MGA BATAN-ON NANGUTANA
Makadaot ba Gyod ang Espiritismo?
Unsay imong hunahuna?
Makadaot ba ang pagtan-awg mga horoscope, paggamit ug Ouija board, o pagkonsultag mga psychic o espiritista?
Ang mga estorya ba bahin sa espiritismo nagsimbolo lang sa away sa maayo ug daotan, o kini ba tinuod ug peligroso?
Hisgotan niini nga artikulo kon nganong morag makapainteres ang espiritismo ug kon nganong angay kang magbantay.
Nganong dunay mainteres niini?
Dakog kita ang industriya sa kalingawan kon ang tema maoy bahin sa espiritismo, maong kaylap kaayo ni sa mga pelikula, salida sa TV, video game, ug mga libro. Tungod niana, daghang batan-on ang nainteres sa astrolohiya, mga demonyo, bampira, ug pagpamarang. Ngano? Niay pipila ka rason:
Pagkamausisahon: Aron mahibaloan kon tinuod ba gyod nga naglungtad ang espiritung mga persona
Kabalaka: Aron masayran kon unsay mahitabo sa umaabot
Komunikasyon: Aron maestorya ang mga minahal nga namatay
Morag makataronganon pod ang maong mga rason kay normal lang nga maghunahuna bahin sa kaugmaon o mobatig kamingaw sa namatayng minahal. Pero naay mga kapeligrohan nga angay nimong mahibaloan.
Nganong angayng magbantay?
Ang Bibliya naghatag ug seryosong mga pasidaan bahin sa bisan unsa nga konektado sa espiritismo. Pananglitan, kini nag-ingon:
“Kinahanglang walay bisan kinsa ninyo nga . . . manag-an, maghimog salamangka, mangitag mga tilimad-on, mamarang, manglamat, mangonsultag espiritista o mananag-an, o magpakisayod sa mga patay. Kay gidumtan ni Jehova kadtong nagabuhat niining mga butanga.”—Deuteronomio 18:10-12.
Nganong giisip sa Diyos nga daotan kaayo ang espiritismo?
Ang pagpakigbahin sa espiritismo nagpakita nga dapig ka sa mga demonyo. Gitudlo sa Bibliya nga ang ubang mga anghel mirebelde sa Diyos ug nahimong iyang mga kaaway. (Genesis 6:2; Judas 6) Kining daotang mga anghel, nga gitawag ug mga demonyo, nagpahisalaag sa mga tawo pinaagi sa mga espiritista, mananag-an, ug niadtong nakigbahin sa astrolohiya. Kon makigbahin ta niining mga butanga, mahimo tang kaaway sa Diyos.
Gipasiugda sa espiritismo ang bakak nga ideya nga dunay mga tawo nga makatagna sa umaabot. Pero ang Diyos ray makaingon: “Sukad sa sinugdan gitagna na nako ang mahitabo, ug sa dugay nang panahon gitagna na nako ang mga butang nga wala pa mahimo.”—Isaias 46:10; Santiago 4:13, 14.
Gipasiugda sa espiritismo ang bakak nga ideya nga ang mga patay puwedeng makig-estorya sa mga buhi. Pero ang Bibliya nag-ingon: “Ang mga patay walay nahibaloan nga bisan unsa . . . Walay buluhaton o plano o kahibalo o kaalam sa Lubnganan.”—Ecclesiastes 9:5, 10.
Base niana nga mga rason, gilikayan sa mga Saksi ni Jehova ang mga buhat nga nalangkit sa espiritismo. Gilikayan sab nila ang mga kalingawan nga naay mga zombie, bampira, ug mga dili ingon nato. “Kon kini naay sagol nga espiritismo,” miingon ang batan-ong si Maria, “dili gyod ko motan-aw.”a
Sama nga itago sa usa ka kriminal ang iyang pagkatawo aron mailad ka, ang mga demonyo magpakaaron-ingnon sab nga sila ang imong mga minahal nga namatay
Ang imong mahimo
Himoang determinasyon nga “mahuptan ang hinlong konsensiya” atubangan kang Jehova pinaagi sa paglikay sa bisan unsang buhat o kalingawan nga nalangkit sa espiritismo.—Buhat 24:16.
Wad-a ang bisan unsang personal nga gamit nga konektado sa espiritismo. Basaha ang Buhat 19:19, 20, ug matikdi ang maayong ehemplo sa mga Kristohanon sa unang siglo bahin niini.
Hinumdomi: Dihang likayan nimo ang bisan unsang buhat ug kalingawan nga nalangkit sa espiritismo, imong gipakita nga dapig ka kang Jehova. Ug makapalipay na sa iyang kasingkasing!—Proverbio 27:11.
a Kini wala magpasabot nga ang tanang estorya nga gikan sa imahinasyon direktang nagpasiugdag espiritismo. Pero gigamit sa mga Kristohanon ang ilang nabansay sa Bibliya nga konsensiya aron likayan ang bisan unsang buhat o kalingawan nga nagpasiugdag espiritismo.—2 Corinto 6:17; Hebreohanon 5:14.