MGA BATAN-ON NANGUTANA
Friends ra o More Than Friends?—Bahin 1: Unsang mga Senyales ang Akong Nadawat?
Nakagusto kaayo ka niya, ug segurado ka nga nakagusto pod siya nimo. Sige mog text-text, sige mog kuyog . . . , ug base sa iyang mga gipang-text sa imo, klaro kaayo nga nakagusto siya nimo.
Maong nangutana ka niya kon unsa gyoy inyong status, kay gusto nimong seguroon kon parehas ba mog feelings. Ang iyang tubag? “Para nako, friends ra ta.”
Unsay imong bation?
“Suko kaayo ko—nasuko ko niya ug sa akong kaugalingon! Kada adlaw ming mag-text, ug concern kaayo siya nako. Natural lang nga ma-develop ko niya.”—Jasmine.
“Pirme ming mag-chaperone sa kaila namo nga mag-uyab. Usahay mora mig nag-double date. Pirme ming mag-estoryahanay, ug dayon nagsige na mig text-text. Sakit kaayo para nako dihang giingnan ko niya nga amigo ray iyang tan-aw nako, ug dihang nahibaloan nako nga dugay na diay siyang nakig-date sa lain.”—Richard.
“Naay lalaki nga sigeg text nako, ug usahay ginapakita namo nga naa miy gusto sa usag usa. Pero dihang giingnan nako siya nga naa koy feelings niya, mikatawa siya ug miingon, ‘Wa pa koy planong mag-uyab-uyab ron!’ Nagsige kog hilak.”—Tamara.
Ang punto: Kon nagtuo ka nga nagkagustoay mo unya mahibaloan nimo nga ikaw ra diay ang naay feelings, natural lang nga masuko ka, maulawan, ug mobati nga gitraydor. “Nahugno ang akong kalibotan, ug nasakitan gyod ko,” miingon ang batan-ong si Steven. “Taodtaod pa una mibalik ang akong pagsalig sa uban.”
Nganong mahitabo ni?
Tungod sa pirmeng pag-text ug pag-chat, dali ra kang ma-develop sa tawo nga sa tinuoray wala diay feelings nimo. Niay giingon sa ubang mga batan-on bahin ani:
“Naa tingaliy mag-text-text nimo kay wa siyay lingaw, pero basin magtuo ka nga senyales ni nga nakagusto siya nimo. Ug kon kada adlaw siyang mag-text nimo, maghunahuna na ka nga espesyal gyod ka para niya.”—Jennifer.
“Ang usa basig nakagusto gyod, samtang ang iyang [ka-text o ka-chat] gusto ra diay nga naay kaestorya, nga naay mohatag niyag dugang kompiyansa sa kaugalingon.”—James.
“Ang simpleng text nga ‘good night’ usahay hatagan dayon ug kahulogan, pero sa tinuoray, wala ra diay toy laing ipasabot.”—Hailey.
“Ang pag-send ug smiley puwedeng magpasabot nga ‘nagpakita lang kog kaayo nimo’ o ‘nakagusto ko nimo.’ Usahay ang makadawat ani magtuo nga nakagusto niya ang nag-send.”—Alicia.
Ang punto: Ayaw dayon hatagig kahulogan ang gipakitang atensiyon sa uban.
Sayon ba nang himoon? Dili! Ang Bibliya nag-ingon: “Ang kasingkasing labaw nga malimbongon kay sa bisan unsa pa ug desperado.” (Jeremias 17:9) Puwede kang patuohon sa imong kasingkasing nga ikaw ug ang laing tawo naay feelings sa usag usa, pero dihang ma-realize nimo nga ikaw ra diay ang naghunahuna ana, sama ra nag bulâ nga kon mobuto mawala.
Ang imong mahimo
Balanseha una ang situwasyon. Pangutan-a ang imong kaugalingon, ‘Naa ba gyoy rason nga maghunahuna ko nga espesyal ang iyang pagtagad nako kay sa uban?’ Gamita ang imong hunahuna, ug ayawg padala sa imong gibati.—Roma 12:1.
Ayaw dayon pagdahom. Base sa iyang gipakitang atensiyon nga tungod ana nagtuo ka nga nakagusto siya nimo, hunahunaa sab ang posibilidad nga ang iyang gipakitang atensiyon nimo inamigo ra. Ayaw pagdahom nga kay nakagusto ka sa usa ka tawo, nakagusto pod siya nimo.
Paghulat. Hangtod nga dili mosulti ang usa ka tawo nga interesado siya nimo, ayaw kaayo pag-invest ug feelings sa maong tawo aron dili ka masakitan pag-ayo.
Isulti ang gibati. Ang Bibliya nag-ingon nga naay “panahon sa pagsulti.” (Ecclesiastes 3:7) Kon gusto nimong mahibaloan kon naa bay feelings nimo ang imong amigo o amiga, pakig-estorya niya. “Kon dili mo parehas ug gibati,” miingon ang batan-ong si Valerie, “mas maayong masakitag gamay karon kay sa moabot pag pila ka bulan ayha nimo mahibaloan nga wala diay siyay feelings nimo.”
Ang punto: “Ampingi ang imong kasingkasing,” nag-ingon ang Proverbio 4:23. Kon nakagusto ka sa usa ka tawo, sayra kon nakagusto pod ba siya nimo. Kay kon pasagdan nimo nga mosamot pa ang imong pagbati pero wala ka makaseguro kon ang maong tawo nakagusto pod ba nimo, masakitan ra ka.
Kon naay feelings para nimo ang maong tawo, ug kon sakto na kag edad ug andam nang mosulod sa usa ka relasyon, ikaw nay mag-igo kon imo ba kanang ipadayon. Timan-i nga sa usa ka malamposong kaminyoon, ang bana ug asawa parehas ug espirituwal nga mga tumong ug mosultig tinuod sa usag usa. (1 Corinto 7:39) Gani, sila nagsugod ingong suod nga managhigala ug magpabiling suod sa usag usa.—Proverbio 5:18.