Duha ka Bag-ong Membro sa Nagamandong Lawas

NIADTONG Oktubre 5, 2024, panahon sa tinuig nga miting, naay makapalipay kaayo nga pahibalo: Si Brader Jody Jedele ug Jacob Rumph natudlo ingong mga membro sa Nagamandong Lawas sa mga Saksi ni Jehova. Silang duha matinumanong nag-alagad kang Jehova sulod na sa daghang tuig.

Si Brader Jedele natawo sa Missouri, U.S.A. ug nagdako sa Saksi nga pamilya. Nagpuyo sila sa lugar nga gamay rag mga Saksi, maong daghang igsoon gikan sa lainlaing lugar ang moadto aron motabang sa pagsangyaw didto. Ang ilang gugma ug panaghiusa dako kaayog epekto kang Brader Jedele, maong nagpabawtismo siya niadtong Oktubre 15, 1983. Na-enjoy kaayo niya ang pagsangyaw, ug pag-graduate niya sa high school, nagregular payunir siya niadtong Septiyembre 1989.

Sa bata pa si Brader Jedele, siya ug ang iyang igsoong babaye pirmeng dad-on sa ilang mga ginikanan sa Bethel. Tungod ana, nahimo nilang tumong nga moalagad sa Bethel, ug nakab-ot gyod to nila. Si Brader Jedele miabot sa Wallkill Bethel niadtong Septiyembre 1990. Ang iyang unang asaynment maoy sa Cleaning Department ug sa ulahi sa Medical Services.

Niadtong panahona, paspas ang pag-uswag sa Spanish nga mga kongregasyon sa ilang lugar, ug dakog panginahanglan sa mga brader. Maong si Brader Jedele mibalhin sa usa niini nga mga kongregasyon ug mikat-og Spanish. Wala madugay, nailaila niya si Damaris, payunir nga sister sa ilang sirkito. Sa ngadtongadto nagminyo sila, ug si Damaris miuban niya sa pag-alagad sa Bethel.

Pagka-2005, mibiya sila sa Bethel aron atimanon ang ilang matinumanong mga ginikanan. Niadtong mga panahona, nag-alagad sila ingong mga regular payunir. Si Brader Jedele nag-alagad pod ingong usa sa mga instruktor sa Pioneer Service School ug nahimong membro sa Hospital Liaison Committee sa ilang lugar ug sa Regional Building Committee.

Niadtong 2013, si Brader ug Sister Jedele gidapit pag-usab sa Bethel aron motabang sa construction project sa Warwick. Human adto, nakaalagad pod sila sa Patterson ug sa Wallkill. Si Brader Jedele naasayn sa Local Design/Construction Department ug sa Hospital Information Services. Niadtong Marso 2023, natudlo siya ingong katabang sa Komite sa Pag-alagad. Bahin sa iyang mga asaynment, siya miingon: “Dihang makadawat kag bag-ong mga asaynment, usahay mobati ka nga dili nimo kaya. Pero mao nay panahon nga angay kang mosalig kang Jehova kay tabangan ka niya nga buhaton ang iyang kabubut-on.”

Si Brader Rumph natawo sa California, U.S.A. Niadtong bata pa siya, ang iyang mama dili aktibo, pero naningkamot gihapon ang iyang mama nga matudloan siya sa mga kamatuoran sa Bibliya. Kada tuig, mobisita pod siya sa iyang lola, nga usa ka madasigong Saksi. Gitabangan siya sa iyang lola nga maugmad ang iyang interes sa kamatuoran, ug pag-edad niyag 13, mihangyo siya nga magpa-Bible study. Niadtong Septiyembre 27, 1992, samtang tin-edyer pa siya, nagpabawtismo siya. Makapalipay kay ang iyang mama nahimong aktibo pag-usab, ug ang iyang papa ug mga igsoon miuswag ug nabawtismohan.

Niadtong bata pa siya, nakita ni Brader Rumph kon unsa ka malipayon ang mga payunir. Maong pagka-Septiyembre 1995, nagpayunir siya human siya mo-graduate sa high school. Pagka-2000, mibalhin siya sa Ecuador aron moalagad sa lugar nga dakog panginahanglan. Didto niya nailaila si Inga, payunir nga sister nga gikan sa Canada, ug sa ngadtongadto nagminyo sila. Human adto, nag-alagad sila sa usa ka lungsod sa Ecuador nga gamay rag magmamantala. Karon daghan nag igsoon ang maong kongregasyon.

Sa ngadtongadto, si Brader ug Sister Rumph natudlo ingong mga espesyal payunir ug sa ulahi nag-alagad sa sirkitong buluhaton. Pagka-2011, gidapit sila sa ika-132 nga klase sa Gilead. Human sila migraduwar, nakaalagad sila sa lainlaing nasod ug nakabaton ug daghang pribilehiyo, sama sa pag-alagad sa Bethel, sa sirkitong buluhaton, ug ingong mga misyonaryo. Nakapribilehiyo pod si Brader Rumph nga mahimong instruktor sa School for Kingdom Evangelizers.

Tungod sa COVID-19 nga pandemic, si Brader ug Sister Rumph mibalik sa United States. Gidapit sila sa Wallkill Bethel, diin gibansay si Brader Rumph sa Service Department. Wala madugay, giasayn silag balik sa sangang buhatan sa Ecuador, diin nag-alagad si Brader Rumph ingong membro sa Branch Committee. Pagka-2023, gibalhin sila sa Warwick. Dayon sa Enero 2024, gitudlo si Brader Rumph ingong katabang sa Komite sa Pag-alagad. Bahin sa iyang mga asaynment, si Brader Rumph miingon, “Dili ang lugar ang nakapaespesyal sa usa ka asaynment, kondili ang mga tawo nga imong nakauban sa pag-alagad.”

Gipabilhan gyod nato ang mga paningkamot niini nga mga brader, ug hinaot nga ‘padayon natong mahalon ang mga igsoon nga sama nila.’—Filip. 2:29.