Batan-ong lalaki nga mitindog gikan sa lingkoranan ug midagan

MGA BATAN-ON NANGUTANA

Unsay Akong Himoon Aron Ganahan Kong Mag-ehersisyo?

Nganong kinahanglan kong mag-ehersisyo?

Sa ubang nasod, ang mga batan-on wala na kaayoy panahon sa pag-ehersisyo, ug nagpameligro ni sa ilang panglawas. Ang Bibliya nag-ingon nga ‘ang pagbansay sa lawas naay kaayohan.’ (1 Timoteo 4:8) Konsideraha ang mosunod:

Ang pag-ehersisyo makaayo sa imong pamati. Ang pisikal nga kalihokan magpatunghag endorphins—mga kemikal sa utok nga makapabati nimong relaks ug malipayon. Para sa uban, natural nga antidepressant ang pag-ehersisyo.

“Kon mag-jogging ko sayo sa buntag, mas produktibo ug makalingaw ang akong tibuok adlaw. Makapanindot ni sa akong pamati.”—Regina.
Ang pag-ehersisyo makapanindot sa imong lawas. Ang balanseng pag-ehersisyo motabang nimo nga mahimong mas kusgan, himsog, ug makabaton ug kompiyansa sa kaugalingon.

“Nindot kaayo ang akong pamati karon nga makahimo na kog 10 ka chin-up kompara sa miaging tuig nga dili gyod ko makahimo bisag usa lang! Labaw pa, kabalo ko nga giatiman nako ang akong lawas.”—Olivia.
Ang pag-ehersisyo makapataas sa imong kinabuhi. Ang pagkaaktibo makaayo sa imong kasingkasing ug baga. Ang aerobic nga ehersisyo makatabang sab nga malikayan ang coronary artery disease—usa sa pangunang mga hinungdan sa kamatayon sa mga lalaki ug babaye.

“Kon naa tay maayong rutina sa pag-ehersisyo, atong gipakita sa atong Maglalalang nga atong gipabilhan ang lawas nga iyang gihatag kanato.”—Jessica.

Ang punto: Ang pag-ehersisyo naay dakong kaayohan sa panglawas sa umaabot, ug bisan karon. “Dili gyod ka makaingon, ‘Maayo pag wala ko mag-hiking o mag-jogging,’” miingon ang batan-ong si Tonya. “Dihang maningkamot gyod kong mag-ehersisyo ug dili mangitag daghang pasangil, dili gyod ko magmahay.”

Batan-ong lalaki mitan-aw sa makina sa sakyanan nga wala atimana — Ang sakyanan nga wala atimana, sa kadugayan dili na mogana; mao pod nay mahitabo sa lawas nimo kon dili ka mag-ehersisyo

Unsay nakapugong nako?

Mao niy pipila ka posibleng mga babag:

Walay rason nga mag-ehersisyo. “Para nako ang mga tawo mobati nga lig-on kaayo sila dihang batan-on pa. Dili ka makahunahuna nga magkaproblema ka sa panglawas. Maghunahuna ka nga para lang na sa mga tigulang.”—Sophia.
Walay panahon. “Kay busy kaayo ko, kinahanglan nakong ieskedyul ang akong panahon sa pagkaon ug pagtulog, pero mas lisod ang pag-eskedyul ug panahon sa pag-ehersisyo.”—Clarissa.
Walay membership sa gym. “Mahal ang pagmentinar ug maayong lawas—kinahanglan kang magbayad kon gusto kang mag-gym!”—Gina.

Hunahunaa:

Unsay imong kinadak-ang babag sa pag-ehersisyo? Ang pagbuntog sa maong babag nagkinahanglag paningkamot, pero maayo kaayo ang mga resulta niini.

Unsay makatabang nako sa pag-ehersisyo?

Niay pipila ka sugyot:

Himoang responsibilidad ang imong kaugalingong panglawas.—Galacia 6:5.
Ayaw pangitag mga pasangil. (Ecclesiastes 11:4) Pananglitan, dili na ka kinahanglang magpamembro sa gym aron makaehersisyo. Pangitag kalihokan nga malingaw ka ug iapil ni sa imong rutina.
Aron naa kay mga ideya, pangutan-a ang uban kon unsay ilang paagi sa pag-ehersisyo.—Proverbio 20:18.
Pagbaton ug espesipikong eskedyul. Paghimog mga tumong ug irekord ang imong pag-uswag aron ganahan kang mopadayon.—Proverbio 21:5.
Pangitag kauban sa pag-ehersisyo. Kon naa kay higala nga regular nimong makauban sa pag-ehersisyo, makatabang siya nga masunod nimo ang imong rutina.—Ecclesiastes 4:9, 10.
Dahoma nga may mga panahong dili ka makaehersisyo, ug ayawg surender kon mahitabo na.—Proverbio 24:10.

Magmabalanse

Ang Bibliya nagtambag sa mga lalaki ug babaye nga ‘magpugong sa kaugalingon.’ (1 Timoteo 3:2, 11) Maong magmabalanse bahin sa pag-ehersisyo. Sagad negatibo ang isipon sa uban niadtong sobra ra kaayong makaehersisyo. “Kon ang usa ka lalaki maskulado pero kulag kahibalo, di ko makagusto niya,” miingon ang batan-ong si Julia.

Pagbantay sab sa mga ‘fitness inspiration’ poster nga may mga eslogan nga magdasig nimo sa pagbuhat ug labaw pa kay sa imong makaya. Ang maong mga eslogan mahimong makadaot nimo sa pisikal ug makapawala sa imong pokus sa “mas importanteng mga butang” sa kinabuhi.—Filipos 1:10.

Dugang pa, ang mga fitness inspiration nga makatabang unta sa pag-ehersisyo mahimong makapadismaya hinuon nimo. Ang batan-ong babaye nga si Vera miingon: “Daghang babaye ang mangolektag picture sa mga tawo nga gusto nilang sundogon, ug tan-awon nila ang maong mga picture aron ganahan silang mag-ehersisyo. Pero kay ikomparar nila ang ilang kaugalingon sa maong mga tawo, madismaya hinuon sila. Mas maayong himoong tumong nga pauswagon ang imong panglawas, dili lang ang imong lawas.”

Ang giingon sa ubang batan-on

“Ganahan kong mag-jogging kay makatabang ni nga mamenosan ang akong stress. Makapahimsog sab ni sa akong kasingkasing ug makatabang nga mahilis ang mga calorie. Inighuman nakog jogging, madugangan akong kusog ug mas nindot ang akong pamati.”—Yasmine.

“Paborito nako nga ehersisyo ang pagdulag sports—ilabina ang basketbol. Kon makasugod na kog dula, dili na ko makahunahuna nga ehersisyo ni. Nagkinahanglag panahon aron mahanas ka sa usa ka sport ug malingaw niini, pero moresultag maayo ang imong paningkamot.”—Joel.

“Nakatabang kaayo nako ang pag-hiking! Gani, dako nig kaayohan sa akong panghunahuna dili lang sa pisikal. Sama sa uban, mabalak-on pod ko, pero kon mag-hiking ko sa bukid o sa lugar nga nindot ang palibot, mobati kong mas relaks ug mas lagsik—butang nga talagsa ra kaayo niining gubot nga kalibotan.”—Lily.

“Daghan ang mga butang nga morag makapalisod sa akong pag-ehersisyo, pero kon dili ra nako na hunahunaon, makaehersisyo ra ko. Pananglitan, dihang magbasketbol ko, mas mapokus ko sa pagdula, dili sa kakapoy. Dakong tabang pod ang pagdulag basketbol aron makabatog mga amigo.”—Miles.