Thomas Jackson/Stone via Getty Images
PADAYON SA PAGBANTAY!
Naa bay Paglaom sa 2024?—Unsay Giingon sa Bibliya?
Daghan ang naghunahuna nga wala nay solusyon ang mga problema sa kalibotan karong 2024. Pero naa tay nindot nga paglaom sa umaabot. Asa nato ni makita?
Ang Bibliya naghatag ug paglaom
Ang Bibliya nagsaad nga wad-on sa Diyos ang mga problema nga nakapabati natong walay paglaom. Sa di madugay, ‘pahiran sa Diyos ang matag luha sa atong mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.’—Pinadayag 21:4.
Aron mahibalog dugang bahin sa mga saad sa Bibliya para sa umaabot, basaha ang artikulo nga “Tinuod nga Paglaom Alang sa Mas Maayong Kaugmaon.”
Kon sa unsang paagi ang Bibliya makatabang nimo karon
Ang Bibliya naghatag ug paglaom para sa umaabot nga makatabang nimo nga mahimong mas positibo ug dili mawad-ag paglaom. (Roma 15:13) Ang praktikal nga mga tambag sa Bibliya makatabang pod nimo nga makaya ang imong mga problema karon, sama tingali sa kalisod sa pinansiyal, inhustisya, ug sakit.
Sayra kon sa unsang paagi ang paglaom nga gihatag sa Bibliya nakatabang sa usa ka lalaki nga magmalinawon ug magmalipayon bisan pag nagdako siyang pobre. Tan-awa ang video nga Juan Pablo Zermeño: Sa Tabang ni Jehova Naa nay Katuyoan ang Akong Kinabuhi.
Susiha kon sa unsang paagi ang Bibliya makatabang nimo dihang mahasol ang imong konsensiya, mobati kag grabeng kaguol ug kabalaka, ug dihang mamatyan kag minahal. Basaha ang artikulo nga “Makahupay ba Nako ang Bibliya?”
Sayra kon sa unsang paagi ang usa ka sundalong babaye nga miingong ‘isog kaayo siya ug way kaluoy sa uban’ nakakaplag ug paglaom diha sa Bibliya. Tan-awa ang video nga Miundang Ko sa Pagkasundalo.
Himoa ang 2024 nga maayong tuig para nimo ug sa imong pamilya. Pagkat-on ug dugang kon sa unsang paagi ang Bibliya makatabang nimo. Sulayi ang among libreng interactive nga pagtuon sa Bibliya. Susiha kon sa unsang paagi ang Diyos makahatag nimo karon ug ‘kalinaw, maayong kaugmaon, ug paglaom.’—Jeremias 29:11.