Maggubat Kaha ang Tibuok Kalibotan?—Unsay Giingon sa Bibliya?

Sa milabayng 30 ka tuig, daghan ang naghunahuna nga maayo ang relasyon sa mga nasod, ug gani para nila mas nagmalinawon ang kalibotan. Pero sa atong makita karon, morag dili kana ang nagakahitabo.

• “Tungod sa paggubatay sa Israel ug Hezbollah duol sa Lebanon, daghan ang nabalaka nga ang gubat sa Gaza makaapektar pa sa ubang nasod.”—Reuters, Enero 6, 2024.

• “Ang Iran naay gisuportahan nga mga grupo nga nagaatake sa lainlaing lugar, ug nagsugod na pod nig himog nukleyar nga mga hinagiban. Nakapabalaka ni sa mga nasod sa Kasadpan, ilabina kay ang Iran kaalyado na sa Russia ug China.”—The New York Times, Enero 7, 2024.

• “Ang pagpamomba sa Russia nakapahinabog grabeng kadaot sa Ukraine.”—UN News, Enero 11, 2024.

• “Ang nagakauswag nga ekonomiya ug puwersa militar sa China, ang garbo sa nasod sa Taiwan, ug ang nagkahuyang nga relasyon sa Beijing ug Washington, posible gyong magpahinabog grabeng kagubot.”—The Japan Times, Enero 9, 2024.

Naa bay giingon ang Bibliya bahin sa gubot nga kahimtang sa mga nasod karon? Moresulta ba nig gubat sa tibuok kalibotan?

Gitagna sa Bibliya ang mga hitabo karon

Ang Bibliya walay gitagna nga espesipikong gubat sa atong panahon. Pero nagtagna ni nga daghang gubat ang mahitabo nga maoy ‘magkuha sa pakigdait gikan sa yuta.’—Pinadayag 6:4.

Ang basahon sa Daniel nagtagna nga “sa panahon sa kataposan,” ang gamhanang mga nasod ‘magtinuloray,’ o magkompetensiyahay. Apil niana ang pagpalabwanay sa ilang puwersa militar ug paggastog daghang “mga bahandi,” o kuwarta.—Daniel 11:40, 42, 43.

Gubat nga hapit nang mahitabo

Gipakita sa Bibliya nga ang kahimtang sa kalibotan mograbe pag-ayo sa dili pa ni moarang-arang. Gitagna ni Jesus nga “aduna unyay dakong kasakitan nga wala pa mahitabo sukad sa sinugdan sa kalibotan.” (Mateo 24:21) Kini nga “dakong kasakitan” moresulta sa gubat nga gitawag ug Armagedon, ang “gubat sa dakong adlaw sa Diyos nga Labing Gamhanan.”—Pinadayag 16:14, 16.

Pero ang Armagedon dili maglaglag sa katawhan, kondili magluwas niini. Pinaagi niana nga gubat, taposon sa Diyos ang pagmando sa tawo, nga maoy hinungdan sa daghang gubat nga nagpahinabog grabeng kadaot. Aron mahibalog dugang kon sa unsang paagi ang Armagedon moresultag kalinaw hangtod sa hangtod, basaha kini nga mga artikulo:

• “Unsa ang Gubat sa Armagedon?”

• “Armagedon—Maayo Kini nga Balita!”