Sa Unsang Paagi Gigamit sa mga Saksi ni Jehova ang mga Donasyon?
Among gigamit ang mga donasyon sa pagsuportar sa relihiyosong mga buluhaton sa among organisasyon ug sa paghatag ug hinabang. Among gihimo kini nga mga buluhaton ingong bahin sa among pangunang tumong—ang pagtabang sa mga tawo nga mahimong tinun-an ni Kristo Jesus.—Mateo 28:19, 20.
Dili gyod namo gamiton ang mga donasyon aron modato ang usa ka indibiduwal. Ang among mga ansiyano o tigdumala walay suweldo, ug ang mga Saksi ni Jehova wala bayri aron mosangyaw. Walay suweldo ang tanang boluntaryo sa among mga sangang buhatan ug sa among hedkuwarter, apil ang mga membro sa Nagamandong Lawas.
Pipila sa Among mga Buluhaton
Paghimog mga Publikasyon: Kami naghubad, nag-imprenta, nagpadala, ug nag-apod-apod ug milyonmilyong Bibliya ug ubang Kristohanong publikasyon kada tuig, nga ang tanan libre. Sa susama, pinaagi sa jw.org nga website ug sa JW Library app, ang among digital nga mga publikasyon mabatonan nga walay bayad o advertisement.
Pagpanukod ug Pagmentinar: Kami nagtukod ug nagmentinar ug simpleng mga dapit sa pagsimba sa tibuok kalibotan aron ang among mga kongregasyon dunay komportableng dapit diin sila magtigom ug magdayeg sa Diyos. Mao sab nay among ginahimo sa among mga sangang buhatan ug mga translation office. Ang kadaghanan niini nga mga buluhaton gihimo sa mga boluntaryo, nga makatabang nga makadaginot sa galastohan.
Pagdumala: Ang mga buluhaton sa among hedkuwarter, mga sangang buhatan, ug mga translation office, ingon man ang mga buluhaton sa nagapanawng mga tigdumala, gisuportahan sa mga donasyon nga gihatag para sa among tibuok kalibotang buluhaton.
Pagsangyaw: Ang mga Saksi wala bayri aron mosangyaw sa maayong balita o magtudlo sa uban bahin “sa pulong sa Diyos.” (2 Corinto 2:17) Pero sama sa buluhaton sa unang siglong mga Kristohanon, ang pinili ug binansay nga mga ministro kinsa naggahin ug dakong bahin sa ilang panahon diha sa pagsangyaw gitagan-an ug simpleng puy-anan ug gihatagan sa ilang pangunang mga panginahanglan.—Filipos 4:16, 17; 1 Timoteo 5:17, 18.
Pagpanudlo: Ang gigasto sa among mga asembliya ug kombensiyon gikuha gikan sa mga donasyon. Dugang pa, kami naghimog binase sa Bibliya nga mga audio ug video program. Nagpahigayon sab mig mga eskuwelahan nga nagbansay sa mga ansiyano ug bug-os panahong mga ministro nga mahimong mas epektibo sa ilang mga asaynment.
Disaster Relief: Kami nagtaganag pagkaon, tubig, ug puy-anan niadtong biktima sa mga kalamidad nga kinaiyanhon ug gipahinabo sa tawo. Kini nga buluhaton nakahatag ug kaayohan sa ‘among mga igsoon sa pagtuo’ ug sa mga dili Saksi.—Galacia 6:10.