Molampos Kaha ang Paningkamot sa Lainlaing mga Ahensiya sa Pagpatunghag Kalinaw sa Yuta?

Grabe kaayo ang mga giyera ug kagubot nga nagakahitabo sa lainlaing dapit sa yuta. Tungod niana, ang United Nations ug ang ubang mga organisasyon mihimog mga paningkamot aron mamentinar ang kalinaw pinaagi sa pagbutang ug mga opisina o mga representante diha sa gubot nga mga dapit. Tumong nila nga ang ilang presensiya makaamot sa kalinaw niining mga dapita. Ang UN Secretary-General nga si António Guterres miingon: “Ang mga representante sa United Nations alang sa kalinaw dako kaayog papel aron makab-ot namo ang among tumong nga himoong mas malinawon ang tibuok yuta.”

Ang ilang mga paningkamot alang sa kalinaw sulod sa daghang tuig nakahatag ug mga kaayohan. Pananglitan, naprotektahan nila ang mga sibilyan, natabangan ang mga refugee nga makabalik sa ilang mga nasod, nahatod ang mga hinabang, ug na-repair ang nadaot nga mga imprastraktura. Pero bisan pa sa ilang mga paningkamot, naay mga problema nga nakapugong nila sa pagkab-ot sa bug-os nga kalinaw. Moabot kaha ang panahon nga bug-os nang magmalinawon ang tibuok yuta? Unsay giingon sa Bibliya?

Mga nakapugong sa kalinaw ug mga solusyon nga giingon sa Bibliya

Nakapugong sa kalinaw: kulang ug pagtinabangay. Bisan pag naay mga sundalo ug mga ahensiya nga nagrepresentar sa lainlaing nasod alang sa kalinaw, usahay dili sila magkahiusa kay naa silay mga dili pagsinabtanay ug lainlain silag giprotektahan nga mga interes.

Ang solusyon nga giingon sa Bibliya: “Ang Diyos sa langit magtukod ug gingharian . . . ug taposon niini kining tanang gingharian [mga gobyerno sa tawo], ug kini ray mobarog hangtod sa hangtod.”—Daniel 2:44.

Nakapugong sa kalinaw: kulag katakos ug may mga limitasyon. Ang mga ahensiya alang sa kalinaw kulang usahay ug mga tawo, budget, o uban pang gikinahanglan, maong nalimitahan ang ilang mahimo. Nalisdan pod sila kay naa sila sa mga lugar nga gubot ug delikado kaayo.

Ang solusyon nga giingon sa Bibliya: “Ang Diyos sa atong Ginoong Jesu-Kristo . . . [nagpalingkod kang Jesus] sa iyang tuong kamot sa langitnong mga dapit, nga labaw kaayo sa tanang gobyerno ug awtoridad ug gahom.”—Efeso 1:17, 20, 21.

Si Jehova,a ang Labing Gamhanang Diyos, nagtudlo kang Jesus ingong Hari sa Gingharian sa Diyos ug naghatag kaniya sa tanan niyang gikinahanglan sa pagmando. (Daniel 7:13, 14b) Ang Diyos naghatag kang Jesus ug gahom, kahibalo, kaalam, ug pagsabot—nga dili gyod malabwan sa tanang gobyerno o ahensiya sa tawo. (Isaias 11:2) Ubos pod sa pagdumala ni Jesus ang gamhanang mga anghel. (Pinadayag 19:14) Wala gyoy kahimtang nga lisod kaayo para niya.

Nakapugong sa kalinaw: mga restriksiyon sa gobyerno. Ang mga ahensiya sa kalinaw malimitahan usahay tungod sa dili klaro nga mga instruksiyon nga ilang nadawat o sa mga restriksiyon sa gobyerno. Tungod ana, mapugngan sila usahay sa pagtabang sa uban o sa pagkab-ot sa ilang mga tumong.

Ang solusyon nga giingon sa Bibliya: “Ang tanang awtoridad sa langit ug sa yuta gihatag na [kang Jesus].”—Mateo 28:18.

Gihatagan sa Diyos si Jesus ug klarong sugo nga ipatungha ang kalinaw sa tibuok yuta, ug gihatagan pod siyag bug-os nga awtoridad sa paghimo niana. (Juan 5:22) Si Jesus kanunay gyong mohimog matarong ug dili gyod mobuhat ug daotan. (Isaias 11:3-5) Tungod ana, ang Bibliya nagtawag kang Jesus nga “Prinsipe sa Pakigdait,” ug ang iyang Gingharian gitukod diha sa “hustisya ug pagkamatarong.”—Isaias 9:6, 7.

Gingharian sa Diyos—ang tinuod nga ahensiya sa kalinaw

Ang pinakamaayo nga mahimo sa tawhanong mga ahensiya mao ra ang paghatag ug temporaryong kalinaw ug tingali pagtapos sa giyera diha sa usa ka lugar. Pero dili nila mawagtang ang pinakahinungdan sa kagubot—ang pagdumot nga gihambin sa daghang tawo diha sa ilang kasingkasing.

“Ang problema mao ni: Wala tay mamentinar nga kalinaw kay wala may kalinaw.”—Dennis Jett, kanhing U.S. ambassador.

Sa laing bahin, ang Gingharian sa Diyos mao ang tinuod nga ahensiya sa kalinaw, kay ginatabangan niini ang mga tawo nga langkaton gikan sa ilang kasingkasing ang pagdumot. Pananglitan, sa dinhi pa si Jesus sa yuta, iyang gitudloan ang iyang mga sumusunod pinaagi sa pulong ug buhat kon unsaon pagpakigdait ug pagpakitag gugma sa uban:

Si Jesus miingon sab nga ang mga sakop sa Gingharian sa Diyos mailhan tungod sa ilang gugma sa uban. Klarong gipakita sa Bibliya nga kadtong nagdumot sa uban dili gyod tugotan nga mabuhi ubos sa Gingharian sa Diyos:

Si Jehova nga Diyos, nga maoy naghimo sa tanang tawo, nahibalo sa pinakamaayo ug bugtong paagi kon unsaon nga mabatonan ang kalinaw sa tibuok yuta. Mahimo ni, dili pinaagi sa tawhanong mga ahensiya, kondili pinaagi lang sa iyang Gingharian.