Kinsa nga Lider ang Imong Pilion?—Unsay Giingon sa Bibliya?

Ang mga tawo mohimog importante nga desisyon kon kinsa nga mga lider ang ilang pilion.

Unsay giingon sa Bibliya?

Ang tawhanong mga lider naay limitasyon

Gihisgotan sa Bibliya ang limitasyon sa tanang tawhanong lider.

• “Ayaw mog salig sa mga prinsipe o sa anak sa tawo, nga dili makaluwas. Mogula ang iyang gininhawa, mobalik siya sa yuta; niana mismong adlawa mahanaw ang iyang mga hunahuna.”—Salmo 146:3, 4, footnote.

Bisan ang malamposon kaayong mga lider mamatay ra sa ulahi. Dugang pa, dili sila makaseguro nga ang ilang maayong mga buhat ipadayon sa magsunod nila.—Ecclesiastes 2:18, 19.

Ang tinuod, gihisgotan sa Bibliya nga ang mga tawo wala gyod lalanga nga magmando sa ilang kaugalingon.

• “Dili iya sa tawong naglakaw bisan ang pagtultol sa iyang lakang.”—Jeremias 10:23.

Naa bay usa nga mahimong maayong lider karon?

Ang lider nga giuyonan sa Diyos

Ang Bibliya nag-ingon nga ang Diyos nagtudlog pinakamaayo ug pinakakasaligan nga lider: si Jesu-Kristo. (Salmo 2:6) Si Jesus ang Hari sa Gingharian sa Diyos, usa ka gobyerno nga nagmando gikan sa langit.—Mateo 6:10.

Pilion ba nimo si Jesus ingong lider? Gipakita sa Bibliya kon nganong importante na nga desisyon:

• “Pasidunggi ninyo ang anak [si Jesu-Kristo], aron dili masuko ang Diyos ug mangahanaw mo sa dalan, kay ang Iyang kasuko dali rang mosilaob. Malipayon ang tanan nga modangop Kaniya.”—Salmo 2:12.

Karon na ang panahon sa pagdesisyon. Gipakita sa tagna sa Bibliya nga si Jesus nagsugod nag mando niadtong 1914 ug nga sa dili madugay pulihan sa Gingharian sa Diyos ang tanang gobyerno sa tawo.—Daniel 2:44.

Aron mahibalog dugang kon sa unsang paagi ka makasuportar kang Jesus ingong lider, basaha ang artikulong “Suportahi Karon ang Gingharian sa Diyos!”