Unsay Akong Himoon kon Dili Ko Tugtan sa Akong Ginikanan sa Paggamit ug Social Media?

Morag halos tanan nimong amigo ug amiga naggamit ug social media, ug pirme ni nilang estoryahan. Ug basin sungogon pa gani ka nila kay wala kay account. Unsay angay nimong mahibaloan bahin niana? Ug unsay puwede nimong himoon?

Ang angay nimong mahibaloan

Wala ka mag-inusara. Daghang ginikanan ang dili mosugot nga mogamit ug social media ang ilang mga anak. Tingali naghunahuna sila nga ang paggamit niini moresulta sa mosunod:

• depresyon ug ubang problema sa mental health.

• pagtan-awg pornograpiya, sexting, ug cyberbullying.

• dili pagsinabtanay sa mga managhigala.

Daghang teenager ang midesisyon nga di na mogamit ug social media. Sila mismo ang nakakita nga mas daghan nig dili maayong epekto kanila. Konsideraha ang mosunod nga tinuod nga mga eksperyensiya:

• Nakita ni Priscilla nga daghan siyag nagamit nga panahon sa social media nga puwede unta niyang gamiton sa mas mapuslanong mga butang.

• Wala ganahi si Jeremy nga dili niya makontrol ang dili maayong mga content nga mogawas sa iyang social media feed.

• Nakita ni Bethany nga tungod sa social media nagsige na hinuon siyag hunahuna kon unsay ginahimo sa uban.

“Gi-delete nako ang akong social media app, ug maayo na lang nga gihimo nako to. Wala gyod ko mingawa ani, ug ganahan ko kay mas daghan kog panahon sa kon unsay mas importante.”—Sierra.

“Di ko ganahan kay makaadik ang social media ug usahay mabalaka ko pag-ayo kon unsay reaksiyon sa uban sa akong mga post. Medyo dili sayon ang pag-delete sa akong account, pero migaan dayon ang akong gibati dihang gihimo nako to. Mas malinawon na ang akong hunahuna.”—Kate.

Ang imong mahimo

Sunda ang giingon sa imong ginikanan. Ipakita nga hamtong na ka pinaagi sa pagsunod sa ilang giingon nga dili ka maglagot o moreklamo.

Prinsipyo sa Bibliya: “Ang buangbuang dili makapugong sa iyang kasuko, apan ang tawong but-an mapailubon ug makapugong niini.”—Panultihon (Proverbio) 29:11, Ang Bag-ong Maayong Balita Biblia.

Ingnon tingali ka sa uban nga dili lang magsulti sa imong ginikanan nga mogamit kag social media o nga maghimo kag sekreto nga account. Sayop gyod na! Kon magsekreto ka, mabalaka ka ug makonsensiya. Maproblema pod ka kon masakpan ka nila—ug mawala gyod ang ilang pagsalig nimo.

Prinsipyo sa Bibliya: “Gusto namong magmatinud-anon sa tanang butang.”—Hebreohanon 13:18.

Ikaw mismo ang modesisyon. Sama sa mga batan-on nga gihisgotan sa ibabaw, daghan tingali kag mahunahunaan nga rason kon nganong dili ka mogamit ug social media. Kon klaro para nimo nga ang social media dili makahatag nimog kaayohan, likayi kini. Himoon nimo ni dili tungod kay giingnan ka sa imong ginikanan, kondili ikaw mismo ang midesisyon. Ingong resulta, kon mangutana ang imong mga amigo ug amiga bahin niini, dili ka maulawan—ug basin dili na kaayo ka nila sungogon.

Ang punto: Sunda ang imong mga ginikanan, ug paningkamoti nga masabtan nimo ang ilang panghunahuna bahin sa social media aron ikaw mismo ang mohimog desisyon. Sa pagkakaron, mag-enjoy ra ka bisag wala kay social media.