Naa pa ba Tay Makat-onan sa Pangunang mga Pagtulon-an sa Bibliya?

1. Sa unsang paagi ang mga pagtulon-an sa Bibliya nakatabang nimo dihang nagsugod ka sa pagkat-on sa kamatuoran?

ANG pangunang mga pagtulon-an sa Bibliya nakahatag natog daghang kaayohan. Pananglitan, dihang atong nakat-onan nga Jehova ang ngalan sa Diyos, mihimo tag mga paningkamot aron masuod niya. (Isa. 42:8) Dihang atong nakat-onan kon unsa gyoy kahimtang sa mga patay, wala na ta mabalaka nga basin nag-antos ang atong namatay nga mga minahal. (Eccl. 9:10) Ug dihang atong nahibaloan ang saad sa Diyos nga mahimong Paraiso ang yuta, wala na ta mabalaka sa atong kaugmaon. Kombinsido ta nga sa umaabot, kita mabuhi dili lang sa mubo nga panahon—70 o 80 ka tuig—kondili hangtod sa hangtod.—Sal. 37:29; 90:10.

2. Giunsa pagpakita sa 2 Pedro 1:12, 13 nga bisan ang hamtong nga mga Kristohanon makabenepisyo gihapon sa pangunang mga pagtulon-an sa Bibliya?

² Dili nato angayng balewalaon ang pangunang mga pagtulon-an sa Bibliya. Ang ikaduhang sulat ni apostol Pedro maoy para sa mga Kristohanon nga “lig-on na sa kamatuoran.” (Basaha ang 2 Pedro 1:12, 13.) Pero nakaatubang silag espirituwal nga mga kapeligrohan tungod kay naay bakak nga mga magtutudlo ug mga tawong daotan nga nakasulod sa kongregasyon. (2 Ped. 2:1-3) Gustong palig-onon ni Pedro ang mga igsoon aron maprotektahan nila ang ilang kaugalingon gikan sa bakak nga mga butang nga gitudlo niining mga tawhana. Maong iya silang gipahinumdoman bahin sa pipila ka pagtulon-an nga ila nang nakat-onan. Kini nga mga pagtulon-an makatabang nila nga magpabiling matinumanon hangtod sa kataposan.

3. Nganong ang tanang Kristohanon kinahanglang padayong mamalandong sa pangunang mga pagtulon-an sa Bibliya? Iilustrar.

³ Bisag hamtong na ta sa espirituwal, naa gihapon tay makat-onan nga bag-ong mga leksiyon gikan sa pangunang mga pagtulon-an sa Bibliya. Sa pag-ilustrar, ang eksperyensiyadong chef ug ang bag-ohan pa nga chef tingali mogamit ug parehong ingredients sa pag-andam ug pagkaon. Pero tungod kay ang eksperyensiyadong chef mas daghan nag nahibaloan, makahimo siyag lainlain ug mas lami nga mga recipe gamit ang sama ra nga ingredients. Sa samang paagi, ang dugay nang alagad ni Jehova ug ang bag-o pa lang nagtuon sa Bibliya tingali lahilahig leksiyon nga makita sa mao ra nga pagtulon-an. Ang atong kahimtang ug mga pribilehiyo tingali nausab na sukad nga nabawtismohan ta. Kon atong ipadapat sa atong kahimtang karon ang mga pagtulon-an nga atong nakat-onan kaniadto, basig makakat-on tag bag-o ug praktikal nga mga leksiyon. Atong hisgotan kon unsay makat-onan sa hamtong nga mga Kristohanon sa tulo ka pangunang mga pagtulon-an sa Bibliya.

SI JEHOVA ANG ATONG MAGLALALANG

4. Sa unsang paagi ta nakabenepisyo sa pagkahibalo nga si Jehova ang atong Maglalalang?

⁴ “Ang nagtukod sa tanang butang mao ang Diyos.” (Heb. 3:4) Nahibalo ta nga ang atong planeta ug ang tanan nga may kinabuhi gihimo sa atong maalamon ug gamhanan kaayo nga Maglalalang. Siya ang nagbuhat nato, mao nga nakaila gyod siya nato. Gawas pa ana, gimahal ta niya pag-ayo ug gusto niya ang pinakamaayo para nato. Nakabenepisyo gyod ta sa pagkahibalo nga si Jehova ang atong Maglalalang, kay naghatag nig katuyoan sa atong kinabuhi.

5. Unsang kamatuoran ang motabang nato nga magmapainubsanon? (Isaias 45:9-12)

⁵ Ang kamatuoran nga si Jehova ang atong Maglalalang motabang nato nga magmapainubsanon. Dihang si Job sobrang nagpokus sa pagdepensa sa iyang kaugalingon, gipahinumdoman siya ni Jehova nga Siya ang Labing Gamhanang Maglalalang. (Job 38:1-4) Kini nga pahinumdom nakatabang kang Job nga makita nga labaw gyod kaayo ang Diyos kon itandi sa tawo, mao nga ang tanan Niyang ginabuhat kanunayng husto. Bahin niini, ang propeta nga si Isaias sa ulahi misulat: “Moingon ba ang yutang kulonon sa Magkukulon: ‘Unsay imong ginahimo?’”—Basaha ang Isaias 45:9-12.

6. Kanus-a ilabina nga angay tang mamalandong kon unsa ka maalamon ug gamhanan ang atong Maglalalang? (Tan-awa sab ang mga hulagway.)

⁶ Samtang mas magkadugay ta sa kamatuoran, basin mas mosalig na ta sa atong kaugalingong pagsabot imbes magpagiya kang Jehova ug sa iyang Pulong. (Job 37:23, 24) Mao nga angay gyod natong pamalandongon kon unsa ka maalamon ug gamhanan ang atong Maglalalang. (Isa. 40:22; 55:8, 9) Kini nga kamatuoran motabang nato nga magpabiling mapainubsanon ug dili sobrang mosalig sa atong kaugalingong pagsabot.

7. Unsay nakatabang kang Rahela nga dawaton ang usa ka kausaban sa organisasyon?

⁷ Si Rahela, sister nga taga-Slovenia, nalisdan sa primero sa pagdawat sa usa ka bag-ong kausaban sa organisasyon. Pero nakatabang niya ang pagpamalandong bahin sa iyang Maglalalang. Siya miingon: “Usahay dili sayon para nako nga dawaton ang mga desisyon nga gihimo sa mga nagapanguna. Pananglitan, bisag natan-aw na nako ang 2023 nga Update sa Nagamandong Lawas Num. 8, wala gihapon ko ganahi dihang nakakita kog usa ka brader nga bungoton nga nagpakigpulong. Maong miampo ko kang Jehova nga tabangan ko niya sa pagdawat niini nga kausaban.” Nasabtan ni Rahela nga ingong Maglalalang sa langit ug yuta, nahibalo gyod si Jehova kon unsa ang pinakamaayo para sa iyang organisasyon ug siyay naggiya niini. Busa kon nalisdan ka sa pagdawat sa usa ka bag-ong pagsabot o direksiyon, maayo gyod nga imong pamalandongon kon unsa ka maalamon ug gamhanan ang atong Maglalalang.—Roma 11:33-36.

KON NGANONG GITUGOTAN SA DIYOS ANG PAG-ANTOS

8. Sa unsang paagi ta nakabenepisyo sa pagkahibalo kon nganong gitugotan sa Diyos ang pag-antos?

⁸ Ang uban nga wala mahibalo kon nganong gitugotan sa Diyos ang pag-antos nasuko sa Diyos o naghunahuna pa gani nga wala siya maglungtad. (Prov. 19:3) Pero atong nahibaloan nga ang napanunod nga sala ug pagkadili-hingpit maoy hinungdan sa pag-antos, dili si Jehova. Ato pong nakat-onan nga tungod sa pailob ni Jehova, milyonmilyong tawo ang nahatagag kahigayonan nga mailhan siya ug makakat-on kon sa unsang paagi bug-os niyang taposon ang atong pag-antos. (2 Ped. 3:9, 15) Kini nga mga kamatuoran nakahupay nato ug nakapasuod nato kaniya.

9. Kanus-a ilabina nga angay natong hinumdoman ang mga rason kon nganong gitugotan ni Jehova ang pag-antos?

⁹ Nahibalo ta nga kinahanglang mapailobon tang magpaabot kon kanus-a taposon ni Jehova ang pag-antos. Pero kon kita o ang atong mga minahal makasinatig mga problema, inhustisya, o kaha mamatyan, tingali makahunahuna ta kon nganong wala pa man molihok si Jehova. (Hab. 1:2, 3) Nianang mga panahona, angay gyod natong pamalandongon ang mga rason kon nganong gitugotan ni Jehova nga mag-antos ang mga matarong.a (Sal. 34:19) Puwede pod natong pamalandongon ang katuyoan ni Jehova nga taposon sa bug-os ang tanang pag-antos.

10. Unsay nakahupay kang Anne dihang namatay ang iyang inahan?

¹⁰ Ang pagkahibalo kon nganong gitugotan sa Diyos ang pag-antos makatabang nato nga makalahutay. Si Anne, nga nagpuyo sa isla sa Mayotte, sa Indian Ocean, miingon: “Naguol ko pag-ayo dihang namatay ang akong inahan pipila ka tuig sa miagi. Pero kanunay nakong gipahinumdoman ang akong kaugalingon nga dili si Jehova ang hinungdan sa pag-antos. Gusto gyod niyang taposon ang tanang pag-antos ug banhawon ang atong mga minahal. Ang pagpamalandong niini nga mga kamatuoran naghatag nakog tinuod nga kalinaw sa hunahuna.”

11. Sa unsang paagi ang pagkahibalo sa mga rason kon nganong gitugotan ni Jehova ang pag-antos makatabang nato nga padayong mosangyaw?

¹¹ Ang pagkahibalo sa mga rason kon nganong gitugotan sa Diyos ang pag-antos makatabang nato nga padayong mosangyaw. Si Pedro miingon nga si Jehova nagpailob tungod kay gusto niya nga ang mga tawo maghinulsol ug maluwas. Dayon siya midugang: “Tagda kon unsay angay ninyong buhaton maylabot sa balaang panggawi ug mga buhat nga nagpakitag debosyon sa Diyos.” (2 Ped. 3:11) Ang atong ministeryo maoy apil sa “mga buhat nga nagpakitag debosyon sa Diyos.” Sama kang Jehova, atong gihigugma ang mga tawo. Gusto nato nga mabuhi sila sa matarong nga bag-ong kalibotan nga gisaad sa Diyos. Si Jehova mapailobong naghatag ug kahigayonan sa mga tawo sa atong lugar sa pagsimba kaniya. Pribilehiyo gyod nato nga mahimong mga isigkamagbubuhat sa Diyos ug makatabang sa mas daghang tawo sa dili pa moabot ang kataposan.—1 Cor. 3:9.

NAGKINABUHI NA TA SA “KATAPOSANG MGA ADLAW”

12. Sa unsang paagi ta nakabenepisyo sa pagkahibalo nga nagkinabuhi na ta sa “kataposang mga adlaw”?

¹² Ang Bibliya nagtagna kon unsay kinaiya sa mga tawo sa “kataposang mga adlaw.” (2 Tim. 3:1-5) Ug kini nga mga kinaiya mao gyoy atong nakita sa mga tawo sa atong palibot. Samtang nakita nato nga misamot pa ka daotan ang mga tawo, nahimo tang mas kombinsido nga kasaligan gyod ang Pulong sa Diyos.—2 Tim. 3:13-15.

13. Base sa ilustrasyon ni Jesus sa Lucas 12:15-21, unsay puwede natong ipangutana sa atong kaugalingon?

¹³ Kay nagkinabuhi na ta sa kataposang mga adlaw, angay natong gamiton ang atong panahon sa mas hinungdanong mga butang. Matikdi kon giunsa ni pagpasiugda ni Jesus sa iyang ilustrasyon sa Lucas 12:15-21. (Basaha.) Nganong ang lalaki nga gihisgotan sa ilustrasyon gitawag man nga “dili makataronganon”? Dili tungod kay dato siya, kondili tungod kay sayop ang iyang mga prayoridad. Siya “nagtigom ug bahandi para sa iyang kaugalingon apan dili dato ngadto sa Diyos.” Nganong dili man maalamon ang iyang gihimo? Gisultihan sa Diyos ang maong tawo: “Karong gabii ila kang patyon.” Samtang nagkaduol ang kataposan niini nga sistema, puwede natong pangutan-on ang atong kaugalingon: ‘Ang ako bang mga tumong nagpakita nga akong gigamit ang akong panahon sa mas hinungdanong mga butang? Unsa may akong gidasig sa akong mga anak nga ilang kab-oton? Gigamit ba nako ang akong kusog, panahon, ug materyal nga mga butang aron magtigom ug bahandi, o ako ba ning gigamit aron mahimong dato ngadto sa Diyos?’

14. Sama sa naeksperyensiyahan ni Miki, nganong angay natong pamalandongon ang mga ebidensiya diha sa Bibliya nga nagkinabuhi na ta sa kataposang mga adlaw?

¹⁴ Kon atong pamalandongon ang mga ebidensiya nga nagkinabuhi na ta sa kataposang mga adlaw, mausab ang atong panglantaw sa kinabuhi. Kana ang naeksperyensiyahan sa sister nga si Miki. Siya miingon: “Dihang mi-graduate ko sa high school, gusto kong mokuhag kurso nga zoology kay ganahan kong magtuon bahin sa mga hayop. Pero gusto pod nakong magregular payunir ug mag-alagad sa lugar nga mas dakog panginahanglan. Gitambagan ko sa hamtong nga mga higala nga pamalandongon pag-ayo kon dili ba makababag sa akong espirituwal nga mga tumong ang pagkuha niini nga kurso. Ila kong gipahinumdoman nga hapit nang matapos kini nga sistema, ug didto sa bag-ong kalibotan, naa na koy kahigayonan nga tun-an ang tanang klase sa mga hayop hangtod sa hangtod. Tungod ana, mikuha lang kog mubo ug praktikal nga kurso. Kini nakatabang nako nga makakitag trabaho nga makasuportar sa akong pagpayunir ug sa ulahi mibalhin ko sa Ecuador, diin mas dako ang panginahanglan.” Si Miki ug ang iyang bana nag-alagad na karon sa sirkitong buluhaton sa maong nasod.

15. Nganong dili ta angayng mohunong sa pagtabang sa mga tawo nga wala pa nagpakitag interes sa maayong balita? Paghatag ug pananglitan. (Tan-awa sab ang mga hulagway.)

¹⁵ Kon ang mga tawo dili dayon modawat sa maayong balita, dili ta angayng mawad-an ug paglaom. Hinumdomi nga ang mga tawo puwedeng magbag-o. Tagda ang pananglitan sa igsoon ni Jesus nga si Santiago. Nakauban niya si Jesus sukad sa pagkabata hangtod nga nahimo kining Mesiyas, ug nakita niya si Jesus nga nanudlo sa mga tawo sa talagsaon kaayong paagi. Pero wala dayon siya mosunod kang Jesus. Nahimo lang siyang tinun-an human mabanhaw si Jesus. Gani nahimo siyang madasigon kaayo nga tinun-an!b (Juan 7:5; Gal. 2:9) Busa ayawg hunong sa pagtabang sa imong pamilya ug mga paryente nga wala pa magpakitag interes, ug paningkamoti nga mabalikan ang mga tawo nga wala pa modawat sa maayong balita. Hinumdomi nga nagkinabuhi na ta sa kataposang mga adlaw maong dinalian kaayo ang atong buluhatong pagsangyaw. Ang imong isulti kanila karon posibleng mahinumdoman nila sa ulahi ug molihok sila. Puwede pa gani nang mahitabo panahon sa dakong kasakitan.c

PABILHI KANUNAY ANG MGA PAHINUMDOM NI JEHOVA

16. Sa unsang paagi ka nakabenepisyo sa mga pahinumdom ni Jehova? (Tan-awa sab ang kahong “Gamita Kini sa Pagtabang sa Uban.”)

¹⁶ Ang atong organisasyon nagtaganag espirituwal nga pagkaon para sa mga tawo nga wala pa gyod sukad makadungog sa pangunang mga pagtulon-an sa Bibliya. Pananglitan, ang atong pakigpulong publiko kada semana, ang pipila ka artikulo ug mga video sa jw.org, ug ang atong mga magasin nga para sa publiko giandam ilabina para sa mga dili Saksi. Pero makabenepisyo gihapon ta sa maong mga pahinumdom. Makapalalom ni sa atong gugma kang Jehova, makapalig-on sa atong pagsalig sa iyang Pulong, ug makatabang nato nga mahimong mas epektibo sa pagtudlo sa pangunang mga pagtulon-an sa Bibliya.—Sal. 19:7.

17. Sa unsang mga kahimtang nga angay tang mamalandong sa pangunang mga pagtulon-an sa Bibliya?

¹⁷ Ingong mga Saksi ni Jehova, mapasalamaton kaayo ta sa pangunang mga pagtulon-an sa Bibliya nga nakatabang nato nga madani sa kamatuoran. Malipay pod ta dihang makadawat tag dugang katin-awan sa atong pagsabot sa usa ka pagtulon-an sa Bibliya. Pero kon naay mga higayon nga matental ta nga mas mosalig sa atong kaugalingong pagsabot imbes magpagiya sa organisasyon ni Jehova, angay natong hinumdoman nga ang atong Labing Gamhanan ug maalamon kaayo nga Maglalalang maoy naggiya sa atong organisasyon. Kon kita o ang atong mga minahal nag-atubang ug mga pagsulay, magmapailobon ta ug pamalandongon nato kon nganong gitugotan ni Jehova ang pag-antos. Ug kon naglibog ta kon unsaon nato paggamit ang atong panahon ug materyal nga mga butang sa maalamong paagi, angay natong hinumdoman nga nagkinabuhi na ta sa kataposang mga adlaw. Hinaot nga ang mga pahinumdom ni Jehova padayong magpalig-on nato, magdasig nato, ug maghimo natong maalamon.