Makaiikag nga Report sa Miaging Tuig

Bag-ong Puwesto sa Tibuok-Kalibotang Hedkuwarter

Sa Hulyo 2009, mipalit ang mga Saksi ni Jehova ug 102-ektaryang luna sa yuta sa estado sa New York, U.S.A., aron ibalhin didto ang ilang tibuok-kalibotang hedkuwarter. Kini mga 80 kilometros amihanan-kasadpan sa Brooklyn, New York, diin nahimutang ang hedkuwarter sukad pa sa 1909.

Mga 800 ka Bethelite ang magpuyo ug magtrabaho sa bag-ong pasilidad, nga naglakip sa mga opisina, bilding para sa mga serbisyong gikinahanglan sa pamilyang Bethel, bilding para sa pagmentinar, ug upat ka bilding nga puy-anan. Giplano sab nga magtukod didto ug gamayng museyo nga magpakita sa modernong kasaysayan sa mga Saksi ni Jehova.

Desiotso ka ektarya lang sa yuta ang tukorag mga bilding ug dili tandogon ang nahibiling luna sa kakahoyan ug kalamakan. Sa pagpatahom sa palibot, walay himoong lagpad nga nataran apan ang mga bilding ipahiangay lang sa punog-kakahoyan nga luna. Ang mga arkitekto nagdisenyog mga bilding nga dili kalas ug koryente, dili makadaot sa kalikopan, ug dili gastoso ang pagmentinar. Pananglitan, ang atop sa mga bilding tamnag daling mabuhi ug dili atimanonong mga tanom aron makontrolar ang agos sa ulan ug temperatura sa bilding. Gidisenyo ang opisina sa paagi nga mapahimuslan ang kahayag sa adlaw. Prayoridad sab ang pagdaginot ug tubig.

Nganong ibalhin ang hedkuwarter? Ang pag-imprentag Bibliya ug binase-sa-Bibliya nga literatura gihimo lang kaniadto sa Brooklyn apan karon may ubang sangang buhatan nga naghimo sab niana. Sa 2004, ang imprentahan ug shipping gibalhin sa Wallkill, New York, mga 145 kilometros amihanan-kasadpan sa Brooklyn. Gastoso usab ang pagmentinar sa nagkadaan ug nakatag nga mga pasilidad sa Brooklyn. Kon magdug-ol ang mga pasilidad, ang mga donasyon magamit sa mas maayong paagi.

Mga Sangang Buhatan Giusa

Sa Septiyembre 2012, ang pagdumala sa kapig 20 ka sangang buhatan sa mga Saksi ni Jehova gibalhin ngadto sa mas dagkong sangang buhatan. Adunay duha ka rason sa maong kausaban:

1. Gipasimple sa teknolohiya ang buluhaton. Di pa dugay, tungod sa pag-uswag sa komunikasyon ug teknolohiya sa pag-imprenta, nakunhoran ang gikinahanglang trabahante sa dagkong sangang buhatan. Busa, may bakante nang mga kuwarto alang sa pipila ka Bethelite gikan sa mas gagmayng sangang buhatan sa ubang nasod.

Pagkakaron, diha sa dagkong sangang buhatan adunay grupo sa eksperyensiyadong mga Saksi nga nagdumala sa buluhaton. Pananglitan, ang buluhatong pagsangyaw sa Costa Rica, El Salvador, Guatemala, Honduras, Nicaragua, ug Panama gidumala sa sangang buhatan sa Mexico. Busa, sirado na ang mga sangang buhatan nianang unom ka nasod. Ang 40 ka membro sa pamilya sa maong mga sanga gibalhin ngadto sa Mexico. Mga 95 nagpabilin sa ilang nasod ingong bug-os panahong payunir.

Ang uban pa sa maong mga sangang buhatan sa Central America padayong nagtrabaho diha sa mga opisina sa paghubad ubos sa pagdumala sa sangang buhatan sa Mexico. Pananglitan, mga 20 ka maghuhubad sa Panama naghubad sa publikasyon sa Bibliya ngadto sa nitibong mga pinulongan. Sa Guatemala, 16 ka Saksi ang naghubad sa publikasyon ngadto sa upat ka lokal nga pinulongan. Tungod sa maong kausaban, ang kaniadtong 300 ka Bethelite sa Central America nahimong mga 75 na lang karon.

2. Mas daghang bug-os panahong magsasangyaw. Tungod sa pag-usa sa mga sangang buhatan, ang mga igsoon nga kaniadto nag-alagad sa gagmayng sanga makapokus na karon sa pagsangyaw sa maayong balita. Usa ka brader sa Africa nga giasayn ingong payunir misulat: “Nalisdan ko sa pagpasibo sa akong bag-ong asaynment sa unang mga bulan. Apan ang pagsangyaw kada adlaw nakahatag nakog way-sukod nga kalipay ug panalangin. Karon, 20 ang akong Bible study, ug ang pipila tigtambongan na sa tigom.”

Usa ka Karaang Ilhanan sa Brooklyn

Sa kapig 40 ka tuig, adlaw ug gabii, sinati na ang taga-New York City sa 4.6 metros nga pulang mga letra diha sa ibabaw sa hedkuwarter sa mga Saksi ni Jehova. Daghan nila nagdepende sa gidispley niini nga oras ug temperatura.

Ang tag-iya kaniadto sa bilding nagtaod ug karatula kapig 70 ka tuig kanhi. Apan pagkapalit sa mga Saksi ni Jehova sa bilding niadtong 1969, giusab nila kini ingon sa makita karon.

Kadaghang gibag-o kini nga karatula aron mahimong mas episyente ug tukma. Sa mga 1985, gidugang ang Celsius nga temperatura sa magpulipuling displey sa oras ug Fahrenheit nga temperatura.

Si Eboni, nga makakita sa karatula gikan sa iyang apartment sa Brooklyn, miingon: “Matan-aw nako sa bentana ang oras ug temperatura sa di pa ko moadto sa trabaho. Busa di gyod ko maulahi sa trabaho ug makapili pa kog sinina nga haom sa kahimtang sa panahon.”

Magpabilin kaha ang karatula sa sunod nga 40 ka tuig? Tungod sa giplanong pagbalhin sa hedkuwarter sa mga Saksi ni Jehova, kana magdepende sa umaabot nga tag-iya sa bilding.

Pagpakaylap sa Pulong

May Bag-o sa Manhattan

Niadtong Nobyembre 2011, gisugdan sa usa ka grupo sa mga Saksi ni Jehova ang paggamit ug nindot nga mga displehanang lamesa ug kart sa pagpakaylap sa mensahe sa Bibliya ngadto sa katawhan sa Manhattan. Kini ginahimo sa habagatang bahin sa Manhattan, ang labing puliki ug karaang distrito sa New York City. Ang maong distrito gibahin sa upat ka seksiyon. Sa matag seksiyon, dunay pipila ka puwesto nga may displehanang lamesa o kart nga punog literatura sa Bibliya ug may payunir nga nagbantay. Ang kadaghanan niini anaa o duol sa mga terminal sa bus o tren diin libolibo ang mag-agian kada adlaw.

Niining mga puwestoha, masayran sa mga tawo ang tubag sa ilang mga pangutana bahin sa Bibliya. Ang mga tawong nagdali mahimong makakuhag publikasyon. Ang mga publikasyon mabatonan sa daghang pinulongan. Kon walay publikasyon sa gusto nilang pinulongan, maorder nila kini ug makuha paglabay sa pipila ka adlaw.

Nagustohan sa publiko ug sa awtoridad ang maong kampanya. Usa ka polis miingon: “Nganong karon pa ninyo ni gihimo? Naa ninyo ang gikinahanglan sa mga tawo.” Usa ka lalaki kalit nga mihunong pagkakita niya sa librong Unsay Tinuod nga Gitudlo sa Bibliya? Siya miingon nga nakita niya ang mga tawo sa subway nga nagbasa sa libro ug nahibulong kon diin nila kadto makuha. Karon nahibalo na siya.

Kada adlaw sulod sa unom ka semana, labyan lang sa usa ka batan-ong lalaki ang usa sa mga lamesa sa iyang pagpaingon sa trabaho. Sa kadugayan, mihapit ra gyod siya ug miingon, “Nagkinahanglan kog tabang.” Kadtong mga nagbantay sa lamesa nalipay sa pagtabang niya. Ilang gitagaan siyag Bibliya ug gipakita kon sa unsang paagi makatabang kini kaniya. May mga nanghapit nga gustong makighisgot sa Bibliya, ug sa walo ka bulan 1,748 ang gustong magpa-Bible study. Pagka-Hunyo 2012, may 27,934 ka magasin ug 61,019 ka libro nga napahimutang.

Atong mga Magasin—Mas Diyutayg Panid, Mas Daghag Pinulongan

Sugod sa Enero 2013 nga gula, ang Pagmata! ug ang publikong edisyon sa Ang Bantayanang Torre nga tag-32 ka panid himoong 16 ka panid na lang. Kay diyutay na lag artikulo, mahubad na kini sa mas daghang pinulongan. Pagkakaron, ang Pagmata! gihubad sa 98 ka pinulongan ug Ang Bantayanang Torre sa 204. Ang tun-anang edisyon sa Ang Bantayanang Torre magpadayon nga 32 ka panid.

Ang pipila ka artikulo nga sa nangagi gipatik sa mga magasin, karon mabasa na lang sa www.pr418.com nga Web site. Kini naglakip sa “Alang sa mga Batan-on,” “Akong Leksiyon sa Bibliya,” ug ang report sa graduwasyon sa Gilead gikan sa publikong edisyon sa Ang Bantayanang Torre ug “Repaso Alang sa Pamilya” ug “Mga Batan-on Nangutana” gikan sa Pagmata!

Dugang pa, mabasa sab sa Web site ang serye sa mga artikulong maghatag sa tin-aw ug mugbong tubag sa mga pangutana bahin sa Bibliya ug sa mga Saksi ni Jehova. Ma-download usab sa Web site ang inimprentang publikasyon. Sayon rang ma-access niadtong may computer, cell phone o tablet ang atong publikasyon sa www.pr418.com sa kapig 440 ka pinulongan.

Mas Gipanindot ang Atong Web Site

Sa milabayng mga bulan, usa ka grupo sa mga Saksi ni Jehova didto sa tibuok-kalibotang hedkuwarter sa New York ang nagtinabangay aron panindoton ang www.pr418.com ug himoong mas sayon ang pag-browse niini diha sa computer o cell phone. May duha ka tumong kon nganong gipanindot nila ang Web site:

1. Usahon ang atong mga Web site. Ang tulo ka Web site kaniadto sa mga Saksi ni Jehova giusa na lang karon—ang www.pr418.com. Wala na ang www.watchtower.org ug www.jw-media.org. Busa usa na lang ka Web site ang ma-access sa mga nangitag impormasyon bahin sa mga Saksi ni Jehova o sa ilang publikasyon. Pananglitan, makabasa, makapamati, o makaimprenta kag mga panid sa Bibliya ug mga publikasyon diha sa daghang pinulongan.

2. Pagdugang ug impormasyon. Ang gibag-ong Web site dunay tubag sa mga pangutana bahin sa Bibliya ug naghisgot bahin sa buluhatong pagsangyaw, sa mga sangang buhatan, Kingdom Hall, ug kombensiyon sa mga Saksi ni Jehova. Ang seksiyong “News” nagbalita sa mga panghitabo bahin sa atong mga igsoon sa tibuok kalibotan. May mga artikulo usab alang sa mga pamilya, tin-edyer, ug mga bata.

Sa usa ka adlaw, libolibo ang mobasa online sa atong mga publikasyon. Halos katunga sa milyong audio, EPUB, PDF, o sign-language video ang ilang i-download. Kada adlaw, usa ka gatos ka tawo ang mohangyog Bible study.

Tabang Alang sa Tanang Matang sa mga Tawo

Ang Dos Metros nga Bibliya

Ang kompletong New World Translation diha sa English, Spanish, ug Italian Braille dunay mga 20 ngadto 28 ka tomo ug mookupar kinig kapig dos metros nga espasyo sa estante! Ang ubang format sa Braille nagkinahanglag menos nga espasyo kay sa Bibliya nga gigamitag embossed nga papel. Pananglitan, gamit ang Braille notetaker ang buta makahimog nota ug maka-access sa electronic file pinaagig madaladalang himan nga dunay mga pin nga motaas-moubos aron magpatunghag Braille nga mga simbolo. Ang buta makapamati sab ug mga publikasyon sa tabang sa screen reader, usa ka computer program nga makabasag sinulat nga mga pulong.

Sa kapig 100 ka tuig, ang mga Saksi nakagamag binase-sa-Bibliya nga mga publikasyon alang sa mga buta, nga karon anaa na sa 19 ka pinulongan. Kining mga publikasyona mabatonan nga walay bayad sa interesadong mga buta, apan ang daghan mohatag ug donasyon.

Nakagama ang mga Saksi ug computer program nga makakopyag pinatik nga impormasyon ngadto sa Braille diha sa daghang pinulongan. Pagkahan-ay sa conversion table nga dunay pinatik nga impormasyon ug Braille nga mga karakter, ang program maka-convert na. Ma-format usab niini ang publikasyon sa paaging sayon nga basahon sa buta. Pinaagi niini nga proseso, magama ang Braille nga mga publikasyon, apil ang Braille Bible, diha sa bisan unsang pinulongang may Braille nga mga karakter, apil niadtong wala mogamit ug Romano nga alpabeto.

Kaniadto, kon may publikasyong luwatan sa kombensiyon, ianunsiyo nga ang publikasyon diha sa Braille maorder pa sa ulahi. Sa miaging tuig, ang sangang buhatan sa United States nagsurbi sa mga kongregasyon kon asang kombensiyon motambong ang mga buta ug unsang format (embossed nga papel, electronic notetaker, o electronic screen reader) ang gusto nila.

Ang mga kopya nga gamit ang embossed nga papel gipadala ngadto sa mga kombensiyong may mga buta nga nanambong, busa dungan nilang nadawat ang giluwatang mga publikasyon. Usa ka semana human sa kombensiyon, ang mga electronic format gi-email ngadto sa matag usa nga gusto niana.

Usa ka buta nga sister miingon: “Makalilipay nga dungan ming makadawat sa giluwatang publikasyon. Ang Salmo 37:4 nag-ingon nga ihatag ni Jehova ang mga hangyo sa atong kasingkasing. Iya kanang gihimo niini nga kombensiyon!” Ang laing buta nga Saksi mihilak ug miingon, “Salamat kang Jehova kay iya gyod ming giatiman!”

Libolibo Nakakat-on Pagbasa ug Pagsulat

Niadtong 2011, ang mga Saksi ni Jehova nakatabag kapin sa 5,700 nga makabasa ug makasulat. Tagda ang taho sa pipila ka nasod:

Ghana: Sa milabayng 25 ka tuig, kami nakatabang ug kapin sa 9,000 nga makabasa ug makasulat.

Mozambique: Kapig 19,000 ang nakakat-on sa pagbasa sa milabayng 15 ka tuig. Ang estudyanteng si Felizarda miingon: “Lipay na ko ron kay makabasa na kog mga teksto ngadto sa uban. Sa una, lisdan gyod ko ana.”

Solomon Islands: Ang sangang buhatan misulat: “Sa nangagi, wala makaeskuyla ang daghan nga nagpuyo sa hilit nga mga lugar. Gawas pa, pipila ra ka batang babaye ang nakaeskuyla. Busa, bisan ang hingkod nga mga babaye natabangan sa klase sa pagbasa ug pagsulat. Mas dako nag kompiyansa sa kaugalingon ang daghan pagkahuman sa klase.”

Zambia: Sukad sa 2002, duolag 12,000 ang maayo nang mobasa ug mosulat. Ang 82-anyos nga si Agnes, miingon: “Dihang gianunsiyo sa kongregasyon ang klase sa pagbasa ug pagsulat, nagpaenrol ko dayon. Sa una namong leksiyon, nakakat-on na kog sulat sa akong ngalan!”

Mga Awit sa Pagdayeg Diha sa Daghang Pinulongan

Ang mga Saksi ni Jehova naghubad nag binase-sa-Bibliya nga mga publikasyon ngadto sa mga 600 ka pinulongan. Dili sayon ang paghubad sa tibuok songbok nga may 135 ka awit. Apan, sulod lang sa tulo ka tuig, ang bag-ong songbok, Mag-awit Kang Jehova, gihubad sa 116 ka pinulongan. Ang ubang 55 ka pinulongan dunay 55-awit nga bersiyon sa songbok, ug ginahubad pa ang songbok sa ubang pinulongan.

Ang tumong sa mga maghuhubad sa mga awit mao ang pagpatunghag undanon, nindot, ug di-malimtang mga liriko. Dugang pa, kinahanglang simple ang mga pulong aron masabtan sa moawit ang unod ug katuyoan niini. Sa matag pinulongan, ang mga pulong ug musika kinahanglang magkabagay aron hanoy kanang kantahon nga samag kana maoy mga pulong mismo sa mag-aawit.

Sa unsang paagi makab-ot sa mga maghuhubad ang maong tumong? Inay hubaron nga literal ang Iningles nga mga liriko sa songbok, magkomposo silag bag-ong mga liriko nga magpasiugda sa diwa sa orihinal nga awit. Samtang maningkamot nga ipalutaw ang Kasulatanhong pagtulon-an nga gipasiugda sa matag awit, mogamit silag komon nga mga pulong nga daling masabtan ug mahinumdoman.

Una, hubaron nila sa literal ang Iningles nga awit. Dayon, base sa hinubad nga awit, ang Saksi nga hanas sa pagkomposog awit magtagik ug nindot ug makahuloganong mga liriko sa bag-ong pinulongan. Sunod, susihon kini sa tem sa maghuhubad ug proofreader aron maseguro nga tukma kini sa Kasulatan. Bisag dako nga trabaho ang paghubad sa atong songbok, malipay kaayo ang mga Saksi ni Jehova sa tibuok kalibotan nga mokanta sa mga awit sa pagdayeg diha sa ilang kaugalingong pinulongan.

Opisina sa Paghubad Diha Mismo sa Dapit nga Gigamit ang Pinulongan

Gitagna sa Pinadayag nga ang mga dinihogan sa atong panahon mangimbitar sa mga tawo sa ‘pag-inom sa tubig sa kinabuhi nga walay bayad.’ (Pin. 22:17) Kini nga imbitasyon ipadangat ngadto sa “tanang . . . katawhan ug mga pinulongan.” (Pin. 7:9) Kaniadto, ang kadaghanang maghuhubad nagtrabaho diha mismo sa sangang buhatan, bisag ang ilang pinulongan gigamit sa ubang bahin sa nasod. Pero lisod nilang masayran ang kausaban sa ilang pinulongan ug matandog ang kasingkasing sa mga tawong nagbasa sa gihubad nilang publikasyon. Hinuon, daghang tem sa mga maghuhubad karon ang gibalhin ngadto sa mismong lugar nga gigamit ang ilang pinulongan. Dako gyod kini nga panalangin, ingon sa gipakita sa mga komento sa mga maghuhubad.

Usa ka maghuhubad sa pinulongang Maya sa Mexico miingon: “Gibati ko nga samag gamayng tanom nga gibalik pagtisok sa kaugalingong yuta, diha sa kinaiyanhong palibot niini.” Usa ka maghuhubad sa habagatang Russia miingon usab: “Ang pagbalhin sa opisina ngadto sa dapit nga gisulti ang pinulongan maoy paraiso alang sa mga maghuhubad. Lahi kaayo ang mga pulong nga gigamit sa telebisyon, mga libro, ug Internet nianang gigamit kada adlaw sa mga tawo. Sa among bahin, kinahanglang madunggan namo ang pagsultihanay aron makahubad mi sa natural nga paagi.”

Usa ka maghuhubad sa pinulongang Tshiluba sa Congo nagkanayon: “Kada adlaw namong gigamit ang among pinulongan—sa pagpamalit ug pakig-estorya sa mga silingan, sa pagsangyaw, ug panahon sa tigom. Among tun-an kon unsay among gihubad, ug publikasyong Tshiluba ang among gigamit sa ministeryo, mao nga makita namo kon nasabtan ba sa mga tawo ang mga pulong nga gigamit sa mga maghuhubad.”

Usa ka maghuhubad sa pinulongang Lhukonzo sa Uganda mikomento: “Di mahubit ang among kalipay dihang magtambong sa tigom diha sa pinulongang gigamit ug gihubad namo. Mas ganahan sab ming mosangyaw, sanglit makagamit na mi karon sa among pinulongan sa pagpakigsulti sa mga tawo.”

Nakabenepisyo sab ang mga kongregasyon diin giasayn ang mga maghuhubad. Bahin sa mga maghuhubad sa pinulongang Maya, usa ka sister miingon: “Nadasig mi sa ilang sinultihan ug panig-ingnan. Samag kami nakig-uban sa pamilyang Bethel, ug kana espesyal kaayo.”

Dili lang mga kongregasyon ang nadasig, kondili ang mga maghuhubad usab. Usa ka maghuhubad sa Kenya mipahayag: “Diyutay ra kaayo ang basahon sa pinulongang Luo, mao nga ang mga tawo wa gyod magdahom nga makakitag dekalidad nga publikasyon sa ilang pinulongan. Busa nahinam ang daghan pagkadawat niana. Pagkakita ko sa maong reaksiyon, nadasig gyod ko nga magpadayon sa akong asaynment ug buhaton ang akong maarangan.”

Ang daghang maghuhubad nag-alagad nag daghang katuigan sa sangang buhatan. Gipabilhan pag-ayo ang maayo nilang tinamdan ug kaandam motabang sa mga karnero ni Jehova, ug sila gipanalanginan. Gipahayag sa usa ka maghuhubad sa pinulongang Xhosa sa South Africa ang gibati sa daghan: “Maayo kaayo ang desisyon sa Nagamandong Lawas nga balhinon ang mga opisina sa paghubad. Malipayon mi niadto sa Bethel, pero mas malipayon mi karon dinhi sa opisina sa paghubad.”

Mga Balita Gikan sa Lainlaing Nasod

“Giatiman Kamig Maayo sa mga Igsoon”

Sa Dominggo, Hunyo 3, 2012, nahagsa ang usa ka ayroplano sa daghag tawong seksiyon sa Lagos, ang kinadak-ang siyudad sa Nigeria. Namatay ang tanang nagsakay nga 153 ug way tinong gidaghanon sa ubos.

Si Collins Eweh ug ang iyang pamilya nagpuyo sa kinaibabwan sa tres andanas nga apartment nga naigo sa ayroplano. Sa dihang nahitabo ang aksidente, ang tibuok pamilya nagtambong ug tigom sa Kingdom Hall.

Sa mga alas 3:35 s.h., panahon sa Pagtuon sa Bantayanang Torre, namatikdan ni Collins ug sa iyang asawang si Chinyere nga daghan ang nanawag sa ilang cell phone, apan wala nila kana tubaga. Pagkahuman gyod sa tigom, gitubag kana ni Chinyere. Ang iyang mga silingan nagpahibalo niya nga nagdilaab ang ilang apartment. Pag-abot didto, nakita sa pamilyang Eweh nga naigo sa ayroplano ang ilang apartment ug milandig sa duol nga bilding, diin kini misilaob.

“Kon didto pa mi sa balay,” matod ni Chinyere, “seguradong patay kami. Tapot lawas ray nabilin kanamo apan kami may kinabuhi. Mihikay dayon ug relief committee ang magtatan-aw sa sirkito, ug giatiman kamig maayo sa mga igsoon. Kami mapasalamaton gayod.”

Si Collins miingon: “Nausab ang hunahuna sa akong mga paryente nga supak sa akong pag-Saksi. Usa kanila miingon: ‘Motubag ug mga pag-ampo ang inyong Jehova. Ayaw mog bulag sa inyong Diyos kay siya motabang kaninyo.’ Ang lain pa miingon: ‘Bisag unsay inyong ginabuhat sa pag-alagad sa Diyos, ipadayon ninyo kana sa bug-os kalag.’ Di mahubit ang akong kalipay kay gitabangan mi ni Jehova.”

Ang Pagrehistro sa Relihiyon Giaprobahan sa Parliamento

Sa Pebrero 27, 2012, gisagop sa gobyerno sa Hungary ang gipadak-an nga Church Law nga nag-ila sa mga Saksi ni Jehova ingong rehistradong relihiyon. Kining legal nga pag-ila kanila makatabang pag-ayo sa pagsangyaw sa maayong balita sa Hungary. Malibre sab sa buhis ang mga Saksi ni Jehova, makadawat sila ug mga donasyon, ug makaduaw sa prisohan ug ospital aron ikasangyaw ang mensahe sa Bibliya.

Espesyal nga Dapit Alang sa Memoryal

Usa ka espesyal payunir sa Rundu, Namibia, mitaho bahin sa gitambongan niyang Memoryal sa duol nga balangay. May mga interesado didto busa ang mga igsoon midesisyon nga sa unang higayon saulogon didto ang Memoryal diha sa lokal nga pinulongan, ang Rumanyo. Siya misulat: “Nindot ang palibot, sa gawas ra mi ubos sa daktol nga bulan, nga may mga lamparilya ug duha ka sugang debaterya.” Ang nanambong suod kaayo kang Jehova. Usa ray magmamantala didto nga misugod pagsangyaw sa Marso, apan 275 ang mitambong sa Memoryal!

Pagpahinungod sa mga Sangang Buhatan Nagpasidungog Kang Jehova

Ang Nobyembre 19, 2011 maoy halandomong bahin sa kasaysayan sa organisasyon ni Jehova sa Central African Republic ug sa Chad. Nianang adlawa, 269 ka igsoon nagtigom atubangan sa bag-ong pasilidad. Ug ikalipay nga presente si Samuel Herd, membro sa Nagamandong Lawas, aron ipahinungod kang Jehova ang bag-ong pasilidad sa Bethel nga gamiton sa pag-alagad Kaniya. Panahon sa programa, giasoy ang kasaysayan sa buluhatong pagsangyaw sa duha ka nasod. Kadto nagsugod sa 1947 sa Central African Republic ug sa Chad niadtong 1959. Giasoy sa sunod nga pakigpulong ang detalye sa konstruksiyon ug ang tanang nalangkit sa paghuman sa mga bilding. Human basaha ang mga pangomosta gikan sa lainlaing nasod, gipahayag ni Brader Herd ang pakigpulong sa pahinungod. Mapasalamaton ang 42 ka membro sa pamilyang Bethel kay duna silay walo ka opisina sa paghubad, kosina, komedor, ug laundry alang sa ilang panginahanglan. May 22 ka kuwarto ug ubang pasilidad, sama sa reception area, administratibong mga opisina, ug shipping area, alang sa hapsay nga kalihokan sa pamilyang Bethel.

Ang Sabado, Mayo 26, 2012, maoy di-malimtang adlaw sa mga Saksi ni Jehova sa Congo (Kinshasa). Ang sangang buhatan gipahinungod human sa walo ka tuig nga pagpanukod ug pagreper sa mga bilding. Espesyal kadto nga okasyon kay bisag may sangang buhatan na sa Congo sa halos 50 ka tuig, kadto ang unang pagpahinungod sa sangang buhatan sa nasod. Si Geoffrey Jackson, membro sa Nagamandong Lawas, ang mihatag sa pakigpulong sa pahinungod sa pasilidad sa sanga atubangan sa 2,422 ka igsoon, nga kadaghanan kapig 40 anyos nang bawtismado. May 117 ka bisita gikan sa 23 ka nasod. Ang pipila ka misyonaryong nag-alagad sa Congo daghang katuigan kanhi miasoy ug makapadasig nga mga kasinatian. Nalipay ug miuyon ang tanan nga ang mga pasilidad gamiton lamang sa pagsimba kang Jehova.

Legal nga Report

Sa Hunyo 30, 2011, ang European Court of Human Rights (ECHR) mihukom nga gilapas sa gobyerno sa France ang katungod sa mga Saksi ni Jehova dihang gipahamtang ang 60 porsiyentong buhis sa tanan nilang donasyon tali sa 1993 ug 1996. Ang Korte miawhag nga magsabot lang ang gobyerno ug ang mga Saksi bahin niana. Apan miinsistir ang gobyerno nga ang taas kaayong buhis dili supak sa balaod, mao nga dili kana mahimong basta sabotan lang. Busa, sa desisyong gipakanaog sa Hulyo 5, 2012, ang ECHR nagmando sa gobyerno sa France nga bayran ang “tanang gasto ug danyos-pirhuwisyo” tungod sa gipahamtang nga buhis. Gawas nga iuli ang 4,590,295 euro ($5,749,440 U.S.) nga gikompiskar dihang gipahamtang ang buhis (dugang ang interes sa kuwarta sukad pagkompiskar niana), ang gobyerno kinahanglang mobayad sa mga Saksi ug dugang 55,000 euro ($68,890 U.S.) para sa gasto sa kaso.

Gitangtangan ug katungod ingong lungsoranon ang maunongong mga alagad ni Jehova sa Eritrea tungod sa pagkaneyutral. (Isa. 2:4) Sa miaging 17 ka tuig, daghan ang gidakop, ug mga 50 ka igsoon ang naa karon sa prisohan, lakip ang tigulang nga mga babaye ug mga bata, bisan ganig dos anyos pa lang. Ikasubo, sa Hulyo 2011, si Brader Misghina Gebretinsae ang unang Saksi nga namatay sa prisohan sa Eritrea. Sa wala pa siya mamatay, gibartolina siyag usa ka semana; ug gituohang “misteryoso” ang iyang pagkamatay. Ang mga brader padayong naningkamot nga makigkita sa mga opisyales aron ipatin-aw nga ang atong pagkamakigdaiton ug pagkaneyutral wala magkahulogan nga wala tay pagtahod sa gobyerno sa Eritrea.

Ang mga Saksi ni Jehova sa India padayong nagsagubang sa pag-atake sa magubtanong panon dihang magsangyaw. Ang mga lalaki, babaye, bata, ug bisag 60-anyos nga lola ug masusong kapig tuig pa gidagmalan ug gipasipalahan. Ang uban gihuboan ug gihulga nga patyon. Kay ang mga polis mapihigon ug walay gihimo, migrabe ang pag-atake sa mga Saksi. Inay ikiha ang nangatake, ang mga Saksi hinuon ang gipriso sa mga polis base sa bakak nga mga akusasyon. Kadtong gidakop kasagarang pangayoag dagkong piyansa, dagmalan ug pasipalahan sa mga polis, ug dili hatagag pagkaon, tubig, ug medikal nga tabang. Human niana, ang ilang mga kaso dangtag mga tuig una hukman silang walay sala. Gisang-at na ang pipila ka reklamo bahin sa tawhanong katungod ngadto sa National Human Rights Commission ug gilaoman nga kini makatabang sa atong mga igsoon.

Sa Nobyembre 2011, ang ECHR nagkahiusa sa ilang hukom nga ang Turkey milapas sa katungod ni Yunus Erçep nga modesisyon sumala sa iyang konsensiya ingong Saksi ni Jehova. Gihukman siyang sad-an ug gipriso tungod kay siya midumili sa pagsundalo. Sukad sa Marso 1998, si Brader Erçep 39 ka beses nga gipatawag aron magsundalo ug kapig 30 ka beses nga gikasohan. Siya gimultahan, gipriso, ug gisulod sa mental nga ospital kay kono “nabuang sa relihiyon.”

Sa Oktubre 2004, gisang-at ni Brader Erçep ang iyang kaso sa ECHR. Sa hukom niini, ang Korte miingon nga “ang aplikante, ingong Saksi ni Jehova, gustong makakuhag eksemsiyon sa pagsundalo dili tungod sa personal nga benepisyo o kaharuhay kondili tungod sa iyang relihiyosong pagtuo.”

Si Feti Demirtaş, lain pang Saksi ni Jehova sa Turkey, midumili sa pagsundalo dihang gipatawag siya niadtong 2005. Siya gidakop, gikulata, gikasohan, ug giprisog 554 ka adlaw. Niadto lang Hunyo 2007 siya gipagawas sa prisohan. Kay dili mokompromiso si Brader Demirtas sa iyang pagtuo nga gibase sa Bibliya, siya gihimoag report nga nalisoan kono sa pangisip. Sa paghukom niini batok sa Turkey, nasayran sa ECHR nga si Brader Demirtas nakaagom ug di-tawhanong tratasyon diha sa kamot sa awtoridad sa Turkey ug gilapas ang iyang katungod nga modesisyon base sa iyang konsensiya.

Kining duha ka desisyon sa ECHR susama gyod sa inila nga hukom sa Hulyo 2011 (Bayatyan v. Armenia) diin gikompirmar sa Grand Chamber sa ECHR nga ang European Convention manalipod sa mga katungod niadtong modumili pagsundalo base sa ilang konsensiya. Ang maong mga desisyon kinahanglang tumanon sa tanang membro sa Council of Europe, lakip ang Turkey.

Ang ECHR nagpagawas usab ug mga hukom batok sa Armenia sa mga kasong Bukharatyan v. Armenia ug Tsaturyan v. Armenia sa Enero 2012, nga nagkompirmar nga gilapas ang kagawasan sa duha ka Saksi ni Jehova nga midumili pagsundalo tungod sa ilang konsensiya. Sa pagpakanaog sa mga hukom niini, gipunting sa Korte ang inila nga hukom sa kasong Bayatyan v. Armenia.

Bisan pa niining makasaysayanhong mga paghukom batok sa Armenia, ang gobyerno nagpadayon sa paggukod, paghukom nga sad-an, ug pagpriso sa mga modumili pagsundalo. Tun-an pa sa parliamento ang mga amyenda nga gihimo sa Law on Alternative Service, nga giaprobahan sa gobyerno sa Armenia sa Marso 2012. Gilaoman nga ang gobyerno sa Armenia mosunod sa mga hukom sa ECHR ug pagawson ang mga igsoon nga napriso kay midumili pagsundalo.

Ang mga Saksi ni Jehova sa Azerbaijan padayong nagsagubang sa pagpit-os sa gobyerno: pagronda ug pagdakop tungod sa pagtambong ug tigom, pagsensor sa literatura, deportasyon sa mga langyawng Saksi, pagdagmal ug pagpasipala kanila sa mga polis, ug paghulga nga kanselahon ang rehistro sa ilang relihiyon. Kay wala aprobahi sa State Committee for Work with Religious Associations ang aplikasyon sa pagparehistro pag-usab sa ilang relihiyon, mas gitugaw sa mga polis ang ilang malinawong tigom, pagsangyaw, ug mas gipig-otan ang importasyon ug pagpanagtag sa ilang literatura. Ang mga korte nagpahamtang ug dagkong multa sa mga Saksi ni Jehova tungod sa pagpanagtag ug literatura ug pagtambong sa tigom. Pananglitan, usa ka sister gimultahag $1,909 (U.S.) tungod sa pagtambong ug tigom sa siyudad sa Ganja. Kay kini nga mga pagpaantos naglapas man sa kagawasan sa pagsimba nga gigarantiyahan sa European Convention on Human Rights, daghan nang kaso ang gisang-at ngadto sa ECHR sa paglaom nga mohunong ang pagpanghasi ug paglutos sa mga Saksi ni Jehova sa Azerbaijan.

Ang mga polis sa lainlaing bahin sa Russia padayong naghasi ug naglutos sa mga Saksi ni Jehova ug nagsiba sa mga korte nga silotan ang mga Saksi tungod sa ilang relihiyosong kalihokan. Pinasukad sa balaod bahin sa ekstremismo nga gisaway sa daghan, ang mga korte sa Russia nagdeklarar sa mga 64 ka basahon sa mga Saksi ingong ekstremista. Di pa dugay, mihangyo ang usa ka piskal nga isipong ekstremista ang librong Pagkakat-on Gikan sa Dakong Magtutudlo nga nagtudlo sa mga bata bahin kang Jesu-Kristo. Sa daghang bahin sa Russia, ang mga korte nag-block usab sa opisyal Web site sa mga Saksi ni Jehova. Gitugtan ang mga polis nga panid-an ang mga Saksi gamit ang sekretong video ug buksan ang ilang sulat. Busa, regular nga giinterbiyo sa mga polis ang oposer nga mga silingan, girekisa ang balay sa mga Saksi, ug gikompiskar ang relihiyosong publikasyon ug ubang personal nga butang. Gidakop ang mga Saksi samtang naglakat sa dalan, nagdrayb ug kotse, o nikawas sa tren. Ang mga polis nagpahunong sa mga tigom, ug ang mga ansiyano gikasohan tungod sa ilang kalihokan sa kongregasyon. Sa pipila ka rehiyon, gikombinsir sa mga piskal ang mga korte nga wagtangon ang mga Local Religious Organization (LRO) sa mga Saksi ni Jehova.

Sa Mayo 2012 sa siyudad sa Taganrog, 17 ka Saksi ang giakusahan nga nag-organisar ug nakigbahin sa krimen tungod lang sa ilang relihiyosong kalihokan. Niadtong 2009 giwagtang ang LRO sa mga Saksi ni Jehova niining rehiyona sumala sa mando sa korte ug gikompiskar ang Kingdom Hall tungod kono sa ekstremismo. Kay dili na makagamit sa ilang Kingdom Hall, ang mga Saksi nagtigom sa pribadong mga balay o giabangang mga tigomanan, apan karon ang awtoridad naningkamot sa pagdili sa tanang organisadong pagsimba. Sa Hulyo 2012, usa ka magtiayong payunir sa siyudad sa Chita sa Siberia gihukmang sad-an sa pagdasig ug pagdumot kay nanagtag sa ekstremista konong libro nga Unsay Tinuod nga Gitudlo sa Bibliya? dihang nagsangyaw. Ang kada usa gisentensiyahag 200 ka oras sa pinugos nga trabaho, apan giapelar nila kana.

Bisan pag duha na ka kaso ang gipadaog sa ECHR pabor sa mga Saksi ni Jehova kontra sa Russia—ang Kuznetsov and Others v. Russia sa 2007 ug ang Jehovah’s Witnesses of Moscow v. Russia sa 2010—wala gihapon tagda sa mga awtoridad sa Russia ang mga hukom niining tinahod nga Korte. Busa, ang mga Saksi ni Jehova misang-at ug 19 ka kaso sa ECHR ug naglaom nga ang umaabot nga mga hukom sa ECHR magtukmod sa mga awtoridad sa Russia sa paghunong na sa paglutos sa katawhan ni Jehova ug tugotan silang “magpadayon sa pagkinabuhi nga mahusay ug malinawon uban ang bug-os nga diyosnong pagkamahinalaron ug pagkaugdang.”—1 Tim. 2:2.

Ang South Korea padayong nagpriso sa batan-ong mga brader tungod sa ilang Kristohanong neyutralidad. Kada bulan mga 45 ka brader ang hukmang sad-an ug sentensiyahag usa ka tuig ug tunga nga pagkapriso. Mga 750 ka brader ang naa karon sa mga prisohan sa Korea. Kini ang kinadaghanang Saksi ni Jehova nga napriso tungod sa ilang pagtuo. Sukad sa 1950, moabot ug kapig 32,000 ka tuig nga pagkapriso ang sentensiya sa mga 17,000 ka Saksi.

Sa 2012, mas gipig-otan sa awtoridad ang mga Saksi nga midumili pagsundalo base sa ilang konsensiya. Sa unang higayon, gisentensiyahan nilag pagkapriso ang midumili nga mahimong reservist o reserbang sundalo. Sa nangagi, gimultahan lang sila tungod sa pagdumili nga magbansay ingong reservist. Kay daghang beses silang tawgon, kadtong modumili balikbalik nga kasohan. Pananglitan, sa Nobyembre 2011, si Ho-jeong Son gisentensiyahag walo ka bulan nga pagkapriso. Pagka-Hunyo 2012, gihusay na sab siya ug gisentensiyahag unom ka bulan nga pagkapriso. Siya gipriso dayon pagkahuman sa ikaduhang paghusay pero nakagawas paglabay sa 29 ka adlaw dihang nakapiyansa samtang naghulat sa resulta sa iyang pag-apelar. Nag-atubang siya karog 14 ka bulan nga pagkapriso.

Ang South Korea daghang beses nga gisaway sa United Nations Human Rights Committee tungod sa paglapas sa kagawasan sa pagdesisyon base sa konsensiya. Dunay bag-ong mga kaso nga gisang-at na sa maong Komite ug sa South Korean Constitutional Court aron mahusay ang maong isyu.