MGA BATAN-ON NANGUTANA
Unsay Akong Himoon Kon Tambagan Ko?
Susiha ang kaugalingon
Usahay, kinahanglan tang tambagan o sawayon aron mahimong mas maayo ang atong trabaho o kinaiya. Tagda ang mosunod nga mga kahimtang.
● Gisultihan ka sa imong titser nga morag gidalidali lang nimog himo ang imong project. Iya kang giingnan, “Kinahanglan pa kang mag-research ug dugang.”
Unsay imong reaksiyon?
Dili dawaton. (‘Di lang gyod ganahan nako ang titser.’)
Dawaton. (‘Sige, sundon nako ang iyang tambag sa sunod project.’)
● Giingnan ka sa imong mama nga katag kaayo ang imong kuwarto—bisag bag-o lang kang nanghinlo.
Unsay imong reaksiyon?
Dili dawaton. (‘Perfectionist ra kaayo siya.’)
Dawaton. (‘Sakto, mas mapahinlo pa nako ang kuwarto.’)
● Giingnan ka sa imong manghod nga dili siya ganahan sa imong kinaiya nga magsigeg panugo.
Unsay imong reaksiyon?
Dili dawaton. (‘Labaw na siyang palasugo!’)
Dawaton. (‘Basig kinahanglang mas ayohon nakog tratar ang akong manghod.’)
Ang ubang batan-on dali kaayong mahiubos kon tambagan. Ingon anâ ba ka? Kon mao, daghan kag masayang nga oportunidad! Ngano? Kay kon modawat ka ug tambag, makabenepisyo ka niini karon ug sa umaabot.
Ayawg balewalaa ang kinahanglan nimong madunggan tungod lang kay dili nimo ni gustong madunggan
Nganong nagkinahanglan kog tambag?
Kay dili ka hingpit. Ang Bibliya nag-ingon: “Kitang tanan masayop sa makadaghan.” (Santiago 3:2, footnote) Busa, kinahanglan tang tambagan o badlongon.
“Pirme nakong hinumdoman nga dili ta hingpit ug normal lang nga masayop. Busa dihang tambagan ko, maningkamot kong sundon kini ug dili na usbon ang samang sayop.”—David.
Kay makatabang ni nga mouswag ka. Ang Bibliya nag-ingon: “Hatagig kahibalo ang tawong maalamon, ug siya mahimong mas maalamon.” (Proverbio 9:9) Makabenepisyo ka sa tambag kon imo ning dawaton.
“Kaniadto, di ko ganahan nga tambagan kay abi pa lang sa uban di ko kamao. Pero karon modawat na kog tambag. Mangayo pa gani kog tambag aron mahibalo ko kon unsa pay akong pauswagon.”—Selena.
Siyempre, okey rang modawat ug tambag kon imo ning gipangayo. Pero kon wala nimo ni pangayoa, basig lahi na ang imong reaksiyon. “Nakurat ko ug nadismaya,” nahinumdom si Natalie dihang nakadawat siyag card nga naay tambag. “Naningkamot kog maayo, pero tambag ray akong nadawat!”
Nakaagi na ba ka anâ? Kon mao, unsay angay nimong himoon?
Unsay akong himoon aron dali kong modawat ug tambag?
Paminaw.
Ang Bibliya nag-ingon: “Ang tawong may kahibalo magpugong sa iyang mga pulong, ug ang tawong may katakos sa pag-ila magpabiling kalmado.” (Proverbio 17:27) Ayawg sagbat sa nakig-estorya nimo. Ug ayaw dayog isulti ang imong gibati o gihunahuna kay basig mahayan nimo ni sa ulahi!
“Naanad ko nga mangatarongan dihang tambagan ko. Pero naamgohan nako nga kinahanglan kong modawat ug tambag aron mas maayo ang akong mahimo sa sunod.”—Sara.
Pagpokus sa gisulti, dili sa nagsulti.
Imbes mangitag sayop sa nagtambag nimo, mas maayo nga sundon ang tambag sa Bibliya nga mahimong “abtik sa pagpaminaw, hinay sa pagsulti, dili daling masuko.” (Santiago 1:19) Sagad naay maayong mga punto sa gihatag nga tambag. Ayawg balewalaa ang kinahanglan nimong madunggan tungod lang kay dili nimo ni gustong madunggan.
“Kaniadto dihang tambagan ko sa akong ginikanan masuko dayon ko ug moingon, ‘Lagi, kabalo na ko anâ!’ Pero dihang maminaw gyod ko nila ug sundon ang ilang tambag, mas maayo ang resulta.”—Edward.
Pagbaton ug balanseng panglantaw sa kaugalingon.
Kon tambagan ka, wala na magpasabot nga pakyas ka. Nagpasabot lang na nga dili ka perpekto, parehas sa uban. Bisan kadtong nagtambag nimo kinahanglan pod tingaling tambagan usahay. Gani, ang Bibliya nag-ingon: “Walay tawong matarong sa yuta nga kanunayng nagbuhat ug maayo.”—Ecclesiastes 7:20.
“Gitambagan ko sa akong amiga, pero para nako wala ko magkinahanglan adto. Gipasalamatan nako siya sa iyang pagkamatinud-anon, pero nalain ko niya. Sa ulahi, nakaamgo ko nga naa siyay punto. Maayo na lang nga iya kong gitambagan kay nakita nako kon unsay angay nakong pauswagon.”—Sophia.
Pagtakdag tumong aron mouswag.
Ang Bibliya nag-ingon nga “ang maalamon modawat ug pagbadlong.” (Proverbio 15:5) Dihang imo ning dawaton, makalimtan nimo ang negatibong mga pagbati ug makapokus ka sa angay nimong pauswagon. Paghimog plano sa kinahanglan nimong himoon, ug i-monitor ang imong pag-uswag sulod sa pipila ka bulan.
“Importante ang pagkamatinud-anon sa kaugalingon dihang tambagan kay kinahanglan nimo ni sa pag-angkon sa imong sayop, pagpangayog pasaylo, ug sa pagpangitag paagi nga mouswag.”—Emma.
Ang punto: Ang Bibliya nag-ingon: “Ang tawo makakat-on gikan sa laing tawo, sama nga ang puthaw mahait pinaagi sa puthaw.” (Panultihon [Proverbio] 27:17, Ang Bag-ong Maayong Balita Biblia) Ang tambag makapahait, o makatabang, nimo nga mouswag karon ug sa umaabot.