Ang Labing Makaiikag nga Bahin sa Miaging Tuig

SAMTANG ang kalibotan nagsusapinday tungod sa lainlaing mga krisis, ang katawhan sa Diyos nagpahimulos sa usa ka espirituwal nga yuta nga nagauswag sa katahom ug kadagaya. (Mal. 3:​12, 18) Kining padayon nga pag-uswag makapahinumdom kanato sa saad ni Jesus sa iyang mga tinun-an sa hapit na siyang mokayab sa langit: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.”​—Mat. 28:20.

Ang mga kalihokan sa miaging tuig naghatag ug dugang pamatuod nga nagakatuman ang makapahupay nga saad ni Jesus. Una, atong tagdon ang espirituwal nga kombira nga gipahimuslan sa mga alagad ni Jehova sa “Lakaw Uban sa Diyos” nga Distritong mga Kombensiyon.

“Lakaw Uban sa Diyos” nga mga Kombensiyon

Gipakita ni manalagnang Miqueas ang kalainan tali sa matarong ug sa dili-matarong sa dihang siya mitagna: “Ang tanang mga katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.” (Miq. 4:5) Sumala sa gipatin-aw sa mamumulong sa keynote address, gisumaryo nianang mga pulonga ang tinamdan sa matinumanong mga tawo kaniadto, sama ni Enoc ug Noe, kinsa naglakaw uban sa Diyos sa gubot kaayong mga panahon. (Gen. 5:22-24; 6:​9, 22) Pagkadako sa atong pribilehiyo sa pagsunod sa ilang mga lakang!

Ang distritong kombensiyon nakapalig-on ba sa imong determinasyon sa pagpadayon sa ‘paglakaw diha sa ngalan ni Jehova’? Nganong dili nimo repasohon ang imong mga nota sa kombensiyon? Ang pagrepaso magpahinumdom kanimo ug magtabang kanimo sa pagbaton ug dumalayong mga kaayohan gikan sa programa.

Mga Basahon nga Giluwatan sa Kombensiyon

Ang mga tawo ba diha sa teritoryo sa imong kongregasyon nagsultig lainlaing pinulongan? Kon mao, lagmit nagamit na nimo ang bag-ong pulyeto nga Good News for People of All Nations. Ang pulyeto, nga may tulo ka lainlaing edisyon, nga dunay 32, 64, ug 96 ka panid, espesipikong gidisenyo aron magamit sa matag nasod sumala sa lainlaing pinulongan niini. Busa paneguroa nga aduna ka niining ekselente ug bag-o nga basahon diha sa imong bag nga pangsangyaw. Ug kon makahimamat ka ug tawong nagsulti ug langyawng pinulongan, palihog sunda ang tulo ka lakang nga gilatid diha sa panid 2 sa pulyeto. Kini mahimong makaluwas ug kinabuhi!

Nahiuyon sa tinuig nga teksto sa 2004​—‘Magpadayon sa pagbantay . . . Pamatud-i ninyo nga kamo andam’​—giluwatan sa kataposang mamumulong sa ikaduhang adlaw sa kombensiyon ang brosyur nga Padayon sa Pagbantay! (Mat. 24:​42, 44) Hinaot daghan pa ang matabangan niini nga publikasyon nga makaalinggat sa pagkadinalian sa atong panahon ug makapamalandong ug maayo sa umaabot ug sa talagsaong mga butang nga hapit nang mahitabo. Ug, matod pa sa mamumulong, hinaot motabang usab kini kanato sa pagsagubang sa daghang kapit-os ug kabalaka sa kinabuhi ug sa pagpabiling timbang sa espirituwal sa dihang makaatubang ug mga pagsulay.

Tunghaan Alang sa Nagapanawng mga Magtatan-aw

Sa miaging unom ka tuig, kapin sa 600 ka magtatan-aw sa sirkito ug distrito gikan sa Canada ug Tinipong Bansa, apil na sa Alaska ug Hawaii, ang nakatambong na sa 13 ka klase sa Tunghaan Alang sa Nagapanawng mga Magtatan-aw nga gihimo sa Watchtower Educational Center sa Patterson, New York, T.B.A. Sa 2004 nga tuig sa pag-alagad, midaghan ang tunghaan, kay gibuksan usab kini diha sa 87 pa ka sanga. Ang 23 niini naglakip ug mga estudyante gikan sa laing mga nasod. Pananglitan, ang Alemanya nagdapit ug mga igsoon gikan sa Austria, Israel, Macedonia, Switzerland, ug Turkey. Ang Portugal dunay mga estudyante gikan sa Luxembourg ug gikan sa ubay-ubayng isla, sama sa Azores, Cape Verde, Madeira, São Tomé ug Príncipe. Ang Kenya nagdapit sa nagapanawng mga magtatan-aw gikan sa Etiopia, Rwanda, Tanzania, Uganda, ug sa uban pang mga nasod sa Aprika.

Ang kurso nagkobre sa tanang bahin sa buluhaton sa mga magtatan-aw sa sirkito ug distrito. Ang tumong mao ang pagtabang niining kugihang mga igsoon nga mahimong mas epektibo sa pagtuman sa ilang daghang responsibilidad, lakip na ang pagtudlo diha sa mga kongregasyon ug sa mga asembliya ug sa pagpanguna sa buluhatong pag-ebanghelyo. (2 Tim. 2:2; 4:5; 1 Ped. 5:​2, 3) Ang kurso nagdasig usab kanila sa pagmentinar sa ilang espirituwalidad ug sa pagpadapat sa mga kasulatan nga may pagsabot ug pag-ila sa dihang motabang sa uban.

Sanglit ang kadaghanan sa mga klase gihimo diha sa mga sangang buhatan, ang nagapanawng mga magtatan-aw ug ang ilang mga asawa nakatilaw ug kinabuhi sa Bethel. Usa ka klase misulat: “Ang rutina sa Bethel nakahatag kanamog espirituwal nga kaayohan. Nakapahimulos gayod kami sa programa sa pagsimba mabuntag, nga naglakip sa pagbasa sa Bibliya ug sa Tinuig nga Basahon. Bisag daghan kamig tun-anan, mitambong usab kami sa Pagtuon sa Bantayanang Torre sa pamilyang Bethel ma-Lunes sa gabii ug nakapahimulos sa maayong asosasyon.”

Sulod sa usa ka oras human sa paniudto kada adlaw, ang pipila ka igsoon magtrabaho nga ulhos-ulhos sa Service Department. Didto ilang nakat-onan kon unsaon pagkooperar sa bug-os sa sangang buhatan, kon unsaon pagsunod sa giya sa mas epektibong paagi, ug kon unsaon paghimog mas tukma ug makahuloganong mga report.

Matag Biyernes ang mga estudyante ug ang ilang mga asawa maminaw sa usa ka lektyur. Ang pakigpulong naglakip ug espirituwal nga pagdasig nga giandam alang gayod niining maunongong mga sister. Pananglitan, gipahinumdoman sila sa pagpadayon sa pagpakitag maayong panig-ingnan sa pagpasakop ingong asawa, ug gihatagan silag instruksiyon sa pagpaluyo sa ilang mga bana pinaagi sa pag-alagad uban sa mga sister diha sa mga kongregasyon. Usa ka nagapanawng magtatan-aw nagpakasama niining senemanang mga pakigpulong sa “lamian kaayong espirituwal nga panam-is.”

Siyempre, gipasiugda pag-ayo sa tunghaan ang Bibliya​—ilabina ang New World Translation of the Holy Scriptures​—With References. Usa ka estudyante sa Alemanya miingon: “Ako nagplano sa paggamit sa Reference Bible sa akong personal nga pagtuon ug sa mga tigom sa kongregasyon. Karon ra ako bug-os nga nakaapresyar sa kabililhon niini.” Gibati sa usa ka dugay nang nagapanawng magtatan-aw sa Britanya nga miuswag ang iyang espirituwalidad ug katakos sa pagtudlo tungod kay gihatagan ug dakong pagtagad ang Pulong sa Diyos. Siya misulat: “Akong nakat-onan nga bisan tuod mapuslanon ang paggamit ug maayong ilustrasyon sa paghatag ug pakigpulong, ang pagbasa ug pagpatin-aw sa mga teksto maoy mas hinungdanon.”

Daghang estudyante misulat agig apresasyon sa tunghaan. Usa ka igsoon sa Tinipong Bansa miingon: “Ang among kasingkasing natugob sa pagpasalamat kang Jehova ug sa iyang organisasyon tungod sa pagdasig kanamo ug sa pagsangkap kanamo alang sa among mga buluhaton. Paningkamotan namo nga magpadayon gayod kami sa pag-alagad, nga mas mapabilhon sa mga dalan ni Jehova, ug mas mahigugmaon sa iyang minahal nga mga karnero.” Usa ka estudyante sa Pransiya misulat: “Tungod sa kurso, nahimo akong mas mahunahunaon sa pagpakiglabot sa atong mga igsoon sa mahigugmaong paagi ug sa paghimo sa atong bug-os nga maarangan aron malipay sila sa pag-alagad kang Jehova.” Sa pagsumaryo sa gibati sa kadaghanan, usa ka nagapanawng magtatan-aw sa Portugal miingon: “Ang tunghaan mao ang labing magantihong kasinatian sa akong teokratikanhong karera.”

Usa ka instruktor mihatag ug laing komento. “Usa ka pribilehiyo ug bug-at nga responsibilidad,” matod pa niya, “ang pagtudlo sa mga lalaki nga sa ulahi mohatag ug giya nga makaapektar sa kinabuhi sa libolibo nato ka igsoon. Kami masaligon nga uban sa panalangin ni Jehova, ang mga kaayohan nga ihatag niini nga tunghaan mahimong dumalayon.”​—Sant. 3:1.

Sa natapos ang 2004 nga tuig sa pag-alagad, kapin sa 1,700 ka nagapanawng mga magtatan-aw ang nakatungha na, nga gidumala diha sa 14 ka pinulongan. Ang tunghaan padayon nga himoon diha sa dagko nga mga sanga panahon sa 2005 nga tuig sa pag-alagad.

Legal nga mga Panghitabo

Sa Mayo 19, 2004, gipatik sa European Court of Human Rights (ECHR) sa Strasbourg, Pransiya, ang desisyon niini sa kasong Lotter v. Bulgaria. Ang magtiayong Lotter, nga kaniadto mga misyonaryo sa mga Saksi ni Jehova, nagpasaka sa maong sumbong tungod sa tinguha sa gobyerno sa pagpahawa kanila sa Bulgaria tungod sa ilang relihiyon. Ang mga awtoridad sa Bulgaria misugot sa pagbayad ug danyos sa magtiayon ug mitugot na kanila sa pagpuyo didto. Misugot usab ang mga awtoridad sa pagpatik ug klarong pahibalo sa pagkalegal sa mga Saksi ni Jehova sa Bulgaria, diin sila girehistro ingong relihiyon niadto pang 1998.

Ang ECHR midesisyon pabor kang Séraphine Palau-​Martínez sa Disyembre 16, 2003. Sa desisyon nga 6 kontra 1, ang korte mihukom nga gilapas sa Pransiya ang mga katungod ni Sister Palau-Martinez maylabot sa iyang pamilya. Iyang gipasaka ang sumbong ngadto sa ECHR sa dihang nawad-an siyag katungod sa pag-atiman sa iyang duha ka anak tungod kay ang mga korte sa apelasyon sa Pransiya midesisyon nga mas labing maayo kon ang mga bata “dili ipailalom sa mapig-oton, estrikto nga mga pamaagi sa . . . mga Saksi ni Jehova sa pagmatuto sa ilang mga anak.” Sumala sa desisyon sa ECHR, ang desisyon sa mga korte sa apelasyon wala ibase sa tinuod nga kahimtang sa pagkinabuhi sa mga bata ug sa kon unsay labing maayo alang kanila ug nga ang desisyon nagbanaag ug relihiyosong pagpihig.

Human mag-antos sa daghang tuig nga pag-atake sa magubtanong mga tawo nga giaghat sa relihiyosong mga panatiko, nga ang uban kanila nabilanggo, ang mga Saksi ni Jehova sa nasod sa Georgia malinawong mitambong sa “Lakaw Uban sa Diyos” nga Distritong Kombensiyon. Usa ka makapalipayng sorpresa alang sa mga igsoon ang pagluwat sa Bag-ong Kalibotan nga Hubad sa Kristohanon Gregong Kasulatan diha sa pinulongang Georgiano. Dugang pa, sa Nobyembre 28, 2003, girehistro sa Ministri sa Hustisya sa Georgia ang lokal nga sanga sa Watch Tower Bible and Tract Society of Pennsylvania. Busa, bisan pag midesisyon ang Korte Suprema sa 1998 sa pag-anular sa korporasyon nga gigamit niadtong panahona sa mga Saksi ni Jehova, usa ka bag-ong korporasyon ang legal nga giila karon, nga gikalipay sa mga igsoon.

Ugaling lang, ubay-ubay pang mga kaso sa Georgia ang naghulat nga desisyonan sa ECHR. Apan, makapalipayng makita nga miarang-arang ang kahimtang sa atong mga igsoon didto.

Sukad sa 1990, napakyas ang paningkamot sa mga igsoon sa Alemanya sa pagparehistro sa atong relihiyosong asosasyon ilalom sa balaod alang sa publikong mga korporasyon. Sa dihang ang Federal Administrative Court mihukom nga kinahanglang sundon sa mga Saksi ni Jehova si “Cesar” nga labaw kay sa gibaod, ang Federal Constitutional Court midesisyon kontra niini ingong dili subay sa konstitusyon ug gibalik ang kaso aron repasohon. (Mar. 12:17) Sa Marso 25, 2004, ang unang korte nagsugod sa pagrepaso sa kaso. Ang korte nangayog dugang impormasyon maylabot sa atong baroganan bahin sa dugo, pagmatuto sa mga anak, pagpalagpot, ug neyutralidad. Ang nagdumala nga huwes miingon nga ang akusasyon sa gobyerno angayng ibase sa kasaligang pamatuod​—mga estadistika ug legal nga mga dokumento​—dili sa kadudahang mga pulong diha sa Internet ug sa mga sulat gikan sa mga tawong adunay personal nga mga kaligutgot ug gustong manimalos.

Usa ka dokumento sa senso nga gigamit sa pagrekluta ug mga sundalo sa Gresya adunay mga pulong nga “Chiliast o Jehovist” ingong kapilian diha sa listahan sa mga relihiyon. Kay giisip kining mga pulonga ingong pagbiaybiay, ang sanga sa Gresya nagpasaka ug sumbong sa Ministri sa Depensa. Sa Marso 24, 2004, gisulatan sa ministri ang mga Saksi ni Jehova nga nag-ingon nga wala silay intensiyon nga manginsulto ug nga ‘natul-id na sa ministri ang sayop nga mga pulong.’ Ang porma gipulihan nag mga pulong nga “Kristohanong mga Saksi ni Jehova.”

Ang mga Saksi ni Jehova legal nga giila sa Peru ingong usa ka relihiyon sa daghan nang tuig. Ugaling lang, niadtong Nobyembre 1997, ang Ministri sa Edukasyon wala na mosugot sa atong hangyo nga eksemsiyon sa buhis sa atong literatura ug nangayog dagkong mga kantidad nga salapi una pa ipagawas sa aduwana ang literatura. Ang kaso gihusay sa korte. Sa Disyembre 11, 2003, ang huwes midesisyon pabor sa mga Saksi ni Jehova. Siya miingon nga ang gihimo sa ministri maoy “kapritso, binuang, ug makalibog.” Ang panggawi sa mga opisyales, matod pa niya, “mapihigon [ug] mainsultohon.” Ang mga problema sa pagpasulod ug literatura gikan sa ubang nasod nasulbad dayon.

Ang Puerto Rico, usa ka nasod nga dunay kaugalingong kagamhanan nga sakop sa Tinipong Bansa, dunay balaod nga nagtugot sa mga pundok sa kabalayan sa pagpabutang ug mga pader nga may mga ganghaan, ug mga guwardiya. Kining maong babag naglimite sa atong kalihokan sa pagsangyaw. Ang mga polis sa estado nagpapahawa pa gani sa mga magmamantala gikan sa pipila ka bahin niining mga dapita. Ang paningkamot sa pag-areglo sa problema wala mosaler. Gisang-at na ang kaso karon diha sa Federal District Court alang sa Distrito sa Puerto Rico, nga naghangyo sa pagdeklarar sa maong balaod ingong supak sa konstitusyon, nga nagyatak sa mga katungod sa libreng paggamit sa kagawasan sa relihiyon ug sa kagawasan sa pagsulti. Gihulat pa ang desisyon sa korte.

Sa Oktubre 28, 2003, giluwatan sa Korte sa Apelasyon sa Bucharest ang Desisyon Num. 1756, nga nag-obligar sa gobyerno sa Romania sa paglakip sa mga Saksi ni Jehova diha sa listahan sa legal nga mga relihiyon sa regulasyon sa buhis. Sa Pebrero 6, 2004, ang Official Gazette Num. 112 nagpatik ug usa ka listahan sa “legal nga mga relihiyon sa Romania.” Apil niini ang mga Saksi ni Jehova.

Sa Marso 21, 2004, ang Seoul District Court sa Republika sa Korea nag-absuwelto sa tulo ka brader sa kriminal nga mga sumbong maylabot sa ilang pagdumili sa pagsundalo tungod sa relihiyosong mga katarongan. Kini ang unang higayon nga dunay korte nianang nasora nga miila nga katungod sa tawo ang pagdumili sa pagsundalo tungod sa relihiyosong mga prinsipyo. Gatosan sa atong mga brader sa Korea ang nabilanggo karon tungod sa “krimen” nga ‘pagsalsal sa ilang mga espada nga mga punta sa daro.’ (Isa. 2:4) Ikasubo, ang korte suprema ug ang konstitusyonal nga korte parehong midumili sa paggamit sa garantiya sa relihiyosong kagawasan nga gilatid diha sa konstitusyon sa Korea sa pagpanalipod sa atong mga brader. Apan ang lehislatura sa Korea dili pa dugayng nagduso ug balaodnon sa pagtaganag dili-militaryong buluhaton sa tanang kuwalipikadong mga lungsoranon nga tawgon sa pagkasundalo.​—Prov. 21:1.

Ang desisyon sa Korte Suprema sa T.B. sa kaso sa Watchtower . . . v. Village of Stratton padayon nga nakabenepisyo sa mga Saksi ni Jehova diha sa ilang pagsangyaw sa kabalayan. Pananglitan, diha sa usa ka komunidad sa estado sa New York, T.B.A., ang mga Saksi padayong gipangitaan ug lisensiya sa mga polis sa dili pa sila makigbahin sa publikong ministeryo. Apan, ang hepe sa kapolisan, human nga gipahibalo bahin sa maong kahimtang ug sa desisyon sa korte, misulat: “Ako mismo naulaw sa gihimo sa akong sakop nga mga polis ug nangayo kog pasaylo sa tanang kahasol nga miresulta niini.”

Usa ka komunidad sa estado sa Illinois naghatag ug instruksiyon sa departamento niini sa kapolisan sa pagpahibalo sa tanang tigpatrolya ug sa ubang mga polis ug kawani nga tungod sa desisyon sa Korte Suprema sa T.B., “ang mga Saksi ni Jehova wala na magkinahanglan ug lisensiya sa pagpamalaybalay.” Ang instruksiyon nagpadayon: “Dili na kinahanglang pahibaloon pa nila kita sa dihang magsangyaw sila sa komunidad.”

Sa Oktubre 8, 2003, ang Korte Suprema sa Iowa midesisyon pabor kang Lester Campbell sa iyang kaso sa pagdumili sa pagpa-abuno ug dugo. Si Brader Campbell nagpasakag sumbong nga nangayog danyos tungod kay giabunohan siya sa iyang kaugalingong dugo human maoperahan bisan pag siya may gisulat ug gisulti nga instruksiyon sa pagdumili niini nga pamaagi. Ang korte midesisyon pabor sa siruhano ug sa ospital. Apan, gibali sa Korte Suprema sa Iowa ang desisyon sa korte, nga nag-ingong wala magkinahanglan si Lester Campbell ug medikal nga eksperto sa pagpamatuod nga ang pag-abuno ug dugo nga walay pagtugot niya wala makaabot sa sukdanan sa maayong pag-atiman. Mihukom usab kini nga angay siyang hatagan ug danyos.

Ang Pagdili sa Moscow ug Epekto Niini

Ang Intermunicipal District Court sa Golovinsky sa Rusya mihukom niadtong Marso 26, 2004, sa pagdili sa tanang kalihokan sa mga Saksi ni Jehova sa Moscow ug sa pagsira sa ilang korporasyon. Ang maong desisyon giapelar. Sa Hunyo 16, 2004, ang Moscow City Court mituboy sa desisyon sa ubos nga korte, busa ang pagdili ug pagnulo sa korporasyon legal nga gipatuman. Ang mga igsoon misumiter ug apelasyon ngadto sa ECHR ug naglaom nga mahusay dayon kini tungod sa daghang kalisdanan nga gipatungha sa pagdili.

Bisan pa niana, ang pagdili wala makapaluya sa kasibot sa mga igsoon. Sa pagkatinuod, kini nakapalihok sa daghan sa paghimo ug labaw pa sa pag-alagad kang Jehova. Ang ilang kadasig makapahinumdom kanato sa mga pulong ni apostol Pablo sa dihang nabilanggo siya sa Roma. “Ang akong mga kalihokan,” siya misulat, “misangpot hinuon sa pagpauswag sa maayong balita.”​—Filip. 1:12.

Pananglitan, sa Marso 2004 dihay kinatas-ang ihap nga 136,034 ka magmamantala ug 136,903 ka pagtuon sa Bibliya. Mao kini ang unang higayon sa pito ka tuig nga ang gidaghanon sa mga pagtuon milabaw sa gidaghanon sa mga magmamantala! Ug gikan sa Marso hangtod Hunyo, ang sanga nakadawat ug kapin sa 1,000 ka aplikasyon alang sa regular payunir nga pag-alagad, ug niadtong Abril dihay kinatas-ang ihap nga 15,489 ka regular payunir. “Sa samang paagi,” ang sanga mitaho, “ang Hunyo 16 nga desisyon nakapadasig hinuon sa atong mga igsoon sa dugang pang kalihokan.” Nakapalihok usab kini sa uban​—lakip na sa pila ka dili-magtutuong mga bana​—sa pagsugod ug tambong sa Kristohanong mga tigom.

Usa ka estudyante sa unibersidad nga taga-Tinipong Bansa naatlang miduaw sa Rusya sa dihang gipakanaog ang desisyon niadtong Hunyo. “Mituyo siya ug adto sa Bethel, sa gawas sa St. Petersburg, aron magpakisayod pag dugang bahin sa kahimtang,” misulat ang sanga. “Nakadayeg siya sa kahinlo sa pasilidad ug sa pag-abiabi kaniya.” Kay natingala kon nganong may mga tawo nga gustong idili ang mga Saksi ni Jehova, mihangyo siya ug mga publikasyon ug video nga iyang dad-on balik sa California aron ipakita sa iyang mga propesor diha sa departamento sa pagtuon bahin sa mga relihiyon.

Mga Kombensiyon sa Moscow Gihimo nga Malinawon

Gikan sa Hunyo 11 hangtod 13, sa hapit nang ipakanaog ang negatibong desisyon sa korte sa apelasyon, duha ka “Lakaw Uban sa Diyos” nga mga Kombensiyon ang gihimo sa Moscow, ang usa maoy sa Russian Sign Language. Ang orihinal nga plano mao nga himoon ang mga kombensiyon human sa bista, apan ang Komite sa Sanga milampos sa pagpauswag sa bista sa laing petsa. Ang mga igsoon mitaho nga ang mga kombensiyon gihimo nga walay kakulian ug ang mga awtoridad sa siyudad mikooperar. Gani, ang mga polis nga nagbantay diha sa mga entrada sa estadyum giingnan sa ilang mga labaw: “Ayaw pagtabako ug ayaw pamalikas sa dihang nagpasulod mo ug mga tawo sa estadyum.”

Sa subwey sa Moscow, gipasanginlan sa usa ka tawo ang gamayng grupo sa mga igsoong babaye nga nangawat sa iyang kuwarta. Iyang gipugos sila sa pag-uban kaniya sa presinto. Didto dili lang ang mga sister kondili ang tanang Saksi iyang gipasanginlan nga mituyo sa pagpahuot sa trapiko aron makapangawat sa mga tawo. Agig sanong, gipangutana sa polis ang mga sister, “Kinsa man mo?”

Ilang gitudlo ang ilang lapel card ug mitubag, “Kami mga Saksi ni Jehova nga nagbiyahe paingon sa among kombensiyon.”

Dayon giatubang sa polis ang nangakusar ug miingon: “Ang mga Saksi ni Jehova dili mangawat. Kinahanglang mangayo kag pasaylo nila kay imo silang giinsulto.” Dayon gisultihan sa polis ang mga sister, “Pangadto na mo sa inyong kombensiyon.” “Apan ikaw,” iyang giingnan ang tawo, “pabilin dinhi. Wala pa ako mahuman sa pagpakig-estorya kanimo.”

Ang kinatas-ang ihap sa tumatambong sa kombensiyon nga gihimo sa estadyum miabot ug 21,291, ug 497 ang gibawtismohan. Sa sign-language nga kombensiyon, nga gihimo sa Kingdom Hall, ang tumatambong mikabat ug 929, ug 19 ang gibawtismohan!

Pagsagubang sa mga Pagsulay sa Haiti

Sulod sa 2004, ang isla nga nasod sa Haiti naapektohan sa kagubot sa politika, kapintasan, kanihit sa kinahanglanong mga butang, ug nagkamahal nga palitonon. Gawas pa niini nga mga kalisdanan, ang malaglagong baha sa Mayo mipatay ug kapin sa 1,500 ka tawo ug libolibo ang nawad-ag mga balay. Walay Saksing namatay, apan ubay-ubay ang nawad-an sa tanan nilang kabtangan, apil na sa ilang mga balay.

Bisan pa niana, ang mga igsoon napalig-on sa klarong pamatuod sa tabang ug pagtultol ni Jehova ug sa mahigugmaong kabalaka nga gipakita sa Nagamandong Lawas ug sa internasyonal nga panagsoonay. Kana nga gugma gipahayag sa praktikal nga paagi pinaagi sa paghatag ug materyal nga hinabang sa mga biktima sa katalagman. Siyempre, ang lokal nga mga igsoon nagtinabangay usab aron makabaton ug pagkaon ug ubang mga kinahanglanon.

Ang sanga sa Haiti nagbantay pag-ayo sa mga panghitabo aron makagiya sa mga kongregasyon. Pananglitan, samtang nagkagrabe ang kapintasan diha sa kaulohan, sa Port-au-Prince, gitambagan sa Komite sa Sanga ang mga ansiyano nga iatras ug usa ka adlaw ang mga tigom nga kasagarang himoon sa Dominggo, Pebrero 29. Ang maong sugyot napamatud-ang maalamon, tungod kay nianang Dominggoha, ang gihasi nga presidente sa Haiti miluwat ug mikalagiw sa nasod. “Madungog ang pinusilay diha sa nagkaguliyang nga kaulohan,” matod sa balita. Ang sanga misulat: “Wala gayoy nagdahom nga mahitabo kini. Wala gayod untay makatambong sa tigom niana nga Dominggo. Nagpasalamat kami kang Jehova tungod kay wala maunsa ang atong mga igsoon.”

Nianang peligroso nga panahon, ang kapolisan ug ang rebeldeng mga sundalo maingon man ang mga tulisan nag-iyahayg butang ug mga checkpoint sa dalan, ug ang gobyerno nagpahamtang ug tibuok-gabiing curfew. Apan bisan sa panahong wala pa sugdi ang curfew, giusab na sa mga kongregasyon ang oras sa ilang mga tigom aron ang tanan makapauli nga luwas sa dili pa mongitngit. Daghang kongregasyon mitaho ug pag-uswag sa gidaghanon sa mga tumatambong sa tigom!

Ang mga igsoon usab nagmapuliki sa ministeryo sa kanataran, nga nakapadayeg sa mga silingan. “Makapahupay nga makita kamong mga Saksi nga nagsangyaw gihapon sama sa naandan,” miingon ang uban. Siyempre, ang mga magmamantala maampingon kaayo ug nagpahibalo gayod sa usag usa kon asang mga dapita ang dili delikadong sangyawan.

Ang Atong Pagpaila nga Kristohanon—Usa ka Panalipod

Ang sanga sa Haiti misulat: “Ang pagkailado sa mga igsoon diha sa kasilinganan ug ang reputasyon nila sa pagkaneyutral sa politika nakapanalipod kanila nga makulata ug matulisan.” Pananglitan, gipahunong sa grupo sa armadong mga tulisan ang usa ka magtiayong misyonaryo diha sa tulo ka checkpoint. Duha ka butang ang gihimo sa magtiayon: Ilang gipailaila ang ilang kaugalingon nga mga Saksi ni Jehova, ug miampo sila​—sa hilom ug sa kusog nga paagi. Sa tanang tulo ka checkpoint, duna gayoy tawo nga midepensa kanila, nga nag-ingong ang mga Saksi ni Jehova maayong mga tawo nga dili mag-apil-apil sa politika. Ang magtiayon nakapauli nga luwas.

Gipahunong usab sa armadong mga grupo ang mga membro sa pamilyang Bethel. Sama sa mga misyonaryo, ang mga igsoon nagpailaila nga mga Saksi, ug sila miampo, ug mao gihapon ang resulta. Sa usa ka higayon dihay tulisan nga miingon: “Pag-ayoayo mo, ug iapil kami sa pag-ampo!” Laing membro sa pamilyang Bethel ang gipahunong sa checkpoint sa mga polis, diin gusto nilang rekisahon ang iyang kotse kon kini ba may mga hinagiban. “Ang hinagiban lang nako mao ang Bibliya ug mga magasing Bantayanang Torre ug Pagmata!,” matod sa brader. Ang polis mipahiyom ug misenyas kaniya sa paglarga. Human niadto, mailhan na nila ang iyang kotse bisag layo pa ug paagion siya nga dili na sukitsukiton.

Ang sanga mitaho nga mas malinawon na ang kahimtang sa misunod nga mga bulan. Apan anaa gihapoy mga problema, ug nagpabilin ang tensiyon. Busa, nagpadayon sa pag-amping ang mga igsoon.

Imprentahan sa Tinipong Bansa Gipauswag

Sa 2002, sa pagtultol sa Nagamandong Lawas, ang pag-imprenta giorganisar pag-usab ngadto sa lima ka dagkong rehiyon sa kalibotan​—Amerika del Norte, Amerika del Sur, Aprika, Asia, ug Uropa. Kini nga kahikayan miresulta sa mas episyente nga paggamit sa mga pasilidad sa sanga, lakip na nianang sa Tinipong Bansa, diin namenosan na karon ang trabaho.

Tanang trabaho sa imprentahan, bindery, ug shipping nga ginahimo sa Tinipong Bansa giusa na didto sa Wallkill, New York, sa 2004. Ang katibuk-ang plano ug katuyoan gipresentar ngadto sa hunta sa tigplano sa lungsod niadtong Agosto 6, 2002. Dihay publikong sesyon nga gihimo sa Septiyembre 3, ug ang plano giaprobahan human niana. Sa tinuig nga miting sa Watch Tower Bible and Tract Society of Pennsylvania sa Oktubre 5, 2002, gipahibalo sa Nagamandong Lawas nga giaprobahan ang pag-usa sa trabaho didto sa Wallkill. Duha ka bag-ong makina sa pag-imprenta nga MAN Roland Lithoman ang giorder, ug ang gidugang nga bilding nga butangan niini gieskedyul nga humanon sa Pebrero 2004.

Sa unsang paagi kining dako kaayong proyekto taposon sulod lang sa 14 ka bulan? Ang mga igsoon nagsalig kang Jehova sa paggiya sa trabaho ug sa pagpalihok sa mga indibiduwal sa pagtanyag sa ilang kaugalingon nga kinabubut-on. Kini nga pagsalig gigantihan. Ang trabaho diha sa lokasyon gisugdan sa Pebrero 2003, ug ang gidugang nga bilding sa imprentahan andam na pagka-Septiyembre. Ang una sa tulo ka daang makina sa Wallkill gibungkag ug gibalhin ngadto sa bag-ong bilding sa Disyembre. Ang duha ka bag-ong makina miabot sa Abril ug Mayo 2004 ug nagsugod sa pag-imprenta sa Hunyo ug Hulyo. Ang tanang lima ka makina nagdagan na sa bug-os pagka-Septiyembre.

Kaniadto, ang bindery nag-okupar ug 11 ka andana diha sa tulo ka bilding sa Adams Street sa Brooklyn. Karon, ang tibuok bindery nahimutang sa usa lang ka andana sa Wallkill ug naibanan ug 58 porsiyento ang luna nga nahimutangan niini. Ang paghimog humok nga hapin sa mga libro nagsugod sa Hulyo 2004. Sa ulahing bahin nianang bulana, ang unang gahig-hapin nga mga libro gigama diha sa bag-ong linya sa bindery nga kapin sa 400 metros ang gitas-on ug may 33 ka makina nga konektado sa 70 ka kombeyor. Kas-a lang ipaagi sa makina ang mga parte sa libro, sa sinugdanan sa linya sa bindery. Ang linya nga motagkos ug gahig-hapin nga mga libro makakompleto ug 120 ka libro kada minuto ug nagkinahanglan lang ug 25 ka operitor​—66 porsiyento nga pagmenos sa mga trabahante. Ang tibuok bindery nagdagan na sa bug-os sa Oktubre 2004.

Sa Nobyembre 2004, ang bag-ong Shipping Department sa Wallkill nagproseso sa mga pedido nga literatura sa mga kongregasyon pinaagig bag-ong de-kompiyuter nga sistema nga nag-okupar ug luna nga menos ug 45 porsiyento kon itandi sa luna niini kaniadto sa Brooklyn. Ang kompiyuter mokalkulo sa gidak-on sa pedido ug mopili sa eksaktong karton. Ihatod sa usa ka 800-metros nga kombeyor ang matag pedido ngadto sa usa ka linaing lugar diin ang mga karton andamon aron ipadala. Adunay hapitanan sa mga sakyanan alang sa lokal nga mga kongregasyon diin sayon ra nilang makuha ang ilang mga pedido.

Kinasingkasing nga gipasalamatan ang daghang igsoong lalaki ug babaye nga mitabang niining proyektoha. Apil niini ang mga membro sa pamilyang Bethel ug ang temporaryong mga boluntaryo, mga grupo sa mga igsoong membro sa mga Regional Building Committee gikan sa lima ka estado, ug ang mga igsoong nanghatag ug daghang himan ug materyales gikan sa ilang kaugalingong mga negosyo. Siyempre, salamat usab sa daghang ‘malipayong mga maghahatag’ nga mitabang sa pinansiyal nga paagi.​—2 Cor. 9:​7, 11.

Mga Kausaban sa Brooklyn

Ang pagbalhin sa imprentahan, bindery, ug shipping ngadto sa Wallkill nakapausab sa dagway sa Brooklyn Bethel. Makasaysayanhon ug makapatandog ang nahitabo sa Abril 29, 2004. Nianang gabhiona, taliwala sa mga pag-abiba ug mga luha, si Max Larson, ang magtatan-aw sa imprentahan sa kapin nag 60 ka tuig, mipalong sa kataposang makina sa pag-imprenta sa Brooklyn, nga nagtapos sa 84 ka tuig nga pag-imprenta didto. Ang trabaho sa bindery mihunong pipila ka semana sa ulahi.

Kay nasayod nga daghan kaayong luna sa Brooklyn ang dili na gamiton tungod niining mga kausaban, gianunsiyo sa Nagamandong Lawas sa Hunyo 2003 nga posibleng ibaligya ang bilding sa 360 Furman Street. Ang kontrata gipirmahan sa Biyernes, Hunyo 18, 2004. Ang labhanan, mga opisina, ug mga trabahoan diha sa 93,000-metro-kuwadrado nga bilding gibalhin ngadto sa nabakanteng mga bilding sa 117 Adams Street.

Ginaayo usab karon ang bilding sa 107 Columbia Heights. Ang mga puy-anan gieskedyul nga matapos sa ulahing bahin sa 2005, ug ang tibuok proyekto, sa Septiyembre 2006. Ang ginaayo nga bilding mapuy-an ug kapin sa 300 ka membro sa pamilyang Bethel ug dunay commissary, Kingdom Hall, librarya, lawak-hulatanan, mga opisina, personal nga labhanan, ug bag-ong nataran nga hardin.

Nasangkapan Alang sa Tibuok-Kalibotang Pag-uswag

Ang Brazil, Britanya, Habagatang Aprika, Japan, ug Mexico nakadawat usab ug bag-ong MAN Roland Lithoman nga mga makina sa pag-imprenta. Ang Britanya mao ang unang sanga nga gitaoran ug bag-ong makina, nga miabot sa Hulyo 2003 ug nagsugod pag-imprenta sa Oktubre. Makaimprenta kini ug 750,000 ka magasin sa usa ka adlaw​—1.5 milyones sa duha ka relibo​—halos tulo ka pilo kay sa maimprenta sa makina nga gigamit kaniadto.

Ang bag-ong mga makina makaimprenta usab ug mga panid sa Bibliya ug ubang mga publikasyon. Pananglitan, ang sanga sa Habagatang Aprika nakaimprenta na ug mga panid sa Bag-ong Kalibotang Hubad sa Sesotho nga pinulongan sa Habagatang Aprika. Ang sanga sa Japan mitaho nga kaniadto moabot ug usa ka adlaw ang pagbalhin gikan sa paggamag gagmayng mga libro ngadto sa dagkong mga libro. Karon moabot na lang kinig usa ka oras. Ug kon napulo ka adlaw ang gugolon niini kaniadto sa paggamag usa ka milyong tract, karon mokabat na lang kini ug lima ka oras. Sa unang tulo ka bulan niini, ang makina sa Japan nakagamag 12 ka milyong tract; 12 ka milyong magasin ug brosyur; 240,000 ka libro; ug 48,000 ka Bibliya.

Ang ubang bag-o, awtomatikong mga makina moputol, moihap, mokamada, mobutang ug ngalan, ug moputos ug literatura. Ang mga palid sa pag-imprenta gigama nga mas episyente ug tukma pinaagig teknik nga gitawag ug kompiyuter-ngadto-sa palid nga metodo. Wala na kinahanglana ang photographic film niini nga proseso, sa ingon namenosan kinig usa ka hugna sa proseso sa pag-imprenta. Ang sanga sa Britanya mitaho nga kining tanang pag-uswag dili lang nakapadaghan sa produksiyon kondili nakamenos usab sa gidaghanon sa mga trabahanteng gikinahanglan.

Miadto sa Alemanya Aron Mabansay

Ang mga grupo gikan sa unom ka sanga nangadto sa kompaniya sa MAN Roland sa Alemanya aron bansayon sa pagpadagan sa makina sa pag-imprenta. Tungod sa ilang kasinatian sa pagbansay sa dili-Saksing mga tig-imprenta, ang mga instruktor nagdahom nga isipon sa mga igsoon ang ilang panahon didto ingong bakasyon. Busa ang mga instruktor nakurat ug nakadayeg sa pagkadedikado sa mga igsoon. Gani, ang mga Saksi mihangyo nga sayo magsugod ug gabii nang mohunong aron makakat-on ug daghan gikan sa pagbansay.

Problema ang pinulongan alang sa pipila nga gibansay sanglit Iningles ang gigamit sa pagtudlo ug ang mga reperensiya sa paggamit sa makina. Agig abanteng pagpangandam, ang grupo gikan sa Japan naningkamot pag-ayo sa pagpauswag sa ilang Iningles una pa mipaingon sa Alemanya. Daghan ang temporaryong mibalhin pa gani sa mga kongregasyon nga Iningles ang sinultihan.

Mga Membro sa Pamilyang Bethel Nakahatag ug Maayong Pamatuod

Sa ulahi, sa dihang ang mga makina nangabot sa mga sanga, giasembol kini sa mga inhenyero sa MAN nga sa samang higayon ang mga trabahante sa Bethel mitabang. Sa tanang unom ka sanga, ang malipayon, maayong palibot sa Bethel may maayong epekto sa dili-Saksing mga trabahante. Usa ka lalaki nga nag-instalar sa makina sa London miingon sa mga igsoon: “Mipauli ko gabii ug nakita nako ang akong silingan diha sa iyang hardin. Wala gyod ko makaangay niya, pero kagabii nakig-estorya ko niya sa 20 minutos ug akong nakita nga maayo man diay siya nga tawo.” Kini nga teknisyan midugang nga ang iyang asawa nakamatikod nga nausab ang iyang tinamdan ug batasan. “Ikaw mahigalaon, mapahiyomon, ug motimbaya sa mga tawo,” matod pa sa iyang asawa.

“Unom ka semana na ako nga nagtrabaho uban sa mga Saksi,” siya mitubag. “Ug niining ulahing duha ka semana, wala na ko mamalikas bisag kausa. Gani, dili na gyod ko gustong mamalikas pa.”

Sa natapos na ang pag-instalar sa sanga sa London, usa ka ehekutibo sa MAN mitelepono sa sanga aron pasalamatan ang mga igsoon sa ilang maayong pag-atiman sa mga trabahante sa kompaniya. Siya miingon nga hapsay kaayo ang pag-instalar.

Ang ubang mga sanga nagbutang ug kan-anan para sa mga trabahante diha mismo sa giasembolan sa bag-ong makina. Daghan ang nabag-ohan, ilabina ang mga dili-Saksi, nga silbihan ug paniudto sa desenteg-pamiste nga mga silbidor. Usa ka teknisyan sa Japan wala makakita sukad ug hinlo, organisado kaayong imprentahan sama nianang sa sanga. “Mao ni ang kinamaayohang dapit sa kalibotan nga pagatrabahoan,” matod pa niya. Nakadayeg usab siya sa pagkamatinud-anon sa mga igsoon. Kini lang ang dapit diin puwede niyang biyaan ang iyang mga himan, nga makasalig nga dili kini kawaton. Kay gustong makahibalo ug dugang bahin sa mga Saksi ni Jehova, midawat siya ug ubay-ubayng publikasyon ug gilibot ang sangang buhatan.

Gidapit sa mga igsoon sa Mexico ang mga teknisyan sa MAN sa pagtambong sa Memoryal. Upat ang midawat sa imbitasyon. Ugaling lang, wala silay haom nga besti. Kay gusto man nilang mopalit ug amerkana, gikuyogan sila sa usa ka membro sa pamilyang Bethel. Gihatagan sila sa mga igsoon ug mga Bibliya ug panahon sa diskurso sa Memoryal gitabangan sila sa pagpangita sa mga teksto. Human sa tigom, ang mga teknisyan nanguhag mga hulagway ug nagsigeg pahiyom nga abi sa kadaghanan sa kongregasyon mga membro sila sa pamilyang Bethel sa Alemanya.

Sa tanang sanga, ang lokal nga mga kontratista ug mga tigsuplay nahatagan usab ug maayong pamatuod. Usa ka kontratista sa Tinipong Bansa misulat: “Nakadayeg gayod ako sa kalidad sa inyong organisasyon ug ilabina sa inyong mga membro. Sa tanan namong proyekto sa pagpanukod, mao lang kini ang nakapaikag gayod kanako. Ang inyong organisasyon nakahatag kanakog paglaom alang sa umaabot sa katawhan. Kon ang kadasig ug kahingawa puwede pang isulod sa botelya ug ibaligya, ang inyong grupo mao ra gayoy nakapanag-iyag produkto nga gustong paliton sa tanang tawo.”

Usa ka tawo nga nagsuplay ug mga tubo-tubo sa bag-ong makina sa Mexico nahingangha sa malinawong atmospera sa sanga. Daghan siyag pangutana, ug karon siya ug ang iyang pamilya nagtuon sa Bibliya ug miuswag pag-ayo. Ang kapatas sa lokal nga grupo sa mga kontratista may talagsaong hangyo. “Kasagaran,” matod pa niya, “ang mga tawo mohatag namog tip nga kuwarta agig pagpasalamat sa among trabaho. Puwede kahang hatagan na lang mi ninyog tagsa ka Bibliya? Sa akong nakita dinhi, nagtuo ko nga ang kahibalo sa Bibliya mas bililhon kay sa salapi.”

Dedikasyon sa Sanga sa India

“Sa kataposan, miabot ang dugay nang gipaabot nga okasyon sa Disyembre 7, 2003,” misulat ang sanga sa India. “Kini ang adlaw sa dedikasyon sa among bag-ong gitukod nga sanga sa Bangalore, sa habagatan-sentro sa India.”

Ang 30,000-metro-kuwadradong mga bilding, nga nahimutang sa 17-ektaryang yuta, nahisamag gamayng lungsod. Mao kini ang unang dako nga sanga sa kalibotan nga gitukod sa usa ka komersiyal nga kompaniya. Kini dunay planta nga tigdalisay sa tubig nga ilimnon, planta nga tigdalisay ug tigresiklo sa inawas nga tubig, ug kaugalingong planta sa koryente. Ang mga bilding dunay 122 ka opisina, apil ang 80 alang sa mga tighubad; nindot nga Kingdom Hall; ug dakong imprentahan. Dunay tulo ka bilding nga puy-anan nga may komportableng mga lawak, labhanan, komedor, ug kosina nga kompletog kasangkapan. Ang tibuok proyekto, nga daghag gigamit nga lokal nga materyales, natapos sa duha ka tuig.

Ang buluhaton sa Gingharian nagsugod sa India niadtong 1905. Karon ang paghubad ug pag-imprenta ginahimo diha sa 26 ka pinulongan sa India. Sa dedikasyon, ang mga misyonaryo nga nakaalagad sa India sa daghang tuig miasoy ug makapadasig nga mga kasinatian, ug si Stephen Lett nga membro sa Nagamandong Lawas mihatag sa pakigpulong sa dedikasyon. Apil sa 2,933 nga nanambong mao ang 150 ka bisita gikan sa 25 ka nasod.

Dedikasyon sa Sanga sa Pilipinas

“Gusto namo nga ang among tukoron sama usab ka pulido sa Watch Tower!” Mao kanay giingon sa pipila ka dili-Saksi nga mga magtutukod sa Manila sa dihang nakita nila ang pagkatukod sa sanga sa Pilipinas. Gani, sa dihang ang mga tawong naghimog dokumentaryo sa telebisyon bahin sa mga reglamento sa pagpanukod miduaw sa inhenyero sa siyudad, iyang giingnan sila: “Kon gusto mong makakita ug tinukod nga detalyadong nagsunod sa reglamento sa pagpanukod, pangadto mo sa Watch Tower.”

Ang mga igsoon nagtukod ug bag-ong napulo-ka-andana nga puy-anan ug dugang pang mga bilding ug giayo ang daang napulo-ka-andanang puy-anan nga gitukod sa 1991. Nganong nagkinahanglan man ug dugang pang mga bilding? Sukad 1991 hangtod 2003, ang magmamantala nadugangan ug 34,000, nga miresulta sa bag-ong kinatas-ang ihap nga kapig 144,000 ka magmamantala sa Gingharian!

Ang dedikasyon gihimo sa Nobyembre 1, 2003. Ang nanambong nianang mainit nga buntag sa Sabado mao ang pamilyang Bethel, mga misyonaryo kanhi ug ubang mga bisita gikan sa 13 ka nasod, ug kapin sa 2,000 ka igsoon sa Pilipinas, nga mikabat tanan sa 2,540. Gihisgotan ni Stephen Lett ang tema nga “Pagpabili sa mga Balay sa Pagsimba ni Jehova Kaniadto ug Karon.” Pagkasunod adlaw, usa ka dakong panon sa lokal nga mga payunir maingon man sa mga ansiyano ug ilang mga asawa, nga may total nga 8,151, naminaw sa usa ka linaing programa sa Metro Manila Assembly Hall.

Sa tibuok kalibotan, 20,092 ka ordinadong mga ministro ang nag-alagad diha sa mga pasilidad sa sanga. Ang tanan maoy mga membro sa Tibuok Kalibotan nga Orden sa Espesyal Bug-os-Panahong mga Alagad sa mga Saksi ni Jehova.

[Kahon sa panid 21, 22]

Gikidnap sa Adlawng Dako

Biyernes sa udtong-tutok, Marso 19, 2004, si Carl, nga usa ka 20-anyos nga Saksi, naglakaw diha sa puliki nga dalan sa Pétionville, Haiti. Kalit lang, dihay armadong mga lalaki nga nagbestig itom nga mipugos pagpasakay kaniya sa pik-ap, gisakloban ang iyang ulo, ug kusog kaayong mipabulhot sa sakyanan. Si Carl miasoy:

Pagkanaog namo sa pik-ap, gidala ako sa usa ka lawak diin dihay ubang mga biktima, nga lagmit mga estudyante sa unibersidad nga giakusar nga nakigbahin sa politikanhong mga demonstrasyon. Sa kalagot, nangrakrak ang nangidnap namo nga nakapatay sa usa sa mga gikidnap. Ang ulo niya nahisandig sa akong tiil. Dayon ila akong gisukitsukit ug gihulga. Kay naglagot, ila akong gikulata ug gituklod ngadto sa patayng tawo.

“Tubaga ang among mga pangutana!” namugos ang ilang lider.

“Apan ignorante gayod ako bahin sa politika,” ako mitubag.

“Nan patyon ti ka karon dayon!” misinggit siya.

“Sa dili pa ko nimo patyon,” ako mihangyo, “palihog paampoa una ko sa akong Diyos nga si Jehova aron hangyoon siya sa pagtabang sa akong mga ginikanan ug mga igsoon, kay dili na ko nila makita pag-usab.”

“Dalia kay nagdali ko!” siya misinghag.

Samtang nag-ampo akog kusog, migawas sa lawak ang lalaki. Pagbalik niya, akong giingnan ang akong kaugalingon, ‘Mao na ni ang imong kataposan, Carl. Mamatay ka na.’ Apan nakurat gayod ako.

“Ikaw ba si Carl Tampulano?” nangutana ang tawo.

“Oo,” ako mitubag, nga natingala kon giunsa niya pagkahibalo sa akong ngalan.

Siya miingon nga makadaghan nako siya pasakya sa akong kotse, ug dili siya makaako sa pagbuhat ug daotan kanako karong nailhan na niya kon kinsa ako. Dayag nga nailhan niya ako tungod sa akong gisulti samtang nag-ampo, bisan pag may saklob ang akong ulo. Migawas na usab siya ug naglalis sila pag-ayo sa iyang mga kauban. Sa ulahi, gipasakay ako sa pik-ap, mibiyahe kami, ug unya gihulog ako sa dalan. Makalilisang kadto nga kasinatian nga nakapalig-on gayod sa akong pagtuo kang Jehova ug sa gahom sa pag-ampo.

[Chart/Mga hulagway sa panid 12, 13]

PIPILA KA PANGHITABO SA 2004 NGA TUIG SA PAG-ALAGAD

Septiyembre 1, 2003

Septiyembre: Sa 2004 nga tuig sa pag-alagad, ang Tunghaan Alang sa Nagapanawng mga Magtatan-aw gipahigayon diha sa 88 ka sanga.

Oktubre: Ang sanga sa Britanya nagsugod sa pag-imprenta diha sa MAN Roland Lithoman nga makina.

Oktubre 28: Ang korte sa Romania nagbaod nga iapil ang mga Saksi ni Jehova diha sa listahan sa legal nga mga relihiyon sa regulasyon sa buhis.

Nobyembre 1: Dedikasyon sa sanga sa Pilipinas.

Nobyembre 28: Girehistro sa Ministri sa Hustisya sa Georgia ang lokal nga sangang buhatan sa mga Saksi ni Jehova.

Disyembre 7: Dedikasyon sa sanga sa India.

Enero 1, 2004

Marso 26: Korte sa Golvinsky midesisyon sa pagdili sa mga Saksi ni Jehova sa Moscow. Ang kaso giapelar.

Abril: Ang Rusya dunay kinatas-ang ihap nga 15,489 ka regular payunir.

Abril 29: Ang 84 ka tuig nga pag-imprenta sa Brooklyn gihunong. Ang bag-ong imprentahan gibutang sa Wallkill.

Mayo 1, 2004

Mayo: Ang politikanhong kagubot sa Haiti giduyogan ug grabeng mga baha. Walay igsoon nga namatay.

Hunyo 16: Gituboy sa Korte sa Moscow City ang Marso 26 nga desisyon. Ang pagdili sa buluhaton ug pagsira sa korporasyon gihimong legal. Ang kaso giapelar sa ECHR.

Agosto 31, 2004

[Hulagway sa panid 11]

Ang “Bag-ong Kalibotan nga Hubad sa Kristohanon Gregong Kasulatan” giluwatan sa Georgiano nga pinulongan

[Mga hulagway sa panid 27]

Ang mga igsoon nagpadagan sa usa sa duha ka bag-ong MAN nga mga makina sa pag-imprenta sa Wallkill, New York, T.B.A.

[Hulagway sa panid 29]

Bag-ong gipahinungod nga sanga sa Bangalore, India

[Hulagway sa panid 30]

Gipadako nga sanga sa Pilipinas