Kon sa Unsang Paagi Ginatabangan Ta ni Jehova nga Makalahutay

1. Nganong dili sayon ang paglahutay, pero kinsay makatabang nato? (1 Pedro 5:10)

NAGKINABUHI na ta sa kataposang mga adlaw ug lisod ang kahimtang, maong dili sayon ang paglahutay. Ang uban nag-antos sa grabeng sakit. Naa poy namatyan ug mga minahal sa kinabuhi. Ang uban pod gisupak sa ilang pamilya o sa mga opisyales sa gobyerno. (Mat. 10:​18, 36, 37) Pero makasalig ka nga bisag unsa pay imong giatubang, tabangan ka ni Jehova nga makalahutay.—Basaha ang 1 Pedro 5:10.

2. Kang kinsa naggikan ang kusog nga atong gikinahanglan aron makalahutay ta?

² Ang paglahutay nagpasabot nga mopadayon ta ug dili mawad-ag paglaom bisan pag makaatubang tag mga problema, paglutos, pagsulay, o tentasyon. Makalahutay ta dili pinaagi sa atong kaugalingong kusog, kondili pinaagi kang Jehova, kinsa makahatag natog “gahom nga labaw sa kasarangan.” (2 Cor. 4:7) Niining artikuloha, atong hisgotan ang upat ka tagana ni Jehova nga makatabang nato sa paglahutay. Ato pong mahibaloan kon unsay atong himoon aron makabenepisyo niini nga mga tagana.

PAG-AMPO

3. Nganong ang pag-ampo talagsaon kaayo nga tagana?

³ Si Jehova naghatag nato ug talagsaon kaayo nga tagana nga makatabang nato sa paglahutay. Iya tang gitugotan nga makaampo niya bisan pag makasasala ta. (Heb. 4:16) Hunahunaa ni: Makaampo ta kang Jehova bisan unsang orasa ug bahin sa bisan unsa. Masabtan ta niya bisag unsay atong pinulongan ug bisan asa pa ta, bisag nag-inusara ra ta sa layo nga lugar o naa sa prisohan. (Jon. 2:​1, 2; Buh. 16:​25, 26) Kon naay mga higayon nga mabalaka kaayo ta ug maglisod tag sulti sa atong gibati, makasabot gihapon si Jehova sa kon unsay gusto natong isulti. (Roma 8:​26, 27) Oo, ang pag-ampo talagsaon kaayo nga tagana!

4. Nganong makaingon ta nga ang atong mga pag-ampo aron makalahutay nahiuyon sa kabubut-on ni Jehova?

⁴ Sa iyang Pulong, gipasaligan ta ni Jehova nga “bisan unsay atong pangayoon uyon sa iyang kabubut-on, maminaw siya nato.” (1 Juan 5:14) Puwede ba tang mangayog tabang ni Jehova aron makalahutay? Puwede! Kay nahiuyon ni sa iyang kabubut-on. Nganong makaingon ta ana? Kay kon molahutay ta sa mga pagsulay, si Jehova makahatag ug tubag sa nagatamay kaniya, si Satanas nga Yawa. (Prov. 27:11) Gawas pa ana, ang Bibliya nag-ingon nga gusto kaayo ni Jehova nga “ipakita ang iyang kusog alang niadtong kansang kasingkasing bug-os alang kaniya.” (2 Cron. 16:9) Busa makaseguro ta nga kaya ug gusto ni Jehova nga tabangan ta nga makalahutay.—Isa. 30:18; 41:10; Luc. 11:13.

5. Sa unsang paagi ang pag-ampo makahatag natog kalinaw sa hunahuna? (Isaias 26:3)

⁵ Ang Bibliya nag-ingon nga kon kinasingkasing tang moampo bahin sa atong mga gikabalak-an, “ang kalinaw nga gikan sa Diyos, nga labaw sa tanang pagsabot, magbantay sa [atong] kasingkasing ug hunahuna.” (Filip. 4:7) Hunahunaa ni: Ang ubang tawo nga wala mag-alagad kang Jehova misulay ug lainlaing mga paagi aron makabatog kalinaw sa hunahuna ug malimtan ang ilang mga problema. Pero ang kalinaw nga ilang gibati wala ra kon itandi sa kalinaw nga ihatag ni Jehova niadtong moampo kaniya. Kon moampo ta kang Jehova, atong gipakita nga bug-os tang misalig niya ug hatagan ta niyag “walay kataposang pakigdait.” (Basaha ang Isaias 26:3.) Ang usa ka paagi nga gihimo na ni Jehova mao ang pagtabang nato nga mahinumdom sa makapalig-on nga mga kamatuoran nga atong nakat-onan sa iyang Pulong. Kini nga mga kamatuoran makahatag natog kalinaw sa hunahuna ug kalmadong kasingkasing kay nahibalo ta nga gimahal ta ni Jehova ug gusto niya nga molampos ta.—Sal. 62:​1, 2.

6. Unsay imong buhaton aron bug-os kang makabenepisyo sa tagana nga pag-ampo? (Tan-awa sab ang hulagway.)

⁶ Kon unsay puwede nimong himoon. Dihang mag-atubang kag pagsulay, “itugyan ang imong palas-anon kang Jehova” ug iampo nga hatagan ka niyag kalinaw. (Sal. 55:22) Iampo pod nga hatagan ka niyag kaalam aron malahutay nimo ang imong mga problema. (Prov. 2:​10, 11) Pero gawas pa sa paghangyo kang Jehova alang sa tabang, ayaw pod kalimti ang pagpasalamat niya. (Filip. 4:6) Pamalandonga kon giunsa ka pagtabang ni Jehova sa imong mga pagsulay, ug pasalamati siya. Bisan pa sa mga problema nga imong giatubang, ayawg tugoti nga dili nimo makita ang mga panalangin ni Jehova.—Sal. 16:​5, 6.

PULONG SA DIYOS

7. Sa unsang paagi ang pagtuon sa Bibliya makatabang nato sa paglahutay?

⁷ Gihatag ni Jehova kanato ang iyang Pulong aron tabangan ta sa paglahutay. Daghan tag mabasa nga mga teksto sa Bibliya nga nagpasalig nato nga tabangan gyod ta ni Jehova. Usa niini nga mga teksto mao ang Mateo 6:8. Kini nag-ingon: “Ang inyong Amahan nahibalo na sa inyong gikinahanglan sa wala pa mo mangayo kaniya.” Ang nagsulti niini mao si Jesus, kinsa mas labaw nga nakaila kang Jehova kay ni bisan kinsa. Busa, wa gyod tay rason nga magduhaduha kon tabangan ba ta ni Jehova dihang mag-atubang tag mga problema. Ang Bibliya daghan pag susama niana nga mga pasalig nga magpalig-on sa atong determinasyon nga molahutay.—Sal. 94:19.

8. (a) Unsa ang usa ka prinsipyo sa Bibliya nga makatabang nato sa paglahutay? (b) Unsay makatabang nato nga mahinumdoman ang mga prinsipyo sa Bibliya nga atong gikinahanglan?

⁸ Ang mga prinsipyo sa Bibliya makatabang nato sa paglahutay. Ngano? Kay naa ni praktikal nga kaalam nga makatabang nato sa paghimog maayong mga desisyon. (Prov. 2:​6, 7) Pananglitan, ang Bibliya nagdasig nato nga ang mga problema karong adlawa mao ray atong hunahunaon, imbes sobrang mabalaka kon unsay mahitabo sa sunod nga mga adlaw. (Mat. 6:34) Kon pirme tang magbasag Bibliya ug mamalandong niana, mas dali natong mahinumdoman ang mga prinsipyo nga atong gikinahanglan.

9. Sa unsang paagi ang mga asoy sa Bibliya makapalig-on sa atong pagsalig nga tabangan ta ni Jehova?

⁹ Mabasa nato diha sa Bibliya ang mga asoy bahin sa mga alagad ni Jehova nga misalig niya ug nakadawat sa iyang tabang. (Heb. 11:​32-34; Sant. 5:17) Kon mamalandong ta niini nga mga asoy, molig-on ang atong pagsalig nga si Jehova mao ang “atong kusog ug dangpanan, usa ka tabang nga daling makaplagan panahon sa kasakitan.” (Sal. 46:1) Kon hunahunaon nato pag-ayo ang pagkamatinumanon sa mga alagad ni Jehova kaniadto, mapalihok ta sa pagsundog sa ilang pagtuo ug paglahutay.—Sant. 5:​10, 11.

10. Unsay imong himoon aron bug-os kang makabenepisyo sa Pulong sa Diyos?

¹⁰ Kon unsay puwede nimong himoon. Basaha ang Bibliya kada adlaw, ug ilista ang mga teksto nga ilabinang makatabang nimo. Daghan ang ganahang mobasa sa inadlawng teksto kada buntag aron naa silay mahinumdoman nga makapalig-ong punto gikan sa Bibliya nianang adlawa. Mao nay nakatabang sa usa ka sister nga si Mariea dihang ang iyang mga ginikanan nadayagnos nga naay kanser. Iya silang giatiman sulod sa pipila ka bulan una sila mamatay. Siya miingon: “Kada buntag, akong basahon ang teksto diha sa Pagsusi sa Kasulatan sa Adlaw-Adlaw, ug ako ning pamalandongon. Nakatabang ni nako nga magpokus sa makapalig-ong mga punto sa Bibliya imbes sa akong kaugalingon ug sa akong mga problema.”—Sal. 61:2.

MGA IGSOON

11. Nganong makapahupay ang pagkahibalo nga wala ta mag-inusara sa atong mga problema?

¹¹ Gitagana ni Jehova ang mga igsoon aron tabangan ta sa paglahutay. Ang pagkahibalo nga ang atong “mga igsoon sa tibuok kalibotan nakasinati sab sa samang mga pag-antos” nagpasalig nato nga wala ta mag-inusara. (1 Ped. 5:9) Bisag unsa pang situwasyon ang atong giatubang, makasalig ta nga naeksperyensiyahan pod na sa uban, ug nakalahutay sila. Nagpasabot na nga makalahutay pod ta.—Buh. 14:22.

12. Sa unsang paagi ang mga igsoon makatabang nato, ug sa unsang paagi pod ta makatabang nila? (2 Corinto 1:​3, 4)

¹² Ang mga igsoon makadasig nato sa paglahutay. Kanay naeksperyensiyahan ni apostol Pablo. Gani, usa-usa niyang gipasalamatan kadtong mga mitabang niya sa dihang napriso siya sa balay. Ilang gihupay, gipalig-on, ug gihatagag praktikal nga tabang si Pablo. (Filip. 2:​25, 29, 30; Col. 4:​10, 11) Karon, gikinahanglan pod nato ang tabang sa mga igsoon aron makalahutay ta. Ug kon sila pod ang manginahanglag tabang, naa ta para nila.—Basaha ang 2 Corinto 1:​3, 4.

13. Unsay nakatabang sa sister nga si Maya nga makalahutay?

¹³ Ang mga igsoon nakadasig kaayo kang Maya, usa ka sister nga taga-Russia. Ang ilang balay gi-raid niadtong 2020, ug human ana gihusay siya diha sa korte tungod sa pagsulti sa uban bahin sa iyang tinuohan. Si Maya miingon: “Niadtong panahona, grabe kaayo ang akong kabalaka ug kaguol, pero ang mga igsoon manawag ug magpadala nakog sulat. Ila kong gipasaligan nga gimahal ko nila. . . . Nahibalo na ko daan nga daghang igsoon ang nagmahal nako nga samag akong pamilya, pero mas nakita gyod nako ni sukad niadtong 2020.”

14. Unsay atong himoon aron makabenepisyo ta sa tabang sa mga igsoon? (Tan-awa sab ang hulagway.)

¹⁴ Kon unsay puwede nimong himoon. Kon naa kay giatubang nga problema, pabiling suod sa mga igsoon. Ayaw pagduhaduha sa pagpangayog tabang sa mga ansiyano kay sama silag “silonganan gikan sa hangin, usa ka dangpanan gikan sa bagyo.” (Isa. 32:​2, footnote) Pero hinumdomi nga ang mga igsoon nag-atubang pod ug mga problema. Maong paghimog maayo sa mga nanginahanglan, kay makatabang na nimo nga magpabiling malipayon ug positibo bisag naa pod kay mga problema.—Buh. 20:35.

ATONG PAGLAOM SA UMAABOT

15. Sa unsang paagi ang paglaom sa umaabot nakatabang sa matinumanong mga alagad ni Jehova, sama kang Jesus? (Hebreohanon 12:2)

¹⁵ Si Jehova naghatag natog seguradong paglaom aron tabangan ta nga makalahutay. (Roma 15:13) Matikdi kon sa unsang paagi ang paglaom nakatabang kang Jesus nga makalahutay sa pinakalisod nga adlaw sa iyang kinabuhi dinhi sa yuta. (Basaha ang Hebreohanon 12:2.) Nahibalo si Jesus nga kon magmatinumanon siya, makaamot siya sa pagbindikar sa ngalan ni Jehova. Naghinamhinam pod si Jesus nga makaubag balik ang iyang Amahan ug sa ngadtongadto magmando kauban sa iyang mga igsoon sa langitnong Gingharian. Sa susama, ang atong paglaom nga mabuhi sa walay kataposan sa bag-ong kalibotan sa Diyos motabang nato nga molahutay sa bisan unsang pagsulay nga atong masinatian sa kalibotan ni Satanas.

16. Sa unsang paagi ang paglaom sa umaabot nakatabang sa usa ka sister nga makalahutay, ug unsay imong makat-onan sa iyang gisulti?

¹⁶ Konsideraha kon sa unsang paagi ang paglaom sa umaabot nakatabang sa usa ka sister sa Russia nga ginganlag Alla. Ang iyang bana gidakop ug gipriso samtang naghulat nga husayon. Unsay nakatabang kang Alla niadtong panahona? Siya miingon: “Ang pag-ampo ug pagpamalandong sa atong paglaom sa umaabot nakatabang nako nga dili sobrang maguol. Nahibalo ko nga temporaryo lang ang tanang problema. Si Jehova seguradong magmadaogon, ug magmadaogon pod ta.”

17. Sa unsang paagi mapakita nato nga gipabilhan nato ang atong paglaom? (Tan-awa sab ang hulagway.)

¹⁷ Kon unsay puwede nimong himoon. Paggahin ug panahon aron mamalandong sa nindot nga paglaom nga gisaad ni Jehova. Imadyina kon unsa ka malipayon ang imong kinabuhi didto sa bag-ong kalibotan kauban sa imong mga higala ug mga minahal. Makatabang ni aron imong makita nga ang bisan unsang pagsulay nga imong ginaatubang karon “kadiyot lang ug gaan” kon itandi sa imong mga panalangin sa umaabot. (2 Cor. 4:17) Isangyaw pod ngadto sa uban ang nindot nga mga saad sa Diyos. Hunahunaa kon unsa ka lisod ang kinabuhi sa mga tawo nga wala mag-alagad kang Jehova, kay gawas nga daghan silag problema, wala pa gyod sila mahibalo sa nindot nga mga saad sa Diyos. Bisag kadiyot lang nimo silang maestorya, basin diay mainteres sila sa paglaom sa Gingharian.

18. Nganong makasalig ta sa mga saad ni Jehova?

¹⁸ Human makalahutay sa daghang pagsulay, si Job miingon kang Jehova: “Karon nahibaloan nako nga makahimo ka sa tanang butang ug ang tanan nga gihunahuna nimong buhaton, imo gayong mahimo.” (Job 42:2) Sama sa naamgohan ni Job, wala gyoy makapugong kang Jehova sa pagtuman sa iyang katuyoan. Ang paghinumdom niana makatabang nato nga molahutay. Sa pag-ilustrar, imadyina ang usa ka babaye nga naguol pag-ayo kay daghan nang doktor ang iyang giduolan ug wala gihapon siya maayo. Pero naay eksperyensiyado ug kasaligang doktor nga nakadayagnos sa iyang kondisyon ug nahibalo kon unsaon pag-ayo ang iyang sakit. Nahupayan gyod siya. Bisan pag dili dihadiha nga maayo siya, mas kaya na niyang molahutay kay nahibalo siya nga naa na siyay paglaom nga maulian. Sa samang paagi, ang atong paglaom sa umaabot nga Paraiso makatabang nato nga molahutay.

19. Unsay makatabang nato aron makalahutay?

¹⁹ Sa ato nang nakat-onan, si Jehova nagtabang nato nga makalahutay sa atong mga pagsulay pinaagi sa tagana nga pag-ampo, iyang Pulong, mga igsoon, ug atong paglaom sa umaabot. Kon bug-os natong pahimuslan kini nga mga tagana, si Jehova motabang nato nga makalahutay sa mga kalisdanan, hangtod nga moabot ang panahon nga iya nang taposon ang kalibotan ni Satanas ug ang tanang pag-antos.—Filip. 4:13.