Mga Pangutana Gikan sa mga Magbabasa
Kanus-a matapos ang atong buluhatong pagsangyaw?
Si Jesus miingon: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.” (Mat. 24:14) Ang Gregong pulong nga gihubad ug “kataposan” niining bersikuloha, ug sa bersikulo 6 ug 13, maoy teʹlos. Nagtumong ni sa kataposan sa kalibotan ni Satanas sa Armagedon. (Pin. 16:14, 16) Busa kinahanglang padayon natong isangyaw ang maayong balita sa Gingharian hangtod nga di pa moabot ang Armagedon. Kini maoy kausaban sa atong pagsabot kaniadto.
Kaniadto, ang atong pagsabot mao nga matapos ang pagsangyaw sa maayong balita inigsugod sa dakong kasakitan dihang laglagon na ang Bantogang Babilonya. (Pin. 17:3, 5, 15, 16) Nagtuo ta kaniadto nga dihang magsugod na ang dakong kasakitan, dili na hatagan ni Jehova ug kahigayonan ang mga tawo nga modawat sa maayong balita. (Isa. 61:2) Nagtuo pod ta nga kadtong maluwas sa dakong kasakitan mao kadtong mga tawo nga matinumanong nag-alagad kang Jehova sa wala pa magsugod ang dakong kasakitan. Gipakasama nato sila niadtong mga Hudiyo nga naluwas dihang gilaglag ang Jerusalem niadtong 607 B.C.E. Ang maong mga Hudiyo namarkahan nang daan alang sa kaluwasan tungod kay nagsimba sila kang Jehova ug gidumtan nila ang pagkadaotan. (Ezeq. 5:11; 9:4) Pero kana nga pagtandi dili mohaom sa mga pulong ni Jesus sa Mateo 24:14, nga nagpakita nga ang mga tawo posibleng naa pay kahigayonan nga mosanong sa maayong balita sa dili pa moabot ang Armagedon.
Tungod niini nga kausaban sa atong pagsabot sa Mateo 24:14, kinahanglan pod natong i-adjust ang atong pagsabot sa tagna sa Pinadayag 16:21 bahin sa mensahe nga samag ulan nga yelo. Gipakita sa dugang pagtuon nga konektado kining duha ka teksto. Masabtan nato na pinaagi sa pagsusi sa kon unsay sanong o pag-isip sa mga tawo sa mensahe sa Gingharian. Si apostol Pablo miingon nga para ‘niadtong mga maluwas,’ ang mensahe maoy maayong balita, “usa ka alimyon sa kinabuhi.” Pero para sa mga kaaway sa Diyos, kini maoy daotang balita, “usa ka alimyon sa kamatayon.” (2 Cor. 2:15, 16) Ilang gidumtan ang mensahe sa Gingharian tungod kay nagyagyag ni nga ang kalibotan nga ilang gihigugma maoy daotan, gimandoan ni Satanas, ug nagpaingon sa kalaglagan.—Juan 7:7; 1 Juan 2:17; 5:19.
Matikdi sab nga ang simbolikong ulan nga yelo ‘dako kaayo.’ Kini nagpakita nga panahon sa dakong kasakitan, ang mensahe nga atong isangyaw mahimong mas bug-at o puwersado, sa ato pa, mas daghang tawo ang makaila sa ngalan ni Jehova kay sukad masukad. (Ezeq. 39:7) Nianang panahona, human malaglag ang Bantogang Babilonya, naa kahay mosanong sa mensahe, nga mag-isip niini ingong humot nga alimyon? Posible na. Tingali ilang mahinumdoman o mahibaloan nga sulod sa daghang katuigan, ang mga Saksi ni Jehova nagsangyaw bahin sa kalaglagan sa bakak nga relihiyon.
Ikatandi nato kana sa nahitabo sa karaang Ehipto human sa Napulo ka Hampak. Human ‘siloti ni Jehova ang tanang diyos sa Ehipto,’ miuban sa iyang katawhan “ang dakong panon sa nagkasagol nga mga tawo” nga dili Israelinhon. (Ex. 12:12, 37, 38) Kini nga mga langyaw tingali miuban sa katawhan ni Jehova human nila makita nga natuman gyod ang gipasidaan ni Moises bahin sa Napulo ka Hampak.
Si bisan kinsa nga modapig kang Jehova human malaglag ang Bantogang Babilonya makapribilehiyo nga mosuportar sa mga igsoon sa Kristo nga naa pa dinhi sa yuta nianang panahona. (Mat. 25:34-36, 40) Kana nga kahigayonan nga mahukman ingong karnero matapos sa dili pa magsugod ang Armagedon, dihang ang nahibilin sa mga dinihogan makadawat sa ilang ganti sa langit.
Kining maong kausaban sa atong pagsabot klarong nagpakita nga mahigugmaon ug maluluy-on gyod si Jehova. Oo, “dili niya gusto nga naay malaglag kondili gusto niya nga ang tanan maghinulsol.”—2 Ped. 3:9.