Mahinamong Paabota ang Siyudad nga Magpabilin Hangtod sa Hangtod

1. Unsay gitagna ni Jesus nga mahitabo sa Jerusalem sa unang siglo?

MGA pipila ka adlaw una sa iyang kamatayon, si Jesu-Kristo naghatag ug detalyadong tagna ngadto sa iyang mga sumusunod. Kini nga tagna unang natuman dihang nalaglag ang Jerusalem ug ang templo niini. Nagpasidaan siya nga moabot ang panahon nga ang siyudad sa Jerusalem ‘pagalibotan sa nagkampong kasundalohan.’ (Luc. 21:20) Giingnan ni Jesus ang iyang mga sumusunod nga sa dihang makita nila kini nga kasundalohan—nga mao ang Romanong mga sundalo—kinahanglang mobiya dayon sila sa siyudad.—Luc. 21:21, 22.

2. Unsang pahinumdom ang gihatag ni apostol Pablo ngadto sa Hebreohanong mga Kristohanon sa Judea ug Jerusalem?

² Pipila ka tuig sa wala pa gilibotan sa Romanong mga sundalo ang Jerusalem, gisulat ni apostol Pablo ang basahon sa Hebreohanon. Ug kini nga basahon naay importante kaayo nga mensahe. Gihatagan ni Pablo ang mga Kristohanon sa Judea ug Jerusalem ug hinungdanong tambag nga makatabang nila aron mahimong andam para sa umaabot. Unsay mahitabo sa umaabot? Malaglag ang Jerusalem. Aron maluwas ang maong mga Kristohanon, kinahanglang andam sila nga mobiya sa ilang mga balay ug negosyo. Busa bahin sa siyudad sa Jerusalem, si Pablo misulat: “Dinhi wala tay siyudad nga magpabilin.” Dayon siya midugang: “Mahinamon tang nagpaabot sa siyudad nga tukoron sa umaabot.”—Heb. 13:14.

3. Unsa “ang siyudad nga may tinuod nga mga pundasyon,” ug nganong ato ning gipaabot?

³ Ang mga Kristohanon nga midesisyon nga mobiya sa Jerusalem ug Judea lagmit gibiaybiay ug giyagayagaan. Pero kadto nga desisyon maoy nakaluwas nila. Karon daghan ang nagtamay nato kay wala ta magtuo nga ang mga tawo maoy makasulbad sa mga problema sa kalibotan ug wala pod ta magpokus nga mahimong dato. Pero nganong kana ang atong baroganan? Kay nahibalo ta nga kining sistemaha hapit nang laglagon. Nagpaabot ta sa giingon ni Pablo nga siyudad nga “tukoron sa umaabot,” ang “siyudad nga may tinuod nga mga pundasyon,” nga mao ang Gingharian sa Diyos.a (Heb. 11:10; Mat. 6:33) Ang matag sub-ulohan niini nga artikulo maghisgot sa mosunod: (1) kon sa unsang paagi ang tambag ni Pablo nakatabang sa unang siglong mga Kristohanon nga padayong magpaabot sa “siyudad nga tukoron sa umaabot,” (2) kon sa unsang paagi gitabangan sila ni Pablo nga mahimong andam sa umaabot nga panghitabo, ug (3) kon sa unsang paagi ang iyang tambag makatabang nato karon.

SALIG KANG JEHOVA KAY DILI GYOD KA NIYA TALIKDAN

4. Nganong importante ang Jerusalem sa mga Kristohanon?

⁴ Ang Jerusalem importante sa mga Kristohanon kay dinhi naporma ang unang Kristohanong kongregasyon niadtong 33 C.E., ug dinhi nagpuyo ang mga membro sa nagamandong lawas niadtong panahona. Dugang pa, daghang Kristohanon nianang siyudara ang nanag-iyag mga balay ug nakatigom ug daghang materyal nga butang. Pero gipasidan-an ni Jesus ang iyang mga sumusunod nga kinahanglang andam silang mobiya sa Jerusalem ug bisan gani sa Judea.—Mat. 24:16.

5. Sa unsang paagi giandam ni Pablo ang mga Kristohanon sa kon unsay mahitabo sa umaabot?

⁵ Aron maandam ang mga Kristohanon sa kon unsay mahitabo sa umaabot, gitabangan sila ni Pablo nga magpokus sa kon unsay panglantaw ni Jehova sa siyudad sa Jerusalem. Gipahinumdoman sila ni Pablo nga sa panglantaw ni Jehova, dili na balaan ang templo ug wala na Niya uyoni ang kahikayan sa pagkasaserdote ug ang mga halad nga gitanyag sa Jerusalem. (Heb. 8:13) Kadaghanan sa nagpuyo nianang siyudara wala motuo sa Mesiyas. Ang templo sa Jerusalem dili na mao ang sentro sa matuod nga pagsimba kang Jehova, ug kini pagalaglagon.—Luc. 13:34, 35.

6. Nganong gikinahanglan sa mga Kristohanon kaniadto ang tambag ni Pablo diha sa Hebreohanon 13:5, 6?

⁶ Dihang gisulatan ni Pablo ang mga Hebreohanon, ang Jerusalem dato nga siyudad. Ang Romanong awtor niadtong panahona miingon nga ang Jerusalem mao “ang pinakasikat nga siyudad sa Sidlakan.” Daghang mga Hudiyo sa lainlaing lugar ang mangadto didto kada tuig aron saulogon ang mga pista, nga nakaamot sa kadato sa Jerusalem. Walay duhaduha, nakabenepisyo pod ang mga Kristohanon sa maayong ekonomiya sa siyudad. Tingali mao nay hinungdan kon nganong giingnan sila ni Pablo: “Ayaw ninyog higugmaa ang kuwarta, hinuon magmakontento mo kon unsay naa ninyo.” Dayon iyang gikutlo ang nindot kaayo nga pasalig ni Jehova diha sa Kasulatan nga nag-ingon: “Dili gyod ka nako biyaan, ug dili gyod ka nako talikdan.” (Basaha ang Hebreohanon 13:5, 6; Deut. 31:6; Sal. 118:6) Gikinahanglan gyod sa mga Kristohanon nga nagpuyo sa Jerusalem ug Judea kini nga pasalig. Ngano? Kay wala madugay human nila madawat kini nga sulat, kinahanglan nilang biyaan ang ilang mga balay, negosyo, ug daghang materyal nga mga butang. Dayon kinahanglan nilang atubangon kon unsay nagpaabot nila sa lugar nga ilang balhinan.

7. Nganong kinahanglan natong palig-onon karon ang atong pagsalig kang Jehova?

⁷ Unsay leksiyon para nato? Sa dili madugay, moabot ang “dakong kasakitan” ug matapos na ang presenteng sistema sa mga butang. (Mat. 24:21) Sama sa mga Kristohanon sa unang siglo, kinahanglan tang magpabiling andam ug mabinantayon. (Luc. 21:34-36) Panahon sa dakong kasakitan, kinahanglan tingali natong biyaan ang atong mga kabtangan, ug bug-os mosalig nga dili gyod pasagdan ni Jehova ang iyang mga alagad. Bisan karon pa lang nga wala pa ang dakong kasakitan, naa tay kahigayonan nga ipakita kon kang kinsa ta nagasalig. Pangutan-a ang kaugalingon, ‘Ang ako bang mga desisyon ug plano sa kinabuhi nagpakita nga nagasalig ko, dili sa kuwarta, kondili sa Diyos nga nagsaad nga moatiman nako?’ (1 Tim. 6:17) Siyempre, naa tay makat-onan sa nahitabo sa unang siglo, pero ang “dakong kasakitan” mas lisod pa kay sa bisan unsa nga nasinatian sa mga Kristohanon. Busa unsaon nato pagkahibalo kon unsa gyoy atong himoon inigsugod sa dakong kasakitan?

MAGMASINUGTANON SA MGA NANGUNA

8. Unsang instruksiyon ang gihatag ni Jesus sa iyang mga tinun-an?

⁸ Mga pipila ka tuig human madawat sa mga Hebreohanon ang sulat ni Pablo, nakita nila nga gipalibotan sa Romanong mga sundalo ang siyudad sa Jerusalem. Ilhanan to nga kinahanglan na silang mobiya kay ang siyudad sa Jerusalem hapit nang laglagon. (Mat. 24:3; Luc. 21:20, 24) Pero asa man sila mangadto? Si Jesus igo rang miingon: “Kadtong anaa sa Judea kinahanglang moikyas ngadto sa kabukiran.” (Luc. 21:21) Pero kay daghan mag bukid nianang lugara, asa mang bukira sila angayng moadto?

9. Nganong posibleng naglibog ang mga Kristohanon kaniadto kon asang bukira sila mangikyas? (Tan-awa sab ang mapa.)

⁹ Konsideraha ang pipila sa mga bukid nga posibleng kaikyasan sa mga Kristohanon: kabukiran sa Samaria, sa Galilea, sa Lebanon, sa pikas bahin sa Jordan, ug ang Bukid sa Hermon. (Tan-awa ang mapa.) Ang ubang mga siyudad nianang mga bukira tingali morag luwas rang adtoan. Pananglitan, ang siyudad sa Gamla naa sa taas nga bukid ug lisod kaayo ang dalan paingon didto. Maong naghunahuna ang ubang Hudiyo nga luwas sila niining siyudara. Pero giatake sa mga Romano ang siyudad sa Gamla ug daghan sa mga namuyo didto ang nangamatay.b

10-11. (a) Sa unsang paagi kaha gigiyahan ni Jehova ang mga Kristohanon kaniadto? (Hebreohanon 13:7, 17) (b) Sa unsang paagi nakabenepisyo ang maong mga Kristohanon sa pagsunod sa mga nanguna? (Tan-awa sab ang hulagway.)

¹⁰ Posibleng gigamit ni Jehova ang mga nanguna sa kongregasyon aron giyahan ang mga Kristohanon. Ang historian nga si Eusebius misulat: “Ang kongregasyon sa Jerusalem gigiyahan sa Diyos pinaagi sa mensahe nga gipadayag ngadto sa tinudlong mga lalaki; gisugo sila . . . nga mobiya sa siyudad sa dili pa magsugod ang gubat ug mopuyo sa usa ka siyudad sa Perea nga gitawag ug Pella.” Morag praktikal nga lugar ang Pella kay dili ni layo sa Jerusalem ug medyo sayon rang adtoon. Kay kadaghanan sa mga nagpuyo niini mga Hentil, wala sila mag-apil-apil sa mga Hudiyo nga nakig-away sa mga Romano para sa kagawasan.—Tan-awa ang mapa.

¹¹ Ang mga Kristohanon nga miikyas ngadto sa bukid nagpadapat sa tambag ni Pablo nga nag-ingon: “Magmasinugtanon mo sa mga nanguna kaninyo.” (Basaha ang Hebreohanon 13:7, 17.) Ingong resulta, naluwas ang katawhan sa Diyos. Gipakita sa kasaysayan nga wala gyod biyai sa Diyos ang mga ‘nagpaabot sa siyudad nga may tinuod nga mga pundasyon,’ ang Gingharian sa Diyos.—Heb. 11:10.

12-13. Sa unsang paagi gigiyahan ni Jehova ang iyang katawhan sa lisod nga mga panahon?

¹² Unsay leksiyon para nato? Gigamit ni Jehova ang mga nanguna aron hatagan ang iyang katawhan ug espesipikong direksiyon. Mabasa nato diha sa Bibliya ang mga pananglitan kon sa unsang paagi si Jehova naggamit ug mga magbalantay aron giyahan ang iyang katawhan sa lisod nga mga panahon. (Deut. 31:23; Sal. 77:20) Karon daghan tag makita nga ebidensiya nga padayon gihapong gigamit ni Jehova ang mga nagapanguna.

¹³ Pananglitan, panahon sa COVID-19 nga pandemic, ang “mga nanguna” naghatag sa gikinahanglang direksiyon. Ang mga ansiyano nakadawat ug mga instruksiyon aron matagan-an ang espirituwal nga panginahanglan sa mga igsoon. Wala madugay human magsugod ang pandemic, nakahimo tag kombensiyon sa kapig 500 ka pinulongan pinaagig Internet, TV, ug radyo. Wala gyod mahunong ang suplay sa espirituwal nga pagkaon. Ingong resulta, padayon tang nagkahiusa. Masaligon ta nga bisag unsang mga problema ang atong maatubang sa umaabot, padayong tabangan ni Jehova ang mga nanguna aron makahimo silag maayong mga desisyon. Pero gawas sa pagsalig kang Jehova ug pagsunod sa iyang mga sugo, unsa pang mga hiyas ang makatabang nato aron maandam ta sa dakong kasakitan ug molihok nga maalamon nianang panahona?

IPAKITA ANG INIGSOONG GUGMA UG PAGKAMAABIABIHON

14. Base sa Hebreohanon 13:1-3, unsang mga hiyas ang kinahanglang ipakita sa mga Kristohanon sa hapit nang malaglag ang Hudiyong sistema?

¹⁴ Inigsugod sa dakong kasakitan, ilabinang kinahanglan natong ipakita ang atong gugma sa usag usa. Kinahanglan natong sundogon ang maayong ehemplo sa mga Kristohanon nga nagpuyo kaniadto sa Jerusalem ug Judea. Nagpakita na silag gugma sa usag usa. (Heb. 10:32-34) Pero samtang nagkaduol ang kataposan sa Hudiyong sistema, mas kinahanglan pa gyod nilang ipakita ang ilang “inigsoong gugma” ug “pagkamaabiabihon.”c (Basaha ang Hebreohanon 13:1-3.) Mao pod nay angay natong himoon samtang nagkaduol ang kataposan niini nga sistema.

15. Nganong kinahanglang ipakita sa Hudiyong mga Kristohanon ang inigsoong gugma ug pagkamaabiabihon human sila mangikyas?

¹⁵ Dihang kalit nga mibiya ang naglibot nga Romanong mga sundalo sa Jerusalem, ang mga Kristohanon miikyas nga gamay rag dala. (Mat. 24:17, 18) Maong kinahanglan silang magtinabangay samtang namaktas sila paingon sa kabukiran ug dihang naa na sila sa ilang bag-ong puy-anan. Seguradong naay “dinaliang mga panginahanglan” niadtong panahona, maong daghag kahigayonan ang mga Kristohanon nga ipakita ang ilang tinuod nga inigsoong gugma ug pagkamaabiabihon pinaagi sa pagtinabangay.—Tito 3:14.

16. Sa unsang paagi mapakita nato ang atong gugma sa mga igsoon nga nanginahanglan? (Tan-awa sab ang hulagway.)

¹⁶ Unsay leksiyon para nato? Ang gugma magpalihok nato nga tabangan ang mga igsoon nga nanginahanglan. Daghan sa mga alagad sa Diyos ang andam moatiman sa espirituwal ug materyal nga panginahanglan sa mga igsoon nga namakwet tungod sa mga giyera ug kalamidad. Ang sister nga taga-Ukraine nga mibiya sa iyang balay tungod sa giyera miingon: “Gibati gyod namo ang giya ug tabang ni Jehova pinaagi sa mga igsoon. Giatiman ug gitabangan mi pag-ayo sa mga igsoon sa Ukraine, sa Hungary, ug karon dinhi sa Germany.” Oo, kon maabiabihon natong tabangan ang mga igsoon nga nanginahanglan, atong gipakita nga nagpagamit ta kang Jehova.—Prov. 19:17; 2 Cor. 1:3, 4. 

17. Nganong importante kaayo karon nga magpakita tag inigsoong gugma ug pagkamaabiabihon?

¹⁷ Sa umaabot, mas kinahanglan pa gyod tang magtinabangay. (Hab. 3:16-18) Karon pa lang ginabansay na ta ni Jehova sa pagpakitag inigsoong gugma ug pagkamaabiabihon, mga hiyas nga importante kaayo nianang panahona.

KON UNSAY MAHITABO SA UMAABOT

18. Sa unsang paagi nato masundog ang Hebreohanong mga Kristohanon sa unang siglo?

¹⁸ Gipakita sa kasaysayan nga ang mga Kristohanon nga miikyas sa kabukiran naluwas sa dihang gilaglag ang Jerusalem. Ilang gibiyaan ang siyudad, pero wala gyod sila biyai ni Jehova. Unsay atong makat-onan niana? Wala ta mahibalo sa tanang detalye bahin sa mahitabo sa umaabot. Pero nahibalo ta sa tambag ni Jesus nga kinahanglan tang mahimong andam. (Luc. 12:40) Mabasa pod nato ang tambag ni Pablo sa mga Hebreohanon sa unang siglo nga mapadapat pod sa atong kahimtang. Ug gisaaran ta ni Jehova nga dili gyod ta niya biyaan o talikdan. (Heb. 13:5, 6) Busa hinaot padayon natong paaboton ang siyudad nga magpabilin hangtod sa hangtod—ang Gingharian sa Diyos—ug seguradong matagamtam nato ang walay kataposang mga panalangin.—Mat. 25:34.