Ang Pinakamaayong Paagi sa Pag-atubang sa Inhustisya

1-2. Unsay sagad nga reaksiyon sa daghang tawo sa inhustisya, ug unsa tingali ang atong ikapangutana sa atong kaugalingon?

NAGKINABUHI ta sa kalibotan nga punog inhustisya. Daghan ang nakasinatig dili patas nga pagtratar tungod sa ilang kahimtang sa kinabuhi, gender, kagikan, o rasa. Ang uban pod nag-antos sa dili maayong mga resulta sa gihimo sa hakog nga mga negosyante ug korap nga mga opisyal. Kini ug ang uban pang inhustisya nakaapektar nato o sa atong mga minahal.

² Daghan ang naglagot tungod sa inhustisya nga ilang nakita o naeksperyensiyahan. Gusto natong tanan nga mobating luwas ug trataron sa maayong paagi. Tungod ana, ang uban moapil sa mga kalihokan nga gituohan nilang makahatag ug kabag-ohan. Nagprotesta sila batok sa gobyerno, o misuportar sa mga politiko nga nagsaad nga wad-on ang inhustisya. Pero ingong mga Kristohanon, gitudloan ta nga mahimong “dili bahin sa kalibotan” ug magpaabot nga wad-on sa Gingharian sa Diyos ang tanang inhustisya. (Juan 17:16) Siyempre, dili gyod ta malipay—ug basin masuko pa gani ta—kon naay gihimoan ug dili maayo. Basin makapangutana ta: ‘Unsa may angay nakong buhaton kon naay mahitabong inhustisya? Naa ba koy mahimo bahin sa mga inhustisya karon?’ Aron matubag kana, atong hisgotan kon unsay pagbati ni Jehova ug ni Jesus bahin sa inhustisya.

GIDUMTAN NI JEHOVA UG JESUS ANG INHUSTISYA

3. Nganong normal lang nga masuko tingali ta tungod sa inhustisya? (Isaias 5:7)

³ Gipakita sa Bibliya nga normal lang nga dili ta malipay sa inhustisya. Kini nag-ingon nga gilalang ta ni Jehova sumala sa iyang larawan ug nga “gihigugma niya ang pagkamatarong ug hustisya.” (Sal. 33:5; Gen. 1:26) Dili gyod siya mobuhat ug daotan, ug dili pod niya gusto nga buhaton kana sa uban. (Deut. 32:​3, 4; Miq. 6:8; Zac. 7:9) Pananglitan, sa panahon ni propetang Isaias, nadungog ni Jehova ang “pagtuaw sa kasakit” sa daghang Israelinhon nga gimaltratar sa ilang mga isigka-Israelinhon. (Basaha ang Isaias 5:7.) Milihok si Jehova pinaagi sa pagsilot niadtong balikbalik nga nagsupak sa iyang Balaod ug nagmaltratar sa uban.—Isa. 5:​5, 13.

4. Unsay pagbati ni Jesus sa inhustisya nga nasinatian sa uban? (Tan-awa sab ang hulagway.)

⁴ Sama kang Jehova, si Jesus nahigugma sa hustisya ug nagdumot sa inhustisya. Niadtong dinhi pa si Jesus sa yuta, dihay higayon nga nakakita siyag tawo nga kuyos ug kamot. Si Jesus naluoy pag-ayo sa maong tawo ug iya siyang gitabangan. Pero lahi kaayo ang gibati sa way kaluoy nga relihiyosong mga lider. Mas importante para nila ang pagpatuman sa ilang naghinobrang interpretasyon sa balaod sa Igpapahulay kay sa tabangan ang maong makaluluoy nga tawo. Unsay gibati ni Jesus sa ilang reaksiyon? Siya “naguol pag-ayo tungod sa kagahi sa ilang kasingkasing.”—Mar. 3:​1-6.

5. Unsay angay natong hinumdoman kon masuko ta tungod sa inhustisya?

⁵ Tungod kay si Jehova ug si Jesus nagdumot sa inhustisya, normal lang nga mao pod nay atong pagbati. (Efe. 4:26 ug study note nga “Be wrathful”) Pero angay natong hinumdoman nga bisan pag naa tay balidong rason nga masuko, dili na makasulbad sa inhustisya. Gani, kon magsige tag kasuko ug dili nato makontrolar ang atong kaugalingon, makaapektar na sa atong emosyon ug panglawas. (Sal. 37:​1, 8; Sant. 1:20) Busa unsaon nato pag-atubang ang inhustisya? Naa tay makat-onan sa ehemplo ni Jesus.

KON UNSAY REAKSIYON NI JESUS SA INHUSTISYA

6. Unsa nga mga inhustisya ang komon niadtong dinhi pa si Jesus sa yuta? (Tan-awa sab ang hulagway.)

⁶ Niadtong dinhi pa si Jesus sa yuta, nakita niya nga daghang tawo ang nag-antos sa inhustisya. Nakita niya ang mga tawo nga gilisodlisod sa relihiyosong mga lider. (Mat. 23:​2-4) Nasaksihan pod niya kon unsa ka pintas ang Romanong awtoridad, mao nga daghang Hudiyo ang nangandoy ug kagawasan gikan sa Roma. Gani, ang uban nagpormag mga grupo aron makig-away sa mga Romano. Pero wala gyod mag-apil-apil si Jesus sa maong mga grupo. Dihang nahibaloan niya nga ang mga tawo nagplano nga himoon siyang hari, si Jesus mipalayo nila.—Juan 6:15.

7-8. Nganong wala mosulay si Jesus sa pagwala sa inhustisya dihang dinhi pa siya sa yuta? (Juan 18:36)

⁷ Sa dinhi pa si Jesus sa yuta, wala siya mosulay sa pag-apil-apil sa politika aron taposon ang inhustisya. Ngano? Kay nahibalo siya nga ang mga tawo walay katungod o katakos nga mandoan ang ilang kaugalingon. (Sal. 146:3; Jer. 10:23) Dili pod nila kayang wad-on ang pangunang mga hinungdan sa inhustisya. Kining kalibotana gimandoan ni Satanas nga Yawa. Siya salbahis kaayo ug naggamit sa iyang awtoridad aron impluwensiyahan ang mga tawo sa pagbuhat ug inhustisya. (Juan 8:44; Efe. 2:2) Ug bisan ang mga tawo nga maayog motibo makahimo gihapon usahay ug dili maayo sa uban tungod sa ilang pagkadili-hingpit.—Eccl. 7:20.

⁸ Nahibalo si Jesus nga ang Gingharian sa Diyos lang ang bug-os makawagtang sa pangunang mga hinungdan sa inhustisya. Tungod niana, iyang gigamit ang iyang panahon ug kusog sa ‘pagwali sa maayong balita sa Gingharian sa Diyos.’ (Luc. 8:1) Iyang gipasaligan “kadtong gigutom ug giuhaw sa pagkamatarong” nga moabot ang panahon nga mawala na ang pagkadaotan ug inhustisya. (Mat. 5:6 ug study note; Luc. 18:​7, 8) Pero mahitabo lang ni, dili pinaagi sa gobyerno sa tawo, kondili pinaagi sa langitnong gobyerno sa Diyos, nga “dili bahin niining kalibotana.”—Basaha ang Juan 18:36.

SUNDOGA ANG PANGLANTAW NI JESUS SA INHUSTISYA

9. Nganong kombinsido ka nga ang Gingharian sa Diyos lang ang makawagtang sa tanang inhustisya?

⁹ Mas daghang inhustisya ang nagakahitabo karon kon itandi sa panahon ni Jesus. Pero mao ra gihapon ang hinungdan sa inhustisya niining “kataposang mga adlaw”—si Satanas ug ang dili hingpit nga mga tawo nga ubos sa iyang impluwensiya. (2 Tim. 3:​1-5, 13; Pin. 12:12) Sama kang Jesus, nahibalo ta nga ang Gingharian sa Diyos lang ang makawagtang sa mga hinungdan sa inhustisya. Kay bug-os tang nagsuportar niana nga Gingharian, wala ta mag-apil-apil sa mga protesta ug sa uban pang paningkamot sa pagwagtang sa inhustisya. Konsideraha ang eksperyensiya sa sister nga ginganlag Stacy.a Sa wala pa siya makakat-on sa kamatuoran, si Stacy pirmeng moapil sa mga protesta. Pero sa ngadtongadto, dili na siya segurado kon husto ba ang iyang ginahimo. Siya miingon: “Panahon sa among mga pagprotesta, makahunahuna ko kon sakto ba ang akong gidapigan. Karon nga ang Gingharian sa Diyos na ang akong gisuportahan, segurado ko nga sakto na gyod ang akong gidapigan. Nahibalo ko nga si Jehova lang, dili ako, ang makahatag ug tinuod nga hustisya sa mga biktima sa pagdaogdaog.”—Sal. 72:​1, 4.

10. Base sa Mateo 5:​43-48, nganong dili ta angayng mag-apil-apil sa mga kalihokan alang sa reporma o kabag-ohan? (Tan-awa sab ang hulagway.)

¹⁰ Ang mga kalihokan alang sa reporma o kabag-ohan sagad nagpakitag pagkamasuk-anon ug pagkarebelyoso nga sukwahi sa ehemplo ug gitudlo ni Jesus. (Efe. 4:31) Ang brader nga ginganlag Jeffrey miingon: “Ang mga nagprotesta, nga sa primero malinawon ra, puwedeng kalit lang nga mahimong bayolente ug magsugod nag pagpangguba ug pagpangawat ug mga butang.” Pero si Jesus nagtudlo nato nga higugmaon ang tanang tawo, apil na kadtong mga nagsupak ug naglutos nato. (Basaha ang Mateo 5:​43-48.) Ingong mga Kristohanon, maningkamot gyod ta nga likayan ang pagbuhat sa mga butang nga wala mahiuyon sa ehemplo nga gihatag ni Jesus kanato.

11. Sa unsang kahimtang nga lisod tingali kaayo sundogon ang ehemplo ni Jesus?

¹¹ Bisag nahibalo ta nga ang Gingharian sa Diyos ang makahatag ug permanenteng solusyon sa inhustisya, malisdan tingali ta sa pagsundog kang Jesus kon kita mismo ang makaeksperyensiya niana. Konsideraha ang nahitabo kang Janiya, sister nga nakaeksperyensiyag diskriminasyon. Siya miingon: “Naglagot ug nasakitan kaayo ko. Gusto nakong masilotan kadtong naghimog inhustisya. Maong nakahunahuna ko nga mosuportar sa usa ka grupo nga kontra sa pagpihigpihig ug diskriminasyon. Abi nakog mao to ang mas maayong paagi aron mapagawas nako ang akong kalagot.” Pero sa ngadtongadto, nakita ni Janiya nga kinahanglan siyang mohimog kausaban. Siya miingon: “Nakita nako nga naimpluwensiyahan na sa uban ang akong panghunahuna ug misugod na kog salig sa mga tawo imbes kang Jehova. Midesisyon ko nga dili na gyod makig-uban sa ingon niini nga mga grupo.” Bisag naa tay balidong rason nga masuko, angay tang mag-amping nga dili magpadala niana aron dili nato makompromiso ang atong neyutralidad ug magpabilin gihapon tang dili bahin sa kalibotan.—Juan 15:19.

12. Nganong angay tang mag-amping sa mga impormasyon nga atong ginabasa o ginatan-aw?

¹² Unsay makatabang aron dili ta madaog sa kasuko tungod sa inhustisya? Ang uban nag-amping sa kon unsay ilang ginabasa, ginapaminawan, ug ginatan-aw, ug nakatabang gyod ni nila. Hinumdomi nga ang Internet o social media daghag mga post nga gipalabihag estorya ug nagdasig sa mga tawo nga moprotesta batok sa gobyerno. Naa poy mga reporter nga dili kasaligan dihang maghatag ug balita kay klaro kaayo nga naa silay gidapigan. Bisan pag tinuod ang report bahin sa inhustisya, dili makatabang ang pagsigeg hunahuna niana. Ang pagsigeg tan-aw o pagbasa niana nga mga balita makapalagot o makapaluya ra hinuon nato. (Prov. 24:10) Basin malimot pa gani ta nga ang Gingharian sa Diyos lang ang bugtong solusyon sa tanang inhustisya.

13. Sa unsang paagi ang regular nga pagbasa sa Bibliya makatabang nato nga mabatonan ang hustong panglantaw sa inhustisya?

¹³ Ang regular nga pagbasa sa Bibliya ug ang pagpamalandong niini makatabang nato nga mabatonan ang hustong panglantaw sa inhustisya. Ang sister nga si Alia naglagot dihang iyang nakita nga gidaogdaog ang mga tawo sa ilang lugar. Ang nakaapan pa gyod kay wala ra masiloti ang mga nagbuhat niana. Siya miingon: “Kinahanglan kong mamalandong ug akong gipangutana ang akong kaugalingon, ‘Nagtuo ba gyod ko nga taposon ni Jehova kini nga mga problema?’ Dayon nabasahan nako ang Job 34:​22-29. Kini nga mga bersikulo nagpahinumdom nako nga nakita gyod ni Jehova ang tanan. Siya lang ang makahukom sa mga tawo sa hingpit nga paagi, ug sa iyang gitakdang panahon, bug-os niyang tul-iron ang mga butang.” Pero samtang atong ginapaabot nga taposon sa Gingharian sa Diyos ang tanang inhustisya, unsay atong mahimo karon?

KON UNSAY ATONG MAHIMO SA INHUSTISYA KARON

14. Unsay atong mahimo aron dili ta makadugang sa mga inhustisya karon? (Colosas 3:​10, 11)

¹⁴ Dili tingali nato kayang pugngan ang uban sa pagbuhat ug inhustisya, pero naa tay mahimo aron dili ta makadugang niana. Sa ato nang nahisgotan, masundog nato si Jesus pinaagi sa pagpakitag gugma. Kana nga gugma mopalihok nato nga tahoron ang uban, apil na kadtong wala magbuhat ug maayo. (Mat. 7:12; Roma 12:17) Malipay gyod si Jehova kon trataron nato ang tanan sa buotan ug patas nga paagi.—Basaha ang Colosas 3:​10, 11.

15. Sa unsang paagi makatabang sa mga tawo ang mga kamatuoran sa Bibliya nga atong ginasangyaw nila?

¹⁵ Ang pinakamaayo nga atong mahimo sa inhustisya karon mao ang pagsulti sa uban bahin sa mga kamatuoran sa Bibliya. Ngano? Kay ang “kahibalo bahin kang Jehova” makapabag-o sa mga tawo. Kini motabang sa mga agresibo ug bayolente nga mga tawo nga mahimong buotan ug mahigugmaon. (Isa. 11:​6, 7, 9) Pananglitan, sa wala pa makakat-on sa kamatuoran ang usa ka lalaki nga ginganlag Jemal, siya miapil sa usa ka rebelde nga grupo kay gibati niya nga ang gobyerno nagdaogdaog sa mga tawo. Siya miingon: “Dili nimo mapugos ang mga tawo nga magbag-o pinaagi sa pagpakig-away nila. Pero kon ilang makat-onan ang mga kamatuoran sa Bibliya, puwede silang magbag-o. Mao nay nahitabo nako.” Ang mga nakat-onan ni Jemal sa Bibliya maoy nagpalihok niya nga moundang na sa pagpakig-away sa gobyerno. Kon mas daghan ang magbag-o tungod sa mga kamatuoran sa Bibliya, mas mamenosan ang mga tawo nga makaamot sa inhustisya.

16. Nganong ganahan kang mosulti sa uban bahin sa Gingharian sa Diyos?

¹⁶ Sama sa gihimo ni Jesus, gusto pod natong sultihan ang mga tawo nga ang Gingharian sa Diyos lang ang makahatag ug permanenteng solusyon sa inhustisya. Kana makahatag ug paglaom niadtong mga nakaeksperyensiyag inhustisya. (Jer. 29:11) Si Stacy nga gihisgotan ganiha miingon: “Ang mga kamatuoran nga akong nakat-onan nakatabang nako nga masagubang ang mga inhustisya nga akong nakita ug naeksperyensiyahan. Gihupay ko ni Jehova pinaagi sa mensahe sa Bibliya.” Siyempre, aron masulti nimo ngadto sa uban kining makapahupay nga mensahe sa Bibliya, kinahanglang mangandam ka pag-ayo. Kon mas kombinsido ka sa mga kamatuoran sa Bibliya nga atong gihisgotan niini nga artikulo, mahimo kang mas andam nga isulti kini ngadto sa uban, pananglitan diha sa eskuwelahan o sa trabahoan.b

17. Sa unsang paagi ginatabangan ta ni Jehova nga masagubang ang inhustisya karon?

¹⁷ Nahibalo ta nga dili gyod mawala ang inhustisya samtang si Satanas pa “ang magmamando niining kalibotana.” Pero segurado ta nga moabot ang panahon nga siya “palagpoton,” maong makalaom tag mas maayong kaugmaon. (Juan 12:31) Pinaagi sa Bibliya, gitabangan ta ni Jehova nga masabtan kon unsay hinungdan sa daghang inhustisya karon ug kon unsay iyang gibati dihang makita ta niya nga nag-antos tungod niini. (Sal. 34:​17-19) Pinaagi sa iyang Anak, gitudloan ta ni Jehova kon unsaon pag-atubang ang mga inhustisya karon ug kon sa unsang paagi bug-os kining taposon sa iyang Gingharian sa dili madugay. (2 Ped. 3:13) Busa, hinaot padayon natong himoon ang atong maarangan nga isangyaw ang maayong balita sa Gingharian ug mahinamong magpaabot sa panahon dihang ang tibuok yuta mapuno na sa “hustisya ug pagkamatarong.”—Isa. 9:7.