Kagubot sa Politika nga Nagtuman sa Tagna sa Bibliya

Ang mga tawo karon dili gyod magkahiusa kon bahin sa politika. Dili sila uyon sa mga balaod nga makaapektar sa ilang kinabuhi, ug ginapugos nila ang ilang managlahi nga mga opinyon bahin sa mga isyu sa politika. Sa gobyerno, ang mga tighimog balaod ug ubang opisyal lainlain pod ug gusto ug walay magpapildi nila. Tungod aning mga butanga, gubot kaayo ang politika maong ang gobyerno maglisod sa pagpatuman sa mga balaod niini.

Pero talagsaon kaayo ang kagubot sa politika sa United States ug Britain (nga sagad maoy tawag sa United Kingdom). Ngano? Kay gitagna sa Bibliya ang kagubot sa politika niining duha ka nasod, ug kini nag-ingon nga nianang panahona ang gobyerno sa Diyos molihok aron bug-os nga bag-ohon ang kahimtang sa yuta.

Kagubot sa politika nga “mahitabo sa kaulahiang bahin sa mga adlaw”

Ang Bibliya naay kuyaw nga tagna diha sa basahon sa Daniel. Niana nga tagna, gipadayag sa Diyos “kon unsay mahitabo sa kaulahiang bahin sa mga adlaw,” nga naa unyay dagkong mga hitabo nga makausab sa kasaysayan sa tawo.—Daniel 2:28.

Kini nga tagna sa Bibliya gihatag sa Diyos pinaagig usa ka damgo ngadto sa hari sa Babilonya. Niana nga damgo, ang hari nakakita ug dako kaayong estatuwa nga hinimo gikan sa lainlaing klase sa metal. Gipatin-aw ni propetang Daniel nga ang estatuwa, gikan sa ulo hangtod sa mga tiil niini, nagrepresentar sa lainlaing gamhanang gobyerno sa kalibotan nga motungha ug dayon mapulihan.a Sa ngadtongadto, naay bato nga moigo niini ug bug-os nga madugmok ang estatuwa. Ang bato nagrepresentar sa Gingharian, o gobyerno, sa Diyos.—Daniel 2:36-45.

Sumala sa tagna, pulihan sa Gingharian sa Diyos ang tanang gobyerno sa tawo. Kini nga Gingharian mao ang gitudlo ni Jesus nga iampo sa iyang mga sumusunod dihang siya miingon: “Paanhia ang imong Gingharian.”—Mateo 6:10.

Pero asa nga bahin sa tagna ang naghisgot bahin sa kagubot sa politika? Matikdi nga ang tiil sa estatuwa “may parte nga puthaw ug may parte nga kulonon.” (Daniel 2:33) Lahi ni sa ubang bahin sa lawas sa estatuwa nga hinimo sa puro nga metal. Nagpakita ni nga naay gamhanang gobyerno sa kalibotan nga mahimong lahi sa uban. Sa unsang paagi? Ang tagna ni Daniel nag-ingon:

Sumala sa tagna, ang gamhanang gobyerno sa kalibotan nga girepresentahan sa tiil sa estatuwa makasinatig kagubot sa politika. Huyang ni nga gobyerno tungod sa mga tawo nga sakop niini.

Tagna ni Daniel—natuman karon

Ang tiil sa estatuwa nagrepresentar sa pinakagamhanang gobyerno karon, ang alyansa sa United States ug Britain. Nganong makaingon ta ana?

Ang tiil sa estatuwa “may parte nga puthaw ug may parte nga kulonon,” maong huyang ni. (Daniel 2:42) Karon, ang gobyerno sa United States ug Britain mihuyang kay ang mga tawo nga sakop niini nagkabahinbahin ug di magkasinabot. Pananglitan, ang mga tawo bayolenteng magprotesta para sa ilang mga katungod. Ang ilang mga opisyales sa gobyerno sagad dili magkauyon sa mga isyu sa politika. Tungod sa grabeng pagkabahinbahin sa mga tawo, ang gobyerno niining duha ka nasod malisdan usahay sa pagpatuman sa ilang mga balaod.

Sayra ang kahulogan sa ubang mga detalye sa tagna ni Daniel ug kon sa unsang paagi natuman ni karon:

Tagna: “Ang gingharian mabahin, pero ang gingharian may pagkagahi tungod sa puthaw.”—Daniel 2:41.

Kahulogan: Bisag gubot kaayo ang politika sa United States ug Britain tungod sa ilang mga sakop, ang gobyerno niining duha ka nasod lig-on gihapon tungod sa ilang puwersa militar. Busa dako kaayo silag awtoridad ug impluwensiya sa tibuok kalibotan, nga sama bag puthaw ka gahi ang ilang gobyerno.

Katumanan

Niadtong 2023, ang United States ug United Kingdom dako kaayog nagasto para sa ilang militar. Gani, kon tapoon ang ilang nagasto, mas dako pa ni sa nagasto sa 12 ka nasod nga nagsunod sa listahan.—Stockholm International Peace Research Institute.

“Ang pagtinabangay sa United Kingdom ug United States sa pagdepensa sa ilang nasod . . . mao ang pinakalig-ong alyansa sa duha ka nasod ug mao ang naggamit sa pinakabag-ong teknolohiya sa pagdepensa. . . . Nagtinabangay mi, nagkahiusa, ug dungan ming makig-away.”—Strategic Command, U.K. Ministry of Defence, Abril 2024.

Tagna: “Kay ang mga tudlo sa tiil may parte nga puthaw ug may parte nga kulonon, ang gingharian lig-on sa usa ka bahin ug huyang sa laing bahin.”—Daniel 2:42.

Kahulogan: Bisag lig-on ang puwersa militar sa United States ug Britain, dili nila bastabastang mahimo ang gusto nilang himoon tungod sa klase sa ilang panggobyerno. Kay demokrasya man ang ilang gobyerno, kinahanglan pang mouyon ang kadaghanan sa ilang gustong himoon, maong malisdan sila usahay sa pagpatuman sa ilang mga plano.

Katumanan

“Ang ubang eksperto sa politika nag-ingon nga tungod sa pagkabahinbahin sa politika sa America, ang gobyerno [sa United States] nalisdan sa pagtuman sa ilang gipangangkon sa kalibotan nga kaya nilang himoon, diha pananglitan sa seguridad o negosyo.”—“The Wall Street Journal.”

“Ang dagkong mga problema sa politika nakaapektar gyod sa mga politiko, maong wala mahimo sa mga nagtrabaho sa gobyerno ang mga kausaban nga gustong ipatuman sa gobyerno [sa Britain] aron tabangan ang mga tawo.”—Institute for Government.

Tagna: “Kini [ang gingharian] masagol sa ordinaryong mga tawo; apan dili kini magtapot.”—Daniel 2:43, footnote.

Kahulogan: Ang ordinaryong mga tawo naa tingali kagawasan nga mosulti sa ilang gusto nga himoon sa gobyerno, pero sagad dili kontento niini ang mga opisyales sa gobyerno o ang mga botante.

Katumanan

“Karon, negatibo na kaayo ug hunahuna ang mga tawo sa America bahin sa politika ug sa mga politiko.”—Pew Research Center.

“Sa milabayng 50 ka tuig, ang mga tawo ubos nag pagsalig sa gobyerno ug sa mga politiko, apil na sa ilang sistema sa panggobyerno. Pero karon, mas miubos pa gyod ang ilang pagsalig.”—“National Centre for Social Research.”

Tagna ni Daniel—matuman sa umaabot

Base sa tagna ni Daniel, ang alyansa sa United States ug Britain mao ang pinakagamhanang gobyerno sa kalibotan dihang pulihan sa Gingharian sa Diyos ang tanang gobyerno sa yuta.—Daniel 2:44.

Ang Bibliya nagtagna diha sa basahon sa Pinadayag nga ang “mga hari sa tibuok gipuy-ang yuta” magkahiusa aron makiggubat kang Jehovab nga Diyos panahon sa Armagedon, ang “gubat sa dakong adlaw sa Diyos nga Labing Gamhanan.” (Pinadayag 16:14, 16; 19:19-21) Niini nga gubat, laglagon ni Jehova ang tanang gobyerno sa tawo. Human ana, wala na gyoy bisan unsa nga mahinumdoman sa gamhanang mga gobyerno sa kalibotan nga girepresentahan sa estatuwa diha sa tagna ni Daniel.

Aron mahibalog dugang, basaha ang artikulo nga “Unsa ang Gubat sa Armagedon?”

Makabenepisyo ka sa tagna ni Daniel bahin sa kagubot sa politika

Tukma kaayo ang tagna sa Bibliya bahin sa kagubot sa politika sa United States ug sa Britain karon, ug ang pagkahibalo bahin ani makahatag gyod nimog kaayohan.

• Masabtan nimo kon nganong gusto ni Jesus nga ang iyang mga sumusunod neyutral sa politika. (Juan 17:16) Ug mas masabtan nimo kon nganong si Jesus, nga maoy gipili sa Diyos nga magmando sa iyang Gingharian, miingon: “Ang akong Gingharian dili bahin niining kalibotana.”—Juan 18:36.

• Madasig ka sa paglaom nga hapit nang bag-ohon sa Gingharian sa Diyos ang kahimtang sa yuta ug nga matuman na ang tanang panalangin nga gisaad sa Diyos para sa mga tawo.—Pinadayag 21:3, 4.

• Makasalig ka sa nindot nga kaugmaon, diin dili na ta mabalaka sa kadaot nga resulta sa pag-awayay sa mga nasod.—Salmo 37:11, 29.

Gipakita sa tagna ni Daniel nga ang alyansa sa United States ug Britain, nga girepresentahan sa tiil sa estatuwa, mao na ang kataposang gamhanang gobyerno sa kalibotan nga magmando sa katawhan. Ang sunod mao na unya ang hingpit nga gobyerno nga magmando gikan sa langit—ang Gingharian sa Diyos!

Aron mahibalo ug dugang bahin sa kon unsay himoon sa Gingharian sa Diyos para sa mga tawo, tan-awa ang video nga Unsa ang Gingharian sa Diyos?