Magmalipayon Gihapon Ka Bisag Tigulang Na

1-2. Unsay panglantaw ni Jehova sa iyang matinumanong mga alagad nga tigulang na? (Salmo 92:​12-14; tan-awa sab ang hulagway.)

ANG mga tawo lainlain ug reaksiyon bahin sa pagkatigulang. Para sa uban kadungganan ni, pero dili ingon ana ang hunahuna sa kadaghanan. Pananglitan, kahinumdom pa ba ka sa unang higayon nga nakakita kag uban sa imong buhok? Tingali imo ning giibot aron dili ni makita sa uban. Pero bisag kapila pa nimo ibton ang imong mga uban, nahibalo ka nga dili gyod ni nimo mapugngan sa pagtubo. Kini nga pananglitan nagpakita nga daghan ang dili ganahang matigulang.

² Pero lahi kaayo ang panglantaw sa atong langitnong Amahan sa iyang mga alagad nga tigulang na. (Prov. 16:31) Iya silang gipakasama sa mga kahoy nga padayong nagalambo ug buhi kaayo tan-awon. (Basaha ang Salmo 92:​12-14.) Nganong haom man ni nga deskripsiyon para nila? Kay ang mga kahoy nga daghag dahon ug bulak sagad karaan na kaayo. Ang usa sa mga pananglitan ani mao ang mga kahoy didto sa Japan nga mamulak ug mga cherry blossom. Ang uban niini nga mga kahoy kapig 1000 na ka tuig nga nabuhi, ug nindot kaayo sila tan-awon. Sama niini nga mga kahoy, malipay kaayo si Jehova nga magtan-aw sa iyang matinumanong mga alagad nga tigulang na. Bisag ubanon na sila, nakita ug giapresyar gihapon ni Jehova ang ilang nindot nga mga hiyas, ang ilang paglahutay ug pagkamaunongon, apil na ang ilang matinumanong pag-alagad kaniya sulod na sa daghang katuigan.

3. Giunsa paggamit ni Jehova ang mga tigulang aron molampos ang iyang katuyoan? Paghatag ug pananglitan.

³ Bisag tigulang na ang usa ka tawo, wala ni magpasabot nga dili na siya bililhon kang Jehova.a Gani, si Jehova migamit ug mga tigulang aron molampos ang iyang katuyoan. Pananglitan, si Sara tigulang na dihang giingnan siya ni Jehova nga mahimo siyang inahan sa usa ka gamhanang nasod ug katigulangan sa Mesiyas. (Gen. 17:​15-19) Si Moises taas nag edad dihang gisugo siya ni Jehova nga manguna sa pagpagawas sa mga Israelinhon gikan sa Ehipto. (Ex. 7:​6, 7) Ug bisag tigulang na kaayo si apostol Juan, gigamit gihapon siya ni Jehova sa pagsulat sa lima ka basahon sa Bibliya.

4. Base sa Proverbio 15:​15, unsay makatabang sa mga tigulang aron malahutay ang ilang lisod nga kahimtang? (Tan-awa sab ang hulagway.)

⁴ Ang mga tigulang luya na ug daghan nag gipangbati sa lawas. Ang usa ka sister miingon, “Dili gyod lalim nga magkatigulang.” Pero ang pagpabiling malipayonb makatabang nila nga malahutay ang ilang mga kalisdanan. (Basaha ang Proverbio 15:15.) Niining artikuloha, atong hisgotan ang praktikal nga mga butang nga puwedeng himoon sa mga tigulang aron magpabilin silang malipayon. Ato pong konsiderahon kon sa unsang paagi nato matabangan ang tigulang nga mga igsoon sa atong kongregasyon. Pero hisgotan una nato kon nganong dili sayon nga magpabiling malipayon samtang magkatigulang.

KON NGANONG LISOD TINGALING MAGMALIPAYON DIHANG MAGKATIGULANG

5. Unsa kahay rason kon nganong maguol ang ubang tigulang?

⁵ Ngano tingaling maguol ang mga tigulang? Tingali kay dili na nila mahimo ang mga butang nga kaya nilang himoon kaniadto. Mahinumdom tingali sila sa mga panahon nga batan-on pa sila ug maayo pag panglawas. (Eccl. 7:10) Pananglitan, ang sister nga si Ruby miingon: “Daghan na kog gipangbati sa lawas ug dili na kaayo ko kalihok, maong malisdan kog sul-ob ug sinina. Malisdan gani ko bisan sa pag-alsa lang sa akong tiil aron magmedyas. Giartraytis ang akong mga kamot ug maminhod, maong maglisod ko sa paghimo bisan sa ginagmayng mga butang.” Ug si Harold, nga nag-alagad kaniadto sa Bethel, miingon: “Morag wala na ko kaila sa akong kaugalingon, maong malagot ko usahay. Hilig kog sports sa una, ug paborito nako ang baseball. Moingon gani ang uban, ‘Ihatag ang bola kang Harold aron modaog ta.’ Pero karon, dili na gani ko kaitsag bola.”

6. (a) Unsa pay laing mga rason kon nganong maguol ang ubang tigulang? (b) Unsay makatabang sa mga tigulang nga makadesisyon kon angay pa ba silang magdrayb ug sakyanan? (Tan-awa ang artikulong “Angay na ba Kong Mohunong sa Pagdrayb?” nga makita niini nga isyu.)

⁶ Maguol pod tingali ang uban kay gibati nila nga dili na nila kontrolado ang ilang kinabuhi. Mao nay bation ilabina sa mga tigulang nga naa nay tig-atiman o miipon nag puyo sa ilang mga anak. Tingali maguol sab sila kay dili na sila makadrayb ug sakyanan, o kaha dili na sila bastabasta makaadto sa lainlaing lugar nga walay kauban kay luya na sila o hanap na kaayog panan-aw. Lisod gyod na para nila. Kon tigulang ka ug mao nay imong gibati, basin makatabang nimo ang paghinumdom nga gipabilhan ka ni Jehova ug sa uban, bisan pag limitado na lang ang imong mahimo. Ug makaseguro ka nga nasabtan ni Jehova ang imong gibati. Mas importante para niya kon unsay naa sa imong kasingkasing, nga puno nig gugma ug apresasyon para niya ug sa mga igsoon.—1 Sam. 16:7.

7. Unsay makatabang niadtong naguol nga basig dili nila maabtan ang kataposan niini nga sistema?

⁷ Tingali naguol ka kay basig dili nimo maabtan ang kataposan niini nga sistema. Kon kana ang imong gibati, unsay makatabang nimo? Hinumdomi nga si Jehova mapailobong nagpaabot sa panahon nga iya nang taposon kining daotang kalibotan. (Isa. 30:18) Ug ang iyang pailob naay maayong resulta. Naghatag nig kahigayonan sa minilyong tawo nga makaila ug makaalagad niya. (2 Ped. 3:9) Maong kon maguol ka, hunahunaa kon unsa ka daghang tawo ang makabenepisyo sa pailob ni Jehova sa dili pa moabot ang kataposan. Basin gani ang uban nila mga membro sa imong pamilya.

8. Unsa kahay epekto sa mga tigulang tungod sa ilang gipangbati sa lawas?

⁸ Bisag pila pay atong edad, kon lain ang atong gibati, tingali makasulti o makahimo tag mga butang nga atong mahayan. (Eccl. 7:7; Sant. 3:2) Pananglitan, dihang ang matinumanong si Job nag-antos, “nagpasagad na lang [siyag] sulti.” (Job 6:​1-3) Usahay pod, tungod sa seryosong sakit o sa tambal nga ilang ginatomar, ang mga tigulang makasulti o makahimog mga butang nga lahi kaayo sa ilang kinaiya. Siyempre, dili nato himoong rason ang atong edad o sakit aron mahimong demanding o pasakitan ang uban. Ug kon naa tay nasulti nga nakapasakit sa uban, mangayo dayon tag pasaylo.—Mat. 5:​23, 24.

KON UNSAY HIMOON ARON PADAYONG MAGMALIPAYON

9. Nganong angay nimong dawaton ang tabang sa uban? (Tan-awa sab ang mga hulagway.)

⁹ Dawata ang tabang sa uban. (Gal. 6:2) Sa primero, lisod tingali nang himoon. Ang sister nga si Gretl miingon: “Usahay maulaw ko mangayog tabang kay dili nako gusto nga mabug-atan ang uban. Taudtaod pod ayha nausab ang akong panglantaw ug nadawat nga nagkinahanglan kog tabang.” Kon imong dawaton ang tabang sa uban, imo silang gihatagan ug kahigayonan nga bation ang kalipay sa paghatag. (Buh. 20:35) Ug seguradong malipay ka dihang makita nimo nga gimahal ka nila pag-ayo ug nga naghunahuna gyod sila sa imong kaayohan.

10. Nganong angay nimong ipakita nga mapasalamaton ka? (Tan-awa sab ang hulagway.)

¹⁰ Ipakita ang pagkamapasalamaton. (Col. 3:15; 1 Tes. 5:18) Siyempre, mapasalamaton ta kon himoan tag maayo sa uban, pero basin malimot ta sa pagpakita niana. Pero kon mo-smile ta ug magpasalamat, atong gipabati nila nga atong giapresyar ang ilang gihimo. Si Leah, nga usa sa mga tig-atiman sa mga tigulang sa Bethel, miingon: “Ang usa sa mga sister nga akong giatiman pirmeng mohatag nakog gamayng thank you card. Mubo ra ang iyang mga message, pero makapatandog kaayo. Ganahan kaayo kong makadawat ani, ug nalipay ko nga iyang gipabilhan ang akong tabang.”

11. Sa unsang paagi ka makatabang sa uban? (Tan-awa sab ang hulagway.)

¹¹ Paningkamoti nga makatabang sa uban. Kon gamiton nimo ang imong panahon ug kusog para sa uban, makatabang ni nga dili ka magpokus sa imong mga problema. Naay panultihon sa Africa nga nag-ingon nga ang mga tigulang samag mga libro nga makatudlog importanteng mga leksiyon. Pero ang mga libro nga naa ra sa butanganan dili makatudlo o makasultig mga eksperyensiya. Maong aron makakat-on ang uban sa imong kahibalo ug eksperyensiya, estoryaha sila. Ilailaha sila pinaagi sa pagpangutana nila, ug paminawa ang ilang isulti. I-share ang imong mga eksperyensiya nga nagpakita nga ang pagsunod sa mga sukdanan ni Jehova makahatag natog kaayohan ug makapalipay. Malipay gyod ka kon imo silang dasigon ug palig-onon.—Sal. 71:18.

12. Base sa Isaias 46:​4, unsay gisaad ni Jehova nga iyang himoon para sa mga tigulang? (Tan-awa sab ang hulagway.)

¹² Hangyoa si Jehova nga hatagan kag kusog. Bisan pag maluya ka usahay sa pisikal o emosyonal, si Jehova “dili [gyod] kapoyon o maluya.” (Isa. 40:28) Unsa ang usa ka paagi nga gigamit ni Jehova ang iyang dili mahurot nga kusog? Iya ning gigamit sa pagpalig-on sa iyang matinumanong mga alagad nga tigulang na. (Isa. 40:​29-31) Gani, si Jehova nagsaad nga iya silang tabangan. (Basaha ang Isaias 46:4.) Ug si Jehova kanunay gyong motuman sa iyang mga saad. (Jos. 23:14; Isa. 55:​10, 11) Maong kon moampo ka, tabangan gyod ka ni Jehova. Makita gyod nimo nga gimahal ka niya pag-ayo, ug tungod ana, magmalipayon ka.

13. Base sa 2 Corinto 4:​16-18, unsay angay nimong hinumdoman? (Tan-awa sab ang hulagway.)

¹³ Hinumdomi nga temporaryo ra ang imong kahimtang. Mas sayon tang makalahutay kon atong hinumdoman nga bisag unsa pa ka lisod ang kahimtang, temporaryo lang ni. Ug ang Bibliya nagpasalig nga wad-on ni Jehova ang sakit ug pagkatigulang. (Job 33:25; Isa. 33:24) Magmalipayon ka kon imong hinumdoman nga sa umaabot, mahimo kang mas himsog, mas kusgan, ug mas guwapo o guwapa kay sa niadtong bata pa ka. Maong pagpokus sa umaabot, kay ang imong pinakamalipayong kinabuhi naa sa unahan, wala sa nangagi. (Basaha ang 2 Corinto 4:​16-18.) Pero unsay mahimo sa uban sa pagtabang nimo?

KON SA UNSANG PAAGI MAKATABANG ANG UBAN

14. Nganong importante nga atong bisitahon ug tawgan ang mga tigulang?

¹⁴ Regular nga bisitaha ug tawgi ang tigulang nga mga igsoon. (Heb. 13:16) Ang mga tigulang mobati usahay nga nag-inusara na lang sila. Ang usa ka brader nga dili na makagawasgawas sa balay miingon: “Laay kaayo kay naa ra ko sa balay pirme, buntag hangtod gabii. Usahay mobati ko nga mora kog tigulang nga leyon nga naa na lang pirme sa hawla. Maglagot ko ug dili ko mahimutang.” Dihang bisitahon nato ang mga tigulang, ato silang gipasaligan nga importante sila para nato ug nga gimahal nato sila. Tingali, naay higayon nga gusto tang motawag o mobisita sa tigulang nga igsoon, pero wala nato mahimo tungod sa atong ka-busy. Busa unsay makatabang aron “maseguro [nato] ang mas importanteng mga butang,” sama sa pagbisita sa mga tigulang? (Filip. 1:10) Basin makatabang nimo ang pag-set ug reminder sa imong calendar aron mapahinumdoman ka nga i-text o tawgan sila. Ug aron imo gyod silang mabisita, iapil ni sa imong eskedyul.

15. Unsay puwedeng himoon sa mga tigulang ug batabata pa dihang magkauban sila?

¹⁵ Kon batan-on ka, basin maghunahuna ka kon unsay imong isulti o buhaton uban sa mga tigulang. Pero ayaw ra kaayog kabalaka; ang importante nga mahimo kang maayong higala. (Prov. 17:17) Estoryaha sila sa dili pa ug human sa tigom. Puwede nimo silang pangutan-on sa ilang paborito nga teksto o sa ilang makalingaw nga kaagi sa bata pa sila. Puwede sab mong motan-aw ug programa sa JW Broadcasting^®. Makatabang pod ka nila sa praktikal nga paagi. Pananglitan, puwede nimo silang tabangan sa pag-update sa ilang mga gadget o sa pag-download sa bag-ong release nga mga tun-anan. Ang sister nga si Carol miingon: “Puwede ninyong iapil ang mga tigulang sa gusto ninyong buhaton. Bisag tigulang na ko, gusto gihapon kong mag-enjoy. Ganahan kong mag-shopping, mokaon sa gawas, ug magsuroysuroy sa nindot nga mga lugar.” Ug ang sister nga si Maira miingon: “Naa koy amiga nga 90 anyos na. Dako mig gap sa edad, 57 ka tuig. Pero dili ra nako mamatikdan ang among gap kay lingaw kaayo ming magkauban. Manan-aw pa gani mig salida. Ug kon naa mi mga problema, mangayo mig tambag sa usag usa.”

16. Nganong makatabang tingali nga ubanan ang mga tigulang kon magpa-check up sila sa doktor?

¹⁶ Ubani sila sa ilang mga check up. Gawas nga ihatod nimo ang mga tigulang, puwede pod nimo silang ubanan aron maseguro nga giatiman sila sa mga doktor ug nars ug mahatag ang tabang nga ilang gikinahanglan. (Isa. 1:17) Puwede pod nimo silang tabangan nga isulat kon unsay gisulti sa doktor. Ang tigulang nga sister nga si Ruth miingon: “Sagad, kon ako ray moadto sa doktor, dili ko nila seryosohon. Usahay kon isulti nako ang akong mga gipangbati, moingon ra silag, ‘Wala ra na; naa ra na sa imong hunahuna.’ Pero kon naay mouban nako, lahi ra kaayo ang tinagdan sa mga doktor sa akoa. Mapasalamaton kaayo ko sa mga igsoon nga mogahin gyod ug panahon nga ubanan ko.”

17. Unsay puwede natong himoon aron makauban nato sa ministeryo ang mga tigulang?

¹⁷ Iuban sila sa ministeryo. Dili na tingali kaya sa ubang tigulang nga mamalaybalay. Pero naa kay mahimo aron makauban gihapon sila sa ministeryo. Pananglitan, puwede nimong imbitahon ang usa ka tigulang nga sister nga mag-cart witnessing. Puwede pa gani kang magdala ug lingkoranan aron makalingkod siya duol sa cart. Puwede pod kang mag-uban ug usa ka tigulang nga brader sa pag-Bible study, o kaha himoon ang pagtuon diha sa iyang balay. Ang mga ansiyano puwede pong maghimog kahikayan nga didto himoon sa balay sa mga tigulang ang tigom alang sa pagsangyaw aron makaapil sila. Malipay gyod si Jehova sa bisan unsa nga atong himoon aron ipakita ang atong gugma ug pagtahod sa mga tigulang.—Prov. 3:27; Roma 12:10.

18. Unsay atong hisgotan sa sunod nga tun-anang artikulo?

¹⁸ Gipahinumdoman ta niini nga artikulo nga gihigugma ug gipabilhan gyod ni Jehova ang mga tigulang. Ug mao pod nay atong gibati para nila. Tinuod, dili sayon nga magkatigulang, pero sa tabang ni Jehova puwede gihapon kang magmalipayon. (Sal. 37:25) Makapadasig kaayo ang pagkahibalo nga ang imong pinakamalipayong kinabuhi naa sa unahan, wala sa nangagi. Pero komosta kadtong nag-atiman sa ilang tigulang na nga membro sa pamilya, o kaha sa ilang kapikas, anak, o higala nga nasakit? Unsay makatabang aron dili mawala ang ilang kalipay? Atong hisgotan ang tubag niana sa sunod nga tun-anang artikulo.