Usa ka Gatos ka Tuig Kanhi—1913

GIPAHAYAG sa magasing The Watch Tower sa Enero 1, 1913 ang opinyon sa kadaghanan dihang mikutlo kini sa Amerikanong magsusulat nga si Herbert Kaufman: “Karaan na karon ang pulong ‘imposible’ . . . Halos tanang gidamgo kaniadto natuman na karon.” Sayo sa tuig 1913, ang katawhan malaomon bahin sa umaabot.

Usa ka hinungdan sa maong pagkamalaomon mao ang pag-uswag sa teknolohiya. Pananglitan, sa United States, ang Ford Motor Company nagbukas ug bag-ong pabrika sa Highlands Park, Michigan. Kalit lang nga nabarato ang kotse mao nga milyonmilyon na ang makapalit niini. Nganong mikubos man ang prisyo? May assembly line na ang pabrika diin ginahimo ang matag parte sa kotse. Tungod sa maong metodo, dali nang maasembol sa Ford Motor Company ang popular nga kotseng Model T mao nga mikubos ang gasto sa paggama niini.

May ubang hinungdan nga ang katawhan ni Jehova nagmalaomon sab. Dugay nang nagmantala ang mga Estudyante sa Bibliya nga ang 1914 maoy linaing tuig sa kasaysayan, ug nagdahom silag dagkong panghitabo. Padayon silang nagmasiboton sa pag-alagad samtang nagsingabot ang maong tuig.

Sa Hunyo 1913, gipahigayon ang usa ka adlaw nga kombensiyon sa Kansas City, Missouri, U.S.A. nga maoy sinugdanan sa serye sa mga kombensiyon. Sa misunod nga upat ka semana, ang kapig 200 ka igsoon bibong nagbiyahe sakay sa gipakyawng tren paingon sa kasadpang United States ug Canada. Sa matag kombensiyon, ang bag-ong nanambong giawhag sa pagpangayog dugang impormasyon. Libolibo ang misanong ug ang mga interesado gikontak sa ulahi sa mga Estudyante sa Bibliya.

Sa tuig 1913 ang mga trabahante sa hedkuwarter sa Brooklyn puliki sa paggama sa “Photo-Drama of Creation.” Walo ka oras kini nga presentasyon sa narekord nga mga pakigpulong sa Bibliya ug may dekolor nga mga slide ug pelikula nga dinuyogan sa musika. Naglaom ang mga Estudyante sa Bibliya nga pinaagi sa “Photo-Drama” maabot ang milyonmilyong interesado. Bisag mga 5,100 lang niadto ang aktibong magmamantala sa maayong balita, ang ilang katuyoan mao nga ang presentasyon “kaylap nga ikamantala sa tibuok kalibotan.”

Unsay mahitabo sa 1914? Magustohan kaha sa mga tawo ang “Photo-Drama”? Unsay mahitabo sa tinghunlak, sa kataposan sa Panahon sa mga Hentil? Kay masaligon sa pagpaluyo ni Jehova, ang mga Estudyante sa Bibliya mahinamong nagpaabot sa mga tubag niini.

Ang nagsingabot nga Dakong Gubat nga sa ulahi gitawag Gubat sa Kalibotan I migun-ob sa paglaom sa katawhan. Ang pag-uswag sa teknolohiya dili kasulbaran sa mga problema sa mga tawo. Pagkasunod tuig, may dakong kausaban nga nahitabo sa mga Estudyante sa Bibliya—ug sa tibuok kalibotan.