Duna bay “Pito ka Sala nga Makamatay”?
Tubag sa Bibliya
Ang Bibliya wala espesipikong maghisgot ug “pito ka sala nga makamatay.” Pero, kini nag-ingon nga kadtong nagahimog seryosong mga sala dili maluwas. Pananglitan, ang Bibliya nag-ingon nga ang seryosong mga sala sama sa seksuwal nga imoralidad, idolatriya, espiritismo, pagsilaob sa kasuko, ug paghuboghubog maoy “mga buhat sa unod.” Dayon kini miingon: “Kadtong nagabuhat niini dili makapanunod sa Gingharian sa Diyos.”—Galacia 5:19-21.a
Di ba naghisgot man ang Bibliya ug ‘pito ka butang nga gidumtan’ sa Diyos?
Oo. Ang Proverbio 6:16 nag-ingon: “Dunay unom ka butang nga gidumtan ni Jehova; oo, pito ka butang nga gidumtan niya.” Pero wala kana magpasabot nga ang Proverbio 6:17-19 naghisgot sa tanang sala. Igo lang ning naghisgot sa pangunang kategoriya nga nagrepresentar sa tanang klase sa kasaypanan, apil nianang sa hunahuna, pulong, ug buhat.b
Unsay gipasabot sa ekspresyong “sala nga makamatay”?
Gipakita sa Bibliya nga ang tanang sala moresultag kamatayon. Pero mahimo tang maluwas gikan sa sala ug kamatayon pinaagi sa halad lukat ni Jesu-Kristo. (Roma 5:12; 6:23) Busa, ang “sala nga makamatay” mao kadtong mga sala nga dili apil sa gibayran sa lukat sa Kristo. (1 Juan 5:16) Kadtong nagahimo niining klaseha sa sala determinado kaayo sa paghimog sala ug dili gyod niya bag-ohon ang iyang panghunahuna o binuhatan. Ang Bibliya nag-ingon sab nga kanang klaseha sa sala “dili pasayloon.”—Mateo 12:31; Lucas 12:10.
a Ang gihisgotan sa Galacia 5:19-21 nga 15 ka seryosong mga sala wala magpasabot ug kompletong listahan sa tanang seryosong sala, kay human mahisgoti kini, ang teksto midugang ug mga pulong nga “ug mga butang nga sama niini.” Busa ang magbabasa gidasig sa pag-ila kon unsang mga butanga ang wala ilista pero maoy “mga butang nga sama niini.”
b Makita sa Proverbio 6:16 ang pananglitan sa Hebreohanong ekspresyon nga nagpasiugda sa ikaduhang numero pinaagi sa pagtandi niini sa unang numero. Kini nga paagi sa pagsulti kadaghan gamita sa Kasulatan.—Job 5:19; Proverbio 30:15, 18, 21.