Ang Diyos ba Presente Bisag Asa?
Tubag sa Bibliya
Ang Diyos makakita sa tanang butang ug makahimog bisan unsa sa bisan asang dapit. (Proverbio 15:3; Hebreohanon 4:13) Pero ang Bibliya wala magtudlo nga ang Diyos presente bisag asa—sa tanang lugar ug sa tanang butang. Hinuon, nagtudlo kini nga siya usa ka persona ug nga duna siyay puy-anan.
Kon unsa ang Diyos: Ang Diyos maoy espiritu nga persona. (Juan 4:24) Dili siya makita sa mga tawo. (Juan 1:18) Pero base sa mga panan-awon bahin sa Diyos nga narekord sa Bibliya, duna siyay espesipikong puy-anan. Wala gyod maghisgot ang Bibliya nga siya presente bisag asa.—Isaias 6:1, 2; Pinadayag 4:2, 3, 8.
Kon asa nagpuyo ang Diyos: Ang Diyos nagpuyo sa espirituhanong dapit, dili sa pisikal nga uniberso nga iyang gihimo. Sa maong espirituhanong dapit, ang Diyos dunay ‘puloy-anan sa mga langit.’ (1 Hari 8:30) Ang Bibliya naghisgot nga ang mga anghel misulod didto “aron sa pag-atubang kang Jehova.”a Gipakita niini nga ang Diyos dunay espesipikong puy-anan.—Job 1:6.
Kon dili tinuod nga presente ang Diyos bisag asa, makatabang kaha siya nako?
Oo. Gimahal pag-ayo sa Diyos ang matag tawo. Bisag nagpuyo siya sa espirituhanong dapit, makita niya kon kinsa gyoy gustong moalagad niya, ug siya andam nga motabang nila. (1 Hari 8:39; 2 Cronicas 16:9) Matikdi kon sa unsang paagi tabangan ni Jehova kadtong sinserong nag-alagad niya:
Dihang moampo ka: Dunggon sa Diyos ang imong mga pag-ampo.—2 Cronicas 18:31.
Dihang ma-depress ka: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.
Dihang magkinahanglan kag giya: Hatagan ka ni Jehova ug ‘hait nga salabotan ug tudloan ka’ pinaagi sa iyang Pulong, ang Bibliya.—Salmo 32:8.
Sayop nga mga pagsabot bahin sa Diyos
Sayop nga pagsabot: Ang Diyos presente diha sa tanan niyang gilalang o gibuhat.
Ang tinuod: Ang Diyos wala magpuyo sa yuta o sa pisikal nga uniberso. (1 Hari 8:27) Tinuod, ang mga bituon ug ang nindot kaayong mga kalalangan “nagapahayag sa himaya sa Diyos.” (Salmo 19:1) Pero ang Diyos wala magpuyo sa mga butang nga iyang gihimo, sama nga ang pintor wala magpuyo diha sa iyang painting. Hinuon, inigtan-aw nato sa painting, duna tay makuhang ideya bahin sa pintor niini. Sa susama, makita nato sa mga kalalangan o sa mga butang nga gihimo sa Diyos ang iyang “dili-makita nga mga hiyas,” sama sa gahom, kaalam, ug gugma.—Roma 1:20.
Sayop nga pagsabot: Kinahanglang presente ang Diyos bisag asa aron mahibalo siya sa tanang panghitabo ug makatabang dayon.
Ang tinuod: Ang balaang espiritu sa Diyos, o aktibong puwersa, mao ang nagalihok nga gahom sa Diyos. Pinaagi sa iyang balaang espiritu, makita ug mahimo sa Diyos ang bisan unsa, sa bisan asa ug bisan kanus-a. Dili kinahanglan nga presente siya bisag asa aron mahimo ni.—Salmo 139:7.
Sayop nga pagsabot: Ang Salmo 139:8 nagtudlo nga ang Diyos presente bisag asa, kay kini nag-ingon: “Kon ako mosaka sa langit, ikaw atua didto; ug kon ibuklad ko ang akong higdaanan sa Sheol, tan-awa! ikaw atua didto.”
Ang tinuod: Kini nga teksto wala magtudlo kon asa nahimutang ang Diyos. Nagpasabot lang ni nga bisag asa ta, ang Diyos makatabang nato.
a Jehova ang ngalan sa Diyos sumala sa Bibliya.