Salig sa Paghupay ni Jehova

1. Unsay kahimtang sa Hudiyong mga binihag didto sa Babilonya?

IMADYINA kon unsay gibati sa mga Hudiyo sa dihang gibihag sila ngadto sa Babilonya. Nakita nila nga gilaglag ang ilang yutang natawhan. Tungod sa ilang mga sala ug sa sala sa ilang mga katigulangan, gidala sila ngadto sa layo kaayong nasod. (2 Cron. 36:15, 16, 20, 21) Tinuod, naa ra silay kagawasan nga himoon ang ilang adlaw-adlawng kalihokan didto sa Babilonya. (Jer. 29:4-7) Pero dili sayon ang ilang kinabuhi didto, ug segurado nga dili kadto ang kinabuhi nga ilang gusto. Unsay ilang gibati sa ilang situwasyon? Matikdi ang giingon sa usa ka matinumanong binihag: “Nanglingkod mi sa daplin sa mga suba sa Babilonya. Nanghilak mi dihang nahinumdom sa Zion.” (Sal. 137:1) Nagkinahanglan gyod ug paghupay ang naguol nga mga binihag, pero asa man sila makakitag paghupay?

2-3. (a) Unsay gihimo ni Jehova para sa nabihag nga mga Hudiyo? (b) Unsay atong hisgotan niining artikuloha?

² Si Jehova “ang Diyos sa tanang paghupay.” (2 Cor. 1:3) Ingong mahigugmaong Diyos, malipay gyod siya sa paghupay niadtong tanan nga makigsuod niya. Nahibalo si Jehova nga ang ubang mga binihag modawat sa iyang disiplina ug mobalik kaniya. (Isa. 59:20) Busa, kapig 100 ka tuig sa wala pa sila mabihag, gigiyahan ni Jehova si propetang Isaias sa pagsulat sa basahon sa Isaias. Para sa unsang katuyoan? Si Isaias misulat: “‘Hupaya, hupaya ang akong katawhan,’ miingon ang inyong Diyos.” (Isa. 40:1) Oo, pinaagi sa basahon sa Isaias, gihatag ni Jehova ang paghupay nga gikinahanglan sa Hudiyong mga binihag.

³ Sama sa Hudiyong mga binihag, nagkinahanglan pod tag paghupay matag karon ug unya. Niining artikuloha, atong konsiderahon ang tulo ka paagi nga gihupay ni Jehova ang mga binihag: (1) Nagsaad siya nga iyang pasayloon ang mga mahinulsolon, (2) naghatag siyag paglaom sa iyang katawhan, ug (3) gitabangan niya sila nga dili sobrang mabalaka. Samtang ato ning hisgotan, konsiderahon pod nato kon giunsa ta paghupay ni Jehova niining mga paagiha.

SI JEHOVA MALULUY-ONG NAGPASAYLO NATO

4. Giunsa pagpakita ni Jehova nga siya maluluy-ong Diyos? (Isaias 55:7)

⁴ Si Jehova “ang Amahan nga malumo ug maluluy-on.” (2 Cor. 1:3) Gipakita ni Jehova nga maluluy-on siya dihang nagsaad siya nga iyang pasayloon ang mahinulsolong mga binihag. (Basaha ang Isaias 55:7.) Siya miingon: “Tungod sa walay kataposang maunongong gugma kaluy-an ka nako.” (Isa. 54:8) Giunsa pagpakita ni Jehova ang iyang kaluoy? Bisag kinahanglan gihapong antoson sa mga Hudiyo ang pait nga resulta sa ilang mga sala, si Jehova nagsaad nga dili sila magpabilin sa Babilonya hangtod sa hangtod. (Isa. 40:2) Seguradong nakahupay ug nakapalig-on gyod to sa mahinulsolong mga Hudiyo!

5. Nganong mas daghan tag rason nga mosalig sa kaluoy ni Jehova kon itandi sa nabihag nga mga Hudiyo?

⁵ Unsay atong makat-onan? Si Jehova andam ug bug-os gyong mopasaylo sa iyang mga alagad. Karon, mas daghan tag rason nga mosalig sa kaluoy ug pagpasaylo ni Jehova kon itandi sa nabihag nga mga Hudiyo. Ngano? Tungod kay nasabtan nato ang basehanan sa pagpasaylo ni Jehova. Gatosan ka katuigan human managna si Isaias, gipadala ni Jehova ang iyang pinalanggang Anak ingong halad lukat para sa tanang mahinulsolong makasasala. Kana nga halad naghatag ug basehanan aron “mapapas,” o bug-os nga mapasaylo, ang atong mga sala. (Buh. 3:19; Isa. 1:18; Efe. 1:7) Maluluy-on gyod ang Diyos nga atong gialagaran!

6. Nganong makapahupay ang paghunahuna kon unsa ka maluluy-on si Jehova? (Tan-awa sab ang hulagway.)

⁶ Ang giingon sa Isaias 55:7 makatabang nato sa dihang mabug-atan ta tungod sa grabeng pagkakonsensiya. Ang uban nato makonsensiya tingali gihapon tungod sa sayop nga atong nahimo bisag naghinulsol na ta. Mao tingali ni ang atong bation ilabina kon nag-antos gihapon ta sa pait nga mga resulta sa atong sayop. Pero kon ato nang gitug-an ang atong sala ug wala na ni buhata, makasalig ta nga gipasaylo na ta ni Jehova. Sa dihang mopasaylo si Jehova, dili na gyod niya hinumdoman ang atong sala. (Itandi ang Jeremias 31:34.) Busa kon wala na hinumdomi ni Jehova ang atong nahimong sala, dili na pod nato ni angayng hinumdoman. Ang importante kang Jehova mao ang atong ginahimo karon, dili ang atong mga sayop nga nahimo kaniadto. (Ezeq. 33:14-16) Sa umaabot, wad-on sa atong maluluy-ong Amahan ang tanang resulta sa atong mga sayop.

7. Unsay magpalihok nato nga mangayog tabang kon naa tay gitagong sala?

⁷ Unsay atong himoon kon nakonsensiya ta tungod sa atong gitago nga seryosong sala? Ang Bibliya nagdasig nato nga mangayog tabang sa mga ansiyano. (Sant. 5:14, 15) Tinuod, dili tingali sayon nga itug-an ang atong nahimong sayop. Pero atong hinumdoman nga si Jehova ug ang mga brader nga iyang gigamit sa pagtabang nato magpakita natog gugma ug kaluoy. Kon ato ning hinumdoman ug maghinulsol gyod ta, mapalihok ta nga makig-estorya sa mga ansiyano. Konsideraha kon sa unsang paagi ang kaluoy ni Jehova nakapahupay sa brader nga si Arthur,a kinsa nakonsensiya pag-ayo tungod sa iyang gitagong sala. Siya miingon: “Mga usa ka tuig kong nagtan-aw ug pornograpiya. Pero human ko makadungog ug pakigpulong bahin sa pagbaton ug hinlong konsensiya, gitug-an nako ang akong sala ngadto sa akong asawa ug sa mga ansiyano. Human niana, miarang-arang ang akong gibati. Pero nakonsensiya gihapon ko sa akong nahimo. Gipahinumdoman ko sa mga ansiyano nga wala ko gisalikway ni Jehova. Ginadisiplina ta ni Jehova kay gimahal ta niya. Ang ilang makapahupayng mga pulong nakatandog gyod sa akong kasingkasing ug nakatabang nako nga masabtan nga gipasaylo na ko ni Jehova.” Karon, si Arthur payunir na ug ministeryal nga alagad. Makapahupay gyod ang pagkahibalo nga si Jehova magpakitag kaluoy kon tinuod tang maghinulsol!

SI JEHOVA NAGHATAG NATOG PAGLAOM

8. (a) Unsang paglaom ang gihatag ni Jehova sa mga binihag? (b) Base sa Isaias 40:29-31, unsay epekto niana nga paglaom ngadto sa mahinulsolong mga Hudiyo?

⁸ Sa panglantaw sa tawo, wala na gyoy paglaom ang kahimtang sa nabihag nga mga Hudiyo. Ang pinakagamhanang nasod niadtong panahona nga mao ang Babilonya dili gyod motugot nga buhian ang ilang mga binihag. (Isa. 14:17) Pero si Jehova naghatag ug paglaom sa iyang katawhan. Siya nagsaad nga iya silang pagawason, ug walay makapugong niya sa paghimo niana. (Isa. 44:26; 55:12) Para kang Jehova, ang Babilonya sama rag nipis nga abog. (Isa. 40:15) Sa usa lang ka paghuyop, mawala na ang abog. Unsay epekto niana sa mga binihag? Nakahupay gyod to nila. Pero dili kay kana ra. Si Isaias misulat: “Kadtong mga nagalaom kang Jehova maulian sa kusog.” (Basaha ang Isaias 40:29-31.) Oo, nakahatag gyod to nilag paglaom; “manglupad [sila] pataas nga daw may mga pako sa agila.”

9. Nganong makasalig ang mga binihag nga matuman ang mga saad ni Jehova?

⁹ Gihatagan ni Jehova ang mga binihag ug rason nga mosalig sa iyang mga saad. Sa unsang paagi? Pinaagi sa mga tagna nga ilang nahibaloan nga natuman na. Nahibalo sila nga napildi sa Asirya ang 10 ka tribo nga gingharian sa Israel ug gidala ang katawhan ingong binihag. (Isa. 8:4) Nakita nila nga gilaglag sa Babilonya ang Jerusalem ug gidala ingong binihag ang mga nagpuyo niini. (Isa. 39:5-7) Natuman pod ang tagna bahin kang Haring Zedekias dihang siya gibutaan ug gidala sa Babilonya. (Jer. 39:7; Ezeq. 12:12, 13) Ang tanang giingon ni Jehova natuman gyod. (Isa. 42:9; 46:10) Seguradong kining tanan nakapalig-on sa ilang pagtuo nga matuman pod ang saad ni Jehova nga pagawason sila sa Babilonya!

10. Niining kataposang mga adlaw, unsay makatabang nato nga molig-on ang atong paglaom?

¹⁰ Unsay atong makat-onan? Kon maguol ta, ang paglaom makahupay ug makapalig-on nato. Bisag nagpuyo ta sa lisod kaayong panahon ug makaatubang tag grabeng paglutos, dili gyod ta angayng mahadlok. Si Jehova naghatag natog nindot nga paglaom nga mabuhi hangtod sa hangtod—nga may tinuod nga kalinaw ug kasegurohan. Kini nga paglaom kinahanglang tin-aw kanunay sa atong hunahuna ug kasingkasing. Kay kon dili, ang atong paglaom mahisamag nindot nga view nga nahanap kay nagtan-aw ta gikan sa hugaw nga bentana. Sa unsang paagi magpabiling tin-aw sa atong hunahuna ug kasingkasing ang atong paglaom? Pinaagi sa kanunayng pagpamalandong kon unsa ka nindot ang atong kinabuhi sa bag-ong kalibotan. Puwede tang mobasag mga artikulo, motan-awg mga video, ug maminaw ug mga kanta nga naghisgot bahin sa atong paglaom. Puwede pod natong isulti kang Jehova ang mga saad nga eksayted kaayo tang matuman sa umaabot.

11. Unsay nakatabang sa usa ka sister nga makalahutay sa iyang grabeng sakit?

¹¹ Konsideraha kon sa unsang paagi ang paglaom nakapahupay ug nakapalig-on sa sister nga si Joy nga naay grabeng sakit. Siya miingon: “Sa dihang malumsan ko sa kabalaka, akong isulti kang Jehova kon unsa gyoy akong gibati kay nahibalo ko nga nakasabot siya nako. Dayon si Jehova naghatag nakog ‘gahom nga labaw sa kasarangan.’” (2 Cor. 4:7) Gi-imagine pod ni Joy ang iyang kaugalingon nga naa na sa bag-ong kalibotan, diin “walay residente nga moingon: ‘Masakiton ko.’” (Isa. 33:24) Kon ato pong ibubo kang Jehova ang tanan natong gibati ug magpokus sa atong paglaom, makahatag nato nig kusog sa paglahutay.

12. Unsay mga rason nga makasalig ta nga matuman ang mga saad ni Jehova? (Tan-awa sab ang hulagway.)

¹² Sama sa iyang gihimo sa Hudiyong mga binihag, si Jehova naghatag pod natog daghang rason nga mosalig sa iyang mga saad. Hunahunaa ang mga tagna nga nagakatuman na karon. Pananglitan, nagakatuman na ang tagna bahin sa Anglo-Amerikanong gahom nga “lig-on sa usa ka bahin ug huyang sa laing bahin.” (Dan. 2:42, 43) Nakadungog pod ta nga naay “mga linog sa lainlaing dapit,” ug nagsangyaw ta sa mga tawo “sa tanang kanasoran.” (Mat. 24:7, 14) Kini nga mga tagna ug ang uban pa nakapalig-on sa atong pagtuo nga matuman pod ang nindot kaayo nga mga saad ni Jehova sa umaabot.

SI JEHOVA NAGTABANG NATO NGA DILI SOBRANG MABALAKA

13. (a) Unsang mga kalisdanan ang maatubang sa mga Hudiyo sa dili pa sila makagawas sa Babilonya? (b) Base sa Isaias 41:10-13, sa unsang paagi gihupay ni Jehova ang nabihag nga mga Hudiyo?

¹³ Bisag gihupay na ni Jehova ang mga binihag pinaagig nindot nga paglaom, nahibalo siya nga makaatubang silag mga pagsulay sa dili pa sila makagawas sa Babilonya. Gitagna ni Jehova nga nianang panahona, naay gamhanang hari nga moatake sa palibot nga mga nasod sa Babilonya, ug dayon sa Babilonya mismo. (Isa. 41:2-5) Angay bang mahadlok ang mga Hudiyo? Gihupay daan ni Jehova ang iyang katawhan pinaagi sa pag-ingon: “Ayawg kahadlok, kay ako nagauban kanimo. Ayawg kabalaka, kay ako imong Diyos.” (Basaha ang Isaias 41:10-13.) Unsay iyang gipasabot sa dihang siya miingon: “Ako imong Diyos”? Wala lang siya basta magpahinumdom sa mga Hudiyo nga simbahon siya, kay kabalo na sila niana. Hinuon, iya silang gipahinumdoman nga siya dapig gihapon kanila, buot pasabot, siya padayong motabang nila.—Sal. 118:6.

14. Unsa pay gihimo ni Jehova aron mawala ang kahadlok sa mga binihag?

¹⁴ Gitabangan pod ni Jehova ang mga binihag nga mawala ang ilang kahadlok pinaagi sa pagpahinumdom kanila sa iyang walay kinutobang gahom ug kahibalo. Giingnan niya ang mga binihag nga motan-aw sa langit nga punog bituon. Siya miingon nga gawas nga gihimo niya ang mga bituon, nahibalo pod siya sa ilang mga ngalan. (Isa. 40:25-28) Busa kon nahibalo siya sa ngalan sa tanang bituon, unsa pa kaha sa ngalan sa matag usa sa iyang mga alagad! Ug kon naay gahom si Jehova sa paghimo sa mga bituon, seguradong naa pod siyay gahom sa pagtabang sa iyang katawhan. Oo, ang Hudiyong mga binihag wala gyoy rason nga mabalaka o mahadlok.

15. Giunsa pag-andam ni Jehova ang Hudiyong mga binihag sa kon unsay mahitabo?

¹⁵ Giandam pod ni Jehova ang iyang katawhan sa kon unsay mahitabo. Sa unang bahin sa basahon sa Isaias, giingnan sa Diyos ang katawhan: “Sulod sa inyong kinasulorang mga lawak, ug sirhi ang mga pultahan. Panago usa mo kadiyot hangtod nga ang kasuko molabay.” (Isa. 26:20) Kining mga pulonga unang natuman sa dihang gisulong ni Haring Ciro ang Babilonya. Usa ka historian sa karaang Grego miingon nga sa dihang gisulong ni Ciro ang Babilonya, siya “mihatag ug mando [sa iyang mga sundalo] nga patyon ang tanang naa sa gawas.” Imadyina ang kahadlok nga gibati sa mga namuyo sa Babilonya. Pero naluwas ang Hudiyong mga binihag, posible nga tungod sa ilang pagsunod sa mga instruksiyon ni Jehova.

16. Nganong dili ta angayng sobrang mabalaka bahin sa umaabot? (Tan-awa sab ang hulagway.)

¹⁶ Unsay atong makat-onan? Sa umaabot, hapit na natong maeksperyensiyahan ang pinakalisod nga panahon sa kasaysayan sa tawo—ang dakong kasakitan. Sa dihang magsugod na kana, ang mga tawo maglibog kon unsay buhaton o mangahadlok. Pero dili na mahitabo nato kay si Jehova ang atong Diyos. Mobarog ta nga may kaisog kay nahibalo ta nga “nagkaduol na ang [atong] kaluwasan.” (Luc. 21:28) Bisan pag atakehon ta sa nag-alyansa nga kanasoran, padayon tang mosalig kang Jehova. Proteksiyonan ta ni Jehova pinaagi sa iyang mga anghel ug hatagan ta niyag mga instruksiyon nga makaluwas sa atong kinabuhi. Sa unsang paagi niya ihatag ang maong mga instruksiyon? Wala ta mahibalo. Pero posibleng madawat nato ang maong mga instruksiyon diha sa kongregasyon. Busa, ang atong mga kongregasyon tingali magsilbi ingong atong “kinasulorang mga lawak,” nga makahatag natog proteksiyon. Sa unsang paagi ta makapangandam sa mahitabo sa umaabot? Kinahanglang makigsuod ta sa mga igsoon, andam mosunod sa mga nagapanguna, ug mahimong kombinsido nga si Jehova ang naggiya sa atong organisasyon.—Heb. 10:24, 25; 13:17.

17. Unsay imong himoon aron madawat nimo ang paghupay ni Jehova?

¹⁷ Dili sayon ang kinabuhi sa mga Hudiyo sa Babilonya, pero gihatagan sila ni Jehova ug paghupay nga ilang gikinahanglan. Mao pod na ang iyang himoon para nato. Maong bisan unsa pay mahitabo sa umaabot, padayon tang mosalig sa paghupay ni Jehova. Oo, mosalig ta nga siya maluluy-on kaayo ug andam mopasaylo. Kinahanglan nga pirmeng buhi sa atong hunahuna ug kasingkasing ang atong paglaom. Hinumdomi nga si Jehova ang atong Diyos, maong wala gyod tay angayng kahadlokan.