Unsay Katuyoan sa Kinabuhi?

Tubag sa Bibliya

Ang pangutana bahin sa katuyoan sa kinabuhi mahimong isukna sa daghang paagi, sama sa Nganong ania kita dinhi? o May katuyoan ba ang akong kinabuhi? Gipakita sa Bibliya nga ang katuyoan sa atong kinabuhi mao ang pagpakighigala sa Diyos. Tagda ang pipila niining pasukaranang mga kamatuoran nga gipadayag sa Bibliya.

• Ang Diyos mao ang atong Maglalalang. Ang Bibliya nag-ingon: ‘Ang Diyos maoy nagbuhat kanato, ug dili kita sa atong kaugalingon.’—Salmo 100:3; Pinadayag 4:11.

• Ang Diyos may katuyoan alang sa tanang butang nga iyang gilalang, lakip na kanato.—Isaias 45:18.

• Ang Diyos naglalang kanato uban ang “espirituwal nga panginahanglan,” nga naglakip sa tinguha nga mangitag kahulogan sa kinabuhi. (Mateo 5:3) Buot niya nga tagbawon nato ang maong tinguha.—Salmo 145:16.

• Matagbaw nato ang atong espirituwal nga panginahanglan pinaagi sa pagpakighigala sa Diyos. Tingali alang sa pipila daw imposible nga mahimong higala sa Diyos, apan ang Bibliya nagdasig kanato: “Duol sa Diyos, ug siya moduol kaninyo.”—Santiago 4:8; 2:23.

• Aron mahimong higala sa Diyos, kinahanglang magkinabuhi kita uyon sa iyang katuyoan alang kanato. Ang Bibliya nagpadayag niini nga katuyoan sa Ecclesiastes 12:13: “Tahora ang Dios ug tumana ang iyang mga sugo, kay mao ra kini ang tuyo sa pagbuhat sa tawo.”—Maayong Balita Biblia.

• Sa umaabot, bug-os natong matagamtam ang orihinal nga katuyoan sa Diyos alang kanato sa dihang iyang wagtangon ang pag-antos ug hatagag walay-kataposang kinabuhi ang iyang mga higala, kadtong nagasimba kaniya.—Salmo 37:10, 11.