Mga Leksiyon Gikan sa Tagna ni Jacob—Bahin 2

1. Unsang bahina sa tagna ni Jacob ang atong hisgotan niini nga artikulo?

ANG mga anak ni Jacob nagtapok libot niya ug naminaw sa iyang gisulti sa matag usa kanila. Sama sa gihisgotan sa miaging artikulo, ang mga pulong ni Jacob kang Ruben, Simeon, Levi, ug Juda wala gyod nila damha—ug tingali nakapakurat pa gani nila. Mao nga lagmit naghunahuna sila kon unsa pod kahay isulti ni Jacob sa walo pa niya ka anak nga lalaki. Atong tan-awon kon unsa nga mga leksiyon ang atong makat-onan sa iyang gisulti kang Zabulon, Isacar, Dan, Gad, Aser, Neptali, Jose, ug Benjamin.a

ZABULON

2. Unsa ang gitagna bahin kang Zabulon, ug sa unsang paagi kini natuman? (Genesis 49:13) (Tan-awa sab ang kahon.)

² Basaha ang Genesis 49:13. Si Jacob nagtagna nga ang mga kaliwat ni Zabulon mopuyo sa baybayon, sa amihanang bahin sa Yutang Saad. Kapig 200 ka tuig sa ulahi, ang mga kaliwat ni Zabulon nakadawat ug panulondon nga teritoryo, nga natung-an sa Dagat sa Galilea ug sa Mediteranyo. Bisan tuod ang ilang teritoryo wala mahimutang daplin mismo sa dagat, si Moises nagtagna: “Oh Zabulon, paglipay sa imong paggawas.” (Deut. 33:18) Tingali tungod ni kay dali ra silang makaadto sa mga baybayon ug makanegosyo. Mao nga naa gyod silay rason aron magmalipayon.

3. Unsay makatabang nato nga mahimong kontento?

³ Unsay atong makat-onan? Naa gyod tay rason nga magmalipayon bisag asa pa ta nagpuyo o bisan unsa pay atong kahimtang. Pero aron padayon tang magmalipayon, kinahanglang kontento ta sa kon unsay naa nato. (Sal. 16:6; 24:5) Usahay mas dali rang magpokus sa mga butang nga wala nato mabatoni. Pero mas maayong magpokus ta sa maayong mga butang nga atong nabatonan ug magmakontento niini.—Gal. 6:4.

ISACAR

4. Unsay giingon ni Jacob bahin kang Isacar, ug sa unsang paagi kini natuman? (Genesis 49:14, 15) (Tan-awa sab ang kahon.)

⁴ Basaha ang Genesis 49:14, 15. Gikomendahan ni Jacob si Isacar tungod sa iyang kakugihan ug gipakasama siya sa kusgan nga asno, usa ka hayop nga makargahag bug-at. Gitagna pod ni Jacob nga si Isacar makadawat ug maayo nga yuta. Ug natuman gyod ang mga pulong ni Jacob, kay ang nadawat nga panulondon sa mga anak ni Isacar mao ang tambok ug mabungahon nga yuta duol sa Suba sa Jordan. (Jos. 19:22) Kugihan sila sa pagtikad sa ilang yuta ug sa pagtabang sa uban. (1 Hari 4:7, 17) Pananglitan, dihang si Maghuhukom Barak ug ang propeta nga si Debora nangayog tabang sa mga Israelinhon sa pagpakig-away kang Sisera, ang tribo ni Isacar maoy usa sa mga mitabang. Ug mitabang pod sila sa pagpakig-away sa ubang higayon.—Maghu. 5:15.

5. Nganong angay tang maningkamot nga mahimong kugihan?

⁵ Unsay atong makat-onan? Sama nga gipabilhan ni Jehova ang kakugi sa tribo ni Isacar, iya pong gipabilhan ang atong kakugi sa pag-alagad. (Eccl. 2:24) Tagda pananglitan ang mga brader nga naningkamot sa pag-atiman sa kongregasyon. (1 Tim. 3:1) Wala sila literal nga nakig-away, pero naningkamot sila sa pagpanalipod sa katawhan sa Diyos gikan sa espirituwal nga kadaot. (1 Cor. 5:1, 5; Jud. 17-23) Naningkamot pod sila sa pag-andam ug paghatag ug makapadasig nga mga pakigpulong aron palig-onon ang kongregasyon.—1 Tim. 5:17.

DAN

6. Unsang asaynment ang nadawat sa tribo ni Dan? (Genesis 49:17, 18) (Tan-awa sab ang kahon.)

⁶ Basaha ang Genesis 49:17, 18. Gipakasama ni Jacob si Dan sa usa ka bitin nga mamaak sa mga kaaway nga mas dagko pa niya, sama sa kabayo ug sa sundalo nga nagsakay niini. Ang tribo ni Dan isog ug andam moatake sa mga kaaway sa Israel. Panahon sa panaw sa Israel paingon sa Yutang Saad, ang tribo ni Dan “nagbantay sa luyo” aron mapanalipdan ang mga Israelinhon. (Num. 10:25) Bisag dili makita sa ubang Israelinhon ang tribo ni Dan kay naa ra man sila sa luyo, importante gyod ang ilang asaynment.

7. Unsay angay natong hinumdoman sa bisan unsang asaynment nga atong madawat?

⁷ Unsay atong makat-onan? Naa ba kay asaynment nga morag dili kaayo mamatikdan sa uban? Tingali nagtabang ka sa pagpanghinlo ug pagmentinar sa Kingdom Hall, nagboluntaryo panahon sa asembliya o kombensiyon, o nag-atiman sa uban pang asaynment. Kon oo, angay kang komendahan! Hinumdomi nga nakita ug gipabilhan gyod ni Jehova ang tanan nimong gihimo para niya. Malipay gyod siya kon mag-alagad ka niya, dili aron dayegon ka sa uban, kondili aron ipakita ang imong kinasingkasing nga gugma kaniya.—Mat. 6:1-4.

GAD

8. Nganong dali rang sulongon sa mga kaaway ang tribo ni Gad didto sa Yutang Saad? (Genesis 49:19) (Tan-awa sab ang kahon.)

⁸ Basaha ang Genesis 49:19. Gitagna ni Jacob nga ang tribo ni Gad sulongon sa grupo sa mga tulisan. Mga 200 ka tuig sa ulahi, nakuha sa tribo ni Gad ingong panulondon ang yuta sa sidlakang bahin sa Suba sa Jordan. Kadto nga yuta tapad sa teritoryo sa mga kaaway, maong dali rang sulongon ang ilang tribo. Pero ganahang mopuyo didto ang mga kaliwat ni Gad kay daghan nig sibsibanan para sa ilang mga hayop. (Num. 32:1, 5) Maisogon gyod ang tribo ni Gad. Misalig sila nga tabangan sila ni Jehova nga depensahan ang ilang panulondon batok sa mga tulisan. Sulod sa daghang tuig, gipadala nila ang ilang mga sundalo aron tabangan ang ubang tribo nga makuha sab ang ilang panulondon sa Yutang Saad sa pikas bahin sa Jordan. (Num. 32:16-19) Misalig sila nga panalipdan ni Jehova ang ilang mga asawa ug mga anak samtang wala sila didto. Gipanalanginan ni Jehova ang ilang kaisog ug sakripisyo.—Jos. 22:1-4.

9. Sa unsang paagi ang atong pagsalig kang Jehova makaapektar sa atong mga desisyon?

⁹ Unsay atong makat-onan? Kinahanglan tang mosalig kang Jehova aron padayon tang makaalagad niya bisan sa lisod nga mga kahimtang. (Sal. 37:3) Daghan karon ang nagpakita sa ilang pagsalig kang Jehova pinaagi sa pagsakripisyo aron masuportahan ang buluhaton sa pagpanukod, makaalagad sa lugar nga mas dakog panginahanglan, o makatabang sa uban pang paagi. Ila ning gihimo kay naa silay pagsalig nga atimanon gyod sila ni Jehova.—Sal. 23:1.

ASER

10. Unsang mga sayop ang nahimo sa tribo ni Aser? (Genesis 49:20) (Tan-awa sab ang kahon.)

¹⁰ Basaha ang Genesis 49:20. Gitagna ni Jacob nga ang tribo ni Aser mahimong dato, ug mao gyod nay nahitabo. Ang yuta nga nadawat sa tribo ni Aser ingong panulondon maoy tambok kaayo nga yuta. (Deut. 33:24) Ang ilang teritoryo nahimutang daplin sa Dagat Mediteranyo ug naglakip sa dunggoanan sa Sidon, nga nahimong sentro sa negosyo sa Fenicia. Pero wala papahawaa sa tribo ni Aser ang mga Canaanhon gikan sa ilang yuta. (Maghu. 1:31, 32) Ang daotang impluwensiya sa mga Canaanhon ug ang kadato sa tribo ni Aser posibleng maoy hinungdan nga miawop ang ilang kadasig sa pagsimba kang Jehova. Ang tribo ni Aser wala motabang dihang nangita si Maghuhukom Barak ug mga boluntaryo aron makig-away sa mga Canaanhon. Ingong resulta, ang ilang tribo wala makakita sa gihatag ni Jehova nga kadaogan sa mga Israelinhon sa “daplin sa katubigan sa Megido.” (Maghu. 5:19-21) Puwerte tingaling ulawa sa tribo ni Aser dihang nadunggan nila si Barak ug Debora nga nagkanta sa awit sa kadaogan, nga naay lyrics nga “si Aser nagpungko sa baybayon.”—Maghu. 5:17.

11. Nganong kinahanglan natong batonan ang balanseng panglantaw sa materyal nga mga butang?

¹¹ Unsay atong makat-onan? Gusto natong ihatag kang Jehova ang atong pinakamaayo. Aron mahimo nato na, kinahanglang dili nato sundogon ang panglantaw sa kalibotan bahin sa materyal nga mga butang. (Prov. 18:11) Maningkamot ta nga batonan ang balanseng panglantaw sa kuwarta. (Eccl. 7:12; Heb. 13:5) Dili nato tugotan nga mapokus ta sa pagpangitag kuwarta ug mamenosan ang atong kadasig sa pag-alagad sa Diyos. Hinuon ihatag nato kang Jehova ang atong pinakamaayo, kay nahibalo ta nga kon magpabilin tang matinumanon, iya tang panalanginan ug nindot kaayo nga kinabuhi sa bag-ong kalibotan.—Sal. 4:8.

NEPTALI

12. Sa unsang paagi natuman ang tagna bahin kang Neptali? (Genesis 49:21) (Tan-awa sab ang kahon.)

¹² Basaha ang Genesis 49:21. Giingnan ni Jacob si Neptali nga “madanihon ang iyang mga pulong.” Tingali nagtumong ni sa madanihong mga pulong ni Jesus panahon sa iyang ministeryo. Si Jesus, nga nailhan nga epektibo sa pagpanudlo, taudtaod nga nagpuyo sa Capernaum nga sakop sa teritoryo ni Neptali. Kanay hinungdan nga ang Capernaum gitawag nga “iyang kaugalingong siyudad.” (Mat. 4:13; 9:1, footnote; Juan 7:46) Bahin kang Jesus, si Isaias nagtagna nga ang tribo ni Zabulon ug Neptali makakitag “dakong kahayag.” (Isa. 9:1, 2) Tungod sa iyang pagpanudlo, si Jesus nahimong “ang matuod nga kahayag nga [misidlak] sa tanang matang sa tawo.”—Juan 1:9.

13. Unsay atong himoon aron ang atong mga pulong makapalipay kang Jehova?

¹³ Unsay atong makat-onan? Importante gyod kang Jehova ang atong isulti ug kon unsaon nato ni pagsulti. Sa unsang paagi makasulti tag ‘madanihong mga pulong’ nga makapalipay kang Jehova? Angay tang mosulti kon unsay tinuod. (Sal. 15:1, 2) Angay pod natong palig-onon ang uban pinaagi sa pagkahimong abtik sa paghatag ug komendasyon ug dili mahimong hinawayon o reklamador. (Efe. 4:29) Ug maningkamot ta nga mahimong mas epektibo sa pagsugod ug panag-estorya aron masangyawan nato ang uban.

JOSE

14. Sa unsang paagi natuman ang tagna bahin kang Jose? (Genesis 49:22, 26) (Tan-awa sab ang kahon.)

¹⁴ Basaha ang Genesis 49:22, 26. Seguradong proud kaayo si Jacob kang Jose—siya “gilain gikan sa iyang mga igsoon” kay gigamit siya ni Jehova sa espesyal nga paagi. Gitawag siya ni Jacob nga “ang dakong sanga sa mabungahong kahoy.” Si Jacob mao ang kahoy, ug si Jose ang iyang sanga. Si Jose ang panganayng anak ni Jacob sa iyang pinalanggang asawa nga si Raquel. Gitagna ni Jacob nga si Jose ang makadawat sa dobleng bahin sa panulondon imbes si Ruben—ang panganay ni Jacob sa iyang asawa nga si Lea. (Gen. 48:5, 6; 1 Cron. 5:1, 2) Ingong katumanan niana nga tagna, ang mga kaliwat ni Epraim ug Manases, nga mga anak ni Jose, nakadawat ug panulondon ingong duha ka managlahi nga tribo.—Gen. 49:25; Jos. 14:4.

15. Unsay reaksiyon ni Jose sa inhustisya?

¹⁵ Si Jacob naghisgot pod ug mga magpapana nga “nagpana ug nagdumot” kang Jose. (Gen. 49:23) Sila ang mga igsoon ni Jose nga nasina niya kaniadto, nga maoy hinungdan sa daghang inhustisya nga iyang naeksperyensiyahan. Pero wala magdumot si Jose sa iyang mga igsoon o kang Jehova. Gani, si Jacob miingon: “Ang [pana ni Jose] nakaposisyon gihapon, ug ang iyang mga kamot nagpabiling lig-on ug abtik.” (Gen. 49:24) Si Jose misalig kang Jehova panahon sa mga pagsulay nga iyang nasinatian. Ug gawas nga iyang gipasaylo ang iyang mga igsoon, iya pod silang gitabangan. (Gen. 47:11, 12) Ang mga pagsulay nga naeksperyensiyahan ni Jose nakatabang niya nga mahimong mas maayong tawo. (Sal. 105:17-19) Ingong resulta, gigamit siya ni Jehova sa espesyal nga paagi.

16. Sa unsang paagi nato masundog si Jose dihang makaeksperyensiya tag mga pagsulay?

¹⁶ Unsay atong makat-onan? Dihang makaeksperyensiya tag mga pagsulay, dili nato tugotan nga makapalayo ni nato kang Jehova o sa atong mga igsoon. Hinumdomi nga itugot tingali ni Jehova nga makasinati tag mga pagsulay aron bansayon ta. (Heb. 12:7, footnote) Kini nga pagbansay makatabang aron makaugmad ug makapakita tag Kristohanong mga hiyas, sama sa kaluoy ug pagpasaylo. (Heb. 12:11) Sama kang Jose, panalanginan pod ta ni Jehova tungod sa atong paglahutay.

BENJAMIN

17. Sa unsang paagi natuman ang tagna bahin kang Benjamin? (Genesis 49:27) (Tan-awa sab ang kahon.)

¹⁷ Basaha ang Genesis 49:27. Gitagna ni Jacob nga ang tribo ni Benjamin mahimong banggiitang mga sundalo nga isog samag lobo. (Maghu. 20:15, 16; 1 Cron. 12:2) “Sa buntag,” o sa sinugdanan sa kasaysayan sa mga hari sa Israel, si Saul nahimong unang hari, ug siya naggikan sa tribo ni Benjamin. Maisogon siyang nakig-away sa mga Filistehanon. (1 Sam. 9:15-17, 21) “Sa gabii” niana nga kasaysayan, si Rayna Ester ug Primer Ministro Mardokeo nga parehong naggikan sa tribo ni Benjamin, milihok aron luwason ang mga Israelinhon nga nameligrong mapuo sa Imperyo sa Persia.—Est. 2:5-7; 8:3; 10:3.

18. Unsaon nato pagsundog ang pagkamaunongon sa tribo ni Benjamin?

¹⁸ Unsay atong makat-onan? Seguradong nalipay kaayo ang mga kaliwat ni Benjamin kay naay nahimong hari gikan sa ilang tribo ingong katumanan sa tagna. Pero dihang gibalhin ni Jehova ang pagkahari ngadto kang David sa tribo ni Juda, ang tribo ni Benjamin sa ngadtongadto misuportar niana nga kausaban. (2 Sam. 3:17-19) Daghang tuig sa ulahi dihang ang ubang tribo mirebelde, ang tribo ni Benjamin nagmaunongon sa Juda ug sa gipili ni Jehova nga hari. (1 Hari 11:31, 32; 12:19, 21) Hinaot maunongon pod natong suportahan ang mga brader nga gitudlo ni Jehova nga manguna sa iyang katawhan karon.—1 Tes. 5:12.

19. Sa unsang paagi ta makabenepisyo gikan sa tagna ni Jacob sa hapit na siyang mamatay?

¹⁹ Makabenepisyo gyod ta sa tagna ni Jacob. Ang pagsusi kon sa unsang paagi ni natuman makapalig-on sa atong pagsalig nga matuman gyod ang uban pang tagna ug mga saad ni Jehova. Ug ang paghisgot kon sa unsang paagi gipanalanginan ang mga anak ni Jacob makatabang nga mas masabtan nato kon unsay angay natong buhaton aron mapalipay si Jehova.