Obligado ba Ko nga Mag-Saksi ni Jehova Kon Magpa-Bible Study Ko Nila?

Dili ka obligado niana. Gani, minilyon ang nagpa-Bible study namo nga wala mahimong Saksi ni Jehova.a Ang katuyoan sa maong Bible study mao ang pagtabang nimo nga makakat-on sa mga mensahe sa Bibliya. Ikaw nay mag-igo kon unsay imong himoon nianang imong nakat-onan. Nahibalo mi nga ang pagpilig relihiyon maoy personal nga desisyon.—Josue 24:15.

Puwede ba nakong gamiton ang akong kaugalingong Bibliya dihang mag-Bible study?

Oo, puwede kaayo. Hinuon, naggamit mig Bag-ong Kalibotang Hubad sa Balaang Kasulatan kay dali ning masabtan. Ug puwede ka namong hatagan ug libreng kopya niini. Pero kon mas ganahan kang mogamit sa imong kaugalingong Bibliya, wala ray problema. Masabtan gihapon nimo ang mensahe sa Bibliya bahin sa paglaom ug kaluwasan sa halos bisag unsang hubad sa Bibliya.

Nganong naga-Bible study mo sa mga tawong dili ninyo kauban ug relihiyon?

• Ang pangunang rason mao ang among gugma kang Jehova nga Diyos. Gusto niya nga ang mga Kristohanon magtudlo sa uban bahin sa ilang mga nakat-onan. (Mateo 22:37, 38; 28:19, 20) Para namo, dako kaayong pribilehiyo nga mahimong “isigkamagbubuhat sa Diyos” pinaagi sa pagtabang sa mga tawo nga makakat-on sa iyang Pulong.—1 Corinto 3:6-9.

• Ang ikaduhang rason mao ang among gugma sa silingan o isigkatawo. (Mateo 22:39) Kalipay kaayo namo nga itudlo sa uban ang nindot kaayo nga mga butang nga among nakat-onan.—Buhat 20:35.