panghunahuna sa Diyos, magmapainubsanon, ug maugmad ang maayong panghunahuna.