Sa Unsang Paagi Matabangan Ko sa Bibliya?​—Bahin 2: Himoang Makalingaw ang Pagbasag Bibliya

“Morag makalaay ang Bibliya kon wala ka mahibalo sa saktong paagi sa pagbasa ini,” miingon ang tin-edyer nga si Will.

Gusto ba nimong mahibaloan ang sekreto aron malingaw ka sa pagbasag Bibliya? Kini nga artikulo makatabang nimo.

• Himoang buhi ang estorya sa Bibliya

• Pag-research!

• Ang giingon sa ubang batan-on

Himoang buhi ang estorya sa Bibliya

Aron mahimong buhi ang imong ginabasa, puwede nimo kining himoon:

1. Pagpilig estorya sa Bibliya nga gusto nimong tun-an. Puwede kang magpilig hitabo o asoy gikan sa Ebanghelyo, o makapili kag estorya gikan sa koleksiyon sa audio drama nga pagbasa sa Bibliya sa jw.org.

2. Basaha ang estorya. Puwede nimo ning basahon nga ikaw ra o kauban ang imong mga higala o pamilya. Naay narrator ug naa poy mobasa sa gisulti sa mga karakter.

3. Sulayi ang usa o daghan pa niining mosunod nga mga sugyot:

   • Pagdrowing ug mga picture aron mailustrar ang estorya nga imong gibasa. O paghimog storyboard​—simpleng mga picture nga magpakita sa pagkasunodsunod sa hitabo. Isulat sa ubos sa matag picture kon unsay nahitabo.

   • Paghimog dayagram. Pananglitan, samtang nagbasa ka bahin sa usa ka matinumanong alagad sa Diyos, ikonektar ang iyang mga kinaiya ug nahimo sa nadawat niya nga mga panalangin.

   • Isulat ang estorya nga samag balita. Ibalita kini gikan sa lainlaing anggulo, ug ilakip ang imong pag-interbiyo kunohay sa pangunang mga karakter ug sa mga nakasaksi sa panghitabo.

   • Kon usa sa mga karakter sa estorya nakahimog dili maayong desisyon, pag-imagine ug laing resulta. Pananglitan, tagda ang paglimod ni Pedro kang Jesus. (Marcos 14:66-72) Unsa untay angayng himoon ni Pedro?

   • Kon ganahan ka, pagsulat ug imong drama nga binase sa usa ka estorya sa Bibliya. Iapil ang mga leksiyon nga makat-onan sa maong estorya.​—Roma 15:4.

     

Pag-research!

Kon imong analisahon ang mga detalye, makakita kag natagong mga bahandi sa estorya. Usahay naay usa o duha ka pulong nga importante kaayo.

Pananglitan, itandi ang Mateo 28:7 sa Marcos 16:7.

• Nganong giapil ni Marcos ang detalye nga si Jesus magpakita sa iyang mga tinun-an ug ‘kang Pedro’?

• Clue: Si Marcos wala makakita sa maong mga hitabo; dayag nga nakuha niya ni nga impormasyon kang Pedro.

• Natago nga bahandi: Nganong lagmit nadasig si Pedro sa pagkadungog nga si Jesus gustong makigkita niya pag-usab? (Marcos 14:66-72) Giunsa pagpakita ni Jesus nga tinuod siyang higala ni Pedro? Unsaon nimo pagsundog si Jesus ug mahimong tinuod nga higala sa uban?

Kon himoon nimong buhi ang estorya sa Bibliya ug imong i-research ang mga detalye, mas makalingaw ang pagbasag Bibliya!