Pagsaka sa Presyo sa mga Palitonon sa Tibuok Kalibotan—Unsay Giingon sa Bibliya?

“Nameligro na sab ang ekonomiya sa kalibotan,” nagpasidaan ang presidente sa World Bank Group sa Hunyo 2022 nga report. “Paspas kaayong misaka ang presyo sa mga palitonon ug serbisyo, samtang ang mga tawo wala na kaayoy kuwarta nga ikagasto.”

“Paspas nga nimahal ang presyo sa gasolina ug pagkaon, ug nakaapektar ni ilabina niadtong nagpuyo sa pobreng mga nasod,” miingon ang International Monetary Fund.

Ang Bibliya makatabang nato nga masabtan kon nganong nag-atubang tag grabeng mga problema sa ekonomiya ug kon unsaon kana pagsagubang. Ug naghisgot pod ni sa permanenteng solusyon niana.

Pagsaka sa mga presyo niining “kataposang mga adlaw”

• Ang Bibliya nag-ingon nga nagkinabuhi na ta sa “kataposang mga adlaw.”—2 Timoteo 3:1.

• Si Jesus miingon nga niining panahona, duna unyay “makalilisang nga mga talan-awon,” o makahahadlok nga mga hitabo. (Lucas 21:11) Ang mga tawo mahadlok dihang mosaka pag-ayo ang presyo sa mga palitonon. Daghan ang nabalaka sa ilang kaugmaon ug dili sila segurado kon makatagana pa sila sa panginahanglan sa ilang pamilya.

• Gitagna sa basahon sa Pinadayag nga momahal pag-ayo ang presyo sa pagkaon niining panahona. “Nadungog ko ang daw usa ka tingog … nga nag-ingon, ‘Usa ka litrong trigo o tulo ka litrong sebada ang mapalit sa suhol sa usa ka adlaw nga pagtrabaho.’”—Gipadayag 6:6, Maayong Balita Biblia.

Aron mahibalog dugang bahin sa “kataposang mga adlaw” ug sa tagna sa basahon sa Pinadayag, tan-awa ang video nga Ang Kalibotan Nausab Sukad Niadtong 1914 ug basaha ang artikulo nga “Kinsa ang Upat ka Mangangabayo?“

Ang solusyon sa tanang problema sa ekonomiya

• “Magtukod silag mga balay ug magpuyo niini, ug magtanom silag mga ubasan ug magkaon sa bunga niini. Dili sila magtukod aron puy-an lang sa lain, ug dili sila magtanom aron kaonon lang sa lain.”—Isaias 65:21, 22.

• “Duna unyay dagayang lugas sa yuta; mosugwak unya kini sa tumoy sa kabukiran.”—Salmo 72:16.

• “’Kay ang mga sinakit gidaogdaog, tungod sa pagpanghupaw sa mga kabos, motindog ko aron mangilabot,’ miingon si Jehova.“—Salmo 12:5.a

Hapit nang sulbaron sa Diyos ang dili patas nga kahimtang sa ekonomiya, dili lang sa usa ka nasod kondili sa tibuok kalibotan. Kon sa unsang paagi, basaha ang artikulo nga “Posible ba ang Patas nga Sistema sa Ekonomiya?”

Pero bisan karon, ang Bibliya makatabang nimo sa pagsagubang sa pagsaka sa presyo sa mga palitonon. Sa unsang paagi? Naghatag nig praktikal nga mga tambag kon unsaon paggamit ang kuwarta sa maayong paagi. (Proverbio 23:4, 5; Ecclesiastes 7:12) Aron mahibalog dugang, basaha ang mga artikulo nga “Ampingi ang Imong Panginabuhi” ug “Kon Unsay Himoon Dihang Mogamay ang Kita.”