Dedikasyon sa Sangang Buhatan

SULOD sa usa ka tuig ug tunga, ang lokal ug internasyonal nga mga boluntaryo naghago pag-ayo sa pagtukod sa gipadak-ang mga pasilidad sa sangang buhatan sa Bishkek, ang kaulohan sa Kyrgyzstan. Gihimo ang dedikasyon sa maong pasilidad niadtong Oktubre 24, 2015, usa lang ka bulan pagkahuman sa proyekto. Nalipay kaayo ang kapin sa 3,000 ka mga igsoon diha sa 18 ka Kingdom Hall ug sa 5 ka ubang lokasyon kay gikonektar sila sa maong programa. Si Brader Stephen Lett, nga membro sa Nagamandong Lawas, ang naghatag sa pakigpulong sa dedikasyon nga dunay makapadasig nga ulohang “Alagara si Jehova Uban ang Bug-os nga Kasingkasing.” Pagkaugma, usa ka makapalig-ong programa ang gipresentar ngadto sa kadaghanang mga igsoon sa maong nasod.

Giokupahan sa sangang buhatan sa Armenia ang unom ka andana sa usa ka 18-storey nga bilding. Sa Sabado, Mayo 14, 2016, gihimo ang dedikasyon para sa sangang buhatan, apil ang Assembly Hall ug mga pasilidad para sa School for Kingdom Evangelizers. Gitambongan kinig 6,435 ka igsoon. Gihisgotan sa mga pakigpulong sa maong programa ang kasaysayan sa mga Saksi ni Jehova sa Armenia. Nagsugod ang buluhaton taliwala sa mga Armenian nga nagpuyo sa United States niadtong sayong bahin sa ika-20ng siglo ug dayon sa Armenia niadtong tungatunga sa dekada 70, dihang sakop pa ang maong nasod sa Soviet Union. Di pa dugay, ang organisasyon legal nang narehistro ug naporma ang sangang buhatan. Nalipay pag-ayo ang mga nanambong sa ilang nakita nga mga kalamposan sa organisasyon. Di gyod malimtang panghitabo sa programa ang pagpalakpak sa tanang nanambong ingong pag-uyon kang Brader David Splane, membro sa Nagamandong Lawas, dihang iyang gidedikar ang maong mga pasilidad ngadto kang Jehova.