Salig nga Gipasaylo na Ka ni Jehova

1-2. Unsay himoon ni Jehova para niadtong mga naghinulsol? (Tan-awa sab ang hulagway.)

SI Haring David nakahimog seryosong mga sala, maong nahibalo siya kon unsa ka bug-at ang bation sa usa tungod sa nangaging mga sala. (Sal. 40:12; 51:3; superskripsiyon) Pero kay sinsero siyang naghinulsol, gipasaylo siya ni Jehova. (2 Sam. 12:13) Nahupayan pag-ayo si David kay nasabtan niya nga gipasaylo na siya ni Jehova.—Sal. 32:1.

² Sama kang David, mahupayan pod ta kon madawat nato ang kaluoy ni Jehova. Makapahupay gyod ang pagkahibalo nga si Jehova andam mopasaylo sa atong mga sala, bisag unsa pa ni ka seryoso basta sinsero tang maghinulsol, motug-an sa atong mga sala, ug maningkamot nga dili na ni himoon pag-usab. (Prov. 28:13; Buh. 26:20; 1 Juan 1:9) Ug makapalipay gyod ang pagkahibalo nga dihang mopasaylo si Jehova, iya na gyod ning kalimtan, nga sama bag wala ta makahimog sala.—Ezeq. 33:16.

3-4. Unsay gibati sa usa ka sister human siya mabawtismohan, ug unsay atong hisgotan niining artikuloha?

³ Pero naay mga higayon nga malisdan ta nga mosalig nga gipasaylo na ta ni Jehova. Konsideraha ang eksperyensiya ni Jennifer, nga nagdako sa Saksi nga pamilya. Sa tin-edyer pa siya, doble siyag pagkinabuhi. Sekreto siyang mihimog daotang mga buhat. Sa ulahi, mibalik siya kang Jehova ug sa ngadtongadto siya nabawtismohan. Siya miingon: “Sa una, nagkinabuhi kong imoral, kusog ko moinom, grabe ko masuko, ug kuwarta ray akong gihunahuna. Nahibalo ko nga dihang nangayo kog pasaylo ug naghinulsol ko, nahinloan na ko sa halad lukat sa Kristo. Pero dili gihapon kombinsido ang akong kasingkasing nga gipasaylo na gyod ko ni Jehova.”

⁴ Maglisod ba ka usahay sa pagkombinsir sa imong kaugalingon nga gipasaylo na ka ni Jehova sa imong nangaging mga sala? Si Jehova maluluy-on kaayo. Gusto niya nga sama kang David, dili na ta magduhaduha nga gipasaylo na ta niya. Niining artikuloha, atong hisgotan kon nganong kinahanglan tang mosalig sa pagpasaylo ni Jehova ug kon unsay makatabang nato aron ato nang mahimo.

NGANONG KINAHANGLAN TANG MOSALIG NGA GIPASAYLO NA TA NI JEHOVA?

5. Unsay gusto ni Satanas nga atong tuohan? Paghatag ug pananglitan.

⁵ Kon motuo ta nga gipasaylo na ta ni Jehova, malikayan nato ang usa sa mga lit-ag ni Satanas. Hinumdomi nga himoon ni Satanas ang tanan aron pahunongon ta sa pag-alagad kang Jehova. Aron molampos siya, maningkamot siya nga patuohon ta nga dili gyod mapasaylo ang atong mga sala. Konsideraha ang nahitabo sa lalaki didto sa Corinto nga gitangtang diha sa kongregasyon tungod sa seksuwal nga imoralidad. (1 Cor. 5:​1, 5, 13) Sa ulahi dihang naghinulsol siya, gusto ni Satanas nga dili pasayloon sa mga igsoon ang maong lalaki ug dili siya dawaton pag-usab sa kongregasyon. Gusto pod ni Satanas nga bation sa naghinulsol nga lalaki nga dili mapasaylo ang iyang sala aron ‘malumsan siya sa hilabihang kasubo’ ug moundang na sa pag-alagad kang Jehova. Karon, mao gihapon ni ang gusto ni Satanas nga mahitabo kanato ug wala mausab ang iyang mga pamaagi. Pero “dili ta walay alamag sa iyang mga laraw.”—2 Cor. 2:​5-11.

6. Unsay makatabang nato kon nabug-atan ta sa nangaging mga sala?

⁶ Kon dawaton nato nga gipasaylo na ta ni Jehova, dili na ta angayng magsigeg hunahuna o makonsensiya sa atong nahimong sala. Siyempre natural lang nga makonsensiya ta kon makasala ta. (Sal. 51:17) Ug maayo na, kay makatabang na nato nga mohimog mga kausaban sa atong binuhatan. (2 Cor. 7:​10, 11) Pero kon magsige gihapon tag kakonsensiya bisag dugay na tang naghinulsol, basin maluya ta ug moundang na hinuon sa pag-alagad. Maong kinahanglang dawaton nato nga gipasaylo na ta ni Jehova ug kalimtan na nato ang nahitabo. Kon ato nang himoon makaalagad ta kang Jehova nga malipayon ug naay hinlong konsensiya, nga maoy gusto niya para nato. (Col. 1:​10, 11; 2 Tim. 1:3) Pero unsay atong buhaton aron pasaligan ang atong kasingkasing nga gipasaylo na ta sa Diyos?

UNSAY MAKATABANG NATO NGA MOSALIG NGA GIPASAYLO NA TA NI JEHOVA?

7-8. Unsay giingon ni Jehova dihang gipaila niya ang iyang kaugalingon kang Moises, ug unsay gipasalig niana kanato? (Exodo 34:​6, 7)

⁷ Pamalandonga kon unsay giingon ni Jehova bahin sa iyang kaugalingon. Pananglitan, matikdi ang giingon ni Jehova kang Moises didto sa Bukid sa Sinai.a (Basaha ang Exodo 34:​6, 7.) Sa tanang puwedeng isulti ni Jehova bahin sa iyang mga hiyas, mas gipili niya nga ipaila ang iyang kaugalingon ingong “Diyos nga maluluy-on ug mabination.” Busa kay ingon ana siya nga klase sa Diyos, makaako kaha siya nga dili pasayloon ang iyang mga alagad nga tinuod nga naghinulsol? Siyempre dili! Matandog gyod ang iyang kasingkasing, ug imposible kaayo nga dili siya magpakitag kaluoy nila.

⁸ Dihang miingon si Jehova nga maluluy-on siya, makasalig gyod ta sa iyang giingon kay dili gyod siya mamakak. (Sal. 31:5) Maong kon nakonsensiya gihapon ka sa nangaging mga sala, pangutan-a ang imong kaugalingon: ‘Nagtuo ba gyod ko nga si Jehova maluluy-on kaayo ug nga pasayloon gyod niya si bisan kinsa nga naghinulsol sa ilang mga sala? Kon mao, dili ba angay lang nga motuo ko nga gipasaylo na ko ni Jehova?’

9. Dihang pasayloon ni Jehova ang atong mga sala, unsay gipasabot niana? (Salmo 32:5)

⁹ Pamalandonga kon unsay gipasulat ni Jehova diha sa Bibliya bahin sa iyang pagpasaylo. Pananglitan, konsideraha kon unsay giingon ni David bahin sa pagpasaylo ni Jehova. (Basaha ang Salmo 32:5.) Si David miingon: “Imong gipasaylo ang akong kasaypanan ug mga sala.” Ang Hebreohanong pulong nga gihubad ug “gipasaylo” puwedeng magpasabot ug “gialsa,” “gikuha,” o “gidala.” Sa dihang gipasaylo ni Jehova si David, samag gikuha ni Jehova, o gidala palayo, ang iyang mga sala. Nahupayan gyod si David dihang natangtang na ang kabug-at nga iyang gibati. (Sal. 32:​2-4) Mao pod nay atong bation kon sinsero gyod tang maghinulsol sa atong mga sala. Dili na ta kinahanglang mahasol pa sa mga sala nga gikuha ug gidala na ni Jehova palayo.

10-11. Unsay atong makat-onan bahin kang Jehova sa mga pulong nga “andam sa pagpasaylo”? (Salmo 86:5)

¹⁰ Basaha ang Salmo 86:5. Si David miingon nga si Jehova “andam sa pagpasaylo.” Bahin sa kaandam ni Jehova nga mopasaylo, ang usa ka reperensiya nag-ingon: “[Siya] mapinasayloon. Mao na gyod ni ang iyang kinaiya.” Nganong sayon ra kaayo kang Jehova ang pagpasaylo? Ang sunod nga bahin sa bersikulo nagpatin-aw: “Dagaya ka sa maunongong gugma alang niadtong tanan nga nagatawag kanimo.” Sa ato nang nakat-onan sa milabayng artikulo, ang maunongong gugma maoy nagpalihok kang Jehova nga makigsuod ug dili gyod mobiya sa iyang matinumanong mga magsisimba. Tungod sa maunongong gugma ni Jehova, siya “kinabubut-ong magpasaylo” sa tanang mahinulsolong makasasala. (Isa. 55:​7, footnote) Kon nalisdan kang motuo nga gipasaylo na ka ni Jehova, pangutan-a ang imong kaugalingon: ‘Nagtuo ba gyod ko nga si Jehova mapinasayloon—nga siya andam mopasaylo sa tanang mahinulsolon nga naghangyo sa iyang kaluoy? Kon mao, dili ba angay kong motuo nga gipasaylo na ko ni Jehova dihang sinsero kong mihangyo sa iyang kaluoy?’

¹¹ Makapahupay gyod ang pagkahibalo nga nakasabot si Jehova nga kita makasasala. (Sal. 139:​1, 2) Mao pod ni ang giingon ni David sa uban niyang mga salmo, nga makatabang nato nga mosalig sa pagpasaylo ni Jehova.

UNSAY GINAHINUMDOMAN NI JEHOVA BAHIN NATO?

12-13. Base sa Salmo 103:​14, unsay ginahinumdoman ni Jehova bahin nato, ug unsay iyang gihimo tungod ana?

¹² Basaha ang Salmo 103:14. Si David miingon nga “ginahinumdoman [ni Jehova] nga kita abog.” Ang giingon ni David nagpakita sa usa sa mga rason kon nganong si Jehova andam mopasaylo sa Iyang mahinulsolong mga alagad: Kanunay niyang ginahinumdoman nga makasasala ta. Atong hisgotan ug dugang ang giingon ni David.

¹³ Si David miingon nga si Jehova ‘nahibalo pag-ayo sa atong pagkaumol.’ Giporma ni Jehova si Adan “gikan sa abog sa yuta” ug nahibalo siya pag-ayo nga bisan ang hingpit nga mga tawo naa gihapoy mga limitasyon—pananglitan, kinahanglan silang mokaon, matulog, ug moginhawa. (Gen. 2:7) Pero sa dihang nakasala si Adan ug Eva, ang pagkahimong abog naa nay dugang kahulogan. Kay ila man tang kaliwat, napasa nila kanato ang pagkadili-hingpit. Tungod niana, duna tay tendensiya sa paghimog dili maayo. Dili lang kay basta nahibalo si Jehova sa atong pagkadili-hingpit, kondili iya pod ning “ginahinumdoman.” Kining pulonga nagpakita nga nakasabot gyod si Jehova nga masipyat ta usahay. Ug kon kinasingkasing tang maghinulsol, mapalihok siya nga magpakita natog kaluoy ug pagpasaylo.—Sal. 78:​38, 39.

14. (a) Unsa pay giingon ni David bahin sa pagkamapinasayloon ni Jehova? (Salmo 103:12) (b) Sa unsang paagi ang eksperyensiya ni David nagpakita nga si Jehova bug-os gyong mopasaylo? (Tan-awa ang kahong “Dihang Mopasaylo si Jehova, Dili na Gyod ni Niya Hinumdoman.”)

¹⁴ Unsa ka mapinasayloon si Jehova? (Basaha ang Salmo 103:12.) Si David miingon nga sa dihang si Jehova mopasaylo, Iyang ibutang ang atong mga sala “sama ka layo sa sidlakan gikan sa kasadpan.” Ang sidlakan layo kaayo sa kasadpan, ug dili gyod ni sila mag-abot. Unsay gipakita niini bahin sa mga sala nga gipasaylo na ni Jehova? Ang usa ka reperensiya nag-ingon: “Kon kuhaon ug dalhon palayo ang atong mga sala, makaseguro ta nga wala nay baho ug mansa niini nga magpabilin ug dili na gyod ni mahinumdoman.” Hunahunaa ni—ang baho makapahinumdom nato sa nahitabo sa nangagi. Pero kon si Jehova magpasaylo sa atong mga sala, samag wala nay bisan gamayng baho niini nga magpabilin, nga magpahinumdom niya sa atong nahimo. Iya na gyod ning kalimtan ug dili na ta niya silotan tungod niini.—Ezeq. 18:​21, 22; Buh. 3:19.

15. Unsay atong buhaton kon pirme gihapon tang makonsensiya tungod sa atong nangaging mga sala?

¹⁵ Sa unsang paagi ang giingon ni David sa Salmo 103 makatabang nato nga makombinsir nga gipasaylo na ta ni Jehova? Kon pirme gihapon tang makonsensiya tungod sa atong nangaging mga sala, puwede natong pangutan-on ang atong kaugalingon: ‘Ako bang gikalimtan kon unsay gihinumdoman ni Jehova—sa ato pa, gikalimtan ba nako nga nahibalo siya pag-ayo sa akong pagkadili-hingpit ug nga pasayloon niya ang mga mahinulsolon sama nako? Nagsige pod ba kog hinumdom sa mga sala nga gipasaylo ug gikalimtan na ni Jehova?’ Si Jehova wala na maghunahuna sa atong nangaging mga sala, maong di na pod ni nato angayng hunahunaon. (Sal. 130:3) Kon kombinsido ta nga gipasaylo na gyod ta ni Jehova, angay pod natong pasayloon ang atong kaugalingon ug dili na makonsensiya sa nangagi natong mga sala.

16. Nganong peligroso ang pirmeng pagkakonsensiya sa atong nangaging mga sala? Iilustrar. (Tan-awa sab ang hulagway.)

¹⁶ Kon magsige tag hunahuna sa atong nangaging mga sala, sama tag nagdrayb pero nagsigeg tan-aw sa rearview mirror. Maayo man kon motan-aw ta sa rearview mirror panagsa aron atong makita ang posibleng mga kapeligrohan sa atong luyo. Pero aron luwas tang makapadayon, angay tang magpokus sa unahan. Sa samang paagi, okey ra man nga hinumdoman nato usahay ang nangagi natong mga sayop kay makakat-on ta niini ug mahimo tang mas determinado nga dili na ni himoon pag-usab. Pero kon magsige na lang tag hunahuna sa atong nangaging mga sayop, posibleng mawad-an tag kalipay ug dili nato mahatag ang atong pinakamaayo kang Jehova. Maong hinaot nga magpokus ta sa unahan—sa dalan paingon sa gisaad sa Diyos nga bag-ong kalibotan, diin ang dili maayong mga eksperyensiya “dili na [gyod] hinumdoman.”—Isa. 65:17; Prov. 4:25.

PADAYONG KOMBINSIHA ANG IMONG KASINGKASING

17. Nganong kinahanglan natong padayong kombinsihon ang atong kasingkasing nga gihigugma ug gipasaylo na ta ni Jehova?

¹⁷ Kinahanglang padayon natong kombinsihon ang atong kasingkasing nga gihigugma ug gipasaylo na ta ni Jehova. (1 Juan 3:​19, footnote) Ngano? Kay dili gyod moundang si Satanas sa iyang mga paningkamot nga patuohon ta nga wala ta higugmaa ug dili ta pasayloon ni Jehova. Usa ra gyod ang iyang tumong—ang paundangon ta sa pag-alagad kang Jehova. Makadahom ta nga mas pangusgan pa gyod ni Satanas ang iyang mga paningkamot kay nahibalo siya nga mubo na lang kaayo ang iyang panahon. (Pin. 12:12) Pero dili gyod ta magpapildi kang Satanas!

18. Unsay puwede nimong himoon aron makombinsir nimo ang imong kasingkasing nga gihigugma ug gipasaylo na ka ni Jehova?

¹⁸ Aron imong mapalig-on ang imong pagsalig sa gugma ni Jehova, ipadapat ang mga sugyot sa miaging artikulo. Aron makombinsir ang imong kasingkasing nga gipasaylo na ka ni Jehova, hunahunaa kon unsay giingon ni Jehova bahin sa iyang kaugalingon. Pamalandonga kon unsay iyang gipasulat diha sa Bibliya bahin sa iyang pagpasaylo. Ayaw kalimti nga nahibalo siya pag-ayo nga dili ka hingpit ug nga magpakita siya nimog kaluoy. Ug hinumdomi pod nga sa dihang pasayloon ni Jehova ang atong mga sala, iya na gyod ning kalimtan. Kon himoon nimo ning tanan, makasalig ka nga sama kang David, gipasaylo na ka ni Jehova, ug makaingon ka: “Salamat Jehova, kay ‘imong gipasaylo ang akong kasaypanan ug mga sala.’”—Sal. 32:5.