MGA BATAN-ON NANGUTANA
Unsay Akong Himoon Kon Napasakitan Ko sa Akong Amigo?
Ang angay nimong mahibaloan
Walay perpektong panaghigalaay. Kay dili perpekto, ang imong buotang amigo—bisan ang imong giisip nga best friend—makahimo ug makasultig butang nga makapasakit nimo. Siyempre, dili sab ka perpekto. Basin ganig nakahinumdom ka nga naa poy panahon nga nakapasakit ka sa uban.—Santiago 3:2.
Usahay ang imong makita diha sa Internet makapasakit nimo. Pananglitan, ang tin-edyer nga si David miingon: “Kon online ka ug makita nimo ang mga picture sa imong amigo nga naa sa usa ka gathering, basig maghunahuna ka kon nganong wala ka imbitaha. Bation nimo nga mora kag gitraydor maong masakitan ka.”
Masulbad nimo ang problema.
Ang imong mahimo
Susiha ang imong kaugalingon. Ang Bibliya nag-ingon: “Ayaw pagdalidali sa imong espiritu sa pagkasuko, kay ang pagkasuko nagapuyo sa sabakan sa mga hungog.”—Ecclesiastes 7:9.
“Usahay, dili dayon nimo ma-realize nga ang hinungdan sa imong kasuko dili ra diay ingon ana ka seryoso.”—Alyssa.
Hunahunaa: Sensitive ra ba kaayo ka? Mapalabay ra ba nimo ang mga sayop sa uban?—Ecclesiastes 7:21, 22.
Pamalandonga ang mga kaayohan sa pagpasaylo. Ang Bibliya nag-ingon: “Katahom . . . ang pagpalabay sa kalapasan.”—Proverbio 19:11.
“Bisag naa gyod kay rason nga magreklamo, mas maayong magpasaylo na lang. Nagpasabot na nga dili na nimo hinumdoman ang sala sa imong amigo nga morag kinahanglan siyang mangayog pasaylo nimo pirme. Kon nagpasaylo na ka, kalimti na ang sayop.”—Mallory.
Hunahunaa: Ingon ana ba gyod kaseryoso ang iyang nahimo? Mapalabay ra ba nimo ang iyang sayop aron dili mo mag-away?—Colosas 3:13.
Ang pagsigeg sukmat sa matag sayop sa imong higala samag pagsigeg abli sa pultahan ug pasudlon ang kusog nga hangin sa balay
Hatagig konsiderasyon ang uban. Ang Bibliya nag-ingon nga tinguhaon dili lamang ang personal nga kaayohan, kondili ang kaayohan usab sa uban.—Filipos 2:4.
“Kon ang managhigala dunay gugma ug pagtahod sa usag usa, ila dayong sulbaron ang mga problema. Nagpakita ni nga gipabilhan gyod nila ang usag usa ug dili nila gustong madaot ang ilang panaghigalaay.”—Nicole.
Hunahunaa: Mahatagan ba nimog konsiderasyon ang panglantaw sa uban?—Filipos 2:3.
Ang punto: Kon makamao kang mopalabay ug sayop sa uban samtang batan-on pa, dako nag ikatabang inigkahamtong nimo. Maayo gyong sugdan na nimo karon!